3 Juã́ũ 1:1-14
1 Pa Chaueneẽ, Pa Gaju i Aixcuma Cuxü̃ Changechaü̃xẽx, rü cuxca̱x chanaxümatü i chama i Juã́ũ i jaxõgüxü̃ãrü ãẽ̱xgacü na chiĩxü̃.
2 Pa Chaueneẽx, Tupanana chaca na meã cuxna nadauxü̃ca̱x i curü maxü̃wa rü cuxunewa, ngẽma curü õwa cuxna na nadauxü̃rüü̃.
3 Rü poraãcü chataãẽ ga jexguma núma naxĩxgu ga nhuxre ga taeneẽgü, rü chamaã nüxü̃ jaxugügu ga cuchiga na nhuxãcü meã cujaxõxü̃ i Tupanaãrü ore i aixcuma ixĩxü̃, rü guxü̃guma meã naga na cuxĩnüxü̃.
4 Rü guxü̃guma chataãẽxü̃chi i ngẽxguma nüxü̃ chaxĩnügu na nhuxãcü Tupanaãrü ore nüxü̃ ixuxü̃ãcüma meã namaxẽxü̃ i chauxacügü. Rü aixcuma nataxuma i to i taãẽ i ngẽmaãrü jexera ixĩxü̃.
5 Pa Chaueneẽ i Cuxü̃ Changechaü̃xẽx, mexü̃ cuxü erü nüxü̃ curüngü̃xẽẽ i ngẽma togü i taeneẽgü i toxnamana ne ĩxü̃ i cuxü̃tawa ngugüxü̃.
6 Rü nümagü rü nuã nangugü, rü torü ngutaque̱xepataü̃wa nüxü̃ nixugüe na nhuxãcü nüxü̃ cungechaü̃xü̃ rü namaã cumecümaxü̃. Rü chanaxwa̱xe i nüxü̃ curüngü̃xẽẽ i ngẽma taeneẽgü i ngẽxguma wena cuxü̃tawa nangugügu. Rü ngẽxguma cuxna íjaxĩxgu rü ¡nüxna naxã i ṯacü i nüxü̃́ taxuxü̃ i norü namawaü̃! Erü Tupanaãrü me nixĩ na ngẽmaãcü nüxü̃ rüngü̃xẽẽxü̃ i norü orearü uruü̃gü.
7 1:7-8 Rü nümagü, rü Ngechuchu ja Cristuarü puracü nixĩ i naxügüxü̃, rü ngẽmaca̱x norü oremaã nanaxĩãne. Notürü tama nanajauxgü i ngẽma tama jaxõgüxü̃ãrü ngü̃xẽẽ, rü ngẽmaca̱x name nixĩ i jixema na nüxü̃ rüngü̃xẽẽgüxü̃ na ngẽmaãcü jixema rü ta wüxigu namaã naxügüxü̃ca̱x i Tupanaãrü puracü.
8 Nüü̃ nadau 1:7
Diótepe rü chixexü̃ naxü notürü Demétriu rü mexü̃ naxü
9 Chama rü marü chanaxümatü i wüxi i popera naxca̱x i ngẽma tupaucatanüxü̃gü i curü ĩãnewa ngẽxmagüxü̃. Notürü nüma i Diótepe rü tama naga naxĩnüchaü̃ i ngẽma nüxü̃ tixuxü̃, erü nanaxwa̱xe na nümatama namuãxü̃ i ngẽma tupaucatanüxü̃.
10 Rü ngẽxguma ngẽ́ma chaxũxgu rü tá nüxü̃ chaxoregü erü tochiga i chixexü̃maã inajarüdexanexü̃. Rü woo tomaã na ngexü̃ nawagüxü̃, rü naẽ́tüwa to i chixexü̃ naxü, erü tama nanajauxchaü̃ i ngẽma taeneẽgü i ngẽ́ma ngugüxü̃. Rü nanachu̱xu na texé najaxuxü̃ i ngẽma taeneẽgü. Rü jíxema najauxchaü̃xẽ, rü ngutaque̱xepataü̃wa tüxü̃ ínawoxü̃.
11 Pa Chaueneẽ i Cuxü̃ Changechaü̃xẽx, ¡Tãṹ i nüxü̃ cujadauxü̃xü̃ i ngẽma togü i chixexü̃ ügüxü̃! Notürü name nixĩ i nüxü̃ cujadauxü̃ i ngẽma mexü̃ ügüxü̃. Erü jíxema guxü̃guma mexü̃ ǘxe rü Tupanaxãcü tixĩ. Notürü jíxema chixexü̃ üechaxe rü tama Tupanaxü̃ tacua̱x.
12 Guxü̃ma i duü̃xü̃gü nüxü̃ ixuxgu i Demétriu rü wüxi ja mecü nixĩ. Rü toma rü ta nüxü̃ tacua̱x na meã naga naxĩnüxü̃ i Tupanaãrü ore i aixcuma ixĩxü̃. Rü ngẽmaca̱x toma rü ta nüxü̃ tixu na aixcuma mecü jiĩxü̃. Rü cuma nüxü̃ cucua̱x na aixcuma na jiĩxü̃ i ngẽma nüxü̃ tixuxü̃.
Juã́ũãrü ore ga nawa ijacuáxü̃
13 Chama choxü̃́ nangẽxmachire̱x i muxü̃ma i chorü ore i cumaã nüxü̃ chixuxchaü̃xü̃, notürü tama nhaã poperagu cuxca̱x chanaxümatüchaü̃.
14 1:14-15 Erü chama rü paxa ngẽ́ma chaxũxchaü̃, rü ngẽxguma rü meã tá jigümaã tidexagü. 15 ¡Meã cuxü̃ naxüpetü rü tãṹ i cuxoegaãẽxü̃! Tamücügü i númacü̱̃ã̱x rü moxẽ cuxca̱x ngẽ́ma namugü. Rü chanaxwa̱xe i nüxü̃ curümoxẽ i wüxichigü i tamücügü i ngẽ́ma ngẽxmagüxü̃. Rü ngẽxĩcatama nixĩ i chorü ore i cumaã nüxü̃ chixuxü̃.
Rü nuãma cuxna,
Juã́ũ
