Apocaríchiu 2:1-29
2 “Rü nhu̱xma chanaxwa̱xe i ngẽma Epéchiuwa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü, rü nhacurügü nüxü̃: ‘Nhaã nixĩ i norü ore ja jima ngẽma jaxõgüxü̃tanügu jarüxũũü̃cü rü norü tügüneme̱xẽmaã nüxna daucü i ngẽma jaxõgüxü̃ãrü ãẽ̱xgacügü’.
2 Rü nhanagürü i nümax:
‘Chama nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x na nhuxãcü poraãcü choxü̃́ cupuracüxü̃ rü nhuxãcü cunaxüamaxü̃ i ngẽma puracü woo ngẽmaca̱x muxü̃ma i guxchaxü̃gü cuxca̱x ínguxgu. Rü nüxü̃ chacua̱x na tama curü me jiĩxü̃ i ngẽma duü̃xü̃gü i chixexü̃ ügüxü̃. Rü ngẽxgumarüü̃ ta nüxü̃ chacua̱x na meã cunangugüarü maxü̃ã́xü̃ i ngẽma duü̃xü̃gü i nügü ixugüxü̃ na Tupana imugüxü̃ jixĩgüxü̃ notürü tama aixcuma ixĩgüxü̃ na Tupana jamugüxü̃. Rü cuma rü nüxü̃ cucua̱xama na idorata̱a̱xmaregüxü̃ jixĩgüxü̃.
3 Rü woo naguxcha i ngẽma puracü i chauxca̱x cuxüxü̃, notürü cunaxüama. Rü woo chaugagu poraãcü ngúxü̃ na cuingexü̃, notürü jaxna namaã cuxĩnü, rü tama nüxü̃ curüchau.
4 Notürü nangẽxma i wüxi i cuxüxü̃ i tama chorü me ixĩxü̃. Rü ngẽma nixĩ na tama noxrirüü̃ choxü̃ cungechaü̃xü̃ i nhu̱xmax.
5 Rü ngẽmaca̱x i nhu̱xma na ngẽma chixexü̃gu cunguxü̃, rü name nixĩ i nüxna cucua̱xãchi na nhuxãcü choxü̃ cungechaü̃xü̃ ga noxrix. Rü name nixĩ i nüxü̃ curüxo i curü chixexü̃ rü noxrirüü̃ choxü̃ cungechaü̃ãcüma mexü̃ cuxü. Notürü ngẽxguma chi tama nüxü̃ curüxoxgu i curü chixexü̃, rü paxa tá cuxü̃ íchajadau, rü tá cuxü̃ chaxo na tama ngẽma togü i jaxõgüxü̃tanüwa cuxãchicaxü̃ca̱x.
6 Notürü nangẽxma i wüxi i cuxüxü̃ i chorü me ixĩxü̃. Rü ngẽma nixĩ na nachi cuxaixü̃ i ngẽma chixexü̃ i naxügüxü̃ i ngẽma Nicoraítagü. Rü chama rü ta nachi chaxai i ngẽma chixexü̃ i naxügüxü̃’.
7 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”. Rü nhanagürü:
“Jíxema nüxü̃ rüporamaẽxẽ i chixexü̃ rü tá tüxü̃ nüxü̃ chamu̱xnetaxẽẽ i norü o i ngẽma ori i tüxü̃ maxẽxẽẽxü̃ i Tupanaãrü orinecüwa ngẽxmaxü̃”, nhanagürü i Naãẽ i Üünexü̃.
Ore ga jema jaxõgüxü̃ ga Esmiraarü ĩãnewa jexmagüxü̃ca̱x ümatüxü̃
8 Rü jema chamaã idexaxü̃ rü nhanagürü ta:
“Chanaxwa̱xe i Esmirawa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü, rü nhacurügü tá: ‘Nhaã nixĩ i norü ore ja jima nüxĩra jexmacü rü guxü̃guma ngẽxmaẽchacü ga paxaãchi jucü rü wena maxü̃cü’.
9 Rü nhanagürü i nümax:
‘Chama nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x na nhuxãcü ngúxü̃ cuingexü̃. Rü nüxü̃ chacua̱x na cungearü dĩẽruã́xü̃ i nhama i naãnewa, notürü dauxü̃guxü̃ i naãnewa cuxü̃́ nangẽxma i ngẽma taguma gúxü̃. Rü nüxü̃ chacua̱x na nhuxãcü chixri cuchiga jadexagüxü̃ i ngẽma duü̃xü̃gü i nügü ixugüxü̃ na Judéugü jixĩgüxü̃. Notürü i nümagü rü aixcuma Chatanáãrü duü̃xü̃gümare nixĩgü.
10 ¡Rü tãṹ i cumuü̃xü̃ naxca̱x i ngẽma ngúxü̃ i tá cuingexü̃! Rü ṉg̱oxo i Chataná rü tá norü duü̃xü̃güxü̃ namu na pocupataü̃gu pexü̃ napocuexü̃ca̱x i nhuxre i pema na ngẽmaãcü pexü̃ naxüxü̃ca̱x. Rü nhuxre i ngunexü̃ tá ngúxü̃ peingegü. Notürü woo ngẽmaãcü ngúxü̃ peingegügu rü chanaxwa̱xe i choxü̃́ cujaxõõma nhu̱xmatáta cuju̱x. Rü chama rü tá cuxna chanaxã i curü ãmare i maxü̃ i taguma gúxü̃’.
11 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”. Rü nhanagürü:
“Jíxema nhama i naãnewa nüxü̃ rüporamaẽxẽ i chixexü̃, rü tãũxü̃táma Tupana ṉg̱oxogüxü̃ ípocuexü̃wa tüxü̃ nawogü”, nhanagürü i Naãẽ i Üünexü̃.
Ore ga jema jaxõgüxü̃ ga Pérgamuãrü ĩãnewa jexmagüxü̃ca̱x ümatüxü̃
12 Rü jema chamaã idexaxü̃ rü nhanagürü ta:
“Chanaxwa̱xe i Pérgamuwa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü, rü nhacurügü tá: ‘Nhaã nixĩ i norü ore ja jima nüxü̃́ nangẽxmacü i ngẽma tara i guxü̃cüwawa téxü̃’.
13 Rü nhanagürü i nümax:
‘Chama nüxü̃ chacua̱x na jima ĩãne ja Chataná poraãcü namaã ícuáxü̃newa na cumaxü̃xü̃. Notürü woo ngẽxma na cuxãchiü̃xü̃, rü tama choxü̃ ícuta̱x. Rü woo jexguma chorü orearü uruü̃ ga mecü ga Atípaxü̃ jama̱xgügu nagu ga guma ĩãne ga nawa Chataná duü̃xü̃gümaã ícuáxü̃ne, rü tama nüxü̃ curüxo na choxü̃́ cujaxõõmaxü̃.
14 Notürü nangẽxma i nhuxre i ṯacü i cuxüxü̃ i tama chorü me ixĩxü̃. Rü ngẽma nixĩ na cugüxü̃tawa cunangẽxmagüxẽẽxü̃ i nhuxre i curü duü̃xü̃gü i tama nüxü̃ rüxoechaü̃xü̃ i ngẽma ngu̱xẽẽtae ga nuxcüma Barã́ũ Judéugüarü ãẽ̱xgacü ga Baráquixü̃ namaã ucu̱xẽxü̃ na chixexü̃gu Judéugüxü̃ najixẽẽxü̃ca̱x. Rü jema Judéugü rü jema ucu̱xẽgagu nawa naxĩ ga jema petagü ga togü ügüxü̃ naxca̱x ga norü tupananetachicüna̱xãgü. Rü jexgumarüü̃ ta jema ucu̱xẽgagu nixĩ ga naĩ ga ngemaã namaxẽxü̃ ga Judéugü. Rü nhu̱xma i nhuxre i curü duü̃xü̃gü i Pérgamuwa ngẽxmagüxü̃ rü nagu naxĩ ga jema nuxcümaxü̃xü̃ ga ngu̱xẽẽtae ga chixexü̃, rü tama nüxü̃ narüxoechaü̃.
15 Rü ngẽxgumarüü̃ ta ngẽ́ma cunangẽxmagüxẽẽ i nhuxre i duü̃xü̃gü i tama nüxü̃ rüxoechaü̃xü̃ i ngẽma Nicoraítagüarü ngu̱xẽẽtae i Barã́ũãrü ngu̱xẽẽtaeruü̃ chixexü̃.
16 Rü ngẽmaca̱x chanaxwa̱xe i nüxü̃ curüxo i ngẽma chixexü̃. Rü ngẽxguma chi tama nüxü̃ curüxoxgu, rü paxa tá ngẽ́ma cuxü̃tawa chaxũ rü ngẽma tara i chaua̱xwa ngẽxmaxü̃maã tá ngẽma duü̃xü̃güxü̃ chadai’.
17 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”. Rü nhanagürü:
“Jíxema nüxü̃ rüporamaẽxẽ i chixexü̃ rü tá tüxna chanaxã i põũ i dauxü̃cü̱̃ã̱x. Rü tá tüxna chanaxã ja wüxi ja nuta ja chócü i wüxi i naẽ́ga i ngexwacaxü̃xü̃ nagu ümatücü rü jíxema najaxuxexicatama nüxü̃ cuáxü̃”, nhanagürü i Naãẽ i Üünexü̃.
Ore ga jema jaxõgüxü̃ ga Tiatíraarü ĩãnewa jexmagüxü̃ca̱x ümatüxü̃
18 Rü jema chamaã idexaxü̃ rü nhanagürü ta:
“Chanaxwa̱xe i Tiatírawa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü, rü nhacurügü tá: ‘Nhaã nixĩ i norü ore ja jima Tupana Nane ja nhama üxüemarüü̃ ij̱auraxetücüücü rü nacutügü rü nhama cobri i meãma ípixü̃rüü̃ ixĩxü̃ne’.
19 Rü nhanagürü i nümax:
‘Chama nüxü̃ chacua̱x i guxü̃ma i ngẽma mexü̃ i cuxüxü̃. Rü nüxü̃ chacua̱x na nhuxãcü cumücügüxü̃ cungechaü̃xü̃, rü nhuxãcü meãma choxü̃́ na cujaxõxü̃, rü nhuxãcü nüxü̃ na curüngü̃xẽẽxü̃ i ngẽma togü i jaxõgüxü̃, rü nhuxãcü jaxna namaã cuxĩnüxü̃ i guxchaxü̃gü. Rü nüxü̃ chacua̱x i nhu̱xma na noxriarü jexera cunaxüxü̃ i ngẽma cuxü̃́ chanaxwa̱xexü̃.
20 Notürü nangẽxma i wüxi i cuxüxü̃ i tama chorü me ixĩxü̃. Rü ngẽma nixĩ na ngẽ́ma cunangẽxmaxẽẽẽchaxü̃ i ngẽma ngexü̃ i Jesabéu i nügü ixuxü̃ na Tupanaãrü orearü uruü̃ na jiĩxü̃, notürü norü ngu̱xẽẽtaemaã chorü duü̃xü̃güxü̃ ngẽ́ma womüxẽẽxü̃ na chixri namaxẽxü̃ca̱x, rü naĩ i ngemaã inapegüxü̃ca̱x, rü nangõ̱xgüãxü̃ca̱x i ngẽma õnagü i togü norü tupananetachicüna̱xãgüca̱x ḏaixü̃ na ngẽmamaã nüxü̃ jacua̱xüü̃güxü̃ca̱x.
21 Rü chama rü marü ngĩxü̃ íchanaṉg̱uxẽẽ rü jaxna ngĩmaã chaxĩnü na nüxü̃ naxoxü̃ca̱x i ngẽma ngĩcüma i chixexü̃, notürü tama inaxwa̱xe na nüxü̃ naxoxü̃ rü ínatáãxü̃ i ngẽma ngĩrü chixexü̃ i naxüxü̃.
22 Rü nhu̱xma i ngẽma nge rü tá ngĩxü̃ chiḏaawexẽẽ na ngĩrü ngürücarewa ngúxü̃ jangexü̃ca̱x, rü ngẽma duü̃xü̃gü i ngĩmaã ipexü̃ i ngẽma nge rü nümagü rü tá ta ngúxü̃ na jangegüxü̃ca̱x ega tama nüxü̃ naxoegu i ngẽma chixexü̃ i ngĩmaã naxügüxü̃.
23 Rü tá chanadai i ngĩxãcügü i ngẽma nge. Rü ngẽmawa tá nüxü̃ nacua̱xgü i guxü̃ma i jaxõgüxü̃ na aixcuma nüxü̃ chacuáxü̃ i ngẽma naãẽwa nagu naxĩnüxü̃ i wüxichigü i duü̃xü̃. Rü wüxichigü i pemax rü tá pexü̃́ chanaxütanü ngẽma na nhuxãcü pemaxẽxü̃ãcüma rü nhuxãcü penaxüxü̃ãcüma.
24 2:24-25 Notürü pemagü i Tiatíracü̱̃ã̱x i tama nagu ĩxẽ i ngẽma ngexü̃ãrü ngu̱xẽẽtae i chixexü̃ rü taguma nawa ngúexe i ngẽma ore i togü naxugügu rü Chatanáãrü ore i ẽxü̃guxü̃ ixĩxü̃, rü pemaã nüxü̃ chixu rü ngẽma pexü̃́ chanaxwa̱xexü̃ nixĩ na meã namaã penguxü̃güxü̃ rü naga pexĩnüẽxü̃ i ngẽma chorü ore nhu̱xmatáta íchangu i chamax. Rü ngẽxĩcatama nixĩ i pexü̃́ chanaxwa̱xexü̃.
25 Nüü̃ nadau 2:24
26 Rü jíxema nüxü̃ rüporamaẽgüxe i ngẽma chixexü̃ rü naxügüamaxẽ i ngẽma tüxü̃́ chanaxwa̱xexü̃ nhu̱xmatáta tajuemare, rü tá chaugüxü̃tawa tüxü̃ chaxüchica na wüxigu chamaã guxü̃ãrü ãẽ̱xgacü tixĩgüxü̃ca̱x.
27 Rü jema Chaunatü ãẽ̱xgacüxü̃ choxü̃ na ixĩxẽẽxü̃rüü̃ tá tüxna chanaxã i pora na guxü̃ i nachiü̃ãnegümaã taporaexü̃ca̱x. Rü ngẽxguma nhama i naãnecü̱̃ã̱x i duü̃xü̃gü tama tümaga ĩnüẽgu rü nhama wüxi i tü̃xü̃ ngĩxü̃ ipuxẽẽxü̃rüü̃ tá namaã tixĩgü rü poraãcü tá tanapocue.
28 Rü tá tüxna chanaxã ja jima woramacuri ja pa̱xmama nüxü̃ idaucü’.
29 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü” nhanagürü.
