Corochacü̃ãꞌ 3:1-25
3 Rü nhu̱xma i pemax, rü Cristu wena maxü̃xü̃rüü̃ rü pexü̃́ nangẽxma i maxü̃ i ngexwacaxü̃xü̃. Rü ngẽmaca̱x name nixĩ i naxca̱x pedau i ngẽma mexü̃gü i dauxü̃guxü̃ i naãnewa ngẽxmaxü̃ i ngextá Cristu rü Tupanaãrü tügünecüwawa írütoxü̃wa rü namaã ãẽ̱xgacü íjiĩxü̃wa.
2 Rü name nixĩ i guxü̃guma nagu perüxĩnüẽ i ngẽma dauxü̃guxü̃ i naãnewa ngẽxmaxü̃, rü tama ngẽma nhama i naãnewa ngẽxmaxü̃.
3 Jerü jexguma naju̱xgu ga Cristu rü jexma naju ta ga nuxcümaü̃xü̃ ga perü maxü̃. Rü nhu̱xma rü pexü̃́ nangẽxma i perü maxü̃ i ngexwacaxü̃xü̃ erü Cristutanüxü̃ peixĩgü rü Tupaname̱xẽwa pengẽxmagü.
4 Rü nümatama ja Cristu nixĩ i pexü̃ namaxẽxẽẽxü̃. Rü ngẽxguma wena núma nango̱xgu, rü namaã tá peingóe, rü naxrüü̃ tá pemexẽchi.
Marü nüxü̃ tarüxo i nuxcümaxü̃xü̃ i tacüma i chixexü̃gü rü tanajaxu i ngexwacaxü̃xü̃ i tórü maxü̃
5 Rü nhu̱xma rü name nixĩ i nüxü̃ perüxoe i guxü̃ma i nhama i naãneãrü chixexü̃ i pewa ngẽxmaxü̃. Rü tama name i pema̱xna naĩ i ngemaã pemaxẽ, rü tama name i petena naĩ ja jatümaã pemaxẽ. Rü tama name i penaxü i pexeneãrü ngúchaü̃ rü bai i nagu perüxĩnüẽmare. Rü tama name i pexü̃́ nangúchaü̃ i ṯacü rü to i chixexü̃gü. Rü tama name i pegünaxĩcatama penanuãchigüchaü̃ i guxü̃ma i ngẽmaxü̃gü, erü jíxema ngẽma nacüma tüxü̃́ ngẽxmaxẽ rü düxwa namaã tatupanaã̱x.
6 Rü guxü̃ma i ngẽma chixexü̃güca̱x tá nixĩ i Tupana napocuexü̃ i ngẽma duü̃xü̃gü i ngẽmaãcü maxẽxü̃ rü tama naga ĩnüẽchaü̃xü̃.
7 Rü pema ga ü̃pa rü penaxü ga jema chixexü̃gü, rü jemaãcü pemaxẽ.
8 Notürü i nhu̱xma rü name nixĩ i nüxü̃ perüxoe i guxü̃ma i ngẽma na pegüchi pexaiexü̃, rü pegümaã penuẽxü̃, rü chixri pemaxẽxü̃, rü pegümaã peguxchigagüxü̃, rü guxü̃ma i ngẽma chixexü̃ i dexa i nüxü̃ peixuxü̃.
9 Rü tama name i pegümaã peidorae, erü marü ípenata̱x ga nuxcümaxü̃xü̃ ga pecüma rü guxü̃ma ga jema chixexü̃gü ga ü̃pa pexügüxü̃.
10 Rü nhu̱xma rü marü penajaxu i ngexwacaxü̃xü̃ i perü maxü̃ rü ngexwacaxü̃xü̃ i duü̃xü̃gü peixĩgü. Rü guxü̃ i ngunexü̃gu rü Tupana pexü̃ ningexwacaxü̃xẽẽchigü na jexeraãcü pemexü̃ca̱x naxrüü̃ rü jexeraãcü nüxü̃ na pecua̱xgüxü̃ca̱x ja Tanatü ja Tupana ja maxü̃ tüxna ãcü.
11 Rü nhu̱xma rü Tupanaca̱x rü nüẽ́tama nixĩ ega Judéu cuixĩgu rü e̱xna tama. Rü nüẽ́tama nixĩ ega ícuwiecha̱xmüpe̱xechiraü̃gu rü e̱xna tama. Rü nüẽ́tama nixĩ ega ṯacü rü nachiü̃ãnecü̱̃ã̱x i duü̃xü̃ cuixĩgu, rü e̱xna ṯacü rü duü̃xü̃ cuixĩgu. Rü nüẽ́tama nixĩ ega wüxi i coriarü duü̃xü̃ cuixĩgu, rü e̱xna taxúxearüma duü̃xü̃ cuixĩgu. Erü nhu̱xma rü ngẽma guxü̃ãrü jexera aixcuma tüxü̃́ mexü̃ nixĩ na Cristu rü guxü̃ãrü ãẽ̱xgacü jiĩxü̃ rü guxãwama nangẽxmaxü̃.
12 Rü nhu̱xma ja Tupana rü pexü̃ nangechaü̃ i pema rü pexü̃ nidexechi na noxrü peixĩgüxü̃ca̱x. Rü ngẽmaca̱x name nixĩ i guxü̃guma pexü̃́ nangechaü̃tümüü̃gü i togü, rü namaã pemecümagü, rü tauxchaãcüma nüxna penaxã, rü taguma nape̱xewa pegü íperütagü. Rü ngẽxguma woo ṯacü pemaã naxü̱xgux rü name nixĩ i jaxna namaã pexĩnüẽ.
13 Rü name nixĩ i wüxichigü i pema na pegümaã jaxna pexĩnüẽxü̃. Rü ngẽxguma chi texé ṯacü pemaã ü̱xgux, rü name nixĩ i pegüxü̃́ nüxü̃ pengechaü̃gü i ngẽma. Rü jexgumarüü̃ ga tórü Cori na pexü̃́ nüxü̃ ngechaü̃xü̃rüü̃, rü name nixĩ i togüaxü̃́ nüxü̃ pengechaü̃gü.
14 Rü guxü̃ãrü jexera mexü̃ nixĩ na pegü pengechaü̃güxü̃. Erü ngẽxguma aixcuma pegü pengechaü̃gügu rü aixcuma wüxigu tá perüxĩnüẽ, rü meã pegümaã tá pemaxẽ.
15 Rü name nixĩ na pemaã inacuáxü̃ i ngẽma taãẽ i Cristu pexna ãxü̃ na ngẽmaãcü aixcuma pegü pengechaü̃güxü̃ca̱x. Jerü jemaca̱x nixĩ ga Tupana pexü̃ idexechixü̃ na wüxitama i duü̃xü̃gü peixĩgüxü̃ca̱x rü meã wüxigu perüxĩnüẽxü̃ca̱x. Rü name nixĩ i moxẽ nüxna pexãgü ja Tupana.
16 Rü name nixĩ i guxü̃guma peãẽwa nangẽxma i Cristuarü ore rü taãẽãcüma naga pexĩnüẽ. Rü name nixĩ i meã peãẽxü̃ pecuáãcüma namaã pegü pengúexẽẽ rü pegü peixucu̱xẽgü na ngẽmaãcü pegüaxü̃́ penangúchaü̃xẽẽxü̃ca̱x. Rü name nixĩ i aixcuma Tupanana moxẽ pexãgüãcüma nagu pewijaegü i nagúxü̃raü̃xü̃ i norü wijaegü.
17 Rü guxü̃ma i ngẽma pexüxü̃ rü nüxü̃ peixuxü̃ rü name nixĩ i tórü Cori ja Ngechuchuégagu penaxü. Rü name nixĩ i ngẽmaãcü Ngechuchuégagu Tanatü ja Tupanana moxẽ pexãgü.
Tupana nanaxwa̱xe na meã namaxẽxü̃ i duü̃xü̃gü i Cristuaxü̃́ jaxõgüxü̃
18 Pa Ngexü̃gü i Ãtegüxü̃x, rü name nixĩ i petega pexĩnüẽ. Erü woetama ngẽma nixĩ i mexü̃ na penaxüxü̃ erü tórü Cori ja Cristuarü duü̃xü̃gü peixĩgü.
19 Pa Jatügü i Ãmaxgüxü̃x, rü name nixĩ i ngĩxü̃ pengechaü̃gü i pema̱xgü. Rü tama name i ngĩmaã penuẽ.
20 Pa Buxü̃güx, rü name nixĩ i guxü̃wama penatü rü peega pexĩnüẽ, erü ngẽma nixĩ i namaã nataãẽxü̃ ja tórü Cori.
21 Pa Jatügüx, rü tama name i penanuẽxẽẽ i pexacügü. Erü ngẽxguma ngẽmaãcü penaxü̱xgux rü ngürüãchi tá nüxü̃́ nawa̱xtümüü̃ i ngẽma namaã nüxü̃ peixuxü̃.
22 Pa Duü̃xü̃güx i Ixããrü Coriã̱xgüxü̃x, rü name nixĩ i guxü̃wama naga pexĩnüẽ i perü corigü i nhama i naãnewa pemaã icua̱xgüxü̃. Rü tama name i pexü̃ nadaugüguxicatama meã pepuracüe na ngẽmaãcü penataãẽxẽẽxü̃ca̱x. Notürü name nixĩ i mexü̃ i perü ngúchaü̃maã guxü̃guma meã pepuracüe erü tórü Corixü̃ pemuü̃ẽ.
23 Rü guxü̃ma i ngẽma perü puracü i pexüxü̃wa rü name nixĩ i perü ngúchaü̃maã penaxü nhama tórü Cori ja Cristuaxü̃́ pepuracüexü̃rüü̃ rü tama i duü̃xü̃güaxü̃́.
24 Rü marü nüxü̃ pecua̱x rü dauxü̃guxü̃ i naãnewa rü tórü Cori ja Cristu tá pexna nanaxã i perü ãmare i maxü̃ i taguma gúxü̃. Erü jima Cristu ja aixcuma perü Cori ixĩcüaxü̃́ nixĩ i pepuracüexü̃.
25 Notürü jíxema chixexü̃ üxe rü tá ta tanajaxu i tümaãrü natanü naxca̱x i ngẽma chixexü̃ i taxüxü̃, rü aixcuma Tupana tá tüxü̃ napocu. Erü Tupanape̱xewa rü guxü̃ma i duü̃xü̃gü rü nawüxigu, rü taxucürüwama texé Tupanacha̱xwa tinha ega chixexü̃ taxü̱xgux.
