2 Reyes 22:1-20
22 Rü nüma ga Yochía rü nüxü̃́ nayexma ga 8 ga taunecü ga yexguma ãẽ̱xgacüxü̃ yangucuchigu. Rü 31 ga taunecü ãẽ̱xgacü nixĩ ga Yerucharéü̃wa. Rü naé rü tümaéga rü Yedída nixĩ, rü tümanatü rü Bucácüã̱x nixĩ, rü Adaía nixĩ ga naéga.
2 Rü nüma ga Yochía rü Tupanape̱xewa rü mexü̃ naxü. Rü nũxcümaü̃cü ga norü o̱xi ga Dawí nagu ixũxü̃gu nixũ. Rü taguma ta̱xacüca̱x nhuxgu nüxna ínaxũxũ ga yema nacüma ga mexü̃.
3 Rü yexguma marü 18 ga taunecü ãẽ̱xgacü yixĩgu ga Yochía, rü nüma rü Tupanapatawa nanamu ga norü poperaarü ümatüruxü̃ ga Chapã́ ga Acharía nane ga Mechuráũ nataxa. Rü nhanagürü nüxü̃:
4 —¡Ẽcü yéa chacherdótegüarü ãẽ̱xgacü ya Irichíaxü̃tawa naxũ rü namaxã nüxü̃ ixu rü ngĩxü̃ nanutaque̱xe i ngẽma diẽru i duü̃xü̃gü Tupanapatawa ngĩxü̃ ngecü rü ĩã̱xarü daruü̃gü ngĩxü̃ nutaque̱xecü!
5 ¡Rü ngẽma diẽru rü nüxna ngĩxü̃ naxã i ngẽma duü̃xü̃gü i Tupanapataarü mexẽẽmaxã icua̱xgüxü̃! Rü nümagü rü ngẽma diẽrumaxã tá nüxü̃́ nayaxügütanü i norü puracütanüxü̃ i Tupanapataarü mexẽẽwa puracüexü̃ —nhanagürü ga ãẽ̱xgacü ga Yochía.
6 --
7 --
8 Rü wüxi ga ngunexü̃ ga yexguma Tupanapataarü mexẽxẽ ínaxügüyane, rü nüma ga chacherdótegüarü ãẽ̱xgacü ga Irichía rü yexma nüxü̃ inayangau ga Tupanaarü mugüpane ga nũxcüma iyarütaxuxü̃. Rü poperaarü ümatüruxü̃ ga Chapã́xü̃tawa nanange rü nhanagürü nüxü̃: —¡Dücax! Rü Tupanapatagu nüxü̃ ichayangau i nhaa Tupanaarü mugüpane —nhanagürü. Rü Chapã́na nanaxã nax nüma nüxü̃ nadaumatüxü̃ca̱x.
9 Rü yemawena rü nüma ga Chapã́ rü ãẽ̱xgacü ga Yochíamaxã nüxü̃ nayarüxu rü nhanagürü nüxü̃: —Ngẽma curü duü̃xü̃gü, Pa Ãẽ̱xgacüx, rü marü ngĩxü̃ nanutaque̱xe i ngẽma diẽru i Tupanapatawa ngexma̱xcü. Rü marü nüxna ngĩxü̃ naxã i ngẽma Tupanapataarü mexẽẽwa puracüexü̃maxã icua̱xgüxü̃ —nhanagürü.
10 Rü nüma ga Chapã́ rü yexgumarüxü̃ ta ãẽ̱xgacümaxã nüxü̃ nixu rü chacherdóte ga Irichía rü nüxna nax naxããxü̃ ga wüxi ga mugüpane ga Tupanapatagu nüxü̃ iyanga̱u̱xü̃. Rü nhu̱xũchi nüma ga Chapã́ rü ãẽ̱xgacüca̱x nüxü̃ nadaumatü.
11 Rü yexguma ãẽ̱xgacü nüxü̃ ĩnügu ga yema Tupanaarü mugü ga poperagu ümatüxü̃, rü poraãcü naxoegaãxẽ rü nügü narügáutechiru.
12 22:12-13 Rü yexgumatama ga nüma ga ãẽ̱xgacü rü nanamu ga Chapã́ rü Irichía, rü Aicáü̃ ga Chapã́ nane rü Abúru ga Micaía nane rü Achaía ga norü ngü̃xẽẽruxü̃, rü nhanagürü nüxü̃: —¡Ẽcü, Cori ya Tupanana peyaca̱xa chauégagu rü Yerucharéü̃cüã̱x i duü̃xü̃güégagu rü guxü̃ma i Yudáanecüã̱xégagu nax tüxü̃ nüxü̃ nacua̱xẽẽxü̃ca̱x i norü ore i nhaa popera i nüxü̃ ipeyanga̱u̱xü̃gu ümatüxü̃! Erü ngürüãchi ya Cori ya Tupana rü tamaxã nanu yerü ga tórü o̱xigü rü tama naga naxĩnüe i ngẽma nhaa poperawa nüxü̃ yaxuxü̃, rü tama nagu namaxẽ i ngẽma nhaa poperagu ümatüxü̃ —nhanagürü ga ãẽ̱xgacü ga Yochía.
13 Nüü̃ nadau 22:12
14 Rü nüma ga Irichía, rü Aicáü̃, rü Abúru, rü Chapã́ rü Achaía rü ngĩxü̃tawa naxĩ ga yema orearü uruxü̃ ga Úda ga Charúü̃ naxma̱x. (Rü nüma ga Charúü̃ rü Chíba nane nixĩ rü Arátaxa nixĩ. Rü nüma ga Ará rü chacherdótegüchiruarü daruxü̃ nixĩ.) Rü ngĩma ga Úda rü wüxi ga ngexwaca̱xü̃xü̃ ga ĩtamügu ixãchiü̃ ga Yerucharéü̃wa.
15 Rü yexguma ngĩxna nacagüegu rü ngĩma rü inangãxü̃ga rü ngĩgürügü: —Nhaa nixĩ i norü ore ya Cori ya Iraéutanüxü̃güarü Tupana rü nhanagürü i nümax: “¡Namaxã nüxü̃ pexu ya yimá nua pexü̃ mugücü nax choxna peyaca̱xaxü̃ca̱x!
16 Rü chama i Cori ya Tupana rü nüxü̃ chixu rü guxchaxü̃ tá naxca̱x íchanguxẽxẽ i nhaa nachica rü norü duü̃xü̃gü yema popera ga ãẽ̱xgacü nüxü̃ daumatüxü̃ nüxü̃ ixuxü̃rüxü̃.
17 Erü ngẽma duü̃xü̃gü rü choxna nixĩgachi rü norü tupananetagüca̱x pumára ínagu. Rü ngẽmaãcü choxü̃ nanuxẽẽgü namaxã i ngẽma chixexü̃ nax naxügüxü̃. Rü ngẽmaca̱x nixĩ i chanuxü̃ namaxã ya daa ĩane rü taxũtáma icharüngüxmüxü̃.
18 22:18-19 Notürü tá nüxü̃ charüngü̃xẽxẽ ya yimá Yudáanecüã̱xarü ãẽ̱xgacü ya nua pexü̃ mugücü nax choxna peyaca̱xaxü̃ca̱x. Rü chanaxwa̱xe i namaxã nüxü̃ pexu i chorü ore, rü nhaperügü nüxü̃: ‘Marü nüxü̃ chadau nax nhuxãcü chauga cuxĩnüxü̃ i ngẽxguma chorü orexü̃ cuxĩnügux, rü nhuxãcü cuxoégaãẽ i ngẽxguma poxcu namaxã chaxuegugu i nhaa ĩane rü norü duü̃xü̃gü i tá chadaixü̃, rü nhuxãcü cugü curügáutechiru rü cuxaxuxü̃ i chape̱xewa. Rü ngẽmaca̱x i chama rü tá cuxü̃́ ichaxĩnü rü tá cuxü̃ charüngü̃xẽxẽ.
19 Nüü̃ nadau 22:18
20 Rü ngẽmaca̱x i nhu̱xmax nax ngẽma cuxüxü̃gagu rü taxũtáma chanadaiãcu ya daa ĩane nax ngẽmaãcü taãxẽãcü cuyuxü̃ca̱x rü naxü̃tawa cunguxü̃ca̱x i curü o̱xigü. Rü ngẽmaãcü taxũtáma nüxü̃ cudau i ngẽma poxcu i namaxã tá chanapoxcuxü̃ ya daa ĩane’ ” —nhanagürü. Rü yema ãẽ̱xgacüarü duü̃xü̃gü ga Údaxü̃tawa namugüxü̃ rü nawoegu nax namaxã nüxü̃ yaxugüexü̃ca̱x ga yema Tupanaarü ngãxü̃.
