Ebréugü 11:1-40
11 Rü nhu̱xma rü tórü õgagu nixĩ i nüxü̃ icuáxü̃ na aixcuma tá najauxgüxü̃ i guxü̃ma i ngẽma irüṉg̱uxẽẽgüxü̃ ga Tupana tamaã ixunetaxü̃. Rü ngẽma tórü õgagu nixĩ i nüxü̃ icuáxü̃ na aixcuma Tupana tá janguxẽẽxü̃ i ngẽma norü uneta i nhu̱xma taũta nüxü̃ idauxü̃.
2 Rü nhuxre ga nuxcümaü̃güxü̃ ga tórü o̱xigü rü Tupanaãxü̃́ najaxõgü, rü jemaca̱x ga Tupana rü namaã nataãẽ.
3 Rü ngẽma tórü õgagu nixĩ i nüxü̃ icuáxü̃ na aixcuma jiĩxü̃ na Tupana rü norü oremaãmare nango̱xẽẽãxü̃ ga nhama ga naãne rü üa̱xcü rü tawemacü rü woramacurigü rü ẽxtagü. Rü jemaãcü ga Tupana, rü ngürüwa nanango̱xẽẽmare ga guxü̃ma i ngẽma nhu̱xma nüxü̃ idauxü̃.
4 Rü guma nuxcümaxü̃cü ga Abéu rü Tupanaãxü̃́ najaxõ. Rü jemaca̱x Tupanaga naxĩnü rü nüxna nanaxã ga wüxi ga naxü̃na ga Tupanaca̱x jamáxü̃. Notürü ga naẽneẽ ga Caĩ́ rü tama Tupanaga naxĩnü rü tama nüxna nanaxã ga jema ãmare ga Tupana nüxü̃́ naxwa̱xexü̃. Rü jemaca̱x ga Tupana rü woo tama Caĩ́maã nataãẽ, notürü Abéumaã nataãẽ rü nüxü̃ nixu na mecü jiĩxü̃ jerü najaxõ rü naga naxĩnü. Rü ngẽmaca̱x i nhu̱xmax na woo najuxü̃ ga Abéu, notürü wüxi i tórü cua̱xruü̃ nixĩ. Erü nawa nixĩ i nüxü̃ icuáxü̃ na Tupana naxwa̱xexü̃ na jaxõgüxü̃ rü naga ixĩnüẽxü̃.
5 Rü Enoqui rü ta Tupanaãxü̃́ najaxõ rü naga naxĩnü. Rü jemaca̱x nixĩ ga namaxãcütama jagaãxü̃ na tama najuxü̃ca̱x. Rü namücügü rü taguma nüxü̃ inajangaugü, jerü Tupana najaga. Rü Tupanaãrü ore i ümatüxü̃wa nüxü̃ nixu rü jexguma taũta jagaãgu, ga Enoqui rü nanaxü ga jema Tupana naxwa̱xexü̃.
6 Notürü taxuacüma Tupana tamaã nataãẽ ega tama nüxü̃́ jaxõgügu. Rü jíxema Tupanamaã ãmücüchaü̃xẽ, rü tanaxwa̱xe na tajaxõxü̃ na aixcumaxü̃chi nangẽxmaxü̃ ja Tupana rü nüma rü aixcuma tüxü̃ nangü̃xẽẽxü̃ ja jíxema naxca̱x daugüxe rü naga ĩnüẽxẽ.
7 Rü jexguma Noẽ́maã jadexagu ga Tupana, rü nüma ga Noẽ́ rü najaxõ rü naga naxĩnü. Rü Tupana rü namaã nüxü̃ nixu rü tá na ínanguxẽẽãxü̃ ga mucü ga taxüchicü ga taguma duü̃xü̃gü nüxü̃ daucü rü tá guxü̃wama inanguanexẽẽcü. Rü namaã nüxü̃ nixu ga na naxüãxü̃ca̱x ga wüxi ga wapuru ga taxü̃ne na tama najuexü̃ca̱x ga nüma rü nama̱x rü nanegü rü naneã̱xgü. Rü Tupanaga naxĩnü ga Noẽ́, rü nanaxü ga guma wapuru, rü jemaãcü tama najue ga nüma rü napatacü̱̃ã̱x. Rü jemaãcü Tupanaãxü̃́ najaxõ. Notürü jema togü ga duü̃xü̃gü rü tama najaxõgü, rü jemaca̱x Tupana nanapocue. Notürü nüma ga Tupana rü Noẽ́xü̃ nixu na nape̱xewa namexü̃, jerü nüxü̃́ najaxõ.
8 Rü guma tórü o̱xi ga Abrã́ũ, rü Tupanaãxü̃́ najaxõ. Rü jemaca̱x nixĩ ga naga naxĩnüxü̃ rü nüxna jaxũxü̃ ga nanatüchiü̃ãne na nawa naxũxü̃ca̱x ga jema naãne ga Tupana tá nüxna ãxü̃ na noxrüxü̃chi jiĩxü̃ca̱x. Rü jemaãcü nanaxü ga jexguma Tupana namuxgu. Rü nanatüchiü̃ãnewa inaxũãchi ga Abrã́ũ woo tama nüxü̃ na nacuáxü̃ ga ngextá tá na naxũxü̃.
9 Rü jexguma nawa nanguxgu ga jema naãne ga Tupana namaã ixunetaxü̃, rü nhama jexma naxũãneãxü̃rüü̃mare ĩpata ga naxchirunaxca̱xmaãmare naxãchiü̃. Rü jexgumarüü̃tama nixĩgü ga nane ga Isaqui rü nataa ga Jacú, jerü jexguma najaegu rü Abrã́ũrüü̃ nhama jexma naxĩãneãxü̃rüü̃mare nixĩgü ga jema naãnewa. Rü jemaãcü nixĩgü ga guxü̃ma ga nümagü ga na woo Tupana rü namaã inaxunetaxü̃ ga na noxrüxü̃chi jiĩxü̃ca̱x ga jema naãne.
10 Rü jemaãcü ga Abrã́ũ, rü woo nhama jexma naxũãneãxü̃rüü̃mare jéma najexma, notürü Tupanaãxü̃́ najaxõchigüama, jerü nüxü̃ nacua̱x na Tupana tá dauxü̃guxü̃ i naãnewa na nagaxü̃ nawa ja jima ĩãne ja nümatama naxüxü̃ne ja tagutáma ijarüxoxü̃ne.
11 Rü jexgumarüü̃tama ijixĩ ga Abrã́ũ nama̱x ga Chara. Rü woo ga na taguma naxãxãcüchiréxü̃ jerü marü ijaxüchi, notürü ixãxãcü jerü ijaxõõma na Tupana rü aixcuma tá janguxẽẽãxü̃ ga jema norü uneta ga tá na naxãxãcüxü̃.
12 Rü jemaãcü ga Abrã́ũ rü woo marü jaguã̱xü̃chi na jiĩxü̃, notürü düxwa nüxü̃́ najexma ga wüxi ga nane, rü gumawa ne naxĩ ga muxü̃ma ga nataagü. Rü nhu̱xma rü nhama ẽxtagürüü̃ namuxũchi, rü nhama naxnücü ja taxuacüma jaxugücürüü̃ nixĩgü, jerü jemaãcü Abrã́ũmaã inaxuneta ga Tupana.
13 Notürü nümagü ga Abrã́ũ rü Isaqui rü Jacú rü najue, rü jemaca̱x tama nüxü̃ nadaugü ga guxü̃ma ga nataagü i nhu̱xma ngẽxmagüxü̃, rü tama namaã inacua̱xgü ga jema naãne ga noxri Abrã́ũmaã nüxü̃ jaxuxü̃ ga Tupana. Notürü Tupanaãxü̃́ najaxõgüama, rü jemaca̱x nüxü̃ nacua̱xgü rü Tupana rü tá aixcuma na janguxẽẽãxü̃ ga jema norü uneta ga namaã nüxü̃ jaxuxü̃. Rü nataãẽgü jerü nüxü̃ nacua̱xgü na tãũxü̃táma guxü̃guma nhama ga naãnewa na najexmagüechaxü̃, rü jemaca̱x nüxü̃ nixugüe na to i nachiü̃ãnecü̱̃ã̱xrüü̃mare jixĩgüxü̃ ga nhama ga naãnewa.
14 Rü nümagü rü jema oremaã meãma tüxü̃ nüxü̃ nacua̱xẽẽ na tama nhama ga naãneguxicatama naxĩnüẽxü̃ notürü ínaṉg̱uxẽẽgüãxü̃ i to i nachica i dauxü̃guxü̃ i naãnewa ngẽxmaxü̃.
15 Rü nümagü rü jexguma chi nanaxwa̱xegügu ga naxca̱x na nawoeguxü̃ ga jema naãne ga noxri nawa ne naxĩxü̃, rü tau chima nüxü̃́ naguxcha rü chi naxca̱x nawoegu.
16 Notürü ga nümagü rü nüxü̃́ nangúchaü̃gü i ngẽma naãne i mexẽchixü̃ i dauxü̃wa ngẽxmaxü̃ i Tupanaxü̃tawa. Rü jemaca̱x nixĩ ga Tupana ga tama naxãnexü̃ na nügü jaxuxü̃ na norü Tupana jiĩxü̃. Jerü nüma ga Tupana rü naxca̱x nanamexẽẽ ga wüxi ga ĩãne ja dauxü̃guxü̃ i naãnewa ngẽxmane.
17 11:17-18 Rü Tupana ga noxri rü Abrã́ũmaã nüxü̃ nixu rü nhanagürü:“Cune ja Isaquiwa tá cuxü̃́ nangẽxma i muxũchixü̃tama i cutaagü”,nhanagürü. Rü Abrã́ũ rü najaxõ na Tupana rü aixcumaxü̃chi tá na janguxẽẽãxü̃ ga jema namaã inaxunetaxü̃. Rü jemaca̱x ga jexguma Tupana nüxü̃ ü̱xgu rü Isaquica̱x nüxna nacaxgu na naxca̱x jamáãxü̃ca̱x, rü nüma ga Abrã́ũ rü tama nanachu̱xu. Rü ínamemare na Tupanaca̱x jamáãxü̃ ga guma nane ga nügümaã wüxicacü.
18 Nüü̃ nadau 11:17
19 Jerü nüma ga Abrã́ũ rü najaxõ na Tupanaãxü̃́ natauxchaxü̃ na wena namaxẽxẽẽãxü̃ i juexü̃. Rü jemaca̱x ga Abrã́ũ rü ínamemare na Tupanaca̱x nanexü̃ jamáxü̃ jerü najaxõ na Tupana rü wena tá namaxẽẽãxü̃. Rü aixcumaxü̃chi jemaãcü Abrã́ũca̱x nanaxü ga Tupana, jerü woo nhama marü najuxü̃rüü̃ nixĩ ga nane, notürü ga Tupana rü maxü̃cü nüxna nanamu. Rü jema rü wüxi ga tórü cua̱xruü̃ nixĩ na nhuxãcü aixcuma jaxõõxü̃ ga Abrã́ũ.
20 Rü guma Isaqui rü ta Tupanaãxü̃́ najaxõ. Rü jemaca̱x ga jexguma marü naja̱xgu, rü najumuxẽ rü Tupanana naca na nanegü ga Jacú rü Echaúxü̃ nangü̃xẽẽxü̃ca̱x. Rü jemaãcü najumuxẽ jerü aixcuma najaxõ na Tupana tá janguxẽẽxü̃ ga jema nüxna naxca̱x nac̱axü̃.
21 Rü guma Jacú rü ta Tupanaãxü̃́ najaxõ. Rü jemaca̱x ga jexguma marü naja̱xgu rü najuxchaü̃gu, rü norü caxü̃xü̃maã nügü inachixẽẽ rü Tupanaxü̃ nicua̱xüü̃. Rü najumuxẽ rü Tupanana naca na nataagü ga Juche nanegüxü̃ nangü̃xẽẽxü̃ca̱x. Rü jemaãcü najumuxẽ jerü aixcuma najaxõ na Tupana tá janguxẽẽxü̃ ga jema Abrã́ũmaã inaxunetaxü̃.
22 Rü guma Juche rü ta Tupanaãxü̃́ najaxõ. Rü jemaca̱x ga jexguma najuxchaü̃gu, rü natanüxü̃maã nüxü̃ nixu rü nhanagürü:“Tataagü rü jixcüra rü tá ínachoxü̃ i nuã Ejituanewa na nawa naxĩxü̃ca̱x i ngẽma naãne ga Tupana tórü o̱xi ga Abrã́ũmaã nüxü̃ ixuxü̃. Rü ngẽxguma ngẽ́ma naxĩxgu, rü chanaxwa̱xe ja chauxchina̱xãgü rü ta ngẽ́ma nanana na ngẽxma jata̱xgüãxü̃ca̱x”,
nhanagürü.
23 Rü jemawena rü mucüma ga taunecügü rü nimu ga jema duü̃xü̃gü ga Ejituanewa. Rü jema nachiü̃ãneãrü ãẽ̱xgacü, rü tama nanaxwa̱xe na jexeraãcü jamuẽtanüxü̃, rü jemaca̱x nanamu na tüxü̃ naḏaixü̃ca̱x ga guxãma ga buxe ga ijatüxe ga jexwacax ibuetanüxẽ. Notürü nanatü rü naẽ ga guma tórü o̱xi ga Muĩsé, rü aixcuma Tupanaãxü̃́ tajaxõgü. Rü jemaca̱x ga jexguma noxri nabuxgu ga Muĩsé, rü tamaẽ̱xpü̱x ga tawemacügu itajacu̱xgü, jerü nüxü̃ tadaugü na namexẽchixü̃ rü tama naxca̱x tamuü̃ẽ ga jema Ejituaneãrü ãẽ̱xgacüarü ore ga woo na naxunagüãxü̃ ga na buxe tüxü̃ naḏaixü̃.
24 11:24-25 Rü Muĩsé rü ta Tupanaãxü̃́ najaxõ. Rü jemaca̱x ga jexguma marü naja̱xgu rü tama nanaxwa̱xe na nügü jaxuxü̃ na Ejituaneãrü ãẽ̱xgacüxacü ngĩne na jiĩxü̃, jerü naxca̱x rü narümemaẽ na natanüxü̃gü ga Judéugümaã wüxigu ngúxü̃ jangexü̃. Rü tama nanaxwa̱xe na ṯacü ga nhama ga naãneãrü chixexü̃maã nügü na nataãẽxẽẽxü̃, jerü nüxü̃ nacua̱x rü jema taãẽ rü paxaãchiruü̃mare nixĩ.
25 Nüü̃ nadau 11:24
26 Rü jexgumarüü̃ na dauxü̃guxü̃ ga naãnena na jaxũxü̃ ga Cristu na ngúxü̃ jangexü̃ca̱x, rü jexgumarüü̃ ta nixĩ ga Muĩsé ga ãẽ̱xgacüpatana na jaxũxü̃, jerü naxca̱x rü narümemaẽ na natanüxü̃gü ga Judéugümaã wüxigu ngúxü̃ jangexü̃. Notürü taxuü̃ca̱xma jema ngúxü̃gu narüxĩnü, jerü nüxü̃ nacua̱x rü tá wüxi i ngunexü̃gu Tupanaxü̃tawa na najauxãxü̃ i norü natanü.
27 11:27-28 Rü jema na jaxõõxü̃ca̱x nixĩ ga Tupanaga naxĩnüxü̃ ga Muĩsé. Rü jemaca̱x ga jexguma Tupana namuxgu ga na naxüãxü̃ ga üpetüchiga, rü najanguxẽẽ ga jema Tupana namuxü̃. Rü nüma ga Muĩsé rü guxü̃ma ga natanüxü̃gü ga Judéugüxü̃ namu na wüxichigü ga ĩpatawa jamáãxü̃ca̱x ga wüxi ga carneruxacü na jemagümaã namaxcuãxü̃ca̱x ga naã̱xpatagü. Rü nhanagürü nüxü̃:“Nhama i chütaxü̃gu rü tá Tupana núma Ejituanewa nanamu i wüxi i norü orearü ngeruü̃ i dauxü̃cü̱̃ã̱x rü tá nanadai ja jima nüxira bucü ja Eqüituanecü̱̃ã̱xgü nane i wüxichigü ja ĩpatawa. Notürü ngẽxguma jima nagümaã penamaxcuxgu i perü ĩã̱xpata, rü tãũxü̃táma pechiü̃gu naxücu”,nhanagürü. Rü jemaãcü ga Muĩsé rü Tupanaga naxĩnü jerü nüxü̃́ najaxõ. Rü jemaca̱x ga jema orearü ngeruü̃ ga dauxü̃cü̱̃ã̱x rü taxuü̃ma ga Judéugünexü̃ nima̱x. Rü jema na jaxõõxü̃ca̱x nixĩ ga ínaxũxũxü̃ ga Ejituarü naãnewa, rü tama naxca̱x namuü̃xü̃ na guma Ejituaneãrü ãẽ̱xgacü tá namaã nanuxü̃. Rü taguma nüxü̃ narüxo ga Tupanawe na naxũxü̃, jerü Tupana ja ẽxü̃gucüarü ngúchaü̃ naxü.
28 Nüü̃ nadau 11:27
29 Rü jema duü̃xü̃gü ga Muĩséwe rüxĩxü̃ rü ta najaxõgü. Rü jemaca̱x ga jexguma jema Taxtü ga Dauchiüxü̃wa nangugügu, rü jema dexá rü nügüna nixĩgachi, rü nipaaneãchi, rü jéma nichoü̃. Notürü jexguma jema Ejituanecü̱̃ã̱x ga churaragü ga nawe ngẽgüxü̃ nawe ichoü̃gu, rü jexma najiama, jerü wenaxãrü nügüna naxĩ ga jema dexá.
30 Rü jexguma guma ĩãne ga Jericúwa nangugügu ga jema duü̃xü̃gü, rü taxucürüwama nichocu, jerü guxü̃wama naxãxtapü̱x. Notürü Tupanaãxü̃́ najaxõgü, rü jemaca̱x Tupanaga naxĩnüẽ rü 7 ga ngunexü̃ nüxü̃ ínichoeguãchitanücüü, jema Tupana namaã nüxü̃ ixuxü̃rüü̃. Notürü jexguma norü 7 ga ngunexü̃wa nanguxgu, rü nüẽchama niwa̱xgütapü̱x, rü jemaãcü nichocu.
31 Notürü jema nge ga Jericúcü̱̃ã̱x ga Raábe, rü woo chixri imaxü̃ ga noxrix, notürü jexguma jéma nangugügu ga jema taxre ga Judéugü ga bexma ngugütaewa jéma ĩxü̃, rü ngĩma ijixĩ ga nüxü̃ nangü̃xẽẽxü̃. Rü jemaca̱x tama jema togü ga Jericúcü̱̃ã̱x ga tama Tupanaga ĩnüẽxü̃rüü̃ iju, jerü Tupanaãxü̃́ ijaxõ.
32 ¿Rü nhu̱xma rü ṯacü i togü i duü̃xü̃güchigaxü̃ tá pemaã chixuxü̃? Rü changechica na pemaã nüxü̃ chixuxü̃ca̱x i nachiga ga jema nuxcümaxü̃güxü̃ ga ãẽ̱xgacügü ga Jideã́ũ rü Baraqui rü Sãsã́ũ rü Jefté rü Dawí rü Chamuẽ́ũ, rü guxü̃ma ga nuxcümaxü̃güxü̃ ga Tupanaãrü orearü uruü̃gü.
33 Rü jema na jaxõgüãxü̃ca̱x nixĩ ga Tupana nüxü̃ rüngü̃xẽẽxü̃. Rü jemaãcü to ga nachiü̃ãnegüarü ãẽ̱xgacügüxü̃ narüporamaẽgü, rü meãma norü duü̃xü̃gümaã inacua̱xgü rü aixcuma nanajauxgü ga jema Tupana namaã ixunetaxü̃. Rü jemaca̱x ga jexguma woo aitanügu jata̱xcuchigüãgu, rü taxuü̃ma namaã naxü ga aigü jerü Tupana nüxna nadau.
34 Rü jexguma norü uwanügü üxüxetüwa jawocuxgu, rü taxuü̃ma nüxü̃ naxüpetü rü tama nixae, jerü Tupanaãxü̃́ najaxõgü rü nüma rü nüxna nadau. Rü jexguma togü taramaã nadaixchaü̃gu, rü Tupana nüxü̃ narüngü̃xẽẽ na taxuü̃ma nüxü̃ üpetüxü̃ca̱x. Rü jexguma naturaegu rü norü uwanügü nadaixchaü̃gu, rü Tupana nanaporaexẽẽ. Rü jexguma to ga nachiü̃ãneãrü churaragümaã nügü nadaixgu, rü jema togü ga churaragüxü̃ narüjexeragü.
35 Rü najexma ga ngexü̃gü ga juexacüxü̃, notürü jema naxãcügü rü wenaxãrü ínarüdagü jerü Tupanaãxü̃́ najaxõgü. Notürü najexma ga togü ga poraãcü ngúxü̃ ingegüxü̃ jerü norü uwanügü jemaãcü namaã nachopetü na Tupanaxü̃ ínata̱xgüxü̃ca̱x. Notürü ga nümagü rü tama Tupanaxü̃ ínata̱xgü rü jemaca̱x najue, jerü naxca̱x rü narümemaẽ nixĩ na wena namaxẽxü̃ rü najauxgüãxü̃ i ngẽma maxü̃ i taguma gúxü̃.
36 Rü najexma ta ga nhuxre ga togü ga jaxõgüxü̃ ga duü̃xü̃gü nüxü̃ cugüexü̃, rü jac̱uaixgüxü̃, rü curẽtimaã jana̱ĩ̱xgüxü̃, rü pocupataü̃gu nawocuxü̃.
37 Rü nhuxre ga nümagü rü togü nutamaã ínanamuxũchigü rü jemaãcü nanadai. Rü nhuxre ga nümagü rü togü najaw̱ãĩxjegü rü najue. Rü nhuxre ga nümagü rü togü ngúxü̃ nüxü̃ ningexẽẽgü na Tupanaxü̃ ínata̱xgüxü̃ca̱x. Rü nhuxre ga nümagü rü togü taramaã nanadai. Rü nhuxre ga nümagü rü nu ne nanaxĩmare rü carnerucha̱xmüü̃ rü bodecha̱xmüü̃maãmare nixãxchiru. Rü taxuü̃ma nüxü̃́ najexma, rü nachixeãẽgü jerü norü uwanügü rü chixri namaã nachopetü.
38 Rü nhama ga naãnecü̱̃ã̱x rü nachi naxaie, notürü Tupana rü nüxü̃ nangechaü̃. Rü nhama ga naãnewa rü norü uwanügüchaxwa nu ne nanaxĩmare ga taxúema íxãpataxü̃wa. Rü ngürüanegu nipexü̃tanümare jerü nangepatagü.
39 Rü guxü̃ma ga jema nuxcümaxü̃güxü̃ ga duü̃xü̃gü rü woo norü õgagu Tupana namaã na taãẽxü̃, notürü taxuü̃ma ga nümagü rü guxü̃xü̃ma nadau ga jema mexü̃gü ga Tupana namaã ixunetaxü̃.
40 Rü jemaãcü namaã nangupetü ga jema duü̃xü̃gü, jerü ga Tupana rü tagu narüxĩnü rü tama nanaxwa̱xe na nüxĩra nüxĩca jamexẽẽgüãxü̃, notürü nanaxwa̱xe na tamaã wüxigu jamexẽẽgüãxü̃. Rü nhu̱xma i jixema na jaxõgüxü̃, rü jema nuxcümaxü̃güxü̃ ga duü̃xü̃gürüü̃ Tupanaãrü duü̃xü̃gü tixĩgü, jerü Nane ja Ngechuchu rü guxãca̱xma naju. Rü wüxi i ngunexü̃ rü tá taxca̱x núma naxũ na nügüxü̃tawa tüxü̃ nagagüxü̃ca̱x na ngẽ́ma ingẽxmagüechaxü̃ca̱x.
