Apocaríchiu 3:1-22
3 Rü jema chamaã idexaxü̃ rü nhanagürü ta:
“Chanaxwa̱xe i Sardiwa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü, rü nhacurügü tá: ‘Nhaã nixĩ i norü ore ja Tupana Nane ja Naãẽ i Üünexü̃ nawa ngẽxmacü ja jima 7 ja woramacuri nüxü̃́ ngẽxmacü’. Rü nhanagürü i nümax: ‘Chama nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x ta rü woo guxü̃wama duü̃xü̃gü nüxü̃ ixugügu na Tupanaca̱x namaxẽxü̃ i ngẽma jaxõgüxü̃ i cuxü̃tawa ngẽxmagüxü̃ notürü tama aixcuma nixĩ i ngẽma, erü ngẽma jaxõgüxü̃ rü tama aixcuma choxü̃́ najaxõgü rü tama aixcuma chauxca̱x namaxẽ.
2 Rü name nixĩ i cuḇaixãchi rü cugü ícuicua̱x rü cujangüxẽẽ i ngẽma íraxü̃ i mexü̃ i cuxü̃́ íjaxüxü̃ i marü ijarüxoxchaü̃xü̃. Erü nüxü̃ chadau rü ngẽma cuxüxü̃ rü tama Tupanape̱xewa name.
3 ¡Rü nüxna nacua̱xãchi ga jema ngu̱xẽẽtae ga mexü̃ ga noxri nüxü̃ cuxĩnüxü̃ rü cujaxuxü̃, rü nagu ixũ! ¡Rü nüxü̃ rüxo i ngẽma chixexü̃ i cuxüxü̃! Notürü ngẽxguma tama nüxü̃ curüxoxgu i curü chixexü̃, rü nhama wüxi i ngĩ́ta̱xáxü̃ i ngürüãchi ínguxü̃rüü̃ tá cuxü̃tawa chaxũ. Rü tãũxü̃táma nüxü̃ cucua̱x na nhuxguacü jiĩxü̃.
4 Notürü ngẽ́ma Sardiwa cuxü̃́ nangẽxma i nhuxre i duü̃xü̃gü i mexü̃ i tama nhama i naãneãrü chixexü̃maã nügü ãũãchiarü maxü̃ã̱xgüxü̃. Rü nümagü rü tá cómüxü̃maã nixãxchiru rü ngẽmaãcü tá chamaã inaxĩ, erü nümagü rü duü̃xü̃gü i mexü̃ i chauxca̱x maxẽxü̃ nixĩgü.
5 Rü jíxema nüxü̃ rüporamaẽgüxe i chixexü̃, rü tá cómüxü̃maã tixãxchiru. Rü tãũxü̃táma nawa tüxü̃ íchapiéga i ngẽma chorü popera i nagu chajawügüxü̃ i ngẽma duü̃xü̃gü i nüxü̃́ nangẽxmaxü̃ i maxü̃ i taguma gúxü̃. Rü Chaunatüpe̱xewa rü guxü̃ma i norü orearü ngeruü̃gü i dauxü̃cü̱̃ã̱xgüpe̱xewa tá tüxü̃ chixu na chorü duü̃xü̃gü tixĩgüxü̃’.
6 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”.
Ore ga jema jaxõgüxü̃ ga Firadéufiaarü ĩãnewa jexmagüxü̃ca̱x ümatüxü̃
7 Rü jema chamaã idexaxü̃ rü nhanagürü ta:
“Chanaxwa̱xe i Firadéufiawa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü rü nhacurügü tá: ‘Nhaã nixĩ i norü ore ja jima Üünecü ja aixcuma Cristu ixĩcü ja Dawírüü̃ ãẽ̱xgacü ja tacü ixĩcü ja nüxü̃́ nangẽxmacü i pora na jawãxnaãxü̃ca̱x rü nawãxtaãxü̃ca̱x i dauxü̃guxü̃ i naãne. Rü ngẽxguma texéca̱x jawãxnaãgu, rü taxucürüwama texé tümacha̱xwa tanawãxta. Rü ngẽxguma texécha̱xwa nawãxtaãgu, rü taxucürüwa texé tümaca̱x tajawãxna’.
8 Rü nhanagürü i nümax:
‘Chama nüxü̃ chacua̱x i guxü̃ma i ngẽma cuxüxü̃. Rü dücax, cuxü̃́ chanatauxchaxẽẽ na togümaã nüxü̃ cuixuxü̃ca̱x i chorü ore, rü taxucürüwa texé cuxna tanachu̱xu na cunaxüxü̃ca̱x i ngẽma puracü. Rü chama nüxü̃ chacua̱x na tama aixcuma cuporaxü̃chixü̃, erü noxretama nixĩ i ngẽma jaxõgüxü̃ i cuxü̃tawa ngẽxmagüxü̃. Notürü cuma rü naga cuxĩnü i chorü ore, rü tama icujacu̱x na chorü duü̃xü̃ cuiĩxü̃.
9 Rü ngẽmaca̱x i ngẽma duü̃xü̃gü i Chatanáarü ixĩgüxü̃ i nügü ixugüxü̃ na chorü duü̃xü̃gü jixĩgüxü̃ notürü tama aixcuma choxrü ixĩgüxü̃, rü tá chanamu na cupe̱xegu nacaxã́pü̱xügüxü̃ca̱x na nüxü̃ nacua̱xgüxü̃ca̱x na aixcuma cuxü̃ changechaü̃xü̃.
10 Cuma rü meãma cujanguxẽẽ i ngẽma cuxü̃ chamuxü̃ na aixcuma cujaxõõmaxü̃ naẽ́tüwa i ngẽma guxchaxü̃gü i cuxü̃ ngupetüxü̃. Rü ngẽmaca̱x tá cuxü̃ íchapoxü̃ na tama cuxna nanguxü̃ca̱x i ngẽma guxchaxü̃ i taxü̃ i nhama i naãnewa tá ínguxü̃ na guxü̃ma i nhama i naãnecü̱̃ã̱x i duü̃xü̃güxü̃ naxüxü̃ca̱x.
11 Rü paxa tá ngẽ́ma cuxü̃tawa chaxũ. Rü chanaxwa̱xe i nhu̱xma meã cumaxü̃xü̃rüü̃ meã cumaxecha, na taxúema cuxna napuxü̃ca̱x i ngẽma curü ãmare.
12 Rü jíxema nüxü̃ rüporamaẽgüxe i guxü̃ma i chixexü̃, rü Chaunatü ja Tupanaxü̃tawa tá tüxü̃ changẽxmagüxẽẽ na tagutáma ngẽ́ma ítachoxü̃xü̃ca̱x. Rü tümagu tá chanaxümatü i naẽ́ga ja Chaunatü ja Tupana. Rü ngẽxgumarüü̃ tá ta tümagu chanaxümatü i naẽ́ga ja Tupanaãrü ĩãne ja Jerucharéü̃ ja ngexwacaxü̃ne ja Tupanaxü̃tawa i dauxü̃guxü̃ i naãnewa írüxĩxü̃ne. Rü ngẽxgumarüü̃ tá ta tümagu chanaxümatü i chauéga i ngexwacaxü̃xü̃’.
13 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”.
Ore ga jema jaxõgüxü̃ ga Raodichéawa jexmagüxü̃ca̱x ümatüxü̃
14 Rü jema chamaã idexaxü̃ rü nhanagürü ta:
“Chanaxwa̱xe i Raodichéawa ngẽxmagüxü̃ i jaxõgüxü̃ãrü ãẽ̱xgacüca̱x cunaxümatü rü nhacurügü tá: ‘Nhaã nixĩ i norü ore ja jima aixcuma ixĩcü ja aixcuma janguxẽẽcü i ngẽma nüxü̃ jaxuxü̃ rü ore i aixcuma ixĩxü̃xü̃xicatama ixucü. Rü nüma nixĩ ga inaxügüãxü̃ ga guxü̃ma ga jema Tupana üxü̃’.
15 Rü nhanagürü i nümax:
‘Chama nüxü̃ chacua̱x i guxü̃ma i ngẽma cuxüxü̃. Rü nüxü̃ chacua̱x na tama wüxi i duü̃xü̃ i chauchi aixü̃ cuiĩxü̃, notürü tama wüxi i duü̃xü̃ i aixcuma choxü̃ ngechaü̃xü̃ cuixĩ. Rü chierü noxtacüma wüxi i duü̃xü̃ i chauchi aixü̃ cuixĩgu rü e̱xna noxtacüma wüxi i duü̃xü̃ i aixcuma choxü̃ ngechaü̃xü̃ cuixĩgu.
16 Notürü nhu̱xma na íraruwatama choxü̃ cungechaü̃xü̃, rü ngẽmaca̱x tá cuxü̃ íchata̱x. Erü tama noxtacüma wüxi i duü̃xü̃ i chauchi aixü̃ cuixĩ rü tama noxtacüma wüxi i duü̃xü̃ i aixcuma choxü̃ ngechaü̃xü̃ cuixĩ.
17 Rü cuma cugü cuixuxgu rü cumuãrü dĩẽruã̱x, rü cumuãrü ngẽmaxü̃ã̱x, rü meãma cuxü̃ naxüpetü, rü taxuü̃ma cuxü̃́ nataxu. Notürü i cuma rü tama nüxna cucua̱xãchi na chape̱xewa rü wüxi i taxuwama mexü̃ cuiĩxü̃, rü wüxi i ngechaü̃xü̃chi cuiĩxü̃, rü wüxi i taxuü̃ma cuxü̃́ ngẽxmaxẽ cuiĩxü̃, rü nhama wüxi i ngexetüxü̃rüü̃ cuiĩxü̃, rü nhama wüxi i ngexchiruxü̃rüü̃ cuiĩxü̃.
18 Rü nhu̱xma rü cuxü̃ chaxucu̱xẽ na chauxü̃tawa naxca̱x cutaxexü̃ca̱x i uiru i marü üxüwa figuxü̃ i nüxĩcatama ixĩxü̃. Rü ngẽmaãcü tá aixcuma cuxü̃́ nangẽxma i curü ngẽmaxü̃. Rü ngẽxgumarüü̃ ta cuxü̃ chaxucu̱xẽ na chauxü̃tawa naxca̱x cutaxexü̃ca̱x i cuxchiru i cómüxü̃ na ngẽmagu cuicúxü̃ca̱x na taxúema cuxü̃ dauxü̃ca̱x na cungexchiruxü̃. Rü ngẽxgumarüü̃ ta cuxü̃ chaxucu̱xẽ na chauxü̃tawa naxca̱x cutaxexü̃ca̱x i curü ma̱ĩ̱xẽtüxü̃ na curümexẽtüxü̃ca̱x na wena cuidauchixü̃ca̱x.
19 Chama rü tüxü̃ chaxucu̱xẽ rü tüxü̃ ichajarüwe̱xãchixẽẽ ja guxãma ja jíxema tüxü̃ changechaü̃xẽ. Rü ngẽmaca̱x name nixĩ i nüxü̃ curüxo i cucüma i chixexü̃, rü aixcuma choxü̃ cungechaü̃ rü cunaxü i ngẽma cuxü̃́ chanaxwa̱xexü̃.
20 Rü dücax, chama rü ĩã̱xwa changẽxmaẽcha. Rü ngẽ́ma Tu tu tu nhacharügüecha. Rü ngẽxguma texé choxü̃ ĩnügu rü chauxca̱x tajawãxnagu, rü tá tümaxü̃tagu chaxücu. Rü tümamaã tá chachibü rü tüma i chamaã.
21 Rü jíxema nüxü̃ rüporamaẽgüxe i chixexü̃, rü tá chaugüxü̃tawa tüxü̃ charütogüxẽẽ na chamaã ãẽ̱xgacü tixĩgüxü̃ca̱x, jexgumarüü̃ ga chama rü nüxü̃ na charüporamaẽxü̃ ga chixexü̃, rü nhu̱xmachi Chaunatüxü̃tawa na chajarütoxü̃rüü̃ na namaã ãẽ̱xgacü chiĩxü̃ca̱x’.
22 Rü jíxema ãchixẽ́xẽ rü name nixĩ i naga taxĩnü i ngẽma Tupanaãẽ i Üünexü̃ nüxü̃ ixuxü̃ namaã i ngẽma jaxõgüxü̃tücumügü”, nhanagürü ga jema chamaã idexaxü̃.
