Apocaríchiu 14:1-20
14 Rü jemawena ichadawenü, rü nüxü̃ chadau ga guma pecaduarü ütanüca̱x jucü ga guma ma̱xpǘne ga Siã́ũgu ãẽ́ganeẽ́tügu chicü. Rü naxü̃tawa najexma ga 144,000 ga duü̃xü̃gü ga nacatüwa ixãẽ́gaxü̃ namaã ga guma pecaduarü ütanüca̱x jucüéga rü Nanatü ja Tupanaẽ́ga.
2 Rü nhu̱xmachi nüxü̃ chaxĩnü ga wüxi ga naga ga tagaxü̃ ga dauxü̃guxü̃ ga naãnewa inaxũxü̃ ga nhama taxü̃ i cotüna i chuxchuxü̃garüü̃ ixĩxü̃ rü nhama poraãcü jaduruanexü̃rüü̃ ixĩxü̃ rü nhama muxũchixü̃ i duü̃xü̃gü i arpawa ípaxetagüxü̃rüü̃ ixĩxü̃.
3 Rü jema 144,000 ga duü̃xü̃gü rü nagu nawijaegü ga wüxi ga jexwacaxü̃xü̃ ga wijae nape̱xewa ga Tupanaãrü tochicaxü̃ rü nape̱xewa ga jema ãgümücü ga dauxü̃cü̱̃ã̱x ga maxẽxü̃ rü nape̱xewa ga jema 24 ga ãẽ̱xgacügü. Rü taxucürüwama texé ga togue nüxü̃ tacua̱xéga ga jema wijae. Rü jema 144,000 ga duü̃xü̃güxicatama nixĩ ga nüxü̃ cua̱xgüxü̃. Rü jema nixĩ ga Tupana nhama ga naãnewa idexechixü̃ na namaxẽxẽẽãxü̃ca̱x.
4 Rü jema nixĩ ga duü̃xü̃gü ga tama nhama ga naãneãrü ngúchaü̃ i chixexü̃maã nügü ãũãchiarü maxü̃ã̱xgüxü̃ rü tama nüxü̃ rüxoexü̃ na Tupanaãxü̃́ jaxõgüãxü̃. Rü nümagü rü jima Tupana Nane ga pecaduarü ütanüca̱x jucüwe narüxĩ i ngextá ínaxũxü̃wa. Rü jemagü nixĩ ga nhama ga naãnecü̱̃ã̱xtanüwa nüxira Tupana naxca̱x taxexü̃ na noxrü rü Naneãrü duü̃xü̃gü i üünexü̃ jixĩgüxü̃ca̱x.
5 Rü jematanüwa rü taguma texé nüxü̃ taxĩnü na doraxü̃ jaxugüxü̃, erü Tupanape̱xewa rü nataxuma i norü chixexü̃.
Orearü ngeruü̃gü ga dauxü̃cü̱̃ã̱xãrü orechiga
6 Rü nhu̱xmachi nüxü̃ chadau ga wüxi ga to ga orearü ngeruü̃ ga dauxü̃guxü̃ ga naãnegu íxexeü̃xü̃ ga ijangexü̃ ga Tupanaãrü ore i guxü̃gutáma ixĩxü̃, na guxü̃ i nachiü̃ãnecü̱̃ã̱xgümaã rü nagúxü̃raü̃xü̃ i duü̃xü̃gümaã rü guxü̃ma i duü̃xü̃gü i nagúxü̃raü̃xü̃ i nagawa idexagüxü̃maã nüxü̃ jaxuxü̃ca̱x. Rü jemaãcü inajange ga jema Tupanaãrü ore na guxü̃ma i nhama i naãnewa maxẽxü̃ i duü̃xü̃gümaã nüxü̃ jaxuxü̃ca̱x.
7 Rü tagaãcü nhanagürü:
“¡Nüxü̃ pemuü̃ẽ ja Tupana rü nüxü̃ peicua̱xüü̃gü! Erü marü nawa nangu na guxü̃ma i duü̃xü̃güna nac̱axü̃. ¡Rü nüxü̃ peicua̱xüü̃gü ja jima naxücü i dauxü̃guxü̃ i naãne rü nhama i naãne rü taxtü i taxü̃ rü guxü̃ma i natüxacügü!” nhanagürü.
8 Rü jemawena nango̱x ga to ga orearü ngeruü̃ ga dauxü̃cü̱̃ã̱x, rü nhanagürü:
“Marü nagu najarüchixe ja jima ĩãne ja taxü̃ne ja Babiróniã, rü nagu napogüe rü najawa̱xtaü̃güxẽẽ ja norü ĩgü. Jerü jema ĩãnecü̱̃ã̱x rü nanachixexẽẽ ga guxü̃ma ga to ga nachiü̃ãnecü̱̃ã̱x ga duü̃xü̃gü. Rü guxü̃ma ga jema duü̃xü̃güxü̃ namu na naxügüãxü̃ca̱x ga jema chixexü̃ ga guma ĩãnewa naxügüxü̃ ga Tupanape̱xewa poraãcü chixexü̃”, nhanagürü.
9 14:9-10 Rü jemawena nango̱x ga to ga orearü ngeruü̃ ga tagaãcü nhaxü̃:“Ngẽxguma chi texé nüxü̃ icua̱xüü̃gu i ngẽma ṉg̱oxo rü naxchicüna̱xãxü̃ ticua̱xüü̃gu rü tügü itaxãxgu na tümacatüwa rü e̱xna tümame̱xẽwa ngẽma ṉg̱oxoégamaã tacua̱xruü̃ã́xü̃, rü Tupana rü poraãcüxü̃chi tá tüxü̃ napocu namaã i ngẽma pocu i guxü̃ãrü jexera ixĩxü̃ i nümatama ja Tupana norü numaã namexẽẽxü̃. Rü üxümaã rü ẽzufre i ij̱auraxü̃maã tá ngúxü̃ tüxü̃ ningexẽẽ nape̱xewa i norü orearü ngeruü̃gü rü nape̱xewa ja jima Nane ga pecaduarü ütanüca̱x jucü.
10 Nüü̃ nadau 14:9
11 Rü naẽma ja jima üxü ja nawa Tupana ngúxü̃ tüxü̃ ingexẽẽ́ne, rü guxü̃gutáma ngẽ́ma nicaixqueecha. Rü bai i íraruwa tá tüxü̃́ narüna i ngẽma ngúxü̃ ja jíxema ngẽma ṉg̱oxoxü̃ rü ngẽma ṉg̱oxochicüna̱xãxü̃ icua̱xüü̃güxe rü tügü ixãxẽ na ngẽma ṉg̱oxoégamaã taxãẽ́gaxü̃. Rü bai i ngunecü rü bai i chütacü tá tüxü̃́ narüna i ngẽma ngúxü̃”, nhanagürü.
12 Rü ngẽmaca̱x ja jíxema Tupanaãrü duü̃xü̃gü ixĩgüxe rü norü orega ĩnüẽxẽ rü Ngechuchuaxü̃́ jaxõgüxe, rü name nixĩ na jaxna namaã taxĩnüẽxü̃ rü tajaxõgüamaxü̃ ega woo ṯacü rü guxchaxü̃ tüxü̃ ngupetügu.
13 Rü nhu̱xmachi nüxü̃ chaxĩnü ga wüxi ga naga ga dauxü̃guxü̃ ga naãnewa inaxũxü̃ ga nhaxü̃ choxü̃:
“¡Naxümatü i nhaã ore i tá cumaã nüxü̃ chixuxü̃! Rü nhamaü̃cüü tá tataãẽgü ja jíxema tórü Coriaxü̃́ meã jaxõgüãcüma juexe. Erü Tupanaãẽ i Üünexü̃ rü nhanagürü: ‘Ngü̃, ngẽmáãcü tá tataãẽgü ja jíxema, erü tá itarüngü̃ẽ nüxna i tümaãrü puracügü. Rü ngẽma mexü̃ i taxügüxü̃ rü tümamaã wüxigu dauxü̃guxü̃ i naãnewa tá naxũ’ ”, nhanagürü.
Nhama i naãnewa najadexechi i ngẽma duü̃xü̃gü i Tupanaãrü ixĩgüxü̃
14 Rü nhu̱xmachi ichadawenü rü nüxü̃ chadau ga wüxi ga caixanexü̃ ga cómüxü̃. Rü jema caixanexü̃ẽ́tüwa narüto ga Tupana Nane ga duü̃xü̃xü̃ ixĩcü. Rü naẽruwa najexma ga wüxi ga norü nga̱xcueruü̃ ga uirunaxca̱x. Rü name̱xwa najexma ga wüxi ga cüchi ga ínapomaguxü̃ ga te̱xechixü̃.
15 Rü Tupanapatawa ínaxũxũ ga wüxi ga to ga orearü ngeruü̃ ga tagaãcü nhaxü̃ nüxü̃ ga guma caixanexü̃ẽ́tüwa rütocü:
“¡Inaxügü na cunadexü̃ i ngẽma duü̃xü̃gü i cuxrü ixĩgüxü̃! Erü marü nawa nangu na cugüxü̃tawa cunanaxü̃, erü ngẽma curü duü̃xü̃gü i nhama i naãnewa ngẽxmagüxü̃ rü ínamemare na cunadexü̃”, nhanagürü.
16 Rü nhu̱xmachi ga guma jema caixanexü̃ẽ́tüwa rütocü rü nhama trigu i buxuxü̃rüü̃ naãneẽ́tügu ngĩmaã najabuãchi ga norü cüchi. Rü nanade ga jema norü duü̃xü̃gü ga nhama ga naãnewa jexmagüxü̃.
17 Rü nhu̱xmachi dauxü̃guxü̃ i naãnewa ngẽxmane ja Tupanapatawa ínaxũxũ ga wüxi ga to ga orearü ngeruü̃ ga nüxü̃́ najexmacü ga wüxi ga cüchi ga ínapomaguxcü ga te̱xechixcü.
18 Rü jema pumaraarü gute̱xeruü̃taxmüwa ínaxũxũ ga wüxi ga to ga orearü ngeruü̃ ga üxümaã icuáxü̃. Rü nüma rü tagaãcü nhanagürü nüxü̃ ga jema to ga orearü ngeruü̃ ga jema cüchi ga ínapomaguxcü ga te̱xechixcü nüxü̃́ jexmaxü̃:
“¡Inaxügü na cunadexü̃ i ngẽma duü̃xü̃gü i jéa naãnewa ngẽxmagüxü̃ i tama Tupanaãrü ixĩgüxü̃! Erü marü nawa nangu na Tupana napocuexü̃”, nhanagürü.
19 Rü jema orearü ngeruü̃ rü nhama ga naãneẽ́tügu ngĩmaã najabuãchi ga norü cüchi. Rü najadexechi ga jema duü̃xü̃gü ga tama Tupanaãrü ixĩgüxü̃ ga nhama ga naãnewa jexmagüxü̃. Rü wüxi ga taxü̃ ga nachicagu nanawocu na jexma Tupana norü numaã naḏaixü̃ca̱x, nhama uwagü ima̱ĩ̱xtüü̃xü̃rüü̃.
20 Rü jema nachica ga ĩãnepechinüwa jexmaxü̃gu nanadai. Rü guma nagü ga jéma íjaxüchicü, rü 300 ga quirúmetru inajarübaichi, rü wüxi ga metruarü ngãxü̃ nixĩ ga norü mátama ga guma nagü.
