2 Samuel 12:1-31
12 Rü nüma ga Cori ya Tupana rü norü orearü uruxü̃ ga Natáũxü̃ namu ga Dawíxü̃tawa nax naxũxü̃ca̱x. Rü yexguma Natáũ Dawíxü̃tawa nguxgu, rü nhanagürü nüxü̃: —Wüxi ga ĩanewa nayexma ga taxre ga yatü. Wüxi rü namuarü yemaxü̃ã̱xü̃chi rü yema to rü nangearü yemaxü̃ã̱x.
2 Rü yema muarü yemaxü̃ã́xü̃ rü muxü̃ma ga carnérugü rü wocagü nüxü̃́ nayexma.
3 Notürü ga yema ngearü yemaxü̃ã́xü̃ rü wüxitama ga carnéruacü nüxü̃́ tayexma ga tümaca̱x nataxexe. Rü nümatama tüxü̃ nayaxẽxẽ ga guxema carnéruacü, rü naxü̃tawa rü nanegüxü̃tawa taya. Rü yematama õna ga tümaarü yora ngṍxü̃ tangõ̱x rü naxpáxü̃watama taxaxe, rü nügüxü̃ta tüxü̃ napexẽxẽ. Rü nüma ga guma yatü tüxü̃ nangechaü̃ nhama naxacüxü̃ nangechaü̃xü̃rüxü̃.
4 Rü wüxi ga ngunexü̃ rü yema muarü yemaxü̃ã́xü̃xü̃tagu nanaxũane ga wüxi ga duü̃xü̃ ga toxnamana ne ũxü̃. Notürü nüma ga yema duü̃xü̃ ga muarü yemaxü̃ã́xü̃ rü tama norü carnéruta rüe̱xna norü wocata nimáxchaü̃ nax yemaacü naxca̱x nax naxüwemüxü̃ca̱x ga yema naxü̃tagu naxũanexü̃. Rü guxema ngearü diẽruã́xearü carnéru niyaxu, rü yema yéma nguxü̃ca̱x tüxü̃ naxü —nhanagürü.
5 Rü yexguma yemaxü̃ naxĩnügu ga Dawí, rü yema yatümaxã poraãcü nanu, rü Natáũxü̃ nhanagürü: —Tupanaégagu cumaxã nüxü̃ chixu rü texé ya ngẽma ǘxe rü name nixĩ i tüxü̃ nax imáxü̃.
6 Rü 4 e̱xpü̱xcüna tá tüxü̃ naxütanü ya yíxema carnéruacü, erü tama nüxü̃́ tangechaü̃tümüxü̃ãcüma nanaxü i ngẽma —nhanagürü.
7 Rü yexguma ga Natáũ rü nhanagürü: —Cuma nixĩ i ngẽma yatü quixĩxü̃. Rü nhaa nixĩ i norü ore i Cori ya Iraéuanecüã̱xgüarü Tupana cumaxã nüxü̃ ixuxü̃. Chama cuxü̃ chayaxu nax Iraéuanecüã̱xgüarü ãẽ̱xgacü nax quixĩxü̃, rü Chaúme̱xẽwa cuxü̃ íchapoxü̃.
8 Rü napata cuxna chaxã, rü cuxme̱xwa tüxü̃ changexmagüxẽxẽ ga naxma̱xgü, rü guxü̃ma i Iraéuane rü Yudáane rü cuxna chaxã. Rü ngẽxguma chi cuxca̱x nanoxregu i ngẽma, rü chi muxü̃ma i togü i ngẽmaxü̃gü chi cuxna chaxã.
9 ¿Rü tü̱xcüü̃ tama naga cuxĩnü i chorü ore, rü cunaxü i ngẽma tama chauãẽwa mexü̃? Rü cuma rü Amóũtanüxü̃güarü taramaxã cuyama̱x ya Uría ya Etéutanüxü̃ rü naxma̱xca̱x cungĩ̱x.
10 Rü ngẽma nax choxü̃ cuxoxü̃, rü ngẽmaca̱x Uría ya Etéutanüxü̃ naxma̱x tüxü̃ cuyapu rü cuxma̱xü̃ tüxü̃ quixĩxẽxẽ. Rü ngẽmagagu rü guxü̃gutáma ãũcümaxü̃wa cungexma.
11 Rü chama i Cori ya Tupana rü cumaxã nüxü̃ chixu rü chama rü tá chanaxü nax cutanüxü̃ tátama yixĩxü̃ i guxchaxü̃ cumaxã üxü̃. Rü cupe̱xewa tátama tüxü̃ chade ya cuxma̱xgü rü ngẽma cutanüxü̃na tá tüxü̃ chamugü, rü guxãpe̱xewa tá tümamaxã namaxẽ.
12 Cuma rü cúãcü cunaxü i ngẽma chixexü̃, notürü i chama rü guxü̃ma i Iraéuanecüã̱xgüpe̱xewa tá chanaxü i ngẽma cumaxã nüxü̃ chixuxü̃ nax guxãma nüxü̃ dauxü̃ca̱x —nhanagürü.
13 Rü nüma ga Dawí rü Natáũxü̃ nangãxü̃ga rü nhanagürü: —Tupanamaxã chixexü̃ chaxü —nhanagürü. Rü nüma ga Natáũ nanangãxü̃ga rü nhanagürü: —Ngemáacü, notürü Tupana rü cuxü̃ nangechaü̃, rü taxũtáma ngẽma chixexü̃gagu cuyu.
14 Notürü ngẽma chixexü̃ icuxüxü̃gagu rü Tupanaarü uanügüaxü̃́ cunatauxchaxẽxẽ nax Tupanaxü̃ naxoexü̃ rü namaxã naguxchigagüxü̃. Rü ngẽmaca̱x ya yimá cune ya ngexwaca̱x íxracü rü tá nayu —nhanagürü.
15 Rü yexguma Natáũ nachiü̃ca̱x táegu̱xgux rü nüma ga Cori ya Tupana rü poraãcü nayada̱xawexẽxẽ ga yema buxü̃ ga Uría naxma̱xwaü̃xü̃.
16 Rü nüma ga Dawí rü Tupanana naca naxca̱x ga yema buxü̃, rü naxaure rü nhaxtüanegumare naca rü yexma nüxü̃ nangupetü ga nhuxre ga chütaxü̃.
17 Rü yema ãẽ̱xgacügü ga norü ngü̃xẽẽruü̃gü ga yéma naxü̃tawa yexmagüxü̃, rü nüxü̃ naca̱a̱xü̃gü nax inachixü̃ca̱x ga nhaxtüanewa. Notürü ga nüma ga Dawí rü tama inachixchaü̃ rü tama natanüwa nachibüchaü̃.
18 Rü 7 ga ngunexü̃ ngupetü̱xguwena rü tayu ga guxema buxe. Rü nümagü ga yema Dawíarü ngü̃xẽẽruü̃gü rü namuü̃e ga namaxã nüxü̃ nax yaxugüexü̃, yerü nhaxü̃gu narüxĩnüe: “Rü yexguma tamaxyane ga guxema buxe rü nüma ga ãẽ̱xgacü rü tama taga naxĩnüchaü̃ rü tama nachibüchaü̃. Rü ngẽmaca̱x i nhu̱xmax nax tayuxü̃ rü nhuxãcü tá namaxã nüxü̃ tixu, erü tama nüxü̃ tacua̱x nax ta̱xacü tá nügümaxã naxüxü̃”, nhaxü̃gu narüxĩnüe.
19 Notürü nüma ga Dawí rü nüxü̃ nadau ga yema norü ngü̃xẽẽruü̃gü ga bexma nügümaxã nax yadexagüxü̃, rü yemawa nüxü̃ nacua̱x ga guxema buxe rü marü nax tayuxü̃. Rü yemaca̱x nüxna naca rü nhanagürü: —¿Marü tayu ya yíxema buxe? —nhanagürü. Rü nüma ga yema norü ngü̃xẽẽruü̃gü rü nanangãxü̃gagü rü nhanagürügü: —Ngü̃, marü tayu —nhanagürügü.
20 Rü yexguma ga Dawí rü inachi ga nhaxtüanewa, rü naxaiya rü nügü napumára rü ínacuxuchi rü to ga naxchirugu nicu̱x. Rü Tupanapatawa naxũ rü yexma naxücu rü Cori ya Tupanaxü̃ nicua̱xüxü̃. Rü yemawena rü nachiü̃ca̱x natáegu rü õnaca̱x ínaca rü nachibü.
21 Rü yexguma ga yema norü ngü̃xẽẽruü̃gü rü Dawína nacagü rü nhanagürügü: —¿Notürü ta̱xacüca̱x ngẽmaãcü cunaxü Pa Ãẽ̱xgacüx? Rü yexguma tamaxü̱̃xgu ga guxema buxe, Pa Ãẽ̱xgacüx, rü cuxaure rü tümaca̱x cuxaxu. Notürü i nhu̱xmax marü nax tayuxü̃ ya buxe, Pa Ãẽ̱xgacüx, rü icuchi rü cuchibü —nhanagürügü.
22 Rü Dawí nanangãxü̃ga rü nhanagürü: —Yexguma tamaxü̱̃xgu ga guxema buxe rü chaxaure rü chaxaxu yerü nagu charüxĩnü chi ga Cori ya Tupanaaxü̃́ nax changechaü̃tümüxü̃xü̃ rü tüxü̃ namaxẽẽxü̃ ga guxema buxe.
23 Notürü i nhu̱xmax nax marü tayuxü̃ ¿rü ta̱xacüca̱x ichaxaurexü̃ ega taxucürüwa wena tüxü̃ chamaxẽẽgu? Chama rü tá tümaxü̃tawa chaxũ, notürü i tüma rü taxuacüma cha̱u̱xca̱x tatáegu —nhanagürü.
Charumáuarü buxchiga
24 Rü yemawena ga Dawí rü naxma̱x ga Bachichébaxü̃ nayataãxẽxẽxẽ. Rü ngĩxü̃ta nanaxũane rü ngĩmaxã namaxü̃, rü nüxü̃́ ixãxacü. Rü nüma ga Dawí rü Charumáugu nanaxüéga.
25 --
26 --
27 --
28 --
29 --
30 --
31 --
