Ebréugü 13:1-25
13 Rü nhu̱xma rü tama name na nüxü̃ perüc̱ẖauexü̃ na wüxichigü pegü pengechaü̃güxü̃ nhama peeneẽxü̃ pengechaü̃xü̃rüü̃.
2 Tama name na nüxü̃ ipejarüngümaẽxü̃ na meãma penajaxuxü̃ i ngẽma duü̃xü̃gü i pepatawa ngugüxü̃. Erü nüxü̃ tacua̱x rü nümaxü̃ ga jemaãcü naxügüxü̃ rü nhuxguacü rü tama nüxü̃ nacuáãcüma bexma Tupanaãrü orearü ngeruü̃gü i dauxü̃cü̱̃ã̱xü̃ meã najauxgü.
3 Rü name nixĩ i nüxna pecua̱xãchie i ngẽma duü̃xü̃gü i pocuexü̃, nhama pema rü ta naxrüü̃ pepocuexü̃rüü̃. Rü ngẽxgumarüü̃ ta name nixĩ nüxna pecua̱xãchie i ngẽma duü̃xü̃gü i togü ngúxü̃ nüxü̃ ingexẽẽgüxü̃, erü ngürüãchi tá ta ngẽmaãcü pexü̃ nangupetü.
4 Rü ngẽma jatügü i ãmaxü̃ rü name nixĩ i meã naxma̱xmaã namaxẽ rü tüxü̃ nangechaü̃gü. Rü ngẽxgumarüü̃ ta i ngexü̃gü, rü name nixĩ i meã natemaã namaxẽ rü nüxü̃ nangechaü̃gü. Erü Tupana rü aixcuma tá nüxna naca rü tá nanapocue i ngẽma duü̃xü̃gü i naĩ i ngemaã rü e̱xna naĩ ja jatümaã ipexü̃. Rü ngẽxgumarüü̃ tá ta tüxü̃ napocue ja guxãma ja jíxema ngema̱xãcüma rü ngeteãcüma tügümaã maxẽmarexe.
5 Rü tama name na dĩẽruguama perüxĩnüẽxü̃. Rü name nixĩ i namaã petaãẽgü i ngẽma marü pexü̃́ ngẽxmaxü̃. Jerü Tupana rü nhanagürü:“Tagutáma cuxna chixũ, rü tagutáma cuxü̃ íchata̱x”,
nhanagürü.
6 Rü nhu̱xma na nüxü̃ icuáxü̃ na ngẽmaãcü tamaã inaxã́ũxü̃, rü ngẽmaca̱x tama taxãne na nhagüxü̃:“Nüma ja Cori nixĩ ja choxü̃ rüngü̃xẽẽcü. Rü ngẽmaca̱x taxuü̃ca̱xma chamuü̃. Erü taxucürüwama texé ṯacü rü chixexü̃ chamaã taxü”,
nhagüxü̃.
7 Rü name nixĩ i nüxna pecua̱xãchie ga jema perü daruü̃gü ga noxri pemaã icuáxü̃ rü pemaã nüxü̃ ixugüxü̃ ga Tupanaãrü ore. Rü name nixĩ i nagu perüxĩnüẽ ga na nhuxãcü meã namaxẽxü̃ pepe̱xewa rü nhuxãcü meã jaxõgüãcüma najuexü̃. Rü name nixĩ ga nüma jaxõgüãxü̃rüü̃ meã pejaxõgü i pemax.
8 Rü nüma ja Ngechuchu ja Cristu rü guxü̃guma najanguxẽẽ i ngẽma tamaã nüxü̃ jaxuxü̃. Rü nuxcüma rü najanguxẽẽ ga norü ore, rü nhu̱xma rü ta najanguxẽẽ. Rü guxü̃gutáma ngẽmaãcü nixĩ. Rü ngẽmaca̱x tanaxwa̱xe na aixcuma nüxü̃́ jaxõgüxü̃.
9 Rü tama name i pejaxõgü i ngẽma ngu̱xẽẽtaegü i tama toma pexü̃ namaã tangúexẽẽxü̃ i tama Tupanaãrü ixĩgüxü̃. Rü nuxcüma rü nagu taxĩ ga jema mugü ga Muĩsé ümatüxü̃ ga tüxna nachu̱xuxü̃ na ṯacü ixüxü̃ rü ṯacü ingṍxü̃. Notürü jema mugü rü taguma tüxü̃ naporaexẽẽ ga na Tupanaca̱x imaxẽxü̃. Rü ngẽmaca̱x tanaxwa̱xe na Tupana ja tüxü̃ ngechaü̃cüwa na najaxuxü̃ i tórü pora na aixcuma naxca̱x imaxẽxü̃ca̱x.
10 Rü ngẽma duü̃xü̃gü i Muĩséarü mugügu ĩxü̃, rü Tupanaca̱x naxü̃na nadai na tama napocueãxü̃ca̱x naxca̱x i norü pecadu. Notürü tama nüxü̃́ najaxõgü ja Cristu ga tórü pecaduca̱x jucü. Rü ngẽmaca̱x taxucürüwama taxrüü̃ nanajauxgü i ngẽma ngü̃xẽẽ i Cristu nüxna uaxü̃xü̃.
11 Rü ngẽma duü̃xü̃güarü paigüarü ãẽ̱xgacü, rü tupaucawa nanange ja nagü i naxü̃nagü na Tupanana naxããxü̃ca̱x na tama Tupana napocuexü̃ca̱x i ngẽma duü̃xü̃gü. Notürü naxü̃negü i ngẽma naxü̃nagü, rü ĩãnepechinüwa najanagugü.
12 Rü jexgumarüü̃ ta ga Ngechuchu rü ĩãnepechinüwa ngúxü̃ ninge rü naju na nagümaãtama Tupanaca̱x jaxüünegüxẽẽãxü̃ca̱x i duü̃xü̃gü.
13 Rü ngẽmaca̱x i jixema, rü name nixĩ i nüxna tixĩgachi i ngẽma mugü ga Muĩsé ümatüxü̃, rü name nixĩ i Ngechuchuca̱x taxĩ. Rü woo duü̃xü̃gü tüxü̃ cugüegu, jema Ngechuchuxü̃ na nacugüexü̃rüü̃, rü name nixĩ i naxrüü̃ jaxna namaã taxĩnüẽ.
14 Erü jixema na jaxõgüxü̃, rü tãũxü̃táma nhama i naãne i paxa tá gúxü̃wa tangẽxmagüecha. Erü dauxü̃guxü̃ i naãnewa tüxü̃́ nangẽxma i tachica. Rü ngẽ́ma tá tangugü na guxü̃gutáma Tupanamaã ingẽxmagüechaxü̃ca̱x.
15 Rü ngẽmaca̱x tanaxwa̱xe i Ngechuchu ja Cristuarü ngü̃xẽẽmaã guxü̃guma Tupanaxü̃ ticua̱xüü̃gü. Rü ngẽma na taa̱xmaã nüxü̃ icua̱xüü̃güxü̃, rü ngẽma nixĩ i ãmare i mexü̃ na nüxna naxãxü̃.
16 ¡Rü tãṹ i nüxü̃ ipejarüngümaẽxü̃ na togüxü̃ perüngü̃xẽẽxü̃ rü namaã peṉg̱auxü̃ i perü ngẽmaxü̃gü! Erü ngẽma nixĩ i ãmare i Tupanana pexãxü̃ i aixcuma namaã nataãẽxü̃.
17 ¡Rü naga pexĩnüẽ i ngẽma perü daruü̃gü i pemaã icuáxü̃, rü penaxü̱x i ngẽma pemaã nüxü̃ jaxuxü̃! Erü nümagü rü Tupanape̱xewa pexna nadaugü na meã pemaxẽxü̃ca̱x erü nüxü̃ nacua̱xgü na Tupana tá nüxna c̱axü̃ i nachiga na nhuxãcü pexna nadaugüxü̃. Rü name nixĩ i meã namaã pemaxẽ i ngẽma perü daruü̃gü na wüxi i taãẽ na jiĩxü̃ca̱x i ngẽma norü puracü rü tama wüxi i norü guxchaxü̃ na jiĩxü̃ca̱x. Erü ngẽxguma chi wüxi i norü guxchaxü̃ jixĩgu i ngẽma norü puracü na pexna nadauxü̃, rü pema rü chi taxuü̃ma i mexü̃ nawa pejaxu i ngẽma norü puracü.
18 Rü tanaxwa̱xe na toxca̱x pejumuxẽgüxü̃. Erü toõẽwa nüxü̃ tacua̱x na aixcuma meã tajanguxẽẽxü̃ i ngẽma puracü i Tupana toxna ãxü̃ rü tanaxwa̱xe na guxü̃guma ngẽmaãcü tanaxüxü̃.
19 Rü ngẽma guxü̃ãrü jexera pexna naxca̱x chac̱axü̃ nixĩ na pejumuxẽgüxü̃ na Tupana paxa pexca̱x choxü̃ taeguxẽẽxü̃ca̱x.
Jema duü̃xü̃güxü̃ narümoxẽ rü naxca̱x ínaca na Tupana nüxü̃ rüngü̃xẽẽxü̃
20 13:20-21 Rü nhu̱xma chanaxwa̱xe i poraãcü pexü̃ narüngü̃xẽẽ ja Tupana ja tórü taãẽxẽẽruü̃ rü tórü ngüxmüẽxẽẽruü̃ ixĩcü. Rü nüma nixĩ ga juwa ínadaxẽẽãxü̃ ga tórü Cori ja Ngechuchu ja Cristu ja guxü̃ma i jaxõgüxü̃ãrü daruü̃ ja guxããrü jexera ixĩcü. Rü nhu̱xma na curuchagu taxca̱x nabaãxü̃ ga guma nagü ga tüxü̃ nüxü̃ cua̱xẽẽcü na nhuxãcü guxü̃guma tüxü̃ nangechaü̃xü̃ ja Tupana, rü chanaxwa̱xe na nüma ja Tupana pexü̃ jamexẽẽgüxü̃ rü pexü̃ nangü̃xẽẽxü̃ na aixcuma guxü̃ma i perü maxü̃wa pemexü̃ca̱x. Rü ngẽxgumarüü̃ ta chanaxwa̱xe na Ngechuchu ja Cristuwa tüxü̃ nangü̃xẽẽxü̃ca̱x ja Tupana na nüma nanaxwa̱xexü̃ãcüma ixĩgüxü̃ca̱x. Rü nhu̱xma tanaxwa̱xe i guxü̃guma jima Cristuxü̃ ticua̱xüü̃gü. Rü ngẽmaãcü jiĩxü̃.
21 Nüü̃ nadau 13:20
22 Pa Chaueneẽgüx, pexü̃ chaca̱a̱xü̃ na jaxna namaã pexĩnüẽxü̃ i nhaã noxretama i ore i pexü̃ namaã chataãẽxẽẽxü̃ rü pexü̃ namaã chaxucu̱xẽxü̃.
23 Rü chanaxwa̱xe na nüxü̃ pecuáxü̃ rü taeneẽ ja Timúteu rü marü ínanguxuchi ga na napocuxü̃. Rü ngẽxguma paxa nuã chauxü̃tawa nanguxgu, rü tá ngẽ́ma petanüwa chanaga i ngẽxguma pexü̃ íchajada̱xgu.
24 ¡Rü nüxü̃ perümoxẽgü i guxü̃ma i ngẽma perü daruü̃gü i pemaã icuáxü̃! ¡Rü ngẽxgumarüü̃ ta nüxü̃ perümoxẽgü i guxü̃ma i togü i taeneẽgü i jaxõgüxü̃! Rü taeneẽgü i Itáriaanewa ngẽxmagüxü̃ rü ta pexü̃ narümoxẽgü.
25 ¡Rü Tupana poraãcü pexü̃ rüngü̃xẽẽ̱x i guxãma i pemax! Rü ngẽmaãcü jiĩxü̃.
Rü nuãma pexna.
