Apocaríchiu 17:1-18
17 Rü jema 7 ga orearü ngeruü̃gü ga nüxü̃́ jexmagüxü̃ ga 7 ga tazagü, rü jematanüwa rü wüxi ga orearü ngeruü̃, rü chauxca̱x nixũ, rü nhanagürü choxü̃:
“¡Nuã naxũ! Rü tá cuxü̃ nüxü̃ chadauxẽẽ i ṯacü tá nixĩ i ngĩrü pocu i ngẽma nge i ngeãẽxü̃chicü i taxü̃ i dexágüétüwa rüto̱xcü.
2 Rü nhama i naãnewa ngẽxmagüxü̃ i nachiü̃ãnegüarü ãẽ̱xgacügü, rü ngĩmaã namaxẽ, rü jemaãcü poraãcü chixexü̃ naxügü. Rü guxü̃ma i nhama i naãnecü̱̃ã̱x, rü ngĩrü chixexü̃ nüxna naxüe”, nhanagürü.
3 Rü jexguma Tupanaãẽ i Üünexü̃ jemaãcü choxü̃ ngo̱xetüxẽẽgu, rü jema orearü ngeruü̃ rü wüxi ga nachica ga ngextá taxúema íxãpataxü̃wa choxü̃ naga. Rü jéma ngĩxü̃ chadau ga wüxi ga nge ga wüxi ga ṉg̱oxo ga dauxü̃ẽ́tüwa rüto̱xcü. Rü jema ṉg̱oxo rü guxü̃wama naxãẽ́gaxü̃ne, rü jema naẽ́gagü rü Tupanamaã naguxchiga. Rü 7 nixĩ ga naẽru rü 10 ga naxchatacu̱xre.
4 Rü jema nge rü wüxi ga naxchiru ga dauxracharaxü̃ rü dauxü̃maã ixãxchiru. Rü uirumaã rü nutagü ga mexẽchicümaã ingã̱xãẽ. Rü ngĩxme̱xwa ngĩxü̃́ najexma ga wüxi ga taza ga uirunaxca̱x. Rü jema taza rü namaã naxããcu ga nagúxüraü̃xü̃ ga jema Tupanape̱xewa chixexü̃ rü nagúxüraü̃xü̃ ga chixexü̃gü ga jema nge üxü̃.
5 Rü ngĩcatügu naxümatü ga wüxi ga naẽ́ga ga taxúema nüxü̃ cuáxü̃ na nhuxũ nhaxü̃chiga jiĩxü̃. Rü jema naẽ́ga rü nhanagürü:
“Taxü̃ne ja Babiróniã i naẽ i guxü̃ma i duü̃xü̃gü i chixexü̃ ügüxü̃ rü guxü̃ma i chixexü̃ i nhama i naãnewa ngẽxmaxü̃”, nhanagürü.
6 Rü ngĩxü̃ chadau ga jema nge ga na nangãxü̃xü̃ namaã ga guma nagü ga jema duü̃xü̃gü ga Tupanaãrü ixĩgüxü̃ rü jema duü̃xü̃gü ga Ngechuchuarü orexü̃ na jaxugüxü̃ca̱x ḏaixü̃. Rü jexguma jemaxü̃ chada̱xgu, rü chaḇaixãchi.
7 Rü jexguma ga jema orearü ngeruü̃ rü nhanagürü choxü̃:
“¿Ṯacüca̱x cuḇaixãchi? Dücax, tá cumaã nüxü̃ chixu na ṯacüchiga jiĩxü̃ i ngẽma nge, rü ṯacüchiga jiĩxü̃ i ngẽma ṉg̱oxo i 7 eruxü̃ rü 10 chatacu̱xrexü̃ i naẽ́tüwa natoxü̃.
8 Rü ngẽma ṉg̱oxo i nüxü̃ cudauxü̃, rü jema nixĩ ga nuxcümaxü̃chi maxchiréxü̃ notürü nhu̱xma rü marü juxü̃ rü ngẽma ãxmaxü̃ i taxuguma ijacuáxü̃wa ngẽxmaxü̃. Notürü paxa tá ngẽ́ma íxũxũxü̃, rü nhu̱xmachi ngẽma nachica i guxü̃gutáma nagu napocuxü̃wa tá ũxü̃. Rü ngẽma ṉg̱oxomaã tá naḇaixãchiãẽgü i ngẽma duü̃xü̃gü i nhama i naãnewa maxẽxü̃ i tama nawa ngo̱xégagüxü̃ i ngẽma Tupanaãrü popera i noxritama naãne ixügügu Tupana nagu jawügüxü̃ i ngẽma duü̃xü̃gü i nüxü̃́ nangẽxmaxü̃ i maxü̃ i taguma gúxü̃. Rü nümagü i ngẽma duü̃xü̃gü rü aixcuma tá namaã naḇaixãchiãẽgü i ngẽxguma nüxü̃ nadaugügu i ngẽma ṉg̱oxo ga nuxcümaxü̃chi maxchiréxü̃ rü juxü̃ notürü wena táxarü ínguxü̃.
9 Rü nhaã nixĩ i wüxi i ore naxca̱x i ngẽma duü̃xü̃gü i nüxü̃́ natauxchaxü̃ na nüxü̃ nacua̱xgüxü̃. Rü ngẽma 7 i naẽru i ngẽma ṉg̱oxo, rü jima nixĩ ja 7 ja ma̱xpǘnechiga. Rü jima 7 ja ma̱xpǘneẽ́tüwa nixĩ i natoxü̃ i ngẽma nge. Rü ngẽxgumarüü̃ ta i ngẽma naẽrugü, rü 7 i nachiü̃ãnegüarü ãẽ̱xgacügüchiga nixĩ.
10 Rü wüxime̱ẽ̱xpü̱x i ngẽma ãẽ̱xgacügü rü marü togü nüxü̃ narüjexeragü, rü nhu̱xma rü marü tama ãẽ̱xgacügü nixĩgü. Rü ngẽma norü 6 i ngẽma ãẽ̱xgacügü, rü nüma rü nhu̱xma rü ãẽ̱xgacü nixĩ. Rü ngẽma norü 7 tá nixĩ i jixcüra ínguxü̃. Notürü ngẽxguma ínanguxgu i ngẽma norü 7 i nawa ijacuáxü̃ i ngẽma ãẽ̱xgacügü, rü paxaãchimare tá nixĩ i ãẽ̱xgacü jiĩxü̃.
11 Rü ngẽma ṉg̱oxo ga nuxcümaxü̃chi maxchiréxü̃ rü nhu̱xma rü marü juxü̃, rü ngẽma nixĩ i norü 8 i ngẽma ãẽ̱xgacügü. Rü nüma rü ngẽma 7 tanüxü̃ nixĩ. Notürü i nüma rü ngẽma nachica i guxü̃gutáma nagu napocuxü̃wa naxũ.
12 Rü ngẽma 10 i naxchatacu̱xre i nüxü̃ cudauxü̃, rü 10 i nachiü̃ãnegüarü ãẽ̱xgacügüchiga nixĩ. Notürü i nümagü rü taũta inanaxügüe na duü̃xü̃gümaã inacua̱xgüxü̃. Notürü jixcüra tá nanajauxgü i pora na wüxitátama i ngora ngẽma ṉg̱oxomaã wüxigu ãẽ̱xgacügü jixĩgüxü̃ca̱x.
13 Rü ngẽma 10 i ãẽ̱xgacügü rü wüxigu nagu narüxĩnüẽ na ngẽma ṉg̱oxona naxãgüãxü̃ca̱x i norü pora, na ngẽma ṉg̱oxo namaã icuáxü̃ca̱x.
14 Rü nhu̱xmachi i ngẽma ãẽ̱xgacügü rü ngẽma ṉg̱oxo rü tá nügü nadai namaã ja jima Tupana Nane ga pecaduarü ütanüca̱x jucü. Notürü ja jima Tupana Nane rü tá nüxü̃ narüjexera, erü nüma rü guxü̃ i corigüarü Cori nixĩ, rü guxü̃ i nachiü̃ãnegüarü ãẽ̱xgacügüarü Ãẽ̱xgacü nixĩ. Rü jíxema namücügü ixĩgüxe, rü jíxemagü tixĩgü ja Tupana tüxü̃ idexechixe rü tümaca̱x nac̱axe. Rü tümagü rü aixcuma naga taxĩnüẽ”, nhanagürü choxü̃.
15 Rü jema orearü ngeruü̃ rü nhanagürü ta choxü̃:
“Ngẽma taxü̃ i dexá i nüxü̃ cudauxü̃ i naẽ́tüwa natoxü̃ i ngẽma nge i ngẽãẽxü̃chicü, rü nagúxü̃raü̃xü̃ i duü̃xü̃güchiga nixĩ, rü guxü̃ma i duü̃xü̃gü i to i nagawa idexagüxü̃chiga nixĩ, rü guxü̃ma i nachiü̃ãnecü̱̃ã̱xgü i duü̃xü̃güchiga nixĩ.
16 Rü ngẽma 10 i naxchatacu̱xre i nüxü̃ cudauxü̃ i nüxü̃́ ngẽxmaxü̃ i ngẽma ṉg̱oxo, rü tá ngẽma nge i ngẽãẽxü̃chicüchi naxaie. Rü tá ngẽma ngena nanapuxü̃ i guxü̃ma i ṯacü i ngĩxü̃́ ngẽxmaxü̃, rü ngẽmaãcü ngexchiruãcüma tá ngẽxma irüxã̱ũ̱x. Rü tá ngĩxü̃ nangõ̱xgü, rü üxüwa tá ngĩxü̃ nigugü.
17 Jerü ga Tupana rü jema 10 ga ãẽ̱xgacügüxü̃ nagu narüxĩnüẽxẽẽ na naxügüãxü̃ca̱x i ngẽma nanaxwa̱xexü̃ i nüma ja Tupana. Rü ngẽmaca̱x i ngẽma ãẽ̱xgacügü, rü tá wüxigu nagu narüxĩnüẽ na ngẽma ṉg̱oxoxü̃ naporaxẽẽgüxü̃ na norü ãẽ̱xgacü jiĩxü̃ca̱x nhu̱xmatáta Tupana janguxẽẽ i ngẽma nüxü̃ jaxuxü̃.
18 Rü ngẽma nge i ngĩxü̃ cuda̱xcü, rü jima nixĩ ja jima ĩãne ja taxü̃ne ja guxü̃ma i nachiü̃ãnegüarü ãẽ̱xgacügümaã icuáxü̃ne”, nhanagürü.
