2 Reyes 2:1-25
2 Rü yexguma nawa nanguxchaü̃gu nax dauxü̃guxü̃ ga naanewa Eríaxü̃ nagaxü̃ ga Cori ya Tupana nagu ga wüxi ga buanecü ga íxã̱ũ̱xẽmacü, rü nüma ga Ería rü norü ngü̃xẽẽruxü̃ ga Erichéu rü ĩane ga Yigáwa ínachoxü̃.
2 Rü nüma ga Ería rü Erichéuxü̃ nhanagürü: —¡Nuxã rüxã̱ũ̱x! Erü Cori ya Tupana rü Betéuwa choxü̃ namu —nhanagürü. Notürü nüma ga Erichéu rü nanangãxü̃ rü nhanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —nhanagürü. Rü yemaca̱x wüxigu nügümaxã Betéuwa naxĩ.
3 Notürü yema ngextü̱xücügü ga Betéuwa Tupanaarü orearü uruü̃ca̱x ngúexü̃ rü Erichéuca̱x nibuxmü. Rü nüxna nacagüe rü nhanagürügü: —¿Nüxü̃ cucuáxü̃ rü nhu̱xmax tá nixĩ ya Tupana i cuxna yagaãxü̃ ya Ería? —nhanagürügü. Rü nüma ga Erichéu rü nanangãxü̃ rü nhanagürü nüxü̃: —Ngemáacüx, marü nüxü̃ chacua̱x. Notürü tama chanaxwa̱xe i nüxü̃ pexu —nhanagürü.
4 Rü yemawena rü nüma ga Ería rü Erichéuxü̃ nhanagürü: —¡Ẽcü nuxã rüxã̱ũ̱x! Erü Cori ya Tupana rü Yericówa choxü̃ namu —nhanagürü. Notürü nüma ga Erichéu rü nanangãxü̃ rü nhanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —nhanagürü. Rü yemaca̱x wüxigu nügümaxã Yericówa naxĩ.
5 Notürü yema ngextü̱xücügü ga Yericówa Tupanaarü orearü uruü̃ca̱x ngúexü̃ rü Erichéuca̱x nibuxmü. Rü nüxna nacagüe rü nhanagürügü nüxü̃: —¿Nüxü̃ cucuáxü̃ rü nhu̱xmax tá nixĩ ya Cori ya Tupana i cuxna yagaãxü̃ ya yimá curü ngu̱xẽẽruxü̃ ya Ería? —nhanagürügü. Rü nüma ga Erichéu rü nanangãxü̃ rü nhanagürü: —Ngemáacüx, marü nüxü̃ chacua̱x. Notürü tama chanaxwa̱xe i nüxü̃ pexu —nhanagürü.
6 Rü yexguma ga nüma ga Ería rü Erichéuxü̃ nhanagürü: —¡Ẽcü nuxã rüxã̱ũ̱x! Erü Cori ya Tupana rü natü i Yurdáũwa choxü̃ namu —nhanagürü. Notürü nüma ga Erichéu rü nanangãxü̃ rü nhanagürü: —Cori ya Tupanaégagu rü cuégagu cumaxã nüxü̃ chixu rü tagutáma cuxü̃ changemücüxẽxẽ —nhanagürü. Rü yemaca̱x wüxigu yema natüwa naxĩ.
7 Notürü 50 ga yema ngextü̱xücügü ga orearü uruü̃gü rü nawe narüxĩ. Rü yexguma Yurdáũcutüwa nangugügu, rü Eríaarü yáxü̃waxüra nayachaxãchitanü. Rü nüma ga Ería rü Erichéu rü natü ga Yurdáũcutügu nayachigü.
8 Rü yexguma nüma ga Ería rü nanayaxu ga naxchiru ga mámüxü̃ rü nanadixcumü rü yemamaxã dexáchiüwa nanacua̱i̱xca. Rü ga dexá rü niyauxyexü̃chiüãchi. Rü nüma ga yema taxre rü yéma nügümaxã nichoü̃ pachitamaxü̃wa.
9 Rü yexguma marü Yurdáũarü tocutüwa nangugügu, rü nüma ga Ería rü Erichéuxü̃ nhanagürü: —¡Chamaxã nüxü̃ ixu rü ta̱xacü cunaxwa̱xe nax cuxca̱x chaxüxü̃ naxü̃pa nax Tupana cuxna choxü̃ igaxü̃! —nhanagürü. Rü nüma ga Erichéu rü nanangãxü̃ rü nhanagürü: —Ngẽma Tupanaarü pora i cuxü̃́ ngẽxmaxü̃ rü chanaxwa̱xe i taxree̱xpü̱xcüna ngẽmaarü yexera choxna cunaxã —nhanagürü.
10 Rü yexguma nüma ga Ería rü nanangãxü̃ rü nhanagürü: —Tama wüxi i tauxchaxü̃ nixĩ i ngẽma naxca̱x ícuca̱xaxü̃. Notürü ngẽxguma choxü̃ cudauamagu i ngẽxguma Tupana choxü̃ igaxgu, rü tá cunayaxu i ngẽma naxca̱x ícuca̱xaxü̃. Notürü ngẽxguma tama choxü̃ cuda̱xgu i ngẽxguma Tupana choxü̃ igaxgu rü taxũtáma cunayaxu —nhanagürü.
11 Rü yemaacü yadexatanüyane ga nax inaxĩxü̃ rü ngürüãchi naxca̱x nango̱x ga wüxi ga naweü̃ ga iya̱u̱xracüxǘne ga cowarugü ga iya̱u̱xratanüxü̃ itúgüne, rü yema taxretanügu nayangaxi. Rü guma nixĩ ga Eríaxü̃ igaxü̃ne ga dauxü̃guxü̃ ga naanewa nagu ga wüxi ga buanecü ga íxã̱ũ̱xẽmacü.
12 Rü yemaxü̃ nada̱xgux ga Erichéu rü tagaãcü aita naxü rü nhanagürü: —Pa Chaunatüx, Pa Chaunatüx, cuma rü Iraéuanecüã̱xgüca̱x rü nhama wüxi i churaratücumü i poraxü̃chixü̃rüxü̃ quixĩ —nhanagürü. Rü yema nhaxguwena rü marü tama Eríaxü̃ nadau. Rü yexguma nüma ga Erichéu rü norü ngechaxü̃maxã nügü narügáutechiru.
Eríachicüxü inarüxã̱ũ̱x ga Erichéu
13 Rü yemawena rü nüma ga Erichéu rü nanayaxu ga Eríachiru ga yéma nguxü̃. Rü natü ga Yurdáũca̱x natáegu, rü yemacutügu nayachi.
14 Rü nhu̱xũchi yema Eríachirumaxã dexáchiüwa nanacua̱i̱xca, rü tagaãcü nhanagürü: —¿Ngexcü yixĩxü̃ ya Cori ya Eríaarü Tupana ixĩcü? —nhanagürü. Rü yexguma yema nhaxgu rü dexáchiüwa nanacua̱i̱xca rü niyauxyexü̃chixü ga dexá. Rü nüma ga Erichéu rü wenaxarü nixüe nawa ga yema natü.
15 Rü yexguma yema orearü uruü̃gü ga Yericócüã̱xgü nüxü̃ daugügu ga yema ngupetüxü̃, rü tagaãcü nhanagürügü: —Ngẽma Naãxẽ i Üünexü̃ i Eríawa ngẽxmaxü̃ rü Erichéuwa naxüe —nhanagürügü. Rü nhu̱xũchi naxca̱x naxĩ rü nape̱xegu nayangücuchitanü.
16 Rü nhanagürügü nüxü̃: —Toma nax curü duü̃xü̃gü tixĩgüxü̃ rü nua totanüwa nangexmagü i 50 i totanüxü̃ i poraexü̃. ¡Rü ngẽma ngẽ́ma namugü nax curü ngu̱xẽẽruxü̃ ya Eríaca̱x yadaugüxü̃! Erü ngürüãchi i ngẽma Tupanaãxẽ i Üünexü̃ rü ma̱xpǘnewa rüe̱xna ngatewa nayata̱x —nhanagürügü. Notürü nüma ga Erichéu rü nanangãxü̃ rü nhanagürü: —Tama chanaxwa̱xe i texéxü̃ ngẽ́ma pemugü —nhanagürü.
17 Notürü ga nümagü rü poraãcü nanachixewegü, rü düxwa nüxü̃́ inaxĩnü nax yéma namugüaxü̃ca̱x ga yema 50 ga yatügü nax Eríaca̱x yadaugüxü̃ca̱x. Rü tamaepü̱x ga ngunexü̃ naxca̱x nayadaugü, notürü taguma nüxü̃ inayangaugü.
18 Rü yemaca̱x wenaxarü Yericóca̱x nawoegu ga Erichéu íyexmaxü̃wa. Rü nüma rü nhanagürü nüxü̃: —Marü pemaxã nüxü̃ chixu nax tama yéma pexĩxü̃ca̱x —nhanagürü.
19 --
20 --
21 --
22 --
23 --
24 --
25 --
