Apocaríchiu 13:1-18
13 Rü nüxü̃ chadau ga wüxi ga ṉg̱oxo ga taxü̃ ga taxtügu ínhuãchixü̃ ga 7 eruxü̃ rü 10 chatacu̱xrexü̃. Rü wüxichigü ga naxchatacu̱xrewa rü nüxü̃́ najexma ga norü nga̱xcueruü̃. Rü naẽrugügu naxümatü ga nhuxre ga naẽ́gagü ga Tupanamaã guxchigagüxü̃.
2 Rü jema ṉg̱oxo ga nüxü̃ chadauxü̃, rü wüxi ga airüü̃ nixĩ. Rü naxme̱xgü rü chatü ga taxü̃me̱xẽgürüü̃ nixĩ. Rü naã̱x rü wüxi ga aia̱xrüü̃ nixĩ. Rü jema dragã́ũ ga Chataná rü jema ṉg̱oxoxü̃ naporaxẽẽ na naxrüü̃ naporaxü̃ca̱x rü naxrüü̃ ãẽ̱xgacü jiĩxü̃ca̱x na nhama ga naãnemaã inacuáxü̃ca̱x.
3 Rü wüxi ga naẽruwa ga jema ṉg̱oxo, rü nüxü̃́ najexma ga wüxi ga taxü̃ ga norü o̱xri ga namaã najuxchaü̃xü̃. Notürü ga jema norü o̱xri rü nüxü̃́ nixẽ, rü naxca̱x nitaane. Rü guxü̃ma ga nhama ga naãnecü̱̃ã̱x ga duü̃xü̃gü rü poraãcü jema ṉg̱oxomaã naḇaixãchie, rü nawe narüxĩ.
4 Rü ga duü̃xü̃gü rü jema dragã́ũ ga Chatanáxü̃ nicua̱xüü̃gü jerü jema ṉg̱oxoxü̃ naporaxẽẽ na ãẽ̱xgacü jiĩxü̃ca̱x. Rü jexgumarüü̃ ta jema ṉg̱oxoxü̃ nicua̱xüü̃gü, rü nhanagürügü:
“¿Texé tangẽxma ja nhaã ṉg̱oxorüü̃ poraxe? ¿Rü texé tapora na namaã tügü taḏaixü̃?” nhanagürügü.
5 Notürü ga Tupana rü tama jema ṉg̱oxona nanachu̱xu na nügü jacua̱xüü̃xü̃ca̱x rü ṯacü Tupanamaã jaxugüxü̃ca̱x rü ãẽ̱xgacü na jiĩxü̃ca̱x ga 42 ga tawemacü.
6 Rü jemaãcü chixexü̃ naxü ga jema ṉg̱oxo. Rü poraãcü ṯacü Tupanamaã nixugü. Rü Tupanamaã naguxchiga, rü napatamaã rü ta naguxchiga, rü tümamaã naguxchiga ja guxãma ja jíxema dauxü̃guxü̃ i naãnewa ngẽxmagüxe.
7 Rü jema dragã́ũ ga Chataná rü jema ṉg̱oxoxü̃ naporaxẽẽ na Tupanaãrü duü̃xü̃gümaã nügü naḏaixü̃ca̱x nhu̱xmatáta tüxü̃ najexera. Rü ãẽ̱xgacüxü̃ najaxĩxẽẽ na namaã inacuáxü̃ca̱x ga nagúxü̃raü̃xü̃ ga duü̃xü̃gü ga guxü̃ma ga nachiü̃ãnecü̱̃ã̱x ga nagúxü̃raü̃xü̃ ga nagawa idexagüxü̃.
8 Rü tá ngẽma ṉg̱oxoxü̃ nicua̱xüü̃gü i guxü̃ma i duü̃xü̃gü i nhama i naãnewa maxẽxü̃ i noxritama naãne ü̱xgu ngeégagüxü̃ nawa i norü popera ja jima pecaduarü ütanüca̱x jucü i nagu jawügüãxü̃ i ngẽma duü̃xü̃gü i marü Tupana nüxna naxãxü̃ i maxü̃ i taguma gúxü̃.
9 13:9-10 Rü ngẽxguma texé ãxchixẽgu, rü name nixĩ i naga taxĩnü i nhaã tá pemaã nüxü̃ chixuxü̃. Rü ngẽxguma texé tümamaã naxuegugu na tüxü̃ jajauxgüxü̃, rü noxtacüma tá tijaxu. Rü ngẽxguma texé tümamaã naxuegugu na tüxü̃ jama̱xgüxü̃, rü noxtacüma tá tüxü̃ nima̱xgü. Rü ngẽmaca̱x ja jíxema Tupanaãrü duü̃xü̃gü ixĩgüxe, rü woo ṯacü rü guxchaxü̃ tüxü̃ ngupetügu, rü tanaxwa̱xe na jaxna namaã taxĩnüẽxü̃ rü tajaxõgüamaxü̃.
10 Nüü̃ nadau 13:9
11 Rü jemawena nüxü̃ chadau ga wüxi ga to ga ṉg̱oxo ga taxrechatacu̱xrexü̃ ga waixü̃müãnewa íxũxũxü̃. Rü jema naxchatacu̱xre rü nhama carneruchatacu̱xrerüü̃ nixĩ. Notürü ga naga rü wüxi ga dragã́ũ ga taxüchixü̃garüü̃ nixĩ ga na natagaxü̃.
12 Rü jexguma jema nüxĩraü̃xü̃ ga ṉg̱oxope̱xewa najexmagu, rü naxrüü̃tama napora. Rü nhama ga naãnemaã inacua̱x, rü nanamu ga nhama ga naãnewa maxẽxü̃ ga duü̃xü̃gü na jema nüxĩraü̃xü̃ ga ṉg̱oxo ga ixẽãrü o̱xriáxü̃xü̃ na jacua̱xüü̃güxü̃ca̱x.
13 Rü jema ṉg̱oxo nanaxü ga taxü̃ ga cua̱xruü̃gü ga duü̃xü̃gü tama nüxü̃ cuáxü̃ na naxügüãxü̃. Rü dauxü̃wa nanajixẽẽ ga üxü, rü nhama ga naãnegu naji nape̱xewa ga duü̃xü̃gü.
14 Notürü ga Tupana rü tama jema ṉg̱oxona nanachu̱xu na nhama ga naãnewa maxẽxü̃ ga duü̃xü̃güxü̃ nawomüxẽẽxü̃ namaã ga jema cua̱xruü̃gü ga jema nüxĩraü̃xü̃ ga ṉg̱oxope̱xewa naxüxü̃. Rü jemaãcü ga jema ṉg̱oxo rü duü̃xü̃güxü̃ namu na naxügüãxü̃ca̱x ga naxchicüna̱xã ga jema nüxĩraü̃xü̃ ga ṉg̱oxo ga taramaã chexexü̃ rü poraãcü rüxóxü̃ rü tama juxü̃.
15 Rü Tupana rü tama jema to ga ṉg̱oxona nanachu̱xu na namaxẽẽãxü̃ca̱x ga jema nüxĩraü̃xü̃ ga ṉg̱oxochicüna̱xã. Rü jemaãcü ga jema ṉg̱oxo rü nanamaxẽẽ ga jema naxchicüna̱xã na jadexaxü̃ca̱x rü na nadaiãxü̃ca̱x ga guxü̃ma ga jema duü̃xü̃gü ga tama nüxü̃ icua̱xüü̃güxü̃.
16 Rü jexgumarüü̃ ta guxü̃ma ga duü̃xü̃güxü̃ namu na norü tügüneme̱xẽwa rü e̱xna nacatüwa nüxü̃́ na najexmaxü̃ca̱x ga wüxi ga cua̱xruü̃ ga jema ṉg̱oxoéga ixĩxü̃. Rü jemaãcü nanamu ga guxü̃ma ga duü̃xü̃gü rü woo buxü̃ rü e̱xna jaxü̃, rü woo duü̃xü̃gü i muãrü dĩẽruã̱xgüxü̃ rü e̱xna ngearü dĩẽrũã̱xgüxü̃, rü woo duü̃xü̃gü i ngearü coriã̱xgüxü̃ rü e̱xna duü̃xü̃gü i ixããrü coriã̱xgüxü̃.
17 Rü taxucürüwa texé tümaãrü ṯacüca̱x tataxe rü e̱xna tümaãrü ṯacümaã tataxe ga jexguma tümaãrü tügüneme̱xẽwa rü e̱xna tümacatüwa tüxü̃́ natau̱xgu ga jema ṉg̱oxoéga rü e̱xna jema ṉg̱oxoégaarü cua̱xruü̃ ga númeru.
18 Rü nhaã orexü̃ na icuáxü̃ca̱x, rü tanaxwa̱xe na tüxü̃́ nangẽxmaxü̃ i tórü cua̱x. Rü jíxema tüxü̃́ nangẽxmaxẽ i tümaãrü cua̱x, rü name nixĩ i tanangugü i ngẽma númeru i ngẽma ṉg̱oxoéga ixĩxü̃. Erü ngẽma númeru rü wüxi i jatüégachire̱x nixĩ. Rü ngẽma númeru rü 666 nixĩ.
