Ebréugü 10:1-39
10 Rü jema mugü ga Muĩsé ümatüxü̃ rü íraruwatama jema duü̃xü̃güca̱x nanango̱xẽẽ ga ṯacü tá na naxüxü̃ ga Cristu. Notürü ga jema mugü rü tama aixcuma Cristurüü̃ napora, jerü taxucürüwama Tupanape̱xewa najamexẽẽ ga jema duü̃xü̃gü woo gúcü ga taunecügügu Tupanaca̱x nanadaiixü̃ ga naxü̃nagü na jemaãcü Tupanana nangaicamagüxü̃ca̱x. Rü jemaãcü ga jema mugü rü taxucürüwama Cristurüü̃ nanamaxẽxẽẽ ga jema duü̃xü̃gü.
2 Rü jexguma chi jema mugü aixcuma jema duü̃xü̃güxü̃ imexẽẽgu ga Tupanape̱xewa, rü tau chima nagu narüxĩnüẽẽcha na japecaduã́xü̃, rü chi nüxü̃ narüxoe na naxü̃nagü Tupanaca̱x naḏaixü̃.
3 Notürü jema na Tupanaca̱x naxü̃nagü naḏaixü̃ ga duü̃xü̃gü, rü norü pecaduarü cua̱xãchixẽẽruü̃mare nixĩ ga gúcü ga taunecügügu.
4 Jerü guma nagü ga jema wocagü rü bodegü rü tama napora na ijanaxoxẽẽãxü̃ca̱x ga pecadugü.
5 Rü jemaca̱x ga Cristu ga jexguma nhama ga naãnewa naxũxchaü̃gu, rü Nanatüxü̃ nhanagürü:“Tama cunaxwa̱xe na naxü̃nagü cuxca̱x naḏaixü̃ i duü̃xü̃gü na naxütanügüãxü̃ca̱x i norü pecadugü. Notürü cunamexẽẽ i nhaã chaxune na ngẽmamaã chanaxütanüxü̃ca̱x i pecadu.
6 Rü tama namaã cutaãẽ i ngẽma naxü̃nagü i cuxna naxãmaregüxü̃ rü cuxca̱x naḏaixü̃ rü jagugüxü̃ na naxütanügüãxü̃ca̱x i norü pecadugü.
7 Rü jemaca̱x rü nhacharügü: ‘Dücax, Pa Chaunatüx, daxe chixĩ, rü nuã cupe̱xewa changẽxma na chanaxüxü̃ca̱x i curü ngúchaü̃ rü na chajuxü̃ca̱x, ngẽma curü orewa chauchiga naxümatüxü̃rüü̃’, nhacharügü”.
8 Rü jemaãcü ga Cristu rü nüxü̃ nixu na Tupana rü tama aixcuma namaã nataãẽxü̃ ga jema na naxca̱x nadaiãxü̃ ga naxü̃nagü rü naxca̱x jagugüãxü̃ na naxütanügüãxü̃ca̱x ga norü pecadugü woo jema mugü ga Muĩsé ümatüxü̃wa rü duü̃xü̃güxü̃ namu na naxügüãxü̃ ga guxü̃ma ga jema.
9 Rü jemawena ga Cristu, rü nhanagürü ta:“Dücax, Pa Chaunatüx, daxe chixĩ, rü nuã cupe̱xewa changẽxma na chanaxüxü̃ca̱x i curü ngúchaü̃ rü duü̃xü̃güarü pecaduca̱x na chajuxü̃ca̱x”,
nhanagürü. Rü jemawa nüxü̃ tacua̱x na Tupana rü marü ijanaxoxẽẽãxü̃ na naxü̃nagü naxca̱x naḏaixü̃, jerü Nanexü̃ ningucuchixẽẽ na pecaduca̱x najuxü̃.
10 Rü nhu̱xma na Ngechuchu ja Cristu naxüxü̃ ga jema Tupanaãrü ngúchaü̃, rü ngẽmaca̱x nixĩ i nhu̱xma i Tupanape̱xewa ixüünexü̃ i jixema. Jerü nüma ga Cristu rü Tupanana nügü naxã na wüxicanatama guxããrü pecaduca̱x najuxü̃.
11 Rü guxü̃ma i Judéugüarü paigü rü wüxichigü i ngunexü̃gu rü tupaucawa nangẽxmagüxü̃ na Tupanana naxãgüãxü̃ca̱x i naxü̃nagü i naxca̱x nadaiiixü̃. Rü guxü̃guma jemaãcü nanaxügüxü̃ notürü taguma aixcuma inajarüxo ga norü pecadugü woo jemaãcü na naxügüxü̃ãxü̃.
12 Notürü nüma ga Ngechuchu ja Cristu rü wüxicanatama Tupanana nügü naxã na guxããrü pecaduca̱x najuxü̃ca̱x. Rü jemawena rü nhu̱xmachi dauxü̃wa naxũ rü Tupanaãrü tügünecüwawa najarüto, erü guxããrü ãẽ̱xgacü nixĩ i nhu̱xmax.
13 Rü ngẽ́ma nixĩ i nangẽxmaxü̃ nhu̱xmatáta ja Tupana rü guxü̃ma i norü uwanügüxü̃ nüxü̃ najexeraxẽẽ.
14 Rü nüma ga Ngechuchu ja Cristu rü wüxicanatama Tupanana nügü naxã rü naju na guxü̃guma Tupanape̱xewa timexü̃ca̱x ja jíxema Tupanaca̱x tüxü̃ jaxüünexẽẽgüxe. Rü ngẽmaca̱x i nhu̱xma rü taxuü̃ca̱xma tü̱xcüü̃ wena nügü inaxã rü naju, jerü wüxicanatama guxü̃ma ningutanüxẽẽ.
15 10:15-16 Rü Tupanaãẽ i Üünexü̃ rü tüxü̃ nüxü̃ nacua̱xẽẽ na aixcuma jiĩxü̃ i ngẽma, jerü nüma ga Tupana rü nhanagürü:“Ngẽxguma nawa nanguxgu na wena ngẽma Judéugümaã ichaxunetaxü̃, rü wüxi i ngexwacaxü̃xü̃ i uneta tá nüxna chaxã. Rü tá meã ngẽma duü̃xü̃güxü̃ nüxü̃ chacua̱xẽẽ i chorü mugü na aixcuma naãẽwa nangẽxmagüxü̃ca̱x rü guxü̃guma naga naxĩnüẽxü̃ca̱x.
16 Nüü̃ nadau 10:15
17 Rü tá nüxü̃ ichajarüngümaxü̃chi i ngẽma duü̃xü̃güarü pecadugü rü ngẽma chixexü̃ i naxügüxü̃. Rü tagutáma wena nagu charüxĩnü”,
nhanagürü.
18 Rü ngẽmaãcü nüxü̃ tacua̱x rü ngẽxguma Tupana duü̃xü̃güaxü̃́ nüxü̃ ngechaü̃gu i norü pecadugü, rü marü taxuü̃ca̱xma tü̱xcüü̃ nanaxwa̱xe na wena ṯacü i naxü̃nagü nüxna naxãgüxü̃ naxca̱x i pecadu.
Name nixĩ i Tupanana tangaicamagü
19 10:19-20 Rü ngẽmaca̱x i nhu̱xma, Pa Chaueneẽgü, rü taxuü̃ca̱xma tü̱xcüü̃ tamuü̃ẽ na Tupana íngẽxmaxü̃wa ichocuxü̃ na namaãxü̃chi idexagüxü̃ca̱x. Rü nuxcümaxü̃chima rü paigüarü ãẽ̱xgacüxicatama jexma naxücu nagu ga guma ĩpata ga naxchirunaxca̱x ga Tupana nawa jexmane. Rü taxucürüwama ngexerüxǘxemare jexma taxücu. Notürü nüma ga Ngechuchu ja Cristu rü marü inajanaxoxẽẽ ga guxü̃ma ga jema ga jexguma curuchagu naju̱xgu rü nagü inabaãgu na Tupana íngẽxmaxü̃wa tüxü̃ jachocuxẽẽxü̃ca̱x rü namaãxü̃chi idexagüxü̃ca̱x. Rü woo taxucürüwama Tupanana tangaicamagü ga noxrix, notürü nüma ga Cristu rü naju na tüxü̃ namaxẽxẽẽxü̃ca̱x. Rü nagagu nixĩ i nhu̱xma i Tupanaxü̃tawa ingugüxü̃.
20 Nüü̃ nadau 10:19
21 Rü nüma nixĩ i Tupanape̱xewa tüxü̃ nangü̃xẽẽxü̃ i guxãma i jixema i Tupanaãrü duü̃xü̃gü ixĩgüxe.
22 Rü nhu̱xma na tüxü̃́ nangẽxmaxü̃ ja tórü ngü̃xẽẽruü̃ i Tupanape̱xewa, rü tanaxwa̱xe i aixcuma mexü̃ i taãẽmaã Tupanana tangaicamagü na namaãxü̃chi idexagüxü̃ca̱x. Rü tanaxwa̱xe i aixcuma tajaxõgü na nüma rü tá meã tüxü̃ najaxuxü̃ jerü Cristu rü taxca̱x naju na tüxü̃́ ijanaxoxẽẽãxü̃ca̱x i tórü chixexü̃ rü jemaca̱x marü naẽ́gagu ítabaiü̃.
23 Rü tanaxwa̱xe i aixcuma meã Cristuaxü̃́ tajaxõgüecha jerü nagümaã tüxü̃́ inajanaxoxẽẽ ga tórü chixexü̃. Rü ngẽmaca̱x ítanaṉg̱uxẽẽ na wena taxarü núma naxũxü̃ na Nanatüxü̃tawa tüxü̃ nagagüxü̃. Rü taguma tanaxwa̱xe na nüxü̃ rüxoexü̃ na jaxõgüxü̃, rü bai i íraruwa. Erü Tupana ga tamaã ixunetacü na tüxü̃ nangü̃xẽẽxü̃, rü aixcumaxü̃chi tá najanguxẽẽ i guxü̃ma ga jema tamaã nüxü̃ jaxuxü̃.
24 Rü nhu̱xma na ngẽmaãcü tüxü̃ nangü̃xẽẽxü̃ ja Tupana, rü name nixĩ i guxü̃guma naxca̱x tadaugü na nhuxãcü wüxichigü jigü rüngü̃xẽẽgüxü̃ na jexeraãcü jigü ingechaü̃güxü̃ca̱x rü mexü̃ ixügüxü̃ca̱x.
25 Rü name nixĩ i guxü̃guma tórü ngutaque̱xegüwa na íingugüüxü̃. Erü nümaxü̃ rü marü nüxü̃ narüxoe na ngutaque̱xewa naxĩxü̃, rü tama tanaxwa̱xe na ngẽxgumarüü̃ ixĩgüxü̃. Rü ngẽmaca̱x name nixĩ i jigüaxü̃́ tanangúchaü̃xẽẽ na ingutaque̱xegüxü̃. Rü nhu̱xma na nüxü̃ icuáxü̃ na marü jangaicaxü̃ ja tórü Cori, rü jexeraãcü tanaxwa̱xe na jigüaxü̃́ nangúchaü̃xẽẽxü̃.
26 Notürü ngẽxguma chi texé Cristuaxü̃́ jaxõchire̱xgu ga noxrix rü nhu̱xmachi noxtacüma nüxü̃ tarüxoxgu, rü marü nataxuma na nhuxãcü namexẽẽxü̃ i ngẽma tümaãrü pecadu i Tupanape̱xewa.
27 Erü ngẽxguma chi ngẽmaãcü noxtacüma Cristuxü̃ tarüxoxgu, rü aixcumaxü̃chi tá tanajaxu i ngẽma pocu i ãũcümaxü̃ i Tupana tá tüxü̃ namaã pocuxü̃ rü jima üxü ja ij̱aurane ja nawa tá ínaguxü̃ne i ngẽma Tupanaãrü uwanügü. Rü ngẽxĩcatama nixĩ i tüxü̃ ínaṉg̱uxẽẽxü̃ ja jíxema Cristuxü̃ rüxoxe.
28 Rü nüxü̃ tacua̱x rü jexguma texé tama Muĩséarü mugüga ĩnügu rü najexmagu ga taxre rü e̱xna tamaẽ̱xpü̱x ga duü̃xü̃gü ga tüxü̃ daugüxü̃ rü tüxü̃ ixugüexü̃ na aixcuma tama naga taxĩnüxü̃, rü ãẽ̱xgacügü rü noxtacüma tüxü̃ nima̱xgü rü tama nüxü̃́ tangechaü̃tümüü̃gü.
29 Notürü Tupana rü aixcuma jexeraãcü tá nanapocue i ngẽma duü̃xü̃gü i tama Nanega ĩnüẽxü̃ rü jima nagü ja pecaduarü piruü̃xü̃ oexü̃ rü Naãẽ i Üünexü̃ i nüxü̃ ngechaü̃xü̃maã guxchigagüxü̃.
30 Rü meãma nüxü̃ tacua̱x rü Tupana rü tama notüca̱xma nhanagürü:“Chama tá nixĩ i namaã nüxü̃ chacuáxü̃ na ṯacü tá namaã chaxüxü̃ i guxü̃ma i ngẽma chixexü̃ ügüxü̃. Rü aixcuma tá chanapocu”,
nhanagürü. Rü jexgumarüü̃ ta nhanagürü:“Chama tátama nixĩ i nüxna chac̱axü̃ i wüxichigü i chorü duü̃xü̃gü i norü maxü̃chiga”,
nhanagürü.
31 Rü dücax, rü aixcuma namaxü̃ ja Tupana, rü ngẽmaca̱x ega tama naga ixĩnüẽgu rü wüxi i ãũcümaxü̃chixü̃ nixĩ na name̱xgu inguxü̃ na tüxü̃ napocuxü̃ca̱x.
32 Rü dücax, name nixĩ i nüxna pecua̱xãchie ga nhuxãcü na jiĩxü̃ ga jexguma noxri Cristuxü̃ pejau̱xgu. Rü jexguma ga pema rü jema na pejaxõgüxü̃gagu rü poraãcü guxchaxü̃gü pexü̃ nangupetü, notürü tama Cristuxü̃ perüxoe rü bai ga íraruwa.
33 Rü nhuxre ga pema rü duü̃xü̃gü pemaã naguxchigagü rü guxãpe̱xewa pexü̃ nic̱uaixgü. Rü ṯoguã̱x ga pema rü pegü ipejaxãgü na jema pemücügürüü̃ ngúxü̃ peingegüxü̃ca̱x.
34 Rü pema rü pexü̃́ nangechaü̃tümüü̃gü ga jema petanüxü̃gü ga jaxõgüxü̃ ga pocupataü̃wa jexmagüxü̃. Rü taãẽãcüma jaxna namaã pexĩnüẽ ga jema tama jaxõgüxü̃ ga pexna napuxü̃xü̃ ga perü jemaxü̃gü. Rü tama naxca̱x pexoegaãẽ, jerü meãma nüxü̃ pecua̱x rü dauxü̃guxü̃ i naãnewa pexü̃́ nangẽxma i ngẽma perü ngẽmaxü̃güarü jexera ixĩxü̃, erü tagutáma nagu̱x.
35 Rü ngẽmaca̱x i nhu̱xmax, rü tama name na nüxü̃ perüxoexü̃ na Cristuaxü̃́ pejaxõgüxü̃ woo ṯacü pexü̃ üpetügu. Erü marü nüxü̃ pecua̱x rü Tupana rü aixcumaxü̃chi tá pexna nanaxã i perü ãmare i maxü̃ i taguma gúxü̃, erü Cristuaxü̃́ pejaxõgü.
36 Rü ngẽma guxchaxü̃gü i pexü̃ ngupetüxü̃, rü name nixĩ i jaxna namaã pexĩnüẽ na penaxüxü̃ca̱x i Tupanaãrü ngúchaü̃ rü penajaxuxü̃ca̱x i ngẽma ãmare i pemaã inaxunetaxü̃.
37 Erü Tupanaãrü ore i ümatüxü̃wa rü nhanagürü:“Paxaxü̃chi tá wenaxãrü núma naxũ ja Cristu. Rü aixcuma tãũxü̃táma nuxcü ínangu.
38 Notürü jíxema tümaãrü õgagu chape̱xewa mexẽ, rü name nixĩ i guxü̃guma tajaxõõcüma chauxca̱x tamaxü̃. Notürü ngẽxguma nüxü̃ tarüxoxgu na tajaxõxü̃, rü chama rü tãũxü̃táma tümamaã chataãẽ”,
nhanagürü.
39 Notürü i jixema rü tama ngẽma duü̃xü̃gü i nüxü̃ rüxoexü̃ i Tupana tá pocuexü̃rüü̃ tixĩgü. Erü jixema rü ngẽma jaxõgüxü̃tanüxü̃ tixĩgü, rü ngẽmaca̱x tüxü̃́ nangẽxma i maxü̃ i taguma gúxü̃.
