Corochacü̃ãꞌ 4:1-18
4 Rü pemax, Pa Corigüx, rü name nixĩ i perü duü̃xü̃gümaã pemecümagü, rü tama penawomüxẽẽ. ¡Rü nüxna pecua̱xãchie na pema rü ta pexü̃́ nangẽxmaxü̃ ja perü Cori ja dauxü̃gucü!
2 ¡Rü guxü̃guma pejumuxẽgü, rü pexuãẽgü na tama ngextamare naxĩnüxü̃ca̱x i peãẽ i ngẽxguma pejumuxẽgügu! ¡Rü Tupanana moxẽ pexãgü!
3 ¡Rü toxca̱x rü ta pejumuxẽgü na Tupana toxü̃́ natauxchaxẽẽxü̃ca̱x na nüxü̃ tixuxü̃ca̱x i norü ore i mexü̃, rü meãma duü̃xü̃gümaã nüxü̃ tixuxü̃ca̱x i ngẽma ore ga noxri tama nüxü̃ nacua̱xgüxü̃ i Cristuchiga! Rü ngẽma oreca̱x nixĩ i nhu̱xma ichapocuxü̃.
4 Rü chanaxwa̱xe i chauxca̱x pejumuxẽgü na meã duü̃xü̃güxü̃ nüxü̃ chacua̱xẽẽxü̃ca̱x i ngẽma ore, erü ngẽma nixĩ i mexü̃ na chanaxüxü̃.
5 Rü chanaxwa̱xe i meã pemaxẽ nape̱xewa i ngẽma duü̃xü̃gü i tama jaxõgüxü̃. ¡Rü nhu̱xma na pexü̃́ natauxchaxü̃, rü joxni paxa penaxü̱x i Tupanaãrü puracü! ¡Rü tama iperüchomare!
6 Rü name nixĩ i guxü̃guma meã namaã peidexagü i ngẽma togü i duü̃xü̃gü, rü mexü̃ i orexü̃ namaã peixugü. Rü ngẽmaãcü tá nüxü̃ pecua̱x na nhuxãcü meã penangãxü̃xü̃ i wüxichigü i ngẽma duü̃xü̃gü i perü õchigaca̱x pexna c̱axü̃.
Pauru nanagu̱xẽẽ ga norü popera rü wenaxãrü jema duü̃xü̃güxü̃ narümoxẽ
7 Rü nüma ja taeneẽ ja Tíquicu ja nüxü̃ ingechaü̃gücü rü tá pemaã nüxü̃ nixu i chauchiga. Rü nüma nixĩ i mexẽchicü ja chorü ngü̃xẽẽruü̃ jiĩxü̃, rü nüma nixĩ i wüxigu chamaã naxüãxü̃ i tórü Coriarü puracü.
8 Rü nhu̱xma rü petanüwa chanamu na pexü̃ nataãẽxẽẽxü̃ca̱x rü pemaã nüxü̃ jaxuxü̃ca̱x na nhuxãcü toxü̃ nangupetüxü̃ i tomax.
9 Rü Tíquicumaã petanüwa chanamu i Onéchimu i taeneẽ ja nüxü̃ ingechaü̃gücü ja aixcuma meã Tupanaãrü puracü ücü. Rü nüma nixĩ i petanüxü̃ jiĩxü̃. Rü nümagü i ngẽma taxre rü tá pemaã nüxü̃ nixu i guxü̃ma i ṯacü na ngupetüxü̃ i núma.
10 Rü pexü̃ narümoxẽ i Aristácu i wüxigu nuxma chamaã pocuxü̃. Rü ngẽxgumarüü̃ ta pexü̃ narümoxẽ i Marcu i Barnabéeneẽ ixĩxü̃. Rü marü pemaã nüxü̃ chixu i Marcuchiga na meã penajauxgüxü̃ca̱x i ngẽxguma petanüwa nanguxgu.
11 Rü ngẽxgumarüü̃ ta pexü̃ narümoxẽ ja taeneẽ ja Ngechuchu ja Juchugu ãẽ́gacü. Rü ngẽma tamaẽ̱xpü̱x i jatügü rü ngẽxĩcatama nixĩ i Judéugü i jaxõgüxü̃ i wüxigu chamaã puracüexü̃ i Tupanaãrü puracüwa. Rü nümagü rü poraãcü choxü̃ nataãẽxẽẽgü.
12 Rü ngẽxgumarüü̃ ta pexü̃ narümoxẽ i Epáfra. Rü nüma rü petanüxü̃ nixĩ, rü aixcuma nanaxü i Cristuarü puracü. Rü nüma rü norü jumuxẽwa rü guxü̃guma Tupanaxü̃ naca̱a̱xü̃ pexca̱x na aixcuma meã pemaxẽxü̃ca̱x rü pejaxõgüamaxü̃ca̱x rü aixcuma penaxüxü̃ca̱x i ngẽma Tupana naxwa̱xexü̃.
13 Rü chama rü marü nüxü̃ chadau rü pemaã nüxü̃ chixu i nhuxãcü Epáfra poraãcü pexca̱x napuracüxü̃ rü naxca̱x napuracüxü̃ i ngẽma taeneẽgü i Raodichéaarü ĩãnewa rü Iráporiarü ĩãnewa ngẽxmagüxü̃.
14 Rü Luca, i duturu i nüxü̃ ingechaü̃güxü̃, rü pexü̃ narümoxẽ. Rü ngẽxgumarüü̃ ta pexü̃ narümoxẽ i Dema.
15 Rü chanaxwa̱xe i nüxü̃ perümoxẽgü i taeneẽgü i Raodichéawa ngẽxmagüxü̃. Rü ngẽxgumarüü̃ ta chanaxwa̱xe i nüxü̃ perümoxẽgü i Nifa rü guxü̃ma i taeneẽgü i jaxõgüxü̃ i napatawa ngutaque̱xegüüxü̃.
16 Rü ngẽxguma marü nüxü̃ pedaumatüguwena i nhaã popera, rü chanaxwa̱xe i Raodichéawa penamu na ngẽ́macü̱̃ã̱x i taeneẽgü rü ta nüxü̃ nadaumatügüxü̃ca̱x. Rü ngẽxgumarüü̃ ta i ngẽma popera i Raodichéawa chamuxü̃, rü ngẽxguma pexü̃tawa nanguxgu rü chanaxwa̱xe i nüxü̃ pedaumatügü.
17 Rü chanaxwa̱xe i Ariquípumaã nüxü̃ peixu, rü nhapegügü nüxü̃:
“¡Rü meã napuracü rü janguxẽẽ i ngẽma puracü i tórü Cori cuxna ãxü̃!” nhapegügü nüxü̃.
18 Chama i Pauru rü cha̱xme̱xmaãtama pexca̱x chanaxümatü i nhaã chorü moxẽ. ¡Rü nüxna pecua̱xãchie na chapocuxü̃! Rü chanaxwa̱xe i Tupana pexü̃ narüngü̃xẽẽ.
Rü nuãma pexna,
Pauru
