Ebréugü 2:1-18
2 Rü nhu̱xma na nüxü̃ icuáxü̃ na guxü̃ma i Tupanaãrü orearü ngeruü̃gü i dauxü̃cü̱̃ã̱xãrü jexera jiĩxü̃ ja Nane, rü ngẽmaca̱x tanaxwa̱xe i jexeraãcü meã naga taxĩnüẽ i ngẽma ore i Nanechiga nüxü̃ ixĩnüẽxü̃, erü tama tanaxwa̱xe na nüxü̃ rüxoexü̃ na jaxõgüxü̃.
2 Rü jexguma taũta Nane ja Cristuxü̃ núma namuxgu ga Tupana, rü norü orearü ngeruü̃gü ga dauxü̃cü̱̃ã̱xgüwa duü̃xü̃gümaã nüxü̃ nixu ga norü mugü na naga naxĩnüẽxü̃ca̱x. Rü jema mugü rü aixcuma napora jerü guxü̃ma ga jema duü̃xü̃gü ga tama naga ĩnüẽxü̃, rü jema mugü nüxü̃ ixuxü̃ãcüma Tupana nanapocue.
3 Rü jexguma jemaãcü napocueãgu ga jema duü̃xü̃gü ga tama naga ĩnüẽxü̃, ¿rü nhuxũcürüwa i jixema i naxchaxwa ibuxmüxü̃ na tama tüxü̃ napocuexü̃ca̱x ega nüxü̃ ixoegu i ngẽma maxü̃ i mexẽchixü̃ i nhu̱xma Cristugagu tüxna naxuaxü̃xü̃? Rü dücax, nümatama ja tórü Cori nixĩ ga nüxĩra naxunagüãxü̃ ga jema maxü̃, rü nhu̱xmachi jixcaama nixĩ ga jema nüxü̃ ĩnüẽxü̃ ga nüxĩ meã tüxü̃ nüxü̃ nacua̱xẽẽxü̃ na aixcuma jiĩxü̃ i tüxü̃́ nangẽxmaxü̃ i ngẽma maxü̃ ega nüxü̃́ jaxõgügu ja Cristu.
4 Rü nümatama ga Tupana rü ta taxca̱x nanango̱xẽẽ na aixcuma jiĩxü̃ i Cristugagu tüxü̃́ na nangẽxmaxü̃ i ngẽma maxü̃. Jerü nüma ga Tupana rü norü duü̃xü̃güwa nanaxü ga muxü̃ma ga mexü̃ ga taxü̃gü rü inanawe̱x ga muxü̃ma ga cua̱xruü̃gü. Rü jexguma nagúxü̃raü̃ãcüma tüxna namuãgu ga Naãẽ i Üünexü̃ jema nüma nanaxwa̱xexü̃ãcüma, rü jexguma nixĩ ga wenaxãrü tüxü̃ nüxü̃ nadauxẽẽxü̃ na aixcuma jiĩxü̃ na Cristugagu tüxü̃́ nangẽxmaxü̃ i ngẽma maxü̃.
Tupana rü nhama ga naãnewa nanamu ga Ngechuchu ja Cristu na taxrüü̃ duü̃xü̃xü̃ jiĩxü̃ca̱x
5 Rü nhu̱xma rü guxü̃ma i ngẽma mexü̃gü i Cristugagu tüxü̃́ ngẽxmaxü̃ i pemaã nüxü̃ tixuchigaxü̃, rü Tupana rü taguma dauxü̃cü̱̃ã̱x ga norü orearü ngeruü̃güna naxãga na namaã inacua̱xgüxü̃ca̱x. Notürü duü̃xü̃güxü̃ nixĩ ga namuxü̃ na namaã inacua̱xgüxü̃ca̱x ga guxü̃ma ga jema mexü̃gü.
6 Erü wüxiwa i Tupanaãrü ore i ümatüxü̃wa rü nhanagürü:“Pa Tupanax, ¿rü ṯacü nixĩ i duü̃xü̃gü rü ngẽmaca̱x nagu curüxĩnüxü̃? ¿Rü ṯacüwa name rü ngẽmaca̱x nüxü̃ cungechaü̃xü̃?
7 Rü paxaãchi curü orearü ngeruü̃ ga dauxü̃cü̱̃ã̱xgütüü̃wa cunajexmagüxẽẽ ga duü̃xü̃gü, notürü i nhu̱xma rü aixcuma cunaporaexẽẽ rü cujataxẽẽ.
8 Rü naxme̱xwa cunangẽxmaxẽẽ i guxü̃ma i nhama i naãnewa ngẽxmaxü̃”,
nhanagürü i ngẽma orewa. Rü jemaãcü nixĩ ga Tupana ga duü̃xü̃güme̱xẽwa najexmagüxẽẽãxü̃ i guxü̃ma i nhama i naãnewa ngẽxmaxü̃. Rü nataxuma i ṯacü i nhama i naãnewa i tama naxme̱xwa nangẽxmaxẽẽxü̃. Notürü woo na ngẽmaãcü jiĩxü̃, rü nhu̱xma rü ta taũta nüxü̃ tadau na duü̃xü̃güme̱xẽwa nangẽxmaxü̃ i guxü̃ma i nhama i naãnewa ngẽxmaxü̃.
9 Notürü nüxü̃ tadau ja Ngechuchu ja aixcuma guxü̃maãma icuácü. Rü jexguma Tupana nhama ga naãnewa namu̱xgu rü paxaãchi norü orearü ngeruü̃ ga dauxü̃cü̱̃ã̱xgüarü nhaxtüwaama nanaxüxẽẽ. Notürü i nhu̱xma ja Tupana rü poraãcü Ngechuchuxü̃ nataxẽẽ rü ãẽ̱xgacü ja tacü najaxĩxẽẽ jerü ngúxü̃ ninge rü guxü̃ma ga duü̃xü̃güca̱x naju jerü jemaãcü nanaxwa̱xe ga Tupana jerü tüxü̃ nangechaü̃ rü tüxü̃ narüngü̃xẽẽchaü̃.
10 Jerü ga Tupana rü nanaxwa̱xe na guxü̃ma i naxãcügü nüxü̃́ nangẽxmaxü̃ca̱x i nachica i mexü̃ i naxü̃tawa. Rü jemaca̱x nhama ga naãnewa nanamu ga Ngechuchu ja Cristu na ngúxü̃ jangexü̃ca̱x rü taxca̱x najuxü̃ca̱x na aixcumaxü̃chi tüxü̃́ nangẽxmaxü̃ca̱x i maxü̃ i taguma gúxü̃. Rü name nixĩ na jemaãcü naxüãxü̃ ga Tupana jerü nümatama nixĩ ga naxüãxü̃ ga guxü̃ma rü name̱xwa nangẽxma na nüma nanaxwa̱xexü̃ãcüma namaã inacuáxü̃ca̱x.
11 Rü Ngechuchu nixĩ ja tüxü̃ imexẽẽgücü na Tupanape̱xewa ixüünegüxü̃ca̱x. Rü nhu̱xma i nüma ja Ngechuchu ja tüxü̃ imexẽẽgücü rü guxãma i jixema na tüxü̃ jaxüünexẽẽgüxü̃ rü wüxitama nixĩ ja Tanatü. Rü ngẽmaca̱x nixĩ i nüma ja Ngechuchu ja Tupana Nane, rü tama taxca̱x naxãnexü̃ na naẽneẽgümaã tüxü̃ naxuxü̃.
12 Erü Tupanaãrü ore i ümatüxü̃wa rü nhanagürü ga Nane:“Rü chaueneẽgüxü̃ tá nüxü̃ chacua̱xẽẽ i cuchiga, Pa Chaunatüx. Rü norü ngutaque̱xegüwa rü tá cuxca̱x chawijae na ngẽmaãcü cuxü̃ chicua̱xüüxü̃ca̱x”,
nhanagürü.
13 Rü toxnamana i Tupanaãrü ore i ümatüxü̃wa rü nhanagürü ta ga Nane:“Cuxü̃́ chajaxõ, Pa Chaunatüx, erü nüxü̃ chacua̱x rü tá choxü̃ curüngü̃xẽẽ”,
nhanagürü. Rü nhanagürü ta:“Rü daxe chixĩ, Pa Chaunatüx, namaã i cuxacügü i chaueneẽgü i choxna cumugüxü̃”,
nhanagürü.
14 Rü nüma ga Ngechuchu nüxü̃ nacua̱x na duü̃xü̃gü ixĩgüxü̃, rü jemaca̱x nhama ga naãnewa naxũ na taxrüü̃tama naxãmachixü̃ca̱x rü naxãgüxü̃ca̱x na jemaãcü taxca̱x najuxü̃ca̱x na jema norü jumaã nüxü̃ naporamaẽxü̃ca̱x ga Chataná ga noxri nüxü̃́ jexmaxü̃ ga pora na tüxü̃ ijanatauxexẽẽxü̃ca̱x.
15 Rü jemaãcü nanaxü ga Ngechuchu na Chatanáme̱xẽwa tüxü̃ ínanguxü̃xẽẽxü̃ca̱x ja guxãma ja jíxema noxri naxca̱x muü̃ẽxẽ ga na tajuexü̃.
16 Rü jemaca̱x nhama ga naãnewa nangu ga Ngechuchu na taxca̱x najuxü̃ca̱x i guxãma i jixema na Abrã́ũrüü̃ jaxõgüxü̃. Rü tama dauxü̃cü̱̃ã̱x i orearü ngeruü̃güca̱x naju, notürü taxca̱x nixĩ ga najuxü̃.
17 Rü nüma ga Ngechuchu rü nanaxwa̱xe na jixema i naẽneẽgü ixĩgüxü̃rüü̃tama nügü na jaxĩxẽẽxü̃ na jemaãcü aixcuma mecümacü ja nüxü̃́ ingechaü̃tümüü̃gücü ja tórü chogüruü̃ jiĩxü̃ca̱x i Tupanape̱xewa. Rü jemaca̱x nixĩ ga nügü inaxãxü̃ rü najuxü̃ na jemaãcü Tupana duü̃xü̃güaxü̃́ nüxü̃ ngechaü̃xü̃ca̱x i norü pecadugü.
18 Rü jema nümatama ngúxü̃ na jangexü̃ ga jexguma Chataná nüxna ĩnügu, rü ngẽmaca̱x i nhu̱xma rü nüxü̃ nacua̱x na tüxü̃ nangü̃xẽẽxü̃ ja jíxema Chataná tüxna ĩnüxẽ.
