Ebréugü 6:1-20
6 Rü ngẽmaca̱x name nixĩ i jexeraãcü tingúeetanü na aixcuma meã nüxü̃ icuáxü̃ca̱x i Cristuchiga. Rü tanaxwa̱xe na nüxü̃ ichopetüxü̃ ga jema ore ga nawa inaxügüxü̃ na Cristuchigaxü̃ icuáxü̃. Rü tãũxü̃táma jeü̃cürü jema ore ga nawa inaxügüxü̃chiga tidexagüecha. Rü taxuü̃ca̱xma tü̱xcüü̃ wena pemaã nüxü̃ tixu na nüxü̃ perüxoexü̃ca̱x na nagu pexĩxü̃ i ngẽma mugü ga Muĩsé ümatüxü̃ i tama tüxü̃ maxẽxẽẽxü̃. Rü ngẽxgumarüü̃ ta taxuü̃ca̱xma tü̱xcüü̃ wena pemaã nüxü̃ tixu i nachiga na nhuxãcü Tupanaãxü̃́ jaxõgüxü̃.
2 Rü ngẽxgumarüü̃ ta taxuü̃ca̱xma tü̱xcüü̃ wena pexü̃ tangúexẽẽ na nhuxãcü Tupanaca̱x íibaiü̃xü̃ rü nhuxãcü duü̃xü̃güxü̃ ingõgüãcüma namaã ijumüxẽ́xü̃. Rü ngẽxgumarüü̃ ta taxuü̃ca̱xma tü̱xcüü̃ wena pexü̃ tangúexẽẽ na nhuxãcü tá wena namaxẽxü̃ i duü̃xü̃gü i juexü̃ rü nhuxãcü naãneãrü gu̱xgu rü Tupana tá wüxichigü i duü̃xü̃güna c̱axü̃ na nhuxãcü namaxẽxü̃ i nhama i naãnewa.
3 Rü ngẽmaca̱x i nhu̱xma rü ngẽxguma Tupana tama tüxna nachu̱xgu rü tanaxwa̱xe i jexeraãcü tingúeetanü na aixcuma guxü̃ma i Cristuchigaxü̃ icuáxü̃ca̱x rü nüxü̃ na icuáxü̃ca̱x na aixcuma ngẽma nüma nanaxwa̱xexü̃ãcüma meã naxca̱x na imaxẽxü̃.
4 6:4-5 Notürü ngẽxguma chi wüxie Cristuxü̃ jau̱xgu, rü chi meãma Tupanaxü̃ tacua̱xgu, rü chi Naãẽ i Üünexü̃xü̃ tajau̱xgu, rü chi nüxü̃ tacua̱xgu na nhuxãcü namexü̃ i Tupanaãrü ore rü nhuxãcü na namexü̃ i dauxü̃guxü̃ i naãne, rü name nixĩ i taxuãẽ.
5 Nüü̃ nadau 6:4
6 Erü ngẽxguma chi ngẽmaãcü meã tajaxõ̱xgu i noxrix rü nhu̱xmachi Cristuxü̃ ítata̱xüchi̱xgu, rü marü taxucürüwama texé wenaxãrü Tupanaca̱x tüxü̃ tataeguxẽẽ. Erü ngẽxguma ngẽmaãcü ítanata̱xüchi̱xgu ja Tupana Nane, rü nhama wena curuchawa tajapotaxü̃rüü̃ tajaxĩxẽẽ, erü guxü̃ i duü̃xü̃güpe̱xewa ãne nüxü̃ tingexẽẽ.
7 Rü dücax, wüxi i naãne i pucü nagu nguxü̃ rü meãma i nanetü nawa jaexü̃ tümaca̱x ja jíxema nagu üanexẽ, rü Tupana rü namaã nataãẽ i ngẽma naãne.
8 Notürü ngẽxguma chi ngẽma naãne rü tuxu rü natüanegü i chixexü̃ nawa jaegu, rü Tupana rü chixexü̃ tá namaã nixugü rü tá üxüwa najagu i guxü̃ma i nawa jaexü̃. Rü ngẽxgumarüü̃ tá tixĩ ja jíxema Cristuxü̃ ítáxe.
Ítanaṉg̱uxẽẽ na najauxgüxü̃ i maxü̃ i taguma gúxü̃ rü ngẽmaca̱x tama nüxü̃ tarüxoe na jaxõgüxü̃
9 Notürü, Pa Chaueneẽgü ja Pexü̃ Tangechaü̃güxe, rü woo ngẽmaãcü pemaã tidexagügu, notürü aixcuma nüxü̃ tacua̱x na tama ngẽma duü̃xü̃gü i nüxü̃ rüxoexü̃rüü̃ peixĩgüxü̃. Erü pema rü pexü̃́ nangẽxma i maxü̃ i taguma gúxü̃, rü Tupana rü tá aixcuma poraãcü pexü̃ narüngü̃xẽẽ na naxca̱x pemaxẽxü̃ca̱x.
10 Erü nüma ja Tupana rü aixcumacü nixĩ. Rü nüma rü tãũxü̃táma nüxü̃ inajarüngüma ga jema mexü̃ ga pexüxü̃ rü nhuxãcü taeneẽgü i jaxõgüxü̃xü̃ na pengechaü̃güxü̃ ga jexguma nüxü̃ perüngü̃xẽẽgügu, ngẽma nhu̱xma ípenaxüxü̃rüü̃tama.
11 Rü nhu̱xma rü tanaxwa̱xe i wüxichigü i pema rü ngẽmaãcü noxrirüü̃ mexü̃ i perü ngúchaü̃maã nüxü̃ perüngü̃xẽẽgüecha i taeneẽgü nhu̱xmatáta wena núma naxũ ja Cristu. Rü tanaxwa̱xe na ngẽmaãcü pemaxẽxü̃ na düxwa aixcuma Cristuxü̃tawa pengugüxü̃ ngẽma ípenaṉg̱uxẽẽxü̃rüü̃.
12 Rü tama tanaxwa̱xe na nüxü̃ perüxoetanücüüxü̃ na Cristuwe perüxĩxü̃. Notürü tanaxwa̱xe i naxrüü̃ peixĩgü i ngẽma duü̃xü̃gü i guxü̃guma meã jaxõgüãcüma Cristuwe rüxĩãmaxü̃ rü najauxgüxü̃ i guxü̃ma i ngẽma mexü̃gü ga Tupana namaã ixunetaxü̃.
13 Rü dücax, jexguma tórü o̱xi ga Abrã́ũmaã inaxunetagu ga Tupana rü nügüégagutama inaxuneta, jerü tataxuma ga texé ga norü jexera ixĩxẽ na tümaẽ́gagu inaxunetaxü̃ca̱x.
14 Rü nüma ga Tupana rü nhanagürü nüxü̃ ga Abrã́ũ:“Rü aixcumaxü̃chi tá poraãcü cuxü̃ charüngü̃xẽẽ. Rü tá cuxü̃́ nangẽxma i muxũchixü̃tama i cutaagü”,
nhanagürü nüxü̃.
15 Rü Abrã́ũ rü meãma ínanaṉg̱uxẽẽ ga guma nane ga Tupana namaã ixunetacü. Rü jemaca̱x nabu ga guma nane ga Isaqui ga Tupana namaã nüxü̃ ixucü.
16 Rü ngẽxguma duü̃xü̃gü ṯacüca̱x ixunetagügu, rü to i norü jexera ixĩxü̃ẽ́gagu inaxunetagü. Rü wüxicana ṯacüca̱x ngẽmaãcü inaxunetagügu, rü nüxü̃ tacua̱x rü aixcuma tá nanaxügü i ngẽma naxca̱x inaxunetagüxü̃, rü marü taxucürüwama jeü̃cürü nachiga nidexagüecha.
17 Rü jemaca̱x ga Tupana rü jexguma inaxunetagu namaã ga jema duü̃xü̃gü ga najauxgüxü̃ tá ga jema ngü̃xẽẽ ga Tupana nüxna ãxchaü̃xü̃, rü nügüégagutama inaxuneta, jerü nanaxwa̱xe na meãma nüxü̃ nacua̱xgüxü̃ na aixcuma tá janguxẽẽãxü̃ rü tagutáma naxüchicüüãxü̃ ga jema namaã inaxunetaxü̃.
18 Rü nüxü̃ tacua̱x rü ngẽxguma ṯacüca̱x nügüégagu inaxunetagu ja Tupana, rü taxucürüwama tüxü̃ nawomüxẽẽ rü nanaxüchicüü i ngẽma. Rü nhu̱xma i guxãma i jixema na Tupanaca̱x ibuxmüxü̃ na tüxü̃ nangü̃xẽẽxü̃ca̱x rü tüxü̃ namaxẽxẽẽxü̃ca̱x, rü nüma ja Tupana rü nügüégagu tamaã inaxuneta na ngẽmaãcü tá tüxü̃ nangü̃xẽẽxü̃. Rü ngẽmaãcü tüxü̃́ nanangúchaü̃xẽẽ rü tüxü̃ narüngü̃xẽẽ na nüxü̃ icuáxü̃ca̱x na aixcuma tá najauxgüxü̃ i ngẽma maxü̃ i taguma gúxü̃ i tamaã inaxunetaxü̃.
19 Rü nhu̱xma na ínaṉg̱uxẽẽxü̃ na aixcuma tá najaxuxü̃ i ngẽma maxü̃ i taguma gúxü̃, rü taxuü̃ca̱xma taxoegaãẽgü, erü nüxü̃ tacua̱x na aixcuma dauxü̃guxü̃ i naãnewa i Tupana íngẽxmaxü̃wa tá ingugüxü̃.
20 Rü ngẽ́ma nangẽxma ja Ngechuchu i nhu̱xma jerü nüxĩra jexma naxücu na Tupanape̱xewa taétüwa nachogüxü̃ca̱x. Rü ngẽmaãcü guxü̃guma tórü ngü̃xẽẽruü̃ i paigüeru nixĩ, guma Meuquichedé ga Tupanape̱xewa Abrã́ũẽ́tüwa chogücürüü̃.
