Apocaríchiu 18:1-24
18 Rü jemawena nüxü̃ chadau ga wüxi ga to ga orearü ngeruü̃ ga dauxü̃guxü̃ ga naãnewa írüxĩxü̃ ga taxü̃ ga ãẽ̱xgacü ixĩxü̃. Rü jema orearü ngeruü̃ãrü j̱auracüüxü̃maã nangóone ga nhama ga naãne.
2 Rü tagaãcü nhanagürü:
“Marü nagu najarüchixe ja jima ĩãne ja taxü̃ne ja Babiróniã. Rü nhu̱xma rü ṉg̱oxogüchiü̃ nixĩ rü nagúxü̃raü̃xü̃ i naãẽ i chixexü̃güchiü̃ nixĩ. Rü nhu̱xma rü ngẽxma naxãchiü̃ i nagúxü̃raü̃xü̃ i ngurucugü rü werigü i chixexü̃ i duü̃xü̃gü nachi aiexü̃.
3 Jerü guxü̃ma ga nachiü̃ãnecü̱̃ã̱xgü, rü guma ĩãneãrü chixexü̃ nüxna naxüe. Rü norü ãẽ̱xgacügü, rü jéma poraãcü chixri namaxẽ. Rü guxü̃ma ga nhama ga nachiü̃ãnecü̱̃ã̱xgü ga taxetanüxü̃gü, rü nügü namuãrü dĩẽruã̱xẽẽgü namaã ga jema ĩãneãrü jemaxü̃gü ga tama Tupanape̱xewa mexü̃”, nhanagürü.
4 Rü nhu̱xmachi nüxü̃ chaxĩnü ga to ga naga ga dauxü̃guxü̃ ga naãnewa inaxũxü̃ ga nhaxü̃:
“¡Dücax i guxãma i pema ja chorü duü̃xü̃gü ixĩgüxe, rü ípechoxü̃ nawa ja jima ĩãne na tama ngẽma ĩãnecü̱̃ã̱xrüü̃ pepecaduã̱xgüxü̃ca̱x rü tama nagu pej̱ixü̃ca̱x i ngẽma pocu i tá jima ĩãnewa nguxü̃!
5 Erü ngẽma ĩãnecü̱̃ã̱xãrü pecadugü, rü nügüétüwa narünucue, rü düxwa marü dauxü̃guxü̃ i naãnewa nangu. Rü nhu̱xma ja Tupana rü nüxna nacua̱xãchi i ngẽma chixexü̃ i naxügüxü̃, rü ngẽmaca̱x tá jima ĩãnexü̃ napocu.
6 Rü ngẽma poraãcü chixexü̃ na naxügüxü̃rüü̃, rü ngẽxgumarüü̃ tá ta nixĩ na chixexü̃maã nüxü̃́ penaxütanüxü̃ i pemax. ¡Rü nhu̱xma na ngẽma ĩãnecü̱̃ã̱x togümaã chixexü̃ naxügüxü̃, rü taxree̱xpü̱xcüna tá penachixexẽẽ i pemax! ¡Rü ngẽma chixexü̃ ga jema ĩãnecü̱̃ã̱x togüca̱x mexẽẽgüxü̃, rü pema rü taxree̱xpü̱xcüna tá ngẽmaãcü naxca̱x penamexẽẽ!
7 ¡Rü ngẽma na nügü jacua̱xüü̃güxü̃ rü mexẽchixü̃wa na namaxẽxü̃, rü ngẽxgumarüü̃ tá ta nixĩ na ngúxü̃ nüxü̃ peingexẽẽgüxü̃ rü ngechaü̃ nüxü̃ peingexẽẽgüxü̃! Erü nhu̱xma i ngẽma ĩãnecü̱̃ã̱x rü nügüãẽwa nhanagürügü: ‘Jixema rü nhama wüxi i ãẽ̱xgacürüü̃ mexẽchixü̃wa tangẽxmagü. Rü tagutáma wüxi i jutexü̃rüü̃ tangechaü̃gü’, nhanagürügü nügüãẽwa i ngẽma ĩãnecü̱̃ã̱x.
8 Rü ngẽmaca̱x tá nixĩ i wüxitátama i ngunexü̃gu ínanguxü̃ i ngẽma ĩãneãrü pocuruü̃. Rü ngẽma ĩãnecü̱̃ã̱x rü ngúanemaã tá najue, rü poraãcü tá nangechaü̃gü, rü poraãcü taija tá nüxü̃́ nangu̱x, rü norü ĩãne rü üxümaã tá nigu. Erü naporaxü̃chi ja jima Tupana ja guxü̃ãrü Cori ixĩcü i ngẽma ĩãnexü̃ pocucü”, nhanagürü ga jema naga.
9 Rü ngẽma nachiü̃ãnegüarü ãẽ̱xgacügü ga jema ĩãnewa poraãcü chixri maxẽxü̃ rü mexẽchixü̃wa jexmagüxü̃, rü tá poraãcü norü ngechaü̃maã jima ĩãneca̱x naxauxe i ngẽxguma nüxü̃ nadaugügu i ngẽma üxüema i namaã jaxaxü̃.
10 Notürü ngẽma ãẽ̱xgacügü rü ngẽma pocuxü̃ na namuü̃ẽxü̃cha̱xwa rü tá jaxü̃wa nüxü̃ narüdaunü, rü nhanagürügü tá:
“Cungechaü̃tümüü̃, Pa Taxü̃ne ja Ĩãne ja Babiróniã ja Guxü̃ i Nachiü̃ãnegümaã Porachiréne. Erü wüxitama i ngoragu cuxca̱x ínangu i curü pocu”, nhanagürügü tá.
11 Rü guxü̃ma i nhama i naãnecü̱̃ã̱x i taxetanüxü̃, rü tá poraãcü norü ngechaü̃maã naxca̱x naxauxe ja jima ĩãne. Erü marü taxúetáma naxca̱x nüxü̃́ tataxe i norü ngẽmaxü̃gü i ngẽ́ma nangegüxü̃.
12 Rü marü taxúetáma naxca̱x nüxü̃́ tataxe i norü uiru, rü norü dĩẽrumü, rü norü nutagü i mexẽchixü̃, rü naxpügü i mexẽchixü̃ i dauxracharaxü̃ rü idauxcharaü̃ i ngẽ́ma nangegüxü̃. Rü ngẽxgumarüü̃ ta taxúetáma naxca̱x nüxü̃́ tataxe i nagúxü̃raü̃xü̃ i norü naĩxchipanügü i paacaxü̃, rü norü ngẽmaxü̃gü i marfĩnaxca̱x rü mürapewa i mexẽchixü̃naxca̱x rü cobrinaxca̱x rü ferunaxca̱x rü nutanaxca̱x i ngẽ́ma nangegüxü̃.
13 Rü taxúetáma naxca̱x nüxü̃́ tataxe i norü canela rü togü i norü üexü̃wemüxü̃gü i paacaxü̃, rü pumarate̱xe i guruü̃ ixĩxü̃, rü togü i pumaragü i paacaxü̃, rü wĩũgü rü chixü̃gü, rü farinha i mexẽchixü̃, rü trigu i ngẽ́ma nangegüxü̃. Rü ngẽxgumarüü̃ ta ngẽ́ma nanagagü i wocagü, rü carnerugü, rü cowarugü, rü carrugü i cowaru itúchigüxü̃, rü duü̃xü̃gü i puracüruü̃gü. Rü ngẽmaãcü woo duü̃xẽgü rü ngẽ́ma tüxü̃ nagagü na tümamaã nataxegüxü̃ca̱x.
14 Rü ngẽma taxetanüxü̃, rü nhanagürügü tá nüxü̃ ja jima ĩãne:
“Cuwa rü marü nataxuma i ngẽma ori i curü duü̃xü̃güarü me ixĩxü̃. Rü marü nataxuma i guxü̃ma i ngẽma meruü̃gü ga noxri cuxü̃́ jexmaxü̃, rü tagutáma wenaxãrü cuxü̃́ nangẽxma”, nhanagürügü tá.
15 Rü ngẽma taxetanüxü̃ i guxü̃ma i ngẽma origümaã rü ngẽma meruü̃gümaã taxegüxü̃ rü guma ĩãnegu nügü muãrü dĩẽruã̱xẽẽxü̃chigüxü̃, rü jaxü̃wa tátama nüxü̃ narüdaunü ja jima ĩãne, erü nüxü̃ namuü̃ẽ i ngẽma pocu i jima ĩãnexü̃ üpetüxü̃. Rü tá poraãcü norü ngechaü̃maã naxauxe.
16 Rü nhanagürügü tá:
“Nangechaü̃tümüü̃ ja jima ĩãne ja taxü̃ne. Erü noxri rü nhama wüxi i nge i mexẽchixü̃ i naxchiru i dauxracharaxü̃ rü dauxcharaxü̃maã ãxchirucü i uirumaã rü nutagü ja mexẽchicümaã nga̱xãẽxcürüü̃ nixĩ.
17 Notürü ngürüãchi nagu̱x i guxü̃ma i ngẽma ĩãneãrü meruü̃gü”, nhanagürügü tá. Rü guxü̃ne ja wapurugüarü ãẽ̱xgacügü, rü guxü̃ma i norü duü̃xü̃gü ja jima wapuruwa puracüexü̃, rü guxü̃ma i duü̃xü̃gü ja jima wapurugu ĩxü̃, rü guxü̃ma i taxetanüxü̃gü i wapurugu jarüxĩĩü̃xü̃, rü jaxü̃wa tátama najachaxgütanüãchi, rü ngẽ́ma tá nüxü̃ narüdaunü.
18 Rü ngẽxguma nüxü̃ nadaugügu i norü caxixü̃ ja jima üxü ja jima ĩãne namaã ixaxü̃ne, rü tagaãcü tá nhanagürügü:
“Nataxuma ja náĩ ja ĩãne ja daa ĩãne ja taxü̃nerüü̃ ixĩxü̃ne”, nhanagürügü.
19 Rü norü ngechaü̃maã nügüétügu tá waixü̃mü nagünagügü, rü tá poraãcü naxauxe, rü tagaãcü nhanagürügü tá:
“Nangechaü̃tümüü̃ ja jima ĩãne ja taxü̃ne. Rü noxri rü norü jemaxü̃gümaã nügü nimuãrü dĩẽruã̱xẽẽgü ga guxü̃ne ga wapurugüarü joragü. Notürü i nhu̱xma rü ngürüãchi wüxi i ngoragutama rü inajarüxo i guxü̃ma i ngẽma.
20 Notürü nhu̱xma na napocuxü̃ ja jima ĩãne, rü name nixĩ i petaãẽgü i pema i dauxü̃guxü̃ i naãnewa ngẽxmagüe, rü pema i Tupana pexü̃ imugüe, rü pema i Tupanaãrü orexü̃ ixugüe, rü guxãma i pema i Tupanaãrü duü̃xü̃gü ixĩgüe. Erü nhu̱xma na napocuxü̃ ja jima ĩãne, rü ngẽmaãcü Tupana pexü̃ naxütanü naxca̱x ga jema chixexü̃ ga pemaã naxügüxü̃ ga guma ĩãnecü̱̃ã̱x”, nhanagürügü.
21 Rü nhu̱xmachi wüxi ga Tupanaãrü orearü ngeruü̃ ga dauxü̃cü̱̃ã̱x rü nanangenagü ga wüxi ga nuta ga taxüchicü ga nhama ṯacüarü caruü̃rüü̃ ixĩcü. Rü jema orearü ngeruü̃ rü taxtü ga taxü̃gu nananha ga guma nuta ga taxüchicü, rü nhanagürü:
“Ngẽxgumarüü̃ tá cuixĩ na icujarüxoxü̃ Pa Ĩãne ja taxü̃ne ja Babiróniã na tagutáma texé wena cuxü̃ nadauxü̃.
22 Rü tagutáma wena curü namagüwa texé nüxü̃ taxĩnü i paxetaruü̃gü i arpagü rü wowerugü rü cornetagü. Rü ngẽxgumarüü̃ ta cuwa nataxutáma i puracütanüxü̃gü i ṯacüwa puracüexü̃, rü tagutáma texé nüxü̃ taxĩnü na cuwa ínapuracüexü̃ i chawüarü caruü̃gü.
23 Rü marü tagutáma texé nüxü̃ tadau i cuwa i omü. Rü marü tagutáma texé nüxü̃ taxĩnü i ngĩgüchigaarü petagüarü cuxcuane. Rü ngẽmaãcü tá cumaã nangupetü woo ga noxri rü jema taxetanüxü̃ ga cuwa taxegüxü̃ rü guxü̃ma ga togü ga taxetanüxü̃ãrü jexera nixĩgü. Rü ngẽmaca̱x tá poraãcü cupocu nagagu ga jema chixexü̃ ga namaã cunawomüxẽẽxü̃ ga guxü̃ma ga togü ga nachiü̃ãnecü̱̃ã̱x ga duü̃xü̃gü”, nhanagürü.
24 Jerü guma ĩãnecü̱̃ã̱x ga duü̃xü̃gü nixĩ ga naḏaixü̃ rü inabaxẽẽgüxü̃ ga nagü ga Tupanaãrü orearü uruü̃gü rü jema duü̃xü̃gü ga Tupanaãrü ixĩgüxü̃ rü guxü̃ma ga duü̃xü̃gü ga nhama ga naãnegu Tupanaarü oregagu naḏaixü̃.
