2 Samuel 11:1-27
11 Rü guma tauemacügu ga yexguma taunecüwa nanguxchaü̃gu, rü yexguma nixĩ ga ãẽ̱xgacügü ga ínachoxü̃xü̃ ga daiwa nax naxĩxü̃ca̱x. Rü nüma ga Dawí rü norü churaragüarü ãẽ̱xgacü ga Yoábexü̃ namu nax yema norü churaragümaxã nadaiaxü̃ca̱x ga Amóũtanüxü̃gü. Rü guma Amóũtanüxü̃güarü ĩane ga Rabáxü̃ ínachoeguãchi. Notürü nüma ga Dawí rü Yerucharéü̃gu narüxã̱ũ̱x.
2 Rü wüxi ga yáuanecü ga yexguma tocuchiguwena ngü̃wa ínadaxgu ga Dawí, rü guma napataarü doétüxü̃gu naxĩnagü rü yexma ínixũãchixü̃. Rü yexguma guma ĩaneétü ínadawenügu, rü ngĩxü̃ nadau ga wüxi ga nge ga mexechicü ga yéma aiyacü.
3 11:3-4 Rü yema nge rü ngĩgü imexẽxẽ, yerü yexwaca ngĩxca̱x nitaane ga ngĩrü da̱xawexü̃newa. Rü nüma ga Dawí rü norü duü̃xü̃xü̃ namu nax ínaca̱xü̃ca̱x nax texe yixĩxü̃ ga yema nge. Rü namaxã nüxü̃ nixugüe ga Bachichéba ga Eriáü̃acü ga Uría ga Etéutanüxü̃ naxma̱x nax yixĩxü̃. Rü yexguma ga Dawí rü nhuxre ga norü duü̃xü̃güxü̃ namu nax ngĩxca̱x yaca̱xgüxü̃ca̱x nax naxü̃tawa naxũxü̃ca̱x. Rü yexguma yéma naxü̃tawa nanguxgu, rü nüma rü ngĩmaxã namaxü̃. Rü yemawena ga ngĩma rü ngĩpataca̱x itáegu.
4 Nüü̃ nadau 11:3
5 Rü ngĩma ga yema nge rü nüxü̃́ ixãxacü, rü yemaca̱x Dawíxü̃ nüxü̃ icua̱xẽxẽ.
6 Rü yexguma ga Dawí rü wüxi ga poperagu Yoábexü̃tawa nanamu ga ore ga nhaxü̃: —¡Nua chauxü̃tawa namu ya yimá Etéutanüxü̃ ya Uría! —nhaxü̃. Rü yemaacü nanaxü ga Yoábe.
7 Rü yexguma Uría Dawíxü̃tawa nguxgu, rü nüma ga Dawí rü nüxna naca nax nhuxãcü nüxü̃ naxüpetüxü̃ ga Yoábe rü yema norü churaragü, rü nhuxãcü iyaxũxü̃ ga yema nügü ínadaixü̃wa.
8 Rü yemawena ga Dawí rü nhanagürü: —¡Ẽcü, cuchiü̃wa naxũ rü ngẽxma yarüngü̃! —nhanagürü. Rü yexguma Dawíxü̃tawa ínaxũxũ̱xgu ga Uría, rü nüma ga Dawí rü Uríapatawa nanamu ga wüxi ga õna ga mexü̃ norü ãmarexü̃.
9 Notürü nüma ga Uría rü tama nachiü̃wa naxũ. Rü ãẽ̱xgacüpataarü ĩã̱xü̃tagu nape naxü̃tagu ga yema churaragü ga yéma dauxü̃taegüxü̃.
10 Rü yexguma Dawí nüxü̃ cua̱xgu ga Uría rü tama nachiü̃wa nax naxũxü̃, rü nüxna naca rü nhanagürü: —¿Ta̱xacü cuxü̃ nangupetü? ¿Tü̱xcüü̃ tama cuchiü̃gu cuyape woo nax nhuxre i ngunexü̃ ngextámare nax cungexmaxü̃? —nhanagürü.
11 Rü nüma ga Uría nanangãxü̃ga rü nhanagürü: —Ngẽma baú i Tupanaarü mugüchixü̃ rü Iraéuanecüã̱xgüarü churaragü rü Yudáanearü churaragü rü düxenügütüü̃gumare napegü. Rü ngẽxgumarüxü̃ ta ya Yoábe ya chorü ãẽ̱xgacü, rü ngẽma ãẽ̱xgacügü i cutüü̃wa ügüxü̃ rü düxétüanegumare napegü. ¿Rü nhuxãcü i chama rü chiarü chauxchiü̃gu chaxücuxü̃, rü chachibüxü̃, rü chaxaxexü̃, rü cha̱u̱xma̱xü̃ta chi chapexü̃? Rü Tupanaégagu cumaxã nüxü̃ chixu rü tagutáma ngẽma chaxü —nhanagürü.
12 Notürü nüma ga Dawí rü nanamu ga yexmatama nax naxã́ũxü̃ca̱x rü nhanagürü: —¡Nuxmatama rüxã̱ũ̱x i nhu̱xmax rü chanaxwa̱xe i moxü̃ nax cutáeguxü̃! —nhanagürü. Rü yemaacü ga Uría rü moxü̃ãcü rü ta Yerucharéü̃gu narüxã̱ũ̱x.
13 Rü nüma ga Dawí rü nüxna naxu nax namaxã nachibüxü̃ca̱x rü namaxã nax naxaxexü̃ca̱x, rü nanangãxẽxẽ. Rü yexguma marü nachütagu ga Uría, rü ínaxũxũ rü yema churaragü ga ídauxü̃taegüxü̃tanügu nayape, notürü tama nachiü̃wa naxũ.
14 Rü moxü̃ãcü pa̱xmama ga Dawí rü Yoábeca̱x popera naxümatü rü Uríamaxã yéma nanamu.
15 Rü yema poperawa rü nhanagürü: “¡Ngẽma nape̱xegu ãgüxü̃ i curü churaragümaxã yamu ya Uría i ngextá ngẽma tórü uanügüarü churaragü írüporamaegüxü̃wa nax naxũxü̃ca̱x! ¡Rü nhu̱xũchi nüxica ngẽ́ma penatáx nax ngẽmaãcü yapi̱xẽẽgüaxü̃ca̱x rü ngẽxma nayuxü̃ca̱x!” nhanagürü ga norü poperawa.
16 Rü yemaca̱x ga Yoábe ga yexguma guma ĩanexü̃ ínachoeguãchigu ga nügü nax nadaixü̃ca̱x, rü Uríaxü̃ namu nax ngextá norü uanügüarü churaragü írüporamaexü̃wa yaxũũchixü̃ca̱x.
17 Rü yexguma iyayixgu ga yema norü uanügü nax Yoábearü churaragümaxã nügü nadaixü̃ca̱x rü ínapoxü̃güãxü̃ca̱x ga guma norü ĩane, rü yexma nayue ga nhuxre ga Dawíarü churaragüeru. Rü yematanüwa nayexma ga Uría.
18 Rü nüma ga Yoábe rü Dawíxü̃tawa nanamu ga popera ga nawa nüxü̃ yaxuxü̃ nax nhuxãcü ínanguxuchixü̃ ga yema nügü ínadaixü̃wa.
19 Rü nanaxucu̱xẽ ga yema duü̃xü̃ ga orearü ngeruxü̃, rü nhanagürü: —Ngẽxguma quigúegagu nax ãẽ̱xgacümaxã nüxü̃ quixuxü̃ i nachiga nax nhuxãcü ínanguxuchixü̃ nax yigü namaxã idaixü̃ i tórü uanügü,
20 rü ngürüãchi nüma ya ãẽ̱xgacü rü tá nanu rü cuxna tá naca rü nhanagürü tá: “¿Tü̱xcüü̃ nüxna pengaicamaxü̃chi ya yima ĩane? ¿Tama ẽ̱xna nüxü̃ pecua̱x i norü poxeguruü̃étüwa nax pexü̃ ínamuxũchigüxü̃ namaxã ya nutagü i ngẽma tórü uanügü?
21 ¿Tama ẽ̱xna nüxna pecua̱xãchiexü̃ ga yema nge ga Tébecüã̱x ga ãẽ̱xgacü ga Abimeréchi ga Yerubaá nanexü̃ ima̱xcü ga yexguma wüxi ga nuta ga caexü̃ naétü nanhaxgu? Rü ngẽmaca̱x ¿tü̱xcüü̃ nüxna pengaicamaxü̃chi ya yima ĩanearü poxeguxü̃?” nhaãcü tá cuxna naca. Rü ngẽxguma i cuma rü tá cunangãxü̃ga rü nhacurügü tá: “Ngẽxma ta nixĩ i nayuxü̃ ya Uría ya Etéutanüxü̃ ixĩcü, Pa Chorü Ãẽ̱xgacüx”, nhacurügü tá —nhanagürü ga Yoábe.
22 Rü yema orearü ngeruxü̃ rü yéma Dawíxü̃tawa naxũ. Rü yexguma yéma nanguxgu rü Dawímaxã nüxü̃ nixu ga guxü̃ma ga yema ore ga Yoábe namaxã nüxü̃ ixuxü̃. Rü nüma ga Dawí rü Yoábemaxã nanu, rü yema orearü ngeruü̃xü̃ nhanagürü: —¿Tü̱xcüü̃ nüxna pengaicamaxü̃chi ya yima ĩane? ¿Rü tama ẽ̱xna nüxü̃ pecua̱x i norü poxeguruü̃étüwa nax pexü̃ ínamuxũchigüxü̃ namaxã ya nutagü i ngẽma tórü uanügü? ¿Tama ẽ̱xna nüxna pecua̱xãchiexü̃ ga yema nge ga Tébecüã̱x ga Abimeréchi ga Yerubaá nanexü̃ ima̱xcü ga yexguma wüxi ga nuta ga caexü̃ naétü nanhaxgu? Rü ngẽmaca̱x ¿tü̱xcüü̃ nüxna pengaicamaxü̃chi ya yima ĩanearü poxeguxü̃? —nhanagürü.
23 Rü nüma ga yema orearü ngeruxü̃ rü nanangãxü̃ga rü nhanagürü: —Nüma ga yema tórü uanügüarü churaragü rü inayayi, rü tomaxã nügü nadai. Notürü ga toma rü nügü ítayabuxmüxẽxẽ rü nhu̱xmata ĩaneca̱x ixücuxü̃wa nangugü.
24 Rü yexgumayane ga yema tórü uanügü rü ĩanearü poxeguxü̃arü dauxü̃wa würamaxã curü churaragüxü̃ nadai, Pa Chorü Ãẽ̱xgacüx. Rü ngẽxma nayue i nhuxre i churaragüeru rü ngẽmatanügu nayu ya Uría ya Etéutanüxü̃ ixĩcü —nhanagürü.
25 Rü yexguma ga Dawí rü yema orearü ngeruü̃xü̃ nangãxü̃ga, rü nhanagürü: —¡Yoábemaxã nüxü̃ ixu rü taxuca̱xma naxca̱x naxoegaãxẽ i ngẽma, erü woetama ngẽmaãcü nangupetü i daiwa! ¡Rü namaxã nüxü̃ ixu nax yexera pora naxüxü̃ca̱x nax nadaiãcuãxü̃ca̱x ya yima ĩane, nhacurügü tá nüxü̃! Rü cuma rü name nixĩ i yexeraãcü pora Yoábena cuxã —nhanagürü.
26 Rü yexguma nüxü̃ nacua̱xgu ga Uría naxma̱x ga marü nax nayuxü̃ ga guma ngĩte rü inaxaure.
27 Notürü yexguma marü nangupetü̱xgu ga nax naxaurexü̃, rü nüma ga Dawí rü nachiü̃wa ngĩxca̱x nangema, rü naxma̱xü̃ ngĩxü̃ nixĩxẽxẽ, rü nüxü̃́ ixãxacü. Notürü nüma ga Cori ya Tupana rü tama namaxã nataãxẽ ga yema Dawí üxü̃.
