2 Reis 5:1-27
5 Nayexma ga wüxi ga yatü ga Chíriaanecüã̱x ga Naamáü̃gu ãégacü. Rü nüma rü Chíriaanearü ãẽ̱xgacüarü churaragüeru nixĩ. Rü norü ãẽ̱xgacü rü poraãcü nüxü̃ nangechaü̃ rü nüxü̃ narüngü̃xẽẽ yerü mue̱xpü̱xcüna rü norü churaragümaxã norü uanügüxü̃ narüporamae. Notürü nüma ga yema yatü rü chaxünemaxã nida̱xawe.
2 Rü nüma ga Chíriaanecüã̱xgü rü mue̱xpü̱xcüna Iraéuanecüã̱xgüca̱x ínayaxüãchi. Rü guxema tüxü̃ ínayauxü̃etanüwa rü iyexma ga wüxi ga pacü ga Iraéuanecüã̱x ga Naamáü̃ napatawa ngĩxü̃ gacü nax naxma̱xü̃taxü̃ yixĩxü̃ca̱x.
3 Rü wüxi ga ngunexü̃gu ga yema pacü rü ngĩrü chiũraxü̃ ngĩgürügü: —Chierü nax namexü̃ ya yimá chorü cori ega naxü̃tawa naxũxgu ya yimá orearü uruxü̃ ya Chamáriaanewa ngẽxmacü, rü ngẽxguma rü chi naxca̱x nitaane i norü chaxünewa —ngĩgürügü.
4 Rü nüma ga Naamáü̃ rü norü ãẽ̱xgacümaxã nüxü̃ nixu ga yema ore ga yema pacü nüxü̃ ixuxü̃.
5 Rü nüma ga gumá Chíriaanearü ãẽ̱xgacü rü nanangãxü̃ rü nhanagürü: —¡Ẽcü ngẽ́ma naxũ! Rü chama rü tá cuxna chanaxã i wüxi i popera naxca̱x ya Iraéuanecüã̱xgüarü ãẽ̱xgacü nax cuxü̃ nacuáxü̃ca̱x —nhanagürü. Rü yexguma nüma ga Naamáü̃ rü inaxũãchi. Rü yéma nanana ga 6,000 tachinü ga diẽru ga úirunaxca̱x rü 30,000 tachinü ga diẽrumünaxca̱x rü 10 ga naxchiru.
6 Rü yema popera ga yéma namuxü̃ naxca̱x ga Iraéuanecüã̱xgüarü ãẽ̱xgacü, rü nhanagürü: “Yimá yatü ya ngẽ́ma nangecü i nhaa popera rü chorü duü̃xü̃ ya Naamáü̃ nixĩ. Rü chanaxwa̱xe nax naxca̱x cuyataanexẽẽxü̃ nawa i norü chaxüne”, nhanagürü.
7 Rü yexguma yema poperaxü̃ nadaumatügu ga gumá Iraéuanecüã̱xgüarü ãẽ̱xgacü, rü nügü narügáutechiru rü nhanagürü: —¿Ẽ̱xna nüma nüxü̃ nacua̱xgu rü chama chixĩ ya Tupana i maxü̃ nüxna chaxãxü̃ rü nüxna chanayaxuxü̃, rü ngẽmaca̱x nua cha̱u̱xca̱x namuaxü̃ i nhaa yatü nax naxca̱x chayataanexẽẽxü̃ca̱x i norü chaxünewa? Rü nhu̱xmax i nüma rü ngẽmagu nügü nicu̱xmare nax nhuxãcü wena tá taxca̱x íyaxüãchixü̃ —nhanagürü.
8 Notürü yexguma gumá orearü uruxü̃ ga Erichéu nüxü̃ cuáchigagu ga yema nügü nax nagáutechiruxü̃ ga gumá ãẽ̱xgacü nagagu ga yema popera ga nayaxuxü̃, rü naxca̱x yéma namuga rü nhanagürü: —¿Tü̱xcüü̃ i cugü curügáutechiruxü̃? ¡Rü ẽcü nua namu i ngẽma yatü nax nua choxü̃ íyadauxü̃ca̱x! Rü tá naxca̱x nitaane nax ngẽmawa nüxü̃ nacuáxü̃ca̱x rü nua Iraéuanewa nax nangexmaxü̃ i Tupanaarü orearü uruxü̃ —nhanagürü.
9 Rü nüma ga Naamáü̃ rü yéma naxũ nagu ga norü cáru ga cowarugü itúxü̃ne, rü Erichéuarü ĩã̱xpatawa nayachaxãchi.
10 Notürü nüma ga Erichéu rü Naamáü̃xü̃tawa nanamu ga wüxi ga norü ngü̃xẽẽruxü̃ nax namaxã nüxü̃ yanaxuxü̃ca̱x ga yema Erichéuarü ore. Rü nüma ga yema duü̃xü̃ rü nhanagürü Naamáü̃xü̃: —¡Ẽcü 7 e̱xpü̱xcüna natü i Yurdáũwa cugü nayaxune! Rü ngẽmaãcü tá cuxca̱x nitaane nax curüchaxünexü̃ —nhanagürü.
11 Rü nüma ga Naamáü̃ rü nanu rü íninha rü nhanagürü: —Chama nagu charüxĩnügu rü chi cha̱u̱xca̱x ínaxũxũ rü ngẽmaãcü mea choxü̃ nayaxu rü ngẽxma nachiãcüma chi Cori ya Tupanana naca rü nagu ningṍgü i ngẽma ícharüchaxünexü̃wa rü ngẽmaãcü chi cha̱u̱xca̱x nitaane nawa i chorü chaxüne.
12 ¿Rü tama ẽ̱xna i ngẽma natügü i Abána rü Fáfa i Damácuanewa ngẽxmagüxü̃ rü guxü̃ i togü i natü i Iraéuanewa ngẽxmagüxü̃arü yexera namexechixü̃? Rü ngẽmaca̱x rü taxucürüwama ngẽ́ma chaxũ nax ngẽma natüwa chaugü chayayaxuxü̃ca̱x rü charümexü̃ca̱x —nhanagürü. Rü yemaacü poraãcü nanu rü natáegu.
13 Notürü ga norü duü̃xü̃gü rü naxca̱x naxĩ rü nhanagürügü nüxü̃: —Pa Corix, ngẽxguma chi yimá orearü uruxü̃ rü ta̱xacürü guxchaxü̃ cuxü̃ naxüxẽẽgu rü ngẽxguma rü chi cunaxü. Notürü i nhu̱xmax nax natauxchaxü̃ i ngẽma cumaxã nüxü̃ yaxuxü̃ rü yexera name nixĩ i naga cuxĩnü. ¡Rü cugü nayaxunemare nawa i ngẽma natü nax ngẽmaãcü tá nixĩ i cuxca̱x yataanex! —nhanagürügü.
14 Rü yexguma ga nüma ga Naamáü̃ rü nawa naxũ ga yema natü ga Yurdáũ. Rü 7 e̱xpü̱xcüna narübai rü nügü nawa nayaxune yema orearü uruxü̃ namaxã nüxü̃ ixuxü̃rüxü̃. Rü yexguma ga naxcha̱xmüxü̃ rü narüme rü wüxi ga buxecha̱xmüxü̃rüxü̃ nixĩ.
15 Rü yexguma ga nüma ga Naamáü̃ rü guxü̃ma ga yema namücügü rü Erichéuxü̃tawa naxĩ. Rü yexguma Erichéuxü̃tawa nangugügu, rü nüma ga Naamáü̃ rü nhanagürü nüxü̃: —Nhu̱xmawaxi nixĩ i aixcuma chayaxõxü̃ rü guxü̃wama i nhama i naanewa rü nataxuma i to i Tupana, rü yimá Iraéuanecüã̱xgüarü Tupanaxicatama nixĩ ya aixcuma Tupana ixĩcü. Rü ngẽmaca̱x cuxü̃ chachixewe nax choxü̃́ cunayaxuxü̃ i nhaa wüxi i ãmare i cuxna chaxãxchaü̃xü̃ —nhanagürü.
16 Notürü nüma ga Erichéu rü nanangãxü̃ rü nhanagürü: —Chorü Tupanaégagu cumaxã nüxü̃ chixu rü taxũtáma cuxü̃́ chanayaxu i ngẽma ãmare —nhanagürü. Rü nüma ga Naamáü̃ rü namaxã nayachixewechigüama nax nüxü̃́ nayauxãxü̃ca̱x. Notürü ga nüma ga Erichéu rü tama nanayaxu.
17 Rü yexguma ga nüma ga Naamáü̃ rü nhanagürü: —Ẽcü, ngẽxguma ngẽmaãcü yixĩgu ¡rü nua choxü̃ yangexẽxẽ i taxre i cowaruwetaãcu naguxü̃ i waixümü! Erü nhu̱xmaü̃cüxü rü marü taxũtáma togümare i tupanaca̱x chayama̱x rü chayagu i naxü̃nagü, rü Cori ya Tupanaca̱xicatama tá nixĩ ichanaxüxü̃ i ngẽma.
18 Notürü ngẽxguma yimá chorü ãẽ̱xgacü norü tupana i Yimúü̃patagu naxücu̱xgu rü chauxchacüxü yangĩãcüma nape̱xegu chamaxã nacaxã́pü̱xügu, rü chanaxwa̱xe ya Tupana rü choxü̃́ nüxü̃ inarüngüma i ngẽma —nhanagürü.
19 Rü yexguma ga Erichéu rü nanangãxü̃ rü nhanagürü: —¡Ẽcü, taãxẽãcü natáegu! —nhanagürü. Rü nüma ga Naamáü̃ rü natáegu.
20 Rü yexguma marü yáxü̃waxüra nanguxgu, rü guma Erichéuarü ngü̃xẽẽruxü̃ ga Yeachí rü nhaxü̃gu narüxĩnü: “Yimá chorü cori rü taxuxü̃ma Naamáü̃ ya Chíriaanecüã̱xna nayaxu i ngẽma ngẽmaxü̃gü i nua naxca̱x nanaxü̃. Rü ngẽmaca̱x i nhu̱xmax rü tá nawe changẽ nax nüxna chayaca̱xü̃ca̱x”, nhaxü̃gu narüxĩnü.
21 Rü nüma ga Yeachí rü Naamáü̃we nangẽ. Rü yexguma Naamáü̃ nüxü̃ da̱xgu nax nawe nangẽxü̃ rü ínayachaxãchi rü ínachie nawa ga norü cáru. Rü Yeachíca̱x nixũ rü nüxna naca: —¿Ta̱xacürü chixexü̃ nangupetü? —nhanagürü.
22 Rü yexguma nüma ga Yeachí rü Naamáü̃xü̃ nhanagürü: —Taxuxü̃ma nangupetüchire̱x. Notürü yimá chorü cori rü cuwe choxü̃ narümu nax cumaxã nüxü̃ chayarüxuxü̃ca̱x rü ngexwaca̱xtama ngẽ́ma nangugü i taxre i orearü uruü̃gü i ngextü̱xüxü̃ i Efraĩ́arü ma̱xpǘneanewa ne ĩxü̃. Rü ngẽmaca̱x i nüma ya chorü cori rü nua cuxca̱x namuga nax nüxna cunaxãxü̃ca̱x i 3,000 tachinü i diẽru rü taxre i petachirugü —nhanagürü.
23 Rü nüma ga Naamáü̃ rü nanangãxü̃ rü nhanagürü: —¡Ẽcü, yange i 6,000 tachinü naguxü̃ i diẽru! —nhanagürü. Rü nüma ga Naamáü̃ rü yexeraxü̃ ga diẽru nüxna naxãama. Rü taxre ga chacugu ngĩxü̃ nanucu wüxigu namaxã ga yema taxremü ga naxchiru. Rü taxre ga norü duü̃xü̃güna nanana nax Yeachípatawa nangegüãxü̃ca̱x.
24 Rü yexguma guma ma̱xpǘne ga Erichéu nagu ãchiü̃newa nangugügu, rü nüma ga Yeachí rü Naamáü̃arü duü̃xü̃güna nanayaxu ga yema diẽru, rü nhu̱xmachi nanamuegutanü. Rü yemawena rü ĩpatagu nayacu̱xgü ga yema diẽru.
25 Rü nüma ga Yeachí rü nhu̱xũchi norü corixü̃tawa naxũ. Rü nüma ga Erichéu rü nüxna naca rü nhanagürü: —¿Ngextá ne cuxũ Pa Yeachíx? —nhanagürü. Rü nüma ga Yeachí nanangãxü̃ga rü nhanagürü: —Taxuwama nixĩ ne chaxũxü̃ —nhanagürü.
26 Notürü nüma ga Erichéu rü nüxna nicachigüama rü nhanagürü: —¿Tama ẽ̱xna nüxü̃ cucua̱x i ngẽxguma Naamáü̃ naweü̃wa cuxca̱x íxüegu rü Tupana rü choxü̃ nüxü̃ nacua̱xẽxẽ i ngẽma? Notürü nhu̱xmax nax Tupanaarü poramaxã yixĩxü̃ i naxca̱x yataanexü̃ i ngẽma yatü, rü ngẽmaca̱x tama name nax naxü̃tawa naxca̱x íica̱xü̃ i naxchiru, rü nayauxtanüxü̃ nax naxca̱x itaxexü̃ca̱x i naanegü, rü úwanecügü, rü carnérugü, rü wocagü, rü puracütanüxü̃gü i yatüxü̃gü rü ngexü̃gü.
27 Rü ngẽmaca̱x i nhu̱xmax i ngẽma Naamáü̃arü chaxüne rü tá cuxna naxüe rü nüxna naxüe i cuxacügü rü cutaagü. Rü ngẽmaãcü tá nixĩ i guxü̃gutáma —nhanagürü. Rü yexguma nüma ga Yeachí rü Erichéuna yaxũgachigu rü nüxna naxüe ga chaxüne, rü nanacómüãchi ga naxcha̱xmüxü̃.
