Ebréugü 5:1-14
5 Nuxcüma ga Tupana rü Muĩsémaã nüxü̃ nixu na Arã́ũ jiĩxü̃ca̱x ga Judéugüarü paigüeru ixĩcü na guma duü̃xü̃güétüwa chogüxü̃ca̱x ga Tupanape̱xewa. Rü guxü̃ma ga jema Arã́ũwena ügüxü̃ ga paigüeru rü duü̃xü̃gütanüwa nüxü̃ naxunetagü na jema duü̃xü̃güarü ngü̃xẽẽruü̃ jiĩxü̃ca̱x ga Tupanape̱xewa rü Tupanana naxããxü̃ca̱x ga ãmaregü rü Tupanaca̱x nadaiãxü̃ca̱x ga naxü̃nagü na jemaãcü nüxü̃́ nüxü̃ nangechaü̃xü̃ca̱x ga norü pecadugü.
2 Notürü ngẽma paigüeru rü guxü̃ma i duü̃xü̃gürüü̃tama nixĩ na pecadugu nanguxü̃. Rü ngẽmaca̱x nüxü̃ nacua̱x na nhuxãcü jaxna namaã naxĩnüxü̃ i duü̃xü̃gü i ngẽxguma naẽchitamare pecadu naxüegu rü tama aixcuma Tupanawe naxĩxgu.
3 Rü ngẽma paigüeru rü tama ngẽma duü̃xü̃güarü pecaduca̱xicatama nixĩ i nadaiãxü̃ i naxü̃nagü, notürü nanaxwa̱xe i noxrütama pecaduca̱x rü ta na nadaiãxü̃ i naxü̃nagü na ngẽmaãcü Tupana nüxü̃́ nüxü̃ nangechaü̃xü̃ca̱x i ngẽma pecadugü.
4 Rü taxúema tügütama tingucuchixẽẽ na paigüeru tiĩxü̃ca̱x. Notürü Tupana nixĩ ja tüxü̃ unetacü rü tüxna naxãcü i ngẽma puracü na paigüarü ãẽ̱xgacü tiĩxü̃ca̱x, jexgumarüü̃ ga Tupana rü Arã́ũxü̃ na jangucuchixẽẽxü̃rüü̃ na paigüeru jiĩxü̃ca̱x.
5 Rü jexgumarüü̃ ga Ngechuchu rü tama nügütama ningucuchixẽẽ na Tupanape̱xewa tórü ngü̃xẽẽruü̃ i paigüeru jiĩxü̃ca̱x. Notürü Tupana nixĩ ga jangucuchixẽẽcü. Jerü Tupanatama nixĩ ga nüxü̃ nhacü:“Cuma nixĩ i Chaune. Rü nhu̱xma chanango̱xẽẽ na Chaune cuiĩxü̃”,
nhacü.
6 Rü toxnamana i Tupanaãrü ore i ümatüxü̃wa rü nhanagürü ta:“Cuma nixĩ i guxü̃gutáma duü̃xü̃güarü ngü̃xẽẽruü̃ i paigüeru cuiĩxü̃, guma pai ga Meuquichedérüü̃”,
nhanagürü.
7 Rü jexguma Cristu nhama ga naãnewa maxü̃gu, rü poraãcü najumuxẽ rü tagaãcü rü naxauxãcü Tupanana naca na nüxü̃ nangü̃xẽẽxü̃ca̱x na naga naxĩnüxü̃ca̱x. Rü jemaãcü nanaxü ga Cristu, jerü Tupana rü napora na nüxü̃ nangü̃xẽẽxü̃ca̱x na tama juxü̃ namuü̃xü̃ca̱x. Rü Tupana rü Cristuxü̃ naxĩnü jerü nüma ga Cristu rü aixcuma Tupanaga naxĩnü.
8 Rü nüma ga Cristu rü woo Tupana Nane na jiĩxü̃, rü poraãcü ngúxü̃ ninge na jemaãcü nüxü̃ nacuáxü̃ca̱x na nhuxãcü jaxna namaã naxĩnüxü̃. Rü jemaãcü aixcuma Tupanaga naxĩnü.
9 Rü jemaãcü najanguxẽẽ ga guxü̃ma ga jema puracü ga Nanatü nüxna ãxü̃. Rü jemaca̱x curuchagu naju na guxãma ja texé ja naga ĩnüẽxẽãrü maxẽxẽẽruü̃ na jiĩxü̃ca̱x.
10 Rü Nanexü̃ nixĩ ga naxunetaxü̃ ga Tupana na guxü̃gutáma nügüpe̱xewa tórü ngü̃xẽẽruü̃ i paigüeru jiĩxü̃ca̱x jexgumarüü̃ ga pai ga Meuquichedé ga norü jumuxẽwa nuxcümaxü̃cü ga tórü o̱xi ga Abrã́ũca̱x Tupanana c̱acü na guma Abrã́ũxü̃ nangü̃xẽẽxü̃ca̱x ga Tupana.
Wüxi i ãũcümaxü̃chixü̃ nixĩ na nüxü̃ rüxoexü̃ na jaxõgüxü̃
11 Rü nhu̱xma rü toxü̃́ nangẽxma i muxũchixü̃ma i ore i Cristuchiga ixĩxü̃ i pemaã nüxü̃ tixuxchaü̃xü̃. Notürü naguxchaxü̃chi na meãma pemaã tanango̱xẽẽxü̃ i ngẽma, erü pema rü tama nüxü̃ pecuáxchaü̃.
12 Rü marü nhuxgumama nüxü̃ na pecuáxü̃ i Tupanaãrü orechiga, rü pema rü chi marü namaã pengúexẽẽtae. Notürü i pema rü nhu̱xma rü ta penaxwa̱xe na wena pemaã tanango̱xẽẽxü̃ i ngẽma Tupanaãrü ore i tauxchaxü̃ i nawa inaxügüxü̃ na Tupanachigaxü̃ icuáxü̃. Rü ngẽmaãcü i pema, rü õxchanagürüü̃tama peixĩgü. Erü wüxi i õxchana rü naẽgünenixü̃ ja tauxchaãcü jaxaxüne nixĩ ja nanaxwa̱xene. Rü ngẽxgumarüü̃ peixĩgü i pema i nhu̱xmax, erü penaxwa̱xe na wenaxãrü pemaã nüxü̃ tixuxü̃ ga jema ore ga marü pemaã nüxü̃ tixuchiréxü̃ na nhuxãcü Cristuxü̃ pejauxgüxü̃. Erü tama nüxü̃ pecua̱xgüéga i guxü̃ma i ngẽma Tupanaãrü ore i jexeraãcü tamaã nüxü̃ ixuxü̃ i Cristuchiga na nhuxãcü Tupana nanaxwa̱xexü̃ na naga pexĩnüẽxü̃.
13 Rü jíxema jaxõxẽ ja tama nüxü̃ cua̱xégaxe na nhuxãcü Tupanaca̱x tamaxü̃xü̃, rü wüxi i õxchana i m̱aĩxü̃rüü̃ tixĩ. Rü ngẽmaãcü peixĩgü i pemax.
14 Notürü jíxema jaxõxẽ ja tümamaã jaxǘxe na tanangugüxü̃ na ṯacü jiĩxü̃ i ngu̱xẽẽtae i mexü̃ rü ṯacü jiĩxü̃ i ngu̱xẽẽtae i chixexü̃, rü aixcuma nüxü̃ tacua̱x na nhuxãcü Tupanaca̱x tamaxü̃xü̃. Rü jíxema rü nhama wüxi i duü̃xü̃ i jaxü̃ i namachimaã ãwemüxü̃rüü̃ tixĩ. Notürü i pema rü tama ngẽmaãcü peixĩgü.
