Corochacü̃ãꞌ 1:1-29
1 1:1-2 Pa Chaueneẽgü ja Corochaarü Ĩãnewa Ngẽxmagüxex, chama i Pauru rü wüxigu namaã i taeneẽ i Timúteu nixĩ i pexca̱x tanaxümatüxü̃ i nhaã popera. Rü chama chixĩ i Tupana choxü̃ jaxuxü̃ na Ngechuchu ja Cristu choxü̃ muxü̃ca̱x na nüxü̃ chixuxü̃ca̱x i norü ore. Rü pexca̱x chanaxümatü i guxãma i pema ja chaueneẽgü ja aixcuma Tupanaãrü duü̃xü̃gü ixĩgüxe rü Cristuaxü̃́ jaxõgüxe. Rü chanaxwa̱xe i Tanatü ja Tupana pexü̃ narüngü̃xẽẽ na meã pegümaã pemaxẽxü̃ca̱x rü petaãẽgüxü̃ca̱x.
2 Nüü̃ nadau 1:1
Pauru rü jema jaxõgüxü̃ca̱x najumuxẽ
3 Rü guxü̃guma i ngẽxguma pexca̱x tajumuxẽgügu, rü moxẽ nüxna taxã ja Tupana ja Nanatü ja tórü Cori ja Ngechuchu ja Cristu.
4 Rü ngẽmaãcü tanaxü erü marü nüxü̃ tacuáchiga na nhuxãcü aixcuma meã Ngechuchu ja Cristuaxü̃́ pejaxõgüxü̃, rü aixcuma nüxü̃ pengechaü̃güxü̃ i guxü̃ma i ngẽma duü̃xü̃gü i Tupanaãrü ixĩgüxü̃.
5 Rü nüxü̃ tacua̱xgü na ngẽmaãcü meã Tupanape̱xewa pemaxẽxü̃ erü penajauxgüchaü̃ i ngẽma mexü̃gü i Tupana pexü̃́ namaã nguxü̃xü̃ i dauxü̃guxü̃ i naãnewa. Rü nhu̱xma rü meã ípenaṉg̱uxẽẽ na penajauxgüxü̃ca̱x i ngẽma mexü̃gü jerü marü nüxü̃ pexĩnüẽ ga Tupanaãrü ore i mexü̃ i aixcuma ixĩxü̃.
6 Rü ngẽmatama ore i mexü̃ ga pexü̃tawa nguxü̃, rü guxü̃wama nangu i nhu̱xmax. Rü guxü̃wama ningüchigü rü duü̃xü̃güarü maxü̃xü̃ naxüchicüü, jema perü maxü̃xü̃ na naxüchicüüxü̃rüü̃ ga jexguma nüxü̃ pexĩnüẽgu rü nüxü̃ pecua̱xgügu na nhuxãcü Tupana aixcuma pexü̃ na ngechaü̃xü̃ rü pexü̃ rüngü̃xẽẽchaü̃xü̃.
7 Rü ngẽma ore i mexü̃ nixĩ ga pexü̃ nangúexẽẽxü̃ ga Epáfra ja taeneẽ ja nüxü̃ ingechaü̃gücü ja wüxigu tomaã Tupanaãrü orewa puracücü. Rü nüma rü Cristuarü puracütanüxü̃ ja mecü nixĩ, rü nüma nixĩ i tochicüü pexü̃ nangü̃xẽẽxü̃.
8 Rü nüma ja Epáfra nixĩ i tomaã nüxü̃ jaxuxü̃ i pechiga na nhuxãcü Tupanaãẽ i Üünexü̃ãrü ngü̃xẽẽmaã choxü̃ pengechaü̃güxü̃.
9 Rü ngẽmaca̱x i toma ga noxritama pexü̃ tacuáchigagu, rü taguma nüxü̃ tarüchaue na pexca̱x tajumuxẽgüxü̃. Rü guxü̃guma Tupanana naxca̱x tacagü na meã pexü̃ nüxü̃ nacua̱xẽẽxü̃ca̱x i ngẽma nüma nanaxwa̱xexü̃ na penaxüxü̃. Rü nüxna naxca̱x tacagü na pexna naxããxü̃ca̱x i nagúxü̃raü̃xü̃ i cua̱x i Naãẽ i Üünexü̃wa ne ũxü̃.
10 Rü nüxna naxca̱x tacagü na meã tórü Cori naxwa̱xexü̃ãcüma na pemaxẽxü̃ca̱x rü guxü̃guma penaxüxü̃ca̱x i ngẽma nüma nanaxwa̱xexü̃. Rü nüxna naxca̱x tacagü na pexü̃́ natauxchaxẽẽãxü̃ca̱x na togüxü̃ perüngü̃xẽẽgüxü̃ca̱x rü guxü̃ i ngunexü̃gu jexeraãcü Tupanaxü̃ na pecua̱xgüxü̃ca̱x.
11 Rü nüxna naxca̱x tacagü na norü pora i mexẽchixü̃maã pexü̃ naporaexẽẽxü̃ca̱x, na namaã peporaexü̃ca̱x i guxü̃ma i guxchaxü̃gü rü jaxna namaã pexĩnüẽxü̃ca̱x.
12 Rü nhu̱xmachi tanaxwa̱xe i taãẽãcüma Tanatü ja Tupanana moxẽ pexã, erü nüma pexü̃ nimexẽẽgü na pema rü ta penajauxgüxü̃ca̱x i ngẽma mexü̃gü i naxü̃tawa ngẽxmagüxü̃ i nüma tá nüxna naxãxü̃ i ngẽma duü̃xü̃gü i noxrü ixĩgüxü̃.
13 Jerü nüma ga Tupana rü marü Chatanáme̱xẽwa tüxü̃ ínanguxü̃xẽẽ rü Nane ja nüxü̃ nangechaü̃cüme̱xẽwa tüxü̃ nangẽxmagüxẽẽ.
14 Rü guma Nanegagu nixĩ ga tüxü̃ namaxẽxẽẽxü̃ rü tüxü̃́ nüxü̃ nangechaü̃xü̃ ga tórü pecadugü.
Rü jexguma pecaduca̱x naju̱xgu ga Cristu rü Tupana nügümaã nanangüxmüẽxẽẽ ga duü̃xü̃gü
15 Taguma texé Tupanaxü̃ tadau, notürü nüma rü núma nanamu ga Nane na duü̃xü̃gü nüxü̃ daugüxü̃ca̱x rü nüxü̃ nacua̱xgüxü̃ca̱x na nhuxãcü na jiĩxü̃ i nüma ja Tupana. Rü naxü̃pa i guxü̃ma i ṯacü i nhu̱xma ngẽxmaxü̃, rü nüxĩra najexma ga Tupana Nane.
16 Rü Nanexü̃ nixĩ ga namuxü̃ ga Tupana na naxüãxü̃ca̱x ga guxü̃ma i ṯacü i nhu̱xma ngẽxmaxü̃ i dauxü̃guxü̃ i naãnewa rü nhama i naãnewa, rü guxü̃ma i ngẽma nüxü̃ idauxü̃ rü ngẽma tama nüxü̃ idauxü̃. Rü jemaãcü nanaxü ga guxü̃ma ga norü orearü ngeruü̃gü i dauxü̃cü̱̃ã̱xãrü ãẽ̱xgacügü rü guxü̃ma ga ṉg̱oxogüarü ãẽ̱xgacügü. Rü jemaãcü nanaxü ga guxü̃ma na nüxü̃ jacua̱xüü̃güxü̃ca̱x.
17 Rü naxü̃pa i guxü̃ma i ṯacü i nhu̱xma ngẽxmaxü̃, rü Cristu rü marü nüxĩra najexma. Rü nagagu nixĩ i meã inanuxü̃ i guxü̃ma erü nüma nixĩ i namaã inacuáxü̃.
18 Rü nüma ja Cristu rü naẽru nixĩ i guxü̃ma i ngẽma jaxõgüxü̃. Rü nüma nixĩ ga naxüãxü̃ rü nüxna naxããxü̃ ga maxü̃. Rü nüma nixĩ ga nüxĩra juwa ínadaxü̃ na guxü̃ãrü ãẽ̱xgacü jiĩxü̃ca̱x.
19 Rü Cristu rü Tupanaxü̃chi nixĩ, jerü jemaãcü nanaxwa̱xe ga Tupana.
20 Rü Tupana rü nhama ga naãnewa nanamu ga Cristu na curuchagu pecaduca̱x najuxü̃ca̱x. Rü jemaãcü nixĩ ga Tupana nügümaã nangüxmüẽxẽẽxü̃ ga guxü̃ma i nhama i naãnewa ngẽxmaxü̃ rü guxü̃ma i dauxü̃guxü̃ i naãnewa ngẽxmaxü̃. Rü jemaãcü nanaxü ga Tupana jerü jemaãcü nanaxwa̱xe.
21 Rü pema ga ü̃pa rü tama Tupanamücügü peixĩgü jerü aixcuma norü uwanügü pegü peixĩgüxẽẽ jerü chixexü̃gu perüxĩnüẽ rü chixexü̃ pexüe.
22 Notürü i nhu̱xma ja Tupana rü nügümaã pexü̃ narüngüxmüẽxẽẽ na namücügü i mexü̃ peixĩgüxü̃ca̱x. Rü jemaãcü nanaxü ga Tupana ga jexguma Cristu duü̃xü̃xü̃ ixĩxgu rü curuchawa ngúxü̃ jangexgu rü jexma naju̱xgu. Rü jemaãcü naju ga Cristu na nügüxü̃tawa pexü̃ nagagüxü̃ca̱x rü nape̱xewa pemexü̃ca̱x rü nataxuxü̃ca̱x i perü chixexü̃.
23 Notürü ngẽ́ma na pengugüxü̃ca̱x, rü penaxwa̱xe na meã pejaxõgüechaxü̃ rü meã naga pexĩnüẽxü̃ rü taguma nüxü̃ perüxoexü̃ i ngẽma norü ore i mexü̃ ga marü nüxü̃ pexĩnüẽxü̃. Rü jema ore ga marü nüxü̃ pexĩnüẽxü̃, rü ngẽmatama ore nixĩ i nüxü̃ chixuxü̃ i chamax. Rü nhu̱xma rü guxü̃ i naãnewa nixĩ i nüxü̃ jaxugüexü̃.
Tupana rü Pauruxü̃ namu na guxü̃ma ga jaxõgüxü̃xü̃ nangü̃xẽẽxü̃ca̱x
24 Rü nhu̱xma rü woo pexca̱x ngúxü̃ chingexgu rü chataãẽ erü nüxü̃ chacua̱x rü nhaã chaxunemaã chama rü ta chajanguxẽẽ ga jema ngúxü̃ ga Cristu ingexü̃ naxca̱x i norü duü̃xü̃gü i jaxõgüxü̃.
25 Rü nhu̱xma ja Tupana rü choxü̃ namu na nüxü̃ charüngü̃xẽẽxü̃ca̱x i guxü̃ma i ngẽma norü duü̃xü̃gü i jaxõgüxü̃. Rü perü mexü̃ca̱x nixĩ i choxü̃ namuxü̃ na guxü̃wama meã nüxü̃ chixuxü̃ca̱x i norü ore.
26 1:26-27 Rü ngẽma Tupanaãrü ore rü nhanagürü:“Rü Cristu rü pewa nangẽxma i nhu̱xmax, rü nagaguxicatama nixĩ i pexü̃́ nangẽxmaxü̃ i pechica i dauxü̃guxü̃ i naãnewa i ngextá ínamexẽchixü̃wa”,nhanagürü. Rü jema nuxcümaxü̃güxü̃ ga duü̃xü̃gü rü tama nüxü̃ nacua̱xgü ga jemachiga, notürü nhu̱xma ja Tupana rü norü duü̃xü̃güxü̃ nüxü̃ nacua̱xẽẽ. Erü nüma ja Tupana rü norü duü̃xü̃güxü̃ nüxü̃ nadauxẽẽchaü̃ na nhuxãcü poraãcü pexü̃ nangechaü̃xü̃ rü pexü̃ nangü̃xẽẽxü̃ i guxãma i pema i tama Judéugü ixĩgüxe. Rü nhu̱xma i pema na woo tama Judéugü peixĩgüxü̃, notürü pema rü ta pexü̃́ nangẽxma i pechica i dauxü̃guxü̃ i naãnewa erü Cristuaxü̃́ pejaxõgü.
27 Nüü̃ nadau 1:26
28 Rü nhu̱xma i toma rü Cristuxü̃ nixĩ i tixuxü̃. Rü guxü̃ i torü cua̱xmaã guxü̃ma i duü̃xü̃güxü̃ tixucu̱xẽgü rü meã tanangúexẽẽ na ngẽmaãcü Cristugagu ngearü chixexü̃ã́xü̃ Tupanaxü̃ tawéxü̃ca̱x.
29 Rü ngẽmatama puracü nixĩ i nawa poraãcüxü̃chima chapuracüamaxü̃ woo ṯacü rü guxchaxü̃ chauxca̱x ínguxgu. Rü guxü̃ma i ngẽma pora i Cristu choxna ãxü̃ i chawa ngẽxmaxü̃ nixĩ i choxü̃ poraxẽẽxü̃ na chanaxüamaxü̃ca̱x i ngẽma puracü.
