Ebréugü 4:1-16
4 Rü ngẽmaca̱x i nhu̱xma na Tupana tamaã ixunetaxü̃ na nügüxü̃tawa tá tüxü̃ jachocuxẽẽxü̃ na ngẽxma rüngü̃ẽxü̃ca̱x, rü tanaxwa̱xe i taxuãẽgü, na tama ngürüãchi wüxie i tatanüwa tama ngẽxma taxücuxü̃.
2 Erü nhu̱xma i jixema rü marü nüxü̃ taxĩnüẽ i Tupanaãrü ore i mexü̃, jexgumarüü̃ ga jema nuxcümaxü̃güxü̃ ga duü̃xü̃gü nüxü̃ na naxĩnüẽxü̃. Notürü nümagü ga jema duü̃xü̃gü rü taxuwama nüxü̃́ name ga nüxü̃ na naxĩnüẽxü̃ ga jema ore jerü tama jema naga ĩnüẽxü̃rüü̃ aixcuma nüxü̃́ najaxõgü.
3 4:3-4 Notürü i jixema na jaxõgüxü̃, rü tá aixcuma Tupanaxü̃tawa tichocu na ngẽxma rüngü̃ẽxü̃ca̱x. Rü wüxiwa i Tupanaãrü ore i ümatüxü̃wa rü ngü̃xchigaarü ngunexü̃chigaxü̃ nixu, rü nhanagürü:“Rü 6 ga ngunexü̃gu nixĩ ga nagu̱xẽẽãxü̃ ga norü puracü ga Tupana. Rü jexguma norü 7 ga ngunexü̃wa nanguxgu rü guxü̃ma ga norü puracüna narüngü̃”,nhanagürü. Rü nuxcüma ga Tupana rü nanaxwa̱xe na nangü̃ẽxü̃ ta ga jema nuxcümaxü̃güxü̃ ga tórü o̱xigü ga Muĩséwe rüxĩxü̃. Notürü ga nümagü rü tama nüxü̃́ najaxõgüchaü̃ rü tama naga naxĩnüẽ. Rü jemaca̱x ga Tupana rü norü ore i ümatüxü̃wa rü nhanagürü:“Jema duü̃xü̃gü rü tama choxü̃́ najaxõgü rü jemaca̱x namaã chanu rü aixcumaxü̃chi namaã nüxü̃ chixu na tãũxü̃táma jema naãne ga namaã ichaxunetaxü̃wa nangugüxü̃ na ngẽxma nangü̃ẽxü̃ca̱x”,nhanagürü.
4 Nüü̃ nadau 4:3
5 4:5-6 Rü jemaãcü ga jema duü̃xü̃gü ga nüxĩra nüxü̃ ĩnüẽxü̃ ga Tupanaãrü ore i mexü̃, rü tama nawa nichocu ga jema nachica ga Tupana namaã nüxü̃ ixuxü̃, jerü tama naga naxĩnüẽ. Rü ngẽmaca̱x nixĩ i Tupanaãrü ore i ümatüxü̃wa i nhaxü̃:“Ngẽma duü̃xü̃gü i tama chauga ĩnüẽxü̃ rü tãũxü̃táma ngẽma nachica i namaã ichaxunetaxü̃wa nichocu na ngẽxma nangü̃ẽxü̃ca̱x”,nhaxü̃. Notürü nhu̱xma rü ta nangẽxma i nachica i tümaca̱x ja jíxema ngẽxma Tupanaxü̃tagu chocuchaü̃xẽ na ngẽxma tarüngü̃ẽxü̃ca̱x.
6 Nüü̃ nadau 4:5
7 4:7-8 Rü ngẽma nachica i ngextá nagu nangü̃ẽxü̃ i duü̃xü̃gü rü tama jema naãne ga nuxcümaxü̃güxü̃ ga tórü o̱xigüxacügü tümaãrü ãẽ̱xgacü ga Jochuémaã tajauxgüxü̃ nixĩ. Jerü jexguma chi jema naãne jixĩgu, rü Tupana rü tau chima wenaxãrü nüxü̃ naxuneta ga to ga ngunexü̃ na nagu naxü̃tawa jachocuxü̃ca̱x na ngẽxma nangü̃ẽxü̃ca̱x i duü̃xü̃gü. Rü jemaca̱x ga Tupana rü wenaxãrü nüxü̃ naxuneta i wüxi i to i ngunexü̃ na naxü̃tawa jachocuxü̃ca̱x i duü̃xü̃gü na ngẽxma nangü̃ẽxü̃ca̱x. Rü ngẽma ngunexü̃ rü nhu̱xma nixĩ. Rü jemaca̱x ga Tupana rü mucüma ga taunecü ga Muĩséwena rü Dawímaã nüxü̃ nixu ga jema norü ore ga ümatüxü̃ i nhaxü̃:“Rü nhu̱xma na nüxü̃ pexĩnüẽxü̃ i ngẽma Tupana pemaã nüxü̃ ixuxü̃, rü tama name na nüxü̃ pexoexü̃”,nhaxü̃. Rü jematama nixĩ ga ore ga marüchire̱x pemaã nüxü̃ chixuxü̃.
8 Nüü̃ nadau 4:7
9 Rü ngẽmaca̱x i nhu̱xma rü ta nangẽxma i wüxi i nachica i üünexü̃ i nagu tá aixcuma nangü̃ẽxü̃ i ngẽma Tupanaãrü duü̃xü̃gü ixĩgüxü̃.
10 Rü jíxema Tupanaxü̃tawa ichocuxe na ngẽxma tarüngü̃ẽxü̃ca̱x, rü nüxna tarüngü̃ẽ i guxü̃ma i tümaãrü puracügü jexgumarüü̃ ga Tupana rü nüxna na nangü̃xü̃ ga norü puracügü ga jexguma naãne naxü̱xguwena.
11 Rü ngẽmaca̱x tanaxwa̱xe i meã tajaxõgü rü naga taxĩnüẽ na ichocuxü̃ca̱x i ngextá Tupana tüxü̃ írüngü̃ẽxẽẽxü̃wa. Erü tama tanaxwa̱xe na texé ngürüãchi jema nuxcümaxü̃güxü̃ ga duü̃xü̃gü ga tama Tupanaga ĩnüẽxü̃rüü̃ norü orexü̃ na taxoxü̃.
12 Erü Tupanaãrü ore rü namaxü̃ rü naporaxü̃chi. Rü wüxi i tara i guxü̃cüwawa meã waixmaguxü̃ãrü jexera nixĩ na natéxü̃. Erü ngẽma ore rü tawa nixücu nhu̱xmata taãẽwa nangu, rü nhu̱xmata nawa nangu i ngẽma wüxichigü nagu rüxĩnüxü̃. Rü ngẽmaãcü meãma nanango̱xẽẽãma i guxü̃ma i ngẽma jixicatama nagu rüxĩnüxü̃ rü tüxü̃́ ngúchaü̃xü̃.
13 Rü nataxutáma i ṯacü i Tupana üxü̃ i tá naxchaxwa nügü icúxü̃ erü nape̱xewa rü guxü̃ma meã nango̱x. Rü guxü̃xü̃ nadau rü guxü̃xü̃ nacua̱x ja jima tá tüxna c̱acü na namaã nüxü̃ ixuxü̃ca̱x i tórü maxü̃chiga.
Ngechuchu rü mecüxü̃chi ja tórü ngü̃xẽẽruü̃ nixĩ i Tupanape̱xewa
14 Ngechuchu ja Tupana Nane rü mecüxü̃chi ja tórü ngü̃xẽẽruü̃ nixĩ i Nanatüpe̱xewa. Rü nhu̱xma rü dauxü̃guxü̃ i naãnewa i Nanatüxü̃tawa nangẽxma na ngẽ́ma taétüwa nachogüxü̃ca̱x. Rü ngẽmaca̱x tanaxwa̱xe i guxü̃guma nüxü̃́ tajaxõgüecha rü taguma nüxü̃ tarüxoe.
15 Rü nüma ja Ngechuchu rü aixcuma nüxü̃ nacua̱x na tüxü̃ nangü̃xẽẽxü̃ erü nüxü̃ nacua̱x na nhuxãcü tüxü̃́ naguxchaxü̃ i ngẽxguma Chataná tüxna ĩnügu rü pecadugu tüxü̃ nanguxẽẽchaü̃gu, jerü nüxna rü ta naxĩnü ga Chataná, ngẽma tüxna na naxĩnüxü̃rüü̃. Notürü nüma ga Ngechuchu rü taguma chixexü̃ naxü.
16 Rü nhu̱xma na tüxü̃́ nangẽxmaxü̃ ja tórü ngü̃xẽẽruü̃ ja Ngechuchu, rü name nixĩ i tama imuü̃ẽãcüma nüxna tangaicamagü ja tórü ãẽ̱xgacü ja Tupana ja tüxü̃ ngechaü̃cü. Rü tanaxwa̱xe na ngẽmaãcü nüxna ingaicamagüxü̃ na nüxü̃́ ingechaü̃tümüü̃güxü̃ca̱x rü tüxü̃ nangechaü̃ãcüma tüxü̃ nangü̃xẽẽxü̃ca̱x i ngẽxguma guxchaxü̃gü tüxna ngaicamagu.
