Apocaríchiu 11:1-19
11 Rü jemawena chanajaxu ga wüxi ga dexnemena̱xã ga ngugüruü̃ ixĩxü̃ne ga choxna naxãxü̃ne. Rü guma choxna naxãcü rü nhanagürü choxü̃:
“¡Inachi rü nangugü ja jima Tupanapata rü ngẽma pumaraarü gute̱xeruü̃taxmü! ¡Rü jaxugü rü nhuxre jiĩxü̃ i ngẽma duü̃xü̃gü i ngẽ́ma Tupanaxü̃ icua̱xüü̃güxü̃!
2 ¡Notürü ngẽma naã̱xtü ja Tupanapata, rü tãũxü̃táma cunangugü! Erü ngẽma duü̃xü̃gü i tama Tupanaãxü̃́ jaxõgüxü̃na marü nanaxã. Rü nümagü rü tamaẽ̱xpü̱x ja taunecüarü ngãxü̃ tá chixexü̃ namaã naxügü ja jima ĩãne ja üünene ja Jerucharéü̃.
3 Rü chama rü tá chanamu i taxre i chorü orearü uruü̃gü na 1,260 i ngunexü̃ duü̃xü̃gümaã nüxü̃ jaxugüxü̃ca̱x i chorü ore. Rü nümagü i ngẽma taxre rü tá niwẽxchiru na ngẽmawa duü̃xü̃gü nüxü̃ cua̱xgüxü̃ca̱x na ngechaü̃ nüxü̃́ ngu̱xgüxü̃”, nhanagürü choxü̃.
4 Rü ngẽma taxre i orearü uruü̃gü nixĩ i norü cua̱xruü̃ i ngẽma taxre i nanetü i oriwéra rü ngẽma taxre i weraarü üruü̃gü i tórü Cori ja nhama i naãneãrü jora ixĩcüpe̱xewa ngẽxmagüxü̃.
5 Rü ngẽxguma texé chixexü̃ namaã ügüchaü̃gu i ngẽma taxre i orearü uruü̃gü, rü nümagü rü üxüema ja naã̱xwa ínacuexechinemaã tüxü̃ tá ínagu. Rü ngẽmaãcü tá inajanaxoxẽẽ i norü uwanügü. Rü ngẽmaãcü tá tüxü̃ nadai ja jíxema chixexü̃ namaã ügüchaü̃xẽ.
6 Rü ngẽma taxre i orearü uruü̃gü rü nüxü̃́ nangẽxma i pora na íjachaxãchixü̃ca̱x ja pucü na tama napuxü̃ca̱x i guxü̃ma i ngẽma 1,260 i ngunexü̃gü i nagu Tupanaãrü orexü̃ jaxugüxü̃. Rü ngẽxgumarüü̃ ta nüxü̃́ nangẽxma i pora na nagüxü̃ jaxĩxẽẽgüãxü̃ca̱x i dexá. Rü ngẽxgumarüü̃ ta nüxü̃́ nangẽxma i pora na nhama i naãnewa namugüãxü̃ca̱x i nagúxü̃raü̃xü̃ i pocuruü̃gü na ngẽmaãcü ngúxü̃ duü̃xü̃güxü̃ jangexẽẽgüxü̃ca̱x i ngẽxguma ngẽma taxre naxwa̱xegügu.
7 Notürü ngẽxguma ngẽma taxre i orearü uruü̃gü nagu̱xẽẽgügu na nüxü̃ jaxugüxü̃ i Tupanaãrü ore, rü ngẽma ṉg̱oxo i ngẽma ãxmaxü̃ i taguma ijacuáxü̃wa íxũxũxü̃, rü tá nüxna najuxu. Rü tá ngẽma taxrexü̃ narüjexera, rü tá nanadai.
8 Rü ngẽma naxü̃negü i ngẽma taxre rü tá jima ĩãne ga tórü Cori nawa curuchawa ipotane ja Jerucharéü̃maü̃wa nawogü. Rü jima ĩãne rü nachixe rü ngẽmaca̱x Chodomaãrü ĩãnemaã rü Ejituanemaã nanaxugü.
9 Rü tamaẽ̱xpü̱x i ngunexü̃ãrü ngãxü̃ rü muxü̃ma i nagúxü̃raü̃xü̃ i duü̃xü̃gü rü muxü̃ma i guxü̃ i nachiü̃ãnecü̱̃ã̱x i duü̃xü̃gü rü muxü̃ma i duü̃xü̃gü i to i nagawa idexagüchigüxü̃, rü tá nüxü̃ nadaugü i naxü̃negü. Rü tãũxü̃táma nanaxwa̱xegü na texé inata̱xgüxü̃.
10 Rü ngẽma duü̃xü̃gü i nhama i naãnewa maxẽxü̃ rü tá nataãẽgü na marü najuexü̃ i ngẽma taxre. Rü ngẽma na poraãcü nataãẽgüxü̃chixü̃ rü tá nügüna ãmare naxãgü, jerü jema taxre ga orearü uruü̃gü rü poraãcü nanachixewe rü naãẽwa nanangu̱xẽẽgü.
11 Notürü jema tamaẽ̱xpü̱x ga ngunexü̃ãrü ngãxü̃guwena, rü Tupana wenaxãrü nanamaxẽxẽẽ ga jema taxre. Rü wenaxãrü ínarüdagü. Rü guxü̃ma ga jema duü̃xü̃gü ga nüxü̃ daugüxü̃ rü poraãcüxü̃chi namuü̃ẽ.
12 Rü nhu̱xmachi ga jema taxre ga orearü uruü̃gü, rü nüxü̃ naxĩnüẽ ga wüxi ga naga ga tagaãcü dauxü̃guxü̃ ga naãnewa inaxũxü̃ ga nhaxü̃:
“¡Nuã dauxü̃wa pexĩ!” nhaxü̃. Rü nhu̱xmachi ga nümagü rü wüxi ga caixanexü̃gu dauxü̃guxü̃ ga naãnewa naxĩ. Rü norü uwanügü rü joxni nüxü̃ narüdaunü.
13 Rü jexgumatama poraãcü naxĩã̱xãchiane. Rü wüxi ga jema norü 10 arü üje ga guma ĩãne, rü niwa̱xgü. Rü 7,000 ga duü̃xü̃gü najue namaã ga jema ĩã̱xãchiane. Rü jema togü ga duü̃xü̃gü ga maxẽxü̃ rü poraãcüxü̃chi namuü̃ẽ. Rü Tupana ja dauxü̃guxü̃ i naãnewa ngẽxmacüxü̃ nicua̱xüü̃gü.
14 Rü jexma najacua̱x ga jema norü taxre ga chixexü̃. Notürü paxa tá ínangu i ngẽma norü tamaẽ̱xpü̱x ixĩxü̃.
Guma norü 7 ga cornetachiga
15 Rü jema norü 7 ga Tupanaãrü orearü ngeruü̃, rü najacue ga norü corneta. Rü najexma ga nagagü ga tagaãcü dauxü̃guxü̃ ga naãnewa inaxũgüxü̃ ga nhagüxü̃:
“Nhu̱xma rü jima mecü na namaã inacua̱xgüxü̃ i nhama i naãne, rü nüma nixĩ ja tórü Cori ja Tupana rü Nane ja Cristu. Rü nüma rü guxü̃gutáma namaã inacua̱xgü”, nhagüxü̃.
16 Rü nhu̱xmachi ga jema 24 ga ãẽ̱xgacügü ga norü tochicaxü̃güwa rütogüxü̃ ga Tupanape̱xewa, rü jexma nanangücuchitanü, rü Tupanaxü̃ nicua̱xüü̃gü.
17 Rü nhanagürügü:
“Pa Torü Cori ja Tupana ja Guxü̃ãrü Jexera Poracüx, cuma rü woetama cujexmaẽcha, rü nhu̱xma rü ta cungẽxmaẽcha. Rü moxẽ cuxna taxãgü, erü marü cugüme̱xẽwa cunangẽxmaxẽẽ i guxü̃ma, rü marü icunaxügü na namaã icucuáxü̃.
18 Rü ngẽma duü̃xü̃gü i tama cuxrü ixĩgüxü̃ rü poraãcüxü̃chi nanuẽ, notürü nawa nangu i ngẽma ngunexü̃ i nagu tá cunapocuexü̃. Rü ngẽxgumarüü̃ ta marü nawa nangu na nüxü̃ cuicagüxü̃ i guxü̃ma i duü̃xü̃gü i juexü̃. Rü marü nawa nangu na nüxü̃́ cunaxütanüxü̃ i ngẽma curü duü̃xü̃gü i curü orearü uruü̃gü, rü ngẽma duü̃xü̃gü i cupe̱xewa imexü̃, rü guxü̃ma i ngẽma duü̃xü̃gü i cuxü̃ muü̃ẽxü̃ i jaexü̃ rü buexü̃. Rü marü nawa nangu na icujanaxoxẽẽxü̃ i ngẽma duü̃xü̃gü i nachixexẽẽxü̃ i nhama i naãne”, nhanagürügü.
19 Rü nhu̱xmachi Tupanapata ga dauxü̃guxü̃ ga naãnewa jexmane, rü niwãxna. Rü jéma norü aixepewa nüxü̃ chadau ga jema baú ga Tupanaãrü uneta ga nutagu ümatüxü̃. Rü niba̱i̱xbe̱xane, rü poraãcü nicuxcuane, rü naxĩã̱xãchiane rü poraãcü dejuxü̃ narüji.
