Corochacü̃ãꞌ 2:1-23
2 Pa Chaueneẽgüx, chanaxwa̱xe i nüxü̃ pecua̱x na nhuxãcü poraãcü pexca̱x chapuracüxü̃. Rü ngẽxgumarüü̃ ta chanaxwa̱xe i nüxü̃ pecua̱x na nhuxãcü poraãcü chapuracüxü̃ naxca̱x i ngẽma taeneẽgü i Raodichéaarü ĩãnewa ngẽxmagüxü̃ rü guxü̃ma i petanüxü̃gü i taguma choxü̃ daugüxü̃.
2 Rü ngẽmaãcü poraãcüxü̃chima chapuracü na nüxü̃́ rü ta chanangúchaü̃xẽẽxü̃ca̱x. Erü chanaxwa̱xe i guxü̃ma aixcuma nügü nangechaü̃gü rü nüxü̃́ nangẽxma i ngẽma mexü̃ i cua̱x i aixcuma ixĩxü̃. Rü ngẽmaãcü tá meãma nüxü̃ nacua̱xgü ga jema noxri Tupanaxĩcatama nüxü̃ cuáxü̃. Rü jima rü Cristutama nixĩ.
3 Rü nüma nixĩ i nüxü̃́ nangẽxmaxü̃ i guxü̃ma i cua̱x i aixcuma mexü̃. Rü nüma nixĩ i taxca̱x nango̱xẽẽãxü̃ i Tupanachiga.
4 Rü pemaã nüxü̃ chixu i ngẽma ore erü tama chanaxwa̱xe na texé pexü̃ womüxẽẽgüxü̃ namaã i ṯacü rü ore i chixexü̃wa pexü̃ gagüxü̃.
5 Rü woo na tama ngẽ́ma petanüwa changẽxmaxü̃, notürü chauãẽwa rü poraãcü pegu charüxĩnü. Rü wüxi i chorü taãẽ nixĩ na nüxü̃ chacuáxü̃ na nhuxãcü meã pegü ipenuxü̃ na meã pegümaã ipecuáxü̃ca̱x rü nhuxãcü tama nüxü̃ perüxoexü̃ na Cristuaxü̃́ pejaxõgüxü̃.
Nhu̱xma na Cristuarü ixĩgüxü̃ rü ngexwacaxü̃xü̃ i maxü̃ tüxü̃́ nangẽxma
6 Rü pema ga noxri rü meãma tórü Cori ja Ngechuchu ja Cristuxü̃ pejauxgü. Rü nhu̱xma rü jema noxri meãma na penajauxgüxü̃rüü̃ rü name nixĩ i guxü̃guma nüxna penaxã i perü maxü̃ na nüma pexü̃́ namaã inacuáxü̃ca̱x.
7 Rü wüxi i nanetü nanaxwa̱xe i naxchúma̱xã na nataixü̃ca̱x rü na namaxü̃xü̃ca̱x. Rü ngẽxgumarüü̃ ta i pema rü penaxwa̱xe na meã Cristuna pejaxũ̱xgüxü̃ na meã nawa peijaetanüxü̃ca̱x rü meã naxca̱x pemaxẽxü̃ca̱x rü meã nüxü̃́ pejaxõgüamaxü̃ca̱x jema noxri Epáfra pexü̃ ngúexẽẽgurüü̃. Rü name nixĩ i guxü̃guma Tupanana moxẽ pexã.
8 2:8-9 ¡Rü naxca̱x pexuãẽgü i ngẽma duü̃xü̃gü i pexü̃ womüxẽẽgüchaü̃xü̃! Rü tama name i nüxü̃́ iperüxĩnüẽ i ngẽma norü ore i tama aixcuma ixĩxü̃ rü taxuwama mexü̃. Erü ngẽma duü̃xü̃gü rü pexü̃ nangúexẽẽchaü̃ na nagu pexĩxü̃ca̱x i ngẽma nacümagü ga nuxcümaxü̃güxü̃ ga duü̃xü̃gü nagu ĩxü̃. Rü nhama i naãneãrü ngu̱xẽẽtae nixĩ i inaxĩnüẽxü̃. Notürü tama aixcuma Cristuchiga nixĩ i ngẽma pexü̃ nangúexẽẽxü̃. Rü name nixĩ i nüxna peixĩgachi i guxü̃ma i ngẽma ngu̱xẽẽtaeruü̃gü i chixexü̃gü rü Cristuwe perüxĩ. Erü Cristu rü Tupanaxü̃chi nixĩ rü guxü̃ma i Tupanaãrü pora rü Cristuwa nangẽxma.
9 Nüü̃ nadau 2:8
10 Rü nhu̱xmax, rü Tupanaãrü maxü̃ rü norü pora rü aixcuma pewa nangẽxma erü name̱xwa pengẽxmagü ja Cristu ja namaã icuácü i guxü̃ma i dauxü̃cü̱̃ã̱xãrü ãẽ̱xgacügü rü guxü̃ma i ṉg̱oxogüarü ãẽ̱xgacügü.
11 Rü ngẽma Judéugü rü nügü ínawiecha̱xmüpe̱xechiraü̃gü na Tupanape̱xewa jamexü̃ca̱x. Notürü ngẽxguma Cristuaxü̃́ jaxõgügu rü tama ngẽmaãcü tamaã nanaxü ja Cristu na imexü̃ca̱x. Erü nüma ja Cristu rü tórü maxü̃wa napuracü rü tüxü̃ ínanguxü̃xẽẽ nawa i taxüneãrü ngúchaü̃gü. Rü ngẽmaãcü nixĩ i tüxü̃ jamexẽẽxü̃ na Tupanape̱xewa imexü̃ca̱x.
12 Rü jexguma ípebaiü̃gu, rü Cristu na itáxü̃rüü̃ jexma nata̱x ga jema nuxcümaxü̃xü̃ ga perü maxü̃. Rü jema Cristu na írüdaxü̃rüü̃ rü pema rü ta penajaxu i maxü̃ i ngexwacaxü̃xü̃, jerü pejaxõgü na Tupana norü poramaã Cristuxü̃ írüdaxẽẽxü̃.
13 Rü ü̃pa ga pema rü tama aixcuma pexü̃́ najexma ga maxü̃ i taguma gúxü̃ jerü pepecaduã̱xgü rü pexeneãrü ngúchaü̃ pexügü. Notürü i nhu̱xma rü Cristuxü̃ namaxẽẽxü̃rüü̃ pexü̃ namaxẽxẽẽ ja Tupana erü Cristuarü duü̃xü̃gü peixĩgü. Rü Tupana rü marü Cristugagu tüxü̃́ nüxü̃ nangechaü̃ i guxü̃ma i tórü pecadugü.
14 Rü noxri rü tachixe jerü tama aixcuma naga taxĩnüẽ ga jema mugü ga Muĩsé tüxna ãxü̃, rü tórü pecadugü rü juwa tüxü̃ nagagü. Notürü ga Cristu rü curuchagu tórü pecaduca̱x naju, rü jemaãcü Tupana tüxü̃́ najangutanüxẽẽ ga jema tórü pecadugü.
15 Rü jexguma curuchagu naju̱xgu ga Cristu, rü jexguma nixĩ ga Chatanáxü̃ naporamaẽxü̃ ga Tupana. Rü jexguma nixĩ ga guxü̃ ga duü̃xü̃güpe̱xewa Chatanáxü̃ naxãnexẽẽxü̃ nhama wüxi i churaragüarü ãẽ̱xgacü i norü uwanü i nüxü̃ naporamaẽxü̃xü̃ naxãnexẽẽxü̃rüü̃.
Name nixĩ i naxca̱x tadaugü i ngẽma mexü̃gü i dauxü̃guxü̃ i naãnewa ngẽxmagüxü̃
16 Rü nhu̱xma rü taxuü̃ca̱xma tü̱xcüü̃ pexü̃ nixu i ngẽma Judéugü ega woo tama naxrüü̃ penaxü̱xgux. Nümagü rü nhuxre i õnagüxicatama nangõ̱xgü, rü nhuxre i axchiüxicatama nixaxgü, rü nhuxre i petaarü ngunexü̃gü naxauregü na ngẽmaãcü Tupanaxü̃ jacua̱xüü̃güxü̃ca̱x. Rü nangẽxma i norü peta i gucü ja taunecügu Tupanaca̱x naxauregüxü̃ rü togü i petagü i gucü ja tawemacügu naxauregüxü̃. Rü nüxü̃́ nangẽxma i nacümagü na nhuxãcü ngü̃xchigaarü ngunexü̃gü naxauregüxü̃.
17 Rü aixcuma jema nuxcümaxü̃güxü̃ ga Judéugü rü nanaxauregü ga jema nacümagü jerü ga Cristu rü taũta ínangu ga jexguma. Notürü i nhu̱xma rü marü ínangu ja Cristu rü tórü pecaduca̱x naju. Rü nhu̱xma rü name nixĩ na naga ixĩnüẽxü̃ rü tama nagu ixĩxü̃ i ngẽma nuxcümaxü̃güxü̃ i nacümagü.
18 ¡Rü tãũxü̃táma naga pexĩnüẽ i ngẽma duü̃xü̃gü i nüxü̃ ixugüxü̃ na ipejarütauxexü̃ ega tama dauxü̃cü̱̃ã̱x i orearü ngeruü̃güxü̃ peicua̱xüü̃gügu! Nümagü rü nügü ínarüxíragüneta rü nügü nixugü na jango̱xetügüxü̃. Rü noxrütama cua̱xmaãmare nügü nicua̱xüü̃gü.
19 Notürü i nümagü rü tama aixcuma naga naxĩnüẽ ja jima taeru ixĩcü ja Cristu ja tüxü̃ poraexẽẽcü rü tüxü̃ ijaetanüxẽẽcü i tórü õwa i guxãma i jixema i norü duü̃xü̃gü ixĩgüxe. Rü nüma ja Cristu nixĩ i wüxigu tüxü̃ naxĩnüẽxẽẽxü̃ i wüxichigü i jixema ngẽma Tupana naxwa̱xexü̃rüü̃.
20 Rü jexguma naju̱xgu ga Cristu rü jexma naju ga nuxcümaxü̃xü̃ ga perü maxü̃, rü jexma najarüxo ga guxü̃ma ga nuxcümaxü̃güxü̃ ga pecümagü i nhama i naãnecü̱̃ã̱x i duü̃xü̃gü nagu rüxĩnüẽxü̃. Rü ngẽmaca̱x i nhu̱xmax ¿rü tü̱xcüü̃ nixĩ i nhama i naãnecü̱̃ã̱x maxẽxü̃rüü̃ pemaxẽxü̃ i pemax, rü tü̱xcüü̃ nixĩ i ngẽma Judéugücümagu pexĩxü̃?
21 Rü nümagü i Judéugü rü nüxü̃ nixugüe rü nhanagürügü:
“Tama name i nüxü̃ cuingõgü i ngẽã, rü tama name i cunangõ̱x i jea, rü tama name i cunajaxu i ngẽma”, nhanagürügü.
22 Notürü guxü̃ma i ngẽma nacümagü rü paxa tá inajarüxo erü duü̃xü̃güarü nixĩgü. Rü ngẽma pexü̃ namuxü̃ rü duü̃xü̃güarü mugümare nixĩ. Rü ngẽma pexü̃ nangúexẽẽxü̃ rü duü̃xü̃güarü ngu̱xẽẽtaemare nixĩ.
23 Rü guxü̃ma i ngẽma pexü̃ namuxü̃ rü pexca̱x namexcüraxü̃ erü pexü̃ naxucu̱xẽgü na ṯacü pexauregüxü̃ca̱x, rü tama pegü peicua̱xüü̃güxü̃ca̱x, rü meã pexenemaã ipecua̱xgüxü̃ca̱x. Notürü guxü̃ma i ngẽma mugü rü tama aixcuma pexü̃ narüngü̃xẽẽ na nüxü̃ perüxoexü̃ca̱x i pexeneãrü ngúchaü̃gü.
