Apocaríchiu 16:1-21
16 Rü nhu̱xmachi nüxü̃ chaxĩnü ga wüxi ga naga ga tagaãcü guma Tupanapatawa inaxũxü̃ ga nhaxü̃ nüxü̃ ga jema 7 ga orearü ngeruü̃gü:
“¡Ngẽ́ma pexĩ, rü naãneẽ́tüwa pejabagüãcu i ngẽma 7 i tazagü i Tupanaãrü nu i ãũcümaxü̃maã ixããcuxü̃!” nhanagürü.
2 Rü jéma naxũ ga wüxi ga Tupanaãrü orearü ngeruü̃, rü naãneẽ́tügu najabaãcu ga norü taza. Rü guxü̃ma ga duü̃xü̃gü ga jema ṉg̱oxoégamaã ixãẽ́gaxü̃ rü jema ṉg̱oxochicüna̱xãxü̃ icua̱xüü̃güxü̃, rü nawa inajarügogü ga taixna ga ngu̱xuchixü̃ ga taguma ixẽxü̃.
3 Rü jema norü taxre ga orearü ngeruü̃, rü taxü̃ ga taxtüétügu najabaãcu ga norü taza. Rü nagüxü̃ nananguxuchi ga dexá, rü nhama wüxi i duü̃xü̃ i texé imáxü̃gürüü̃ nixĩ ga dexá. Rü guxü̃ma ga ṯacü ga taxtüwa maxẽxü̃ rü najue.
4 Rü jema norü tamaẽ̱xpü̱x ga orearü ngeruü̃ rü natügüétügu rü natüxacügüétügu najabaãcu ga norü taza. Rü guxü̃ma ga jema natügü rü natüxacügü, rü nagüxü̃ nanaca̱xichi.
5 Rü nhu̱xmachi nüxü̃ chaxĩnü ga jema Tupanaãrü orearü ngeruü̃ ga guxü̃ma ga dexámaã icuáxü̃ ga nhaxü̃:
“Pa Torü Cori ja Tupana ja Üünecü ja Woetama Jexmaẽchacü rü Nhu̱xma Ngẽxmaẽchacü, cuma rü wüxi i mexü̃ cuxü na ngẽmaãcü dexá nagüxü̃ cunaca̱xichixẽẽxü̃ naxchaxwa i ngẽma duü̃xü̃gü.
6 Jerü nümagü rü nanadai ga jema curü duü̃xü̃gü rü curü orearü uruü̃gü, rü inanaba ga nagü. Rü nhu̱xma i cuma rü wüxi i mexü̃ nixĩ i cuxüxü̃ na ngẽma dexá nagüxü̃ cunaca̱xichixẽẽxü̃ na nawa naxaxegüxü̃ca̱x. Jerü jema nixĩ ga jema nanaxwa̱xegüxü̃ rü jemaca̱x nixĩ ga curü duü̃xü̃güxü̃ naḏaixü̃”, nhaxü̃.
7 Rü nüxü̃ chaxĩnü ga wüxi ga naga ga jema pumaraarü gute̱xeruü̃taxmüwa inaxũxü̃ ga nhaxü̃:
“Ngü̃, Pa Cori ja Tupana ja Guxü̃ãrü Jexera Poracüx, aixcuma nixĩ i namexü̃ i ngẽma cuxüxü̃”, nhaxü̃.
8 Rü jema norü ãgümücü ga orearü ngeruü̃ rü üa̱xcüétügu najabaãcu ga norü taza. Rü jemaãcü nanaporaxẽẽ ga üa̱xcü na jexeraãcü nangu̱xemaxü̃ca̱x, na jema norü naĩẽmaxü̃maã ínaguãxü̃ca̱x ga duü̃xü̃gü.
9 Rü guxü̃ma ga duü̃xü̃gü rü poraãcü nüxü̃́ nangu̱xema, notürü tama nüxü̃ narüxoe ga nacüma ga chixexü̃ rü tama Tupanaxü̃ nicua̱xüü̃gü. Rü naguxchigagüama namaã ga Tupana ja guxü̃ma i ngẽma pocuruü̃maã icuácü.
10 Rü jema norü wüxime̱ẽ̱xpü̱x ga orearü ngeruü̃, rü jema ṉg̱oxoarü tochicaxü̃ẽ́tügu najabaãcu ga norü taza. Rü guxü̃wama ga ngextá ãẽ̱xgacü íjiĩxü̃wa ga jema ṉg̱oxo, rü naxẽãne. Rü jema na poraãcü nüxü̃́ nangúxü̃ ga duü̃xü̃gü, rü nügü nangṍõrü conüã̱xgü.
11 Notürü woo jemaãcü nüxü̃ na nangupetüxü̃ ga duü̃xü̃gü, rü tama nüxü̃ narüxoechaü̃ ga jema chixexü̃ ga naxügüxü̃. Notürü jema na poraãcü nüxü̃́ nangúxü̃ ga norü taixnagü, rü naguxchigagüama namaã ga Tupana ja dauxü̃gucü.
12 Rü jema norü 6 ga orearü ngeruü̃, rü jema taxtü ga Eufráteétügu najabaãcu ga norü taza. Rü inajache ga jema taxtü na wüxi ga nama na jiĩxü̃ca̱x naxca̱x ga jema nachiü̃ãnegüarü ãẽ̱xgacügü ga üa̱xcü íjarügoxü̃wa ne ĩxü̃.
13 Rü nüxü̃ chadau rü jema dragã́ũã̱xwa, rü jema nüxĩraü̃xü̃ ga ṉg̱oxoa̱xwa, rü jema to ga ṉg̱oxo ga jema orearü uruü̃netaa̱xwa, rü wüxia̱xwachigü ínaxũxũ ga wüxi ga naãẽ ga chixexü̃ ga nhama curururüü̃ ixĩxü̃.
14 Rü jema nixĩ ga naãẽgü ga jema ṉg̱oxogü ga naxügüxü̃ ga jema taxü̃ ga cua̱xruü̃gü ga duü̃xü̃gü taxucürüwa ügüxü̃. Rü jema ṉg̱oxogü rü ínachoxü̃ na nangutaque̱xexẽẽgüãxü̃ca̱x i guxü̃ma i nhama i naãnewa ngẽxmagüxü̃ i nachiü̃ãnegüarü ãẽ̱xgacügü na Tupana ja Guxü̃ãrü Jexera Poracümaã nügü nadaixü̃ca̱x i ngẽxguma nawa nanguxgu i naãneãrü gu̱x.
15 Notürü dücax, rü ípexuãẽgü erü tórü Cori ja Ngechuchu ja Cristu rü nhanagürü:
“Chama rü ngürüãchi taxúetáma choxü̃ ínaṉg̱uxẽẽjane íchangu, nhama wüxi i ngĩ́ta̱xáxü̃ ínguxü̃rüü̃. Rü tataãẽ ja jíxema ímemarexe nhama wüxi i duü̃xü̃ i naxchiru ímexẽẽxü̃rüü̃ na tama tangexchiruxü̃ca̱x rü taxãnexü̃ca̱x i ngẽxguma íchanguxgu”, nhanagürü.
16 Rü jema ṉg̱oxogü, rü nanangutaque̱xexẽẽ ga guxü̃ma ga nhama ga naãnewa jexmagüxü̃ ga nachiü̃ãnecü̱̃ã̱xgüarü ãẽ̱xgacügü. Rü jema nachica ga nawa nangutaque̱xegüxü̃, rü Armajedṍũgu naxãẽ́ga i Judéugügawa.
17 Rü jema norü 7 ga orearü ngeruü̃, rü buanecügumare najabaãcu ga norü taza. Rü guma Tupanapata ja dauxü̃guxü̃ i naãnewa ngẽxmanewa inanaxũ ga wüxi ga naga ga tagaxü̃ ga jema Tupanaãrü tochicaxü̃wa inaxũxü̃ ga nhaxü̃:
“Marü ningu”, nhaxü̃.
18 Rü niba̱i̱xbe̱xane, rü poraãcü nicuxcuane, rü niduruane. Rü poraãcü naxĩã̱xãchiane. Rü noxri Tupana duü̃xü̃güxü̃ ü̱xgumama rü taguma najexma ga wüxi ga ĩã̱xãchiane ga jemarüü̃ poraxü̃.
19 Rü guma ĩãne ga taxü̃ne ga Babiróniã, rü tamaẽ̱xpü̱xgu ningüxjeane. Rü guma ĩãnegü ga nhama ga naãnewa jexmagüne rü niwa̱xtaü̃gü. Rü Tupana rü nüxna nacuaxãchi ga guma ĩãne ga Babiróniããrü chixexü̃. Rü jemaca̱x norü numaã poraãcü nanapocu ga guma ĩãne, jerü poraãcüxü̃chi namaã nanu.
20 Rü guxü̃ma ga capaxũgü rü guxü̃nema ga ma̱xpǘnegü, rü inajarüxogü.
21 Rü dauxü̃wa narüji ga dejuxü̃ ga itapütaxü̃, rü duü̃xü̃güétügu naji. Rü wüxipütachigü ga jema dejuxü̃, rü 40 ga quirugu nixĩ ga najaxü̃. Rü ga duü̃xü̃gü rü Tupanamaã naguxchigagü nagagu ga jema pocuruü̃ ga dejuxü̃, jerü poraãcü nüxü̃́ nangu̱x ga jema pocu ga Tupana namaã napocuexü̃.
