Apocaríchiu 5:1-14
5 Rü nhu̱xmachi nüxü̃ chadau ga guma tochicaxü̃wa rütocü, rü norü tügüneme̱xẽwa nanange ga wüxi ga popera ga idixixü̃. Rü düxétüwa rü aixepewa rü naxãmatü ga jema popera. Rü 7 wa ninhaxtachipe̱xe.
2 Rü nüxü̃ chadau ga wüxi ga norü orearü ngeruü̃ ga dauxü̃cü̱̃ã̱x ga poraxü̃chixü̃ ga tagaãcü íc̱axü̃ rü nhaxü̃:
“¿Texé tixĩ ja jíxema mexe na tajagaxuchitanüxü̃ i norü nhaxtachipe̱xexü̃ rü ítajawẽgüxü̃ i nhaã popera?” nhaxü̃.
3 Notürü woo ga dauxü̃guxü̃ ga naãnewa rü bai ga nhama ga naãnewa rü bai ga juexü̃tanüwa, rü tataxuma ga texé ga mexe na ítajadixgüxü̃ rü nüxü̃ tadaumatüxü̃ na nhuxũ nhaxü̃ ga jema popera.
4 Rü chama rü poraãcü chaxaxu jerü tataxuma ga texé ga mexẽ na ítajadixgüxü̃ rü nüxü̃ tadaumatüxü̃ na nhuxũ nhaxü̃ ga jema popera.
5 Rü nhu̱xmachi wüxi ga jema 24 ga ãẽ̱xgacügü ga jaxõgüxü̃ãrü, rü nhanagürü choxü̃:
“¡Tãṹ i cuxaxuxü̃! Erü jima Cristu ja Poracü ja Judátaa ixĩcü ja ãẽ̱xgacü ja Dawítaa ixĩcü, rü marü nüxü̃ narüjexera i guxü̃ma i chixexü̃. Rü ngẽmaca̱x nüma nixĩ i namexü̃ na jagaxuchitanüãxü̃ca̱x i ngẽma 7 i norü nhaxtachipe̱xexü̃ i ngẽma popera rü na íjawẽgüãxü̃ca̱x”.
6 Rü nhu̱xmachi nüxü̃ chadau ga Tupana Nane ga nhama wüxi ga carneruxacü ga ma̱xwa írüdaxü̃rüü̃ jexma chicü naxü̃tagu ga guma tochicaxü̃wa rütocü rü natanügu ga jema ãgümücü ga dauxü̃cü̱̃ã̱x ga maxẽxü̃ rü jema 24 ga ãẽ̱xgacügü. Rü nüxü̃́ najexma ga 7 ga nachatacu̱xre ga norü poraarü cua̱xruü̃ rü 7 ga naxẽtü. Rü guma 7 ga naxẽtü rü ngẽma nixĩ i Tupanaãẽ i Üünexü̃ i guxü̃ma i nhama i naãnewa namuxü̃ãrü cua̱xruü̃ ixĩxü̃.
7 Rü guma pecaduarü ütanüca̱x jucü rü guma tochicaxü̃wa rütocüca̱x nixũ, rü nanajaxu ga jema popera ga norü tügüneme̱xẽwa jexmaxü̃.
8 Rü jexguma najauxãgu ga jema popera, rü jema ãgümücü ga dauxü̃cü̱̃ã̱x ga maxẽxü̃ rü jema 24 ga ãẽ̱xgacügü rü inacaxgüã́pü̱xü nape̱xegu ga guma pecaduarü ütanüca̱x jucü. Rü wüxichigü ga jema ãẽ̱xgacügü rü nüxü̃́ najexma ga wüxi ga norü paxetaruü̃ ga arpa. Rü jexgumarüü̃ ta nüxü̃́ najexma ga tazagü ga nangaxwegüraü̃xü̃ ga uirunaxca̱x ga pumarate̱xemaã ixããcuxü̃. Rü jema pumarate̱xe rü napaacaxü̃chi ga jexguma jaxaxgu. Rü jema pumaragü, rü ngẽma nixĩ i Tupanaãrü duü̃xü̃güarü jumuxẽgüarü cua̱xruü̃gü.
9 Rü nagu nawijaegü ga wüxi ga wijae ga jexwacaxü̃xü̃ ga nhaxü̃:“Cuma nixĩ i cumexü̃ na cunajaxuxü̃ i ngẽma popera rü cujagaxuchitanüxü̃ i ngẽma norü nhaxtachipe̱xexü̃. Jerü cuma rü marü cuima̱xchire̱x, rü cugümaã Tupanaãxü̃́ naxca̱x cutaxe i nagúxü̃raü̃xü̃ i duü̃xü̃gü i nagúxü̃raü̃xü̃ i nachiü̃ãnecü̱̃ã̱x i nagúxü̃raü̃xü̃ i nagawa idexagüxü̃.
10 Rü ngẽmagüxü̃ cuxüchica i ngextá ãẽ̱xgacü ícuiĩxü̃wa, rü Tupanaãrü ngü̃xẽẽruü̃güxü̃ cujaxĩgüxẽẽ na cumaã wüxigu guxü̃ i naãnemaã inacua̱xgüxü̃ca̱x”,
nhanagürügü.
11 Rü jemawena ichadawenü, rü nüxü̃ chaxĩnü ga naga ga muxũchixü̃ma ga Tupanaãrü orearü ngeruü̃gü ga dauxü̃cü̱̃ã̱x. Rü norü ngãxü̃wa najexma ga jema tochicaxü̃ rü jema ãgümücü ga dauxü̃cü̱̃ã̱x ga maxẽxü̃ rü jema 24 ga ãẽ̱xgacügü. Rü namuxũchima ga jema Tupanaãrü orearü ngeruü̃gü ga dauxü̃cü̱̃ã̱x ga jéma jexmagüxü̃.
12 Rü tagaãcü nhanagürügü:
“Daa nixĩ ja jima nhama wüxi i carneruacürüü̃ imácü ga pecaduarü ütanüca̱x jucü. Rü nüma nixĩ i namexü̃ na guxü̃ãrü ãẽ̱xgacü jiĩxü̃, rü guxü̃ãrü jora jiĩxü̃, rü guxü̃ i cua̱x nüxü̃́ ngẽxmaxü̃, rü guxü̃ãrü jexera naporaxü̃. Rü nüma nixĩ i namexü̃ na guxãma nüxü̃ ngechaü̃güxü̃ rü nataxẽẽgüxü̃ rü nüxü̃ icua̱xüü̃güxü̃”, nhanagürügü.
13 Rü nüxü̃ chaxĩnü ta ga naga ga guxü̃ma ga jema Tupana üxü̃ i dauxü̃guxü̃ i naãnewa rü nhama i naãnewa rü naãnetüü̃wa rü taxtü i taxü̃wa ngẽxmagüxü̃ ga nhagüxü̃:
“Name nixĩ na guxü̃gutáma guxãma nüxü̃ icua̱xüü̃güxü̃ rü nüxü̃ ngechaü̃güxü̃ rü nataxẽẽgüxü̃ ja jima pecaduarü ütanüca̱x jucü rü jima ngẽma tochicaxü̃wa rütocü, erü nümagü nixĩ i guxü̃guma ãẽ̱xgacügü jixĩgüxü̃”, nhanagürügü.
14 Rü jema ãgümücü ga dauxü̃cü̱̃ã̱x ga maxẽxü̃ rü nhanagürügü:
“Ngẽmaãcü jiĩxü̃”, nhanagürügü. Rü jema 24 ga ãẽ̱xgacügü rü inacaxgüã́pü̱xü rü nüxü̃ nicua̱xüü̃gü.
