Apocaríchiu 9:1-21
9 Rü jema norü wüxime̱ẽ̱xpü̱x ga Tupanaãrü orearü ngeruü̃, rü najacue ga norü corneta. Rü nüxü̃ chadau ga wüxi ga woramacuri ga dauxü̃wa rüngucü ga nhama ga naãnegu ngucü. Rü guma woramacuri nanajaxu ga jema ãxmaxü̃ ga taguma ijacuáxü̃ãrü chawi.
2 Rü najawãxna ga jema ãxmaxü̃ ga taguma ijacuáxü̃. Rü jéma inajagoema ga caxixü̃ nhama wüxi i taxü̃ i u̱xearü caxixü̃rüü̃. Rü jema caxixü̃ rü nanaxẽẽmaxẽẽ ga üa̱xcü.
3 Rü jema caxixü̃wa ínachoxü̃ ga munügü ga naãneẽ́tügu j̱ixü̃. Rü jema munügü rü nanajauxgü ga pora ga nüxna naxãxü̃ na nhama tuxchinawerüü̃ duü̃xü̃güxü̃ nachixü̃ca̱x.
4 Rü jema munümaã nüxü̃ nixu na tama natüanexü̃ nachixexẽẽxü̃ca̱x rü bai i ṯacü rü nanetügü rü bai i ṯacü rü naĩgü. Notürü nanamu na nachixexẽẽgüãxü̃ca̱x ga jema duü̃xü̃gü ga tama Tupanaãrü cua̱xruü̃ nacatüwa jexmaxü̃.
5 Notürü tama nanamu na jema duü̃xü̃güxü̃ naḏaixü̃ca̱x. Notürü nanamu na ngúxü̃ nüxü̃ jangexẽẽmaregüxü̃ca̱x ga wüxime̱ẽ̱xpü̱x ga tawemacü. Rü jema ngúxü̃ ga nüxü̃ jangexẽẽgüxü̃, rü nhama tuxchinawe duü̃xü̃güxü̃ chixü̃rüü̃ nixĩ.
6 Rü ngẽma ngunexü̃gügu rü duü̃xü̃gü tá naxca̱x nadaugü na najuexü̃, notürü tãũxü̃táma najue. Rü woo nanaxwa̱xegüxü̃chi na najuexü̃, notürü taxucürüwatáma najue.
7 Rü jema munügü rü nhama cowaru i guerrawa ĩxü̃rüü̃ nixĩgü. Rü naẽruwa nüxü̃́ najexma ga ṯacü ga nhama nga̱xcueruü̃ ga uirunaxca̱xrüü̃ ixĩgüxü̃. Rü nachametü rü nanaduü̃xü̃chametüraxü̃gü.
8 Rü najaegü rü nhama ngeã̱xjaerüü̃ nixĩgü. Rü napütagü rü nhama aipütagürüü̃ nixĩgü.
9 Rü naxü̃newa nüxü̃́ najexma ga ṯacü ga wüxi ga ferunaxca̱x ga poxü̃ruü̃rüü̃ ixĩxü̃. Rü naxpe̱xatügüga rü nhama muxũchine ja carru ja guerrawa cowaru túgünegarüü̃ nixĩ.
10 Rü nareexü̃gü rü nhama tuxchinawerüü̃ naxãnegu. Rü jema naneguwa rü naxãguchata na wüxime̱ẽ̱xpü̱x ja tawemacü duü̃xü̃güxü̃ ngúxü̃ jangexẽẽgüxü̃ca̱x.
11 Rü jema munügüarü ãẽ̱xgacü, rü jema ãxmaxü̃ ga taguma ijacuáxü̃ãrü daruü̃ nixĩ. Rü Judéugügawa ga jema munügüarü ãẽ̱xgacü, rü Abadṍũ nixĩ. Rü Gregugügawa rü Aporiã́ũ nixĩ. Rü ngẽma rü: “Chixexẽẽruü̃”, nhaxü̃chiga nixĩ.
12 Rü jexma najacua̱x ga jema nüxĩraü̃xü̃ ga chixexü̃ ga taxü̃, notürü ínajaxüama ga to ga taxre.
13 Rü jema norü 6 ga Tupanaãrü orearü ngeruü̃ rü najacue ga norü corneta. Rü nüxü̃ chaxĩnü ga wüxi ga naga ga jema Tupanape̱xewa jexmaxü̃ ga uirunaxca̱x ga pumaraarü gute̱xeruü̃taxmüwa inaxũxü̃.
14 Rü jema naga rü nanamu ga jema orearü ngeruü̃ ga cornetaã́xü̃, rü nhanagürü nüxü̃:
“¡Jawẽgüxü̃ i ngẽma ãgümücü i orearü ngeruü̃gü i Chatanáãrü ixĩgüxü̃ i taxtü i Eufrátegu ngãxü̃güxü̃!” nhanagürü.
15 Rü jemaãcü niwẽgüxü̃ ga jema ãgümücü ga orearü ngeruü̃gü na nadaiãxü̃ca̱x ga wüxi ga jema norü tamaẽ̱xpü̱xarü üjetücumü ga duü̃xü̃gü. Jerü ga jema orearü ngeruü̃gü rü woetama jemaca̱x ínamemaregü na jema ngora rü jema ngunexü̃ rü guma tawemacü rü guma taunecü nadaiãxü̃ca̱x ga jema duü̃xü̃gü.
16 Rü nüxü̃ chaxĩnü na nhuxre na jiĩxü̃ ga jema orearü ngeruü̃güarü churaragü ga cowaruétügu ĩxü̃. Rü 200 mijónegü nixĩgü.
17 Rü jemaãcü nixĩ ga nüxü̃ chadauxü̃ ga jema cowarugü ga jexguma chango̱xetügu. Rü jema churaragü ga jema cowaruétügu ĩxü̃ rü nüxü̃́ najexma ga norü nga̱xcuxü̃nexü̃ ga poxü̃ruü̃ ixĩxü̃ ga nhama üxüxetürüü̃ ij̱auraxü̃. Rü jema poxü̃ruü̃ rü nixãmatü rü nidamatü rü nija̱xmatü rü nidexmatü. Rü jema cowaruerugü rü nhama aierurüü̃ nixĩgü. Rü naã̱xgüwa ínaxũxũ ga üxüema rü caxixü̃ rü azufre.
18 Rü wüxi ga norü tamaẽ̱xpü̱xarü üjetücumü ga duü̃xü̃gü rü najue namaã ga jema tamaẽ̱xpü̱x ga chixexẽẽruü̃ ga üxüema rü caxixü̃ rü azufre ga jema cowarugüa̱xwa íchoxü̃xü̃.
19 Jerü ga jema cowarugü rü naã̱xwa rü nareexü̃wa nixĩ ga nüxü̃́ najexmaxü̃ ga norü pora na duü̃xü̃güxü̃ naḏaixü̃ca̱x. Jerü ga nareexü̃gü rü nhama ãxtaperüü̃ nixĩgü, rü jemamaã nanangõ̱x ga duü̃xü̃gü rü ngúxü̃ nüxü̃ ningexẽẽ rü nanadai.
20 Notürü ga jema togü ga duü̃xü̃gü ga tama jema pocuruü̃gümaã juexü̃, rü tama nüxü̃ narüxoe ga jema chixexü̃gü ga naxügüxü̃. Rü tama nüxü̃ narüxoe na nüxü̃ jacua̱xüü̃güxü̃ ga ṉg̱oxogü rü norü tupananetachicüna̱xãgü ga uirunaxca̱x rü dĩẽrumünaxca̱x rü cobrinaxca̱x rü nutagünaxca̱x rü naĩnaxca̱x. Rü jemaãcü nüxü̃ nicua̱xüü̃güama ga jema norü tupananetachicüna̱xãgü ga ngearü maxü̃ã́xü̃ rü tama nüxü̃ dauxü̃ rü tama nüxü̃ ĩnüxü̃ rü tama ixũxü̃.
21 Rü tama nüxü̃ narüxoe na namáẽtagüxü̃, rü jajuüexü̃, rü nangẽãẽgüxü̃ rü nangĩ́ta̱a̱xgüxü̃.
