Ebréugü 1:1-14
1 Nuxcüma ga Tupana rü muẽ̱xpü̱xcüna rü nagúxü̃raü̃xü̃ãcüma norü orearü uruü̃güwa tórü o̱xigümaã nidexa, rü namaã nüxü̃ nixu ga ṯacü nüxü̃́ na nanaxwa̱xexü̃.
2 Notürü i nhamaü̃cüü ja Tupana rü Nanewatama nixĩ i tamaã jadexaxü̃ rü tüxü̃ nüxü̃ nacua̱xẽẽxü̃ na nhuxãcü tüxü̃ nangü̃xẽẽchaü̃xü̃. Rü gumaxü̃ nixĩ ga namuxü̃ na naxüãxü̃ca̱x ga nhama ga naãne rü dauxü̃guxü̃ ga naãne rü üa̱xcü rü tawemacü rü woramacurigü rü ẽxtagü. Rü nhu̱xmachi guma Nanena nanana ga guxü̃ma ga jema na noxrü jiĩxü̃ca̱x.
3 Rü Nanewa nixĩ i nüxü̃ idauxü̃ na nhuxãcü namexẽchixü̃ i nüma ja Tupana. Rü nüma ja Nane rü Nanatü ja Tupanarüü̃tama nixĩ. Rü nhu̱xma na guxü̃ãrü ãẽ̱xgacü jiĩxü̃ ja Nane, rü guxü̃maãma inacua̱x rü norü ore i poraxü̃maã nanamu i guxü̃ma na nüma nanaxwa̱xexü̃ãcüma na jiĩxü̃ca̱x. Rü nüma ja Nane nixĩ ga taxca̱x najuxü̃ na nüxü̃ rüxoexü̃ca̱x ga tórü pecadugü. Rü jemawena rü Nanatüxü̃tawa naxũ i dauxü̃guxü̃ i naãnewa. Rü jéma Nanatüarü tügünecüwawa najarüto erü guxü̃ãrü ãẽ̱xgacü nixĩ i nhu̱xmax.
Tupana Nane rü guxü̃ma i orearü ngeruü̃gü i dauxü̃cü̱̃ã̱xétüwa nangẽxma
4 Rü nhu̱xma i nüma ja Nane rü guxü̃ma i Tupanaãrü orearü ngeruü̃gü i dauxü̃cü̱̃ã̱xãrü jexera nixĩ rü naẽ́tüwa nangẽxma jerü jemaãcü nanaxuegu ga Nanatü.
5 Rü ngẽmaãcü nixĩ i nhu̱xma jerü ga Tupana rü taguma wüxi ga norü orearü ngeruü̃xü̃ nhanagürü:“Cuma nixĩ i Chaune. Rü nhu̱xma chanango̱xẽẽ na aixcuma Chaune cuiĩxü̃”,
nhanagürü. Rü taguma wüxi ga norü orearü ngeruü̃chiga nhanagürü:“Chama nixĩ i Nanatü chiĩxü̃ rü nüma rü Chaune nixĩ”,
nhanagürü.
6 Notürü jexguma nhama ga naãnewa namuãgu ga Nane ja guxü̃ẽ́tüwa ngẽxmacü, rü nhanagürü ga Tupana:“Chanaxwa̱xe i guxü̃ma i chorü orearü ngeruü̃gü i dauxü̃cü̱̃ã̱x rü nüxü̃ nicua̱xüü̃gü ja Chaune”,
nhanagürü.
7 Rü jexguma norü orearü ngeruü̃gü ga dauxü̃cü̱̃ã̱xchiga jadexagu ga Tupana, rü nhanagürü:“Chama chanaxwa̱xexü̃ãcüma chanamu i ngẽma chorü orearü ngeruü̃gü i chorü ngü̃xẽẽruü̃gü ixĩgüxü̃. Rü ngẽxguma chanaxwa̱xegu rü nhama buanecü rü nhama üxüemarüü̃ chajaxĩgüxẽẽ, rü chanaporaexẽẽ na naxügüãxü̃ca̱x i chorü ngúchaü̃”,
nhanagürü.
8 Notürü jexguma Nanechiga jadexagu ga Tupana rü nhanagürü:“Cuma rü chauxrüü̃ Tupana cuixĩ. Rü guxü̃gutáma ãẽ̱xgacü cuixĩ. Rü aixcuma meã guxü̃maã icucua̱x erü aixcumacü cuixĩ.
9 Rü nüxü̃ cungechaü̃ i guxü̃ma i ngẽma nacüma i mexü̃ notürü nachi cuxai i guxü̃ma i ngẽma nacüma i chixexü̃. Rü ngẽmaca̱x i chama na Cunatü ja Tupana chiĩxü̃ rü guxãẽ́tüwa cuxü̃ changẽxmaxẽẽ rü guxããrü jexera cuxü̃ chataãẽxẽẽ”,
nhanagürü.
10 Rü jexgumarüü̃ ta Nanexü̃ nhanagürü ga Tupana:“Cuma rü guxü̃ãrü Cori cuixĩ. Rü noxriarü ügügumama ga jexguma natau̱xgutama ga nhama ga naãne, rü cuma nixĩ ga cunaxüxü̃. Rü cumatama nixĩ ga cunaxüxü̃ ga üa̱xcü rü tawemacü rü guxü̃ma ga ẽxtagü.
11 Rü guxü̃ma i ngẽma rü tá nagu̱x, notürü i cuma rü guxü̃gutáma cungẽxmaẽcha. Rü guxü̃ma i ngẽma rü nhama naxchirurüü̃ tá nangaue.
12 Rü nhama wüxi i naxchiru i ṉg̱auxü̃ i ngẽ́ma ita̱xmarexü̃rüü̃ tá ícunawogü i nhama i naãne rü guxü̃ma i dauxü̃wa nüxü̃ idauxü̃. Rü to i ngexwacaxü̃xü̃maã tá cunaxüchicüü, nhama wüxi i naxchiru i ṉg̱auxü̃ i ngexwacaxü̃xü̃maã ixüchicüüxü̃rüü̃. Notürü i cuma rü tá cunaxa̱i̱xrügumaraxü̃ẽcha rü tagutáma cuju”,
nhanagürü ga Tupana.
13 Rü Tupana rü nhanagürü nüxü̃:“¡Nuã chauxü̃tawa rüto nhu̱xmatáta nüxü̃ cuxü̃ charüporamaẽxẽẽ i guxü̃ma i curü uwanügü!”
nhanagürü. Notürü ga Tupana rü taguma jema nhanagürü nüxü̃ ga ngẽxü̃rüüxü̃ ga norü orearü ngeruü̃gü ga dauxü̃cü̱̃ã̱x.
14 Rü guxü̃ma i Tupanaãrü orearü ngeruü̃gü i dauxü̃cü̱̃ã̱x rü naãẽgü i Tupanaãxü̃́ puracüexü̃ nixĩgü. Rü nüma ja Tupana rü núma nanamugü na nüxü̃ janangü̃xẽẽgüxü̃ca̱x i guxü̃ma i ngẽma duü̃xü̃gü i Tupana naxwa̱xexü̃ na najauxgüãxü̃ i maxü̃ i taguma gúxü̃.
