Ebréugü 7:1-28
7 Rü guma Meuquichedé rü ĩãne ga Charéü̃ãrü ãẽ̱xgacü nixĩ ga jexguma namaxü̃gu ga Abrã́ũ. Rü nüma ga Meuquichedé, rü duü̃xü̃güarü pai nixĩ ga Tupanape̱xewa. Rü jexguma Abrã́ũ rü to ga nachiü̃ãneãrü ãẽ̱xgacügümaã nügü nadaixgu rü nüxü̃ najexeragu, rü Meuquichedé rü namawa Abrã́ũpe̱xegu najangu ga jexguma Abrã́ũ napataca̱x taegugu. Rü nüma ga Meuquichedé rü najumuxẽ na Tupana Abrã́ũxü̃ rüngü̃xẽẽxü̃ca̱x.
2 Rü Abrã́ũ rü nüxü̃́ najexma ga guxü̃ma ga jemaxü̃gü ga jema ãẽ̱xgacügü ga namaã nügü naḏaixü̃na napuxü̃xü̃. Rü jemawa ínanaxüxüchi ga jema Tupanana üxü̃, rü Meuquichedéna nanaxã. Rü ngẽma naẽ́ga i Meuquichedé rü Ãẽ̱xgacü ja Ixaixcumacü nhaxü̃chiga nixĩ. Rü norü ĩãne ga Charéü̃ rü Taãẽxẽẽruü̃ nhaxü̃chiga nixĩ. Rü ngẽmaca̱x i naẽ́ga i Meuquichedé rü Ãẽ̱xgacü ja Taãẽxẽẽruü̃ nhaxü̃chiga ta nixĩ.
3 Rü Tupanaãrü ore ga nuxcüma ümatüxü̃wa rü tama nüxü̃ nixu na texé tiĩxü̃ ga nanatü rü naẽ rü norü o̱xigü ga Meuquichedé. Rü ngẽxgumarüü̃ ta tama nüxü̃ nixu i norü buxchiga rü norü juxchiga. Rü ngẽmaca̱x Tupana Nanerüü̃ guxü̃guma duü̃xü̃güarü ngü̃xẽẽruü̃ ja pai nixĩ i Tupanape̱xewa.
4 Rü nhu̱xma rü name nixĩ i nagu perüxĩnüẽ na nhuxãcü aixcuma ãẽ̱xgacü ja tacü jiĩxü̃ ga Meuquichedé. Jerü nuxcümaxü̃cü ga tórü o̱xi ga Abrã́ũ rü Meuquichedéna nanaxã ga jema Tupanana üxü̃ ga natanüwa ga jema jemaxü̃gü ga togü ga ãẽ̱xgacügüna napuxü̃xü̃. Rü ngẽmawa nüxü̃ tacua̱x na Tupanape̱xewa tórü o̱xi ga Abrã́ũãrü jexeracü jiĩxü̃ ga Meuquichedé.
5 Rü nhu̱xma i Judéugü, rü guxü̃ma i norü ngẽmaxü̃wa ínanaxüxüchigü i ngẽma Tupanana üxü̃, rü nhu̱xmachi norü paigüna nanaxã jerü jemaãcü nixĩ ga namuãxü̃ ga jema mugü ga Muĩsé ümatüxü̃. Notürü guxü̃ma i ngẽma paigü rü Lewítaagü nixĩgü. Rü nüma ga Lewí rü guxü̃ma i Judéugürüü̃ Abrã́ũtaa nixĩ. Rü ngẽmaãcü i ngẽma Judéugü rü norü paigüna nanaxã i ngẽma Tupanana üxü̃, woo natanüxü̃ na jiĩxü̃ i ngẽma paigü.
6 Notürü ga Meuquichedé rü woo tama Lewítaa nixĩ, notürü Abrã́ũme̱xẽwa nanajaxu ga jema Tupanana üxü̃. Rü nüxü̃ tacua̱x na Abrã́ũ jiĩxü̃ ga noxri najaxucü ga Tupanaãrü uneta. Rü nüma ga Meuquichedé rü Tupanana naca na Abrã́ũxü̃ nangü̃xẽẽxü̃ca̱x ga Tupana.
7 Rü guxãma meãma nüxü̃ tacua̱x rü ngẽxguma texé togueca̱x Tupanana caxgu na tüxü̃ nangü̃xẽẽxü̃ca̱x, rü Tupanape̱xewa rü jíxema nüxna c̱axe rü ngẽma togü i naxca̱x ítac̱axü̃ãrü jexera tixĩ. Rü ngẽmaãcü nüxü̃ tacua̱x na Abrã́ũãrü jexera jiĩxü̃ ga Meuquichedé i Tupanape̱xewa.
8 Rü nhu̱xma i nuã tatanüwa rü ngẽma paigü i ngĩxü̃ jauxgüxü̃ i ngẽma dĩẽru i Tupanana ücü, rü duü̃xü̃gümare nixĩgü rü tá najue. Notürü ngẽxguma Meuquichedéchiga jadexagu i Tupanaãrü ore, rü nhama namaxü̃gurüü̃ nixĩ i nachiga jadexaxü̃. Rü ngẽmawa nüxü̃ tacua̱x na Cristu ja guxü̃guma maxü̃cürüü̃ jiĩxü̃ ga Meuquichedé.
9 7:9-10 Rü Abrã́ũtaa ga Lewí, rü guxü̃ma i paigü i Lewítaagü ixĩgüxü̃ i nhu̱xma ngĩxü̃ jauxgüxü̃ i ngẽma dĩẽru i Tupanana ücü, rü nümagü rü ta Abrã́ũmaã Meuquichedéna nanaxãgü ga jema Tupanana üxü̃. Jerü nüma ga Lewí rü guxü̃ma ga nataagü i nhu̱xma Judéugüarü paigü ixĩgüxü̃, rü woo ga na taũta nabuexü̃ ga jexguma, notürü marü Abrã́ũxü̃newa najexmagü ga jexguma Meuquichedé namawa Abrã́ũpe̱xegu janguxgu. Rü ngẽmawa nüxü̃ tacua̱x na guxü̃ma i ngẽma paigüarü jexera jiĩxü̃ ja Meuquichedé.
10 Nüü̃ nadau 7:9
11 Rü nuxcümaxü̃güxü̃ ga tórü o̱xigü ga Judéugü, rü Lewítaagü ga paigüme̱xẽwa nixĩ ga najauxgüãxü̃ ga Tupanaãrü mugü. Notürü pemaã nüxü̃ chixu rü jexguma chi jema paigü aixcuma jema Judéugüxü̃ imexẽẽgügu ga Tupanape̱xewa, rü taxuü̃ca̱x chima Tupana nüxü̃ naxuneta ga naĩ ga pai ga Meuquichedérüü̃ ixĩcü ga tama Lewítaa ga Arã́ũrüü̃ ixĩcü. Rü jemaca̱x ga Tupana rü nüxü̃ naxuneta ga Nane ga Ngechuchu na tórü chogüruü̃ ja pai jiĩxü̃ca̱x.
12 Rü jemaca̱x ga Tupana rü jema Judéugüarü paigüchicüüxü̃ najangucuchixẽẽ ga Cristu. Rü nüma nixĩ i nhu̱xma i aixcuma Tupanape̱xewa tüxü̃ jamexẽẽgüxü̃. Rü guxü̃ma ga jema paigü rü Lewítaa nixĩgü jerü jemaãcü nixĩ ga namuãxü̃ ga jema mugü ga Muĩsé ümatüxü̃. Notürü nüma ga Cristu rü marü nanaxüchicüü ga guxü̃ma ga jema.
13 7:13-14 Erü meãma nüxü̃ tacua̱x rü nüma ja tórü Cori ja Ngechuchu ja jima nachiga idexagücü rü tama Lewítaa nixĩ erü nüma rü Judátaa nixĩ. Rü nüxü̃ tacua̱x rü taxuü̃ma ga Judátaa rü pai nixĩ, jerü ga Muĩsé rü jexguma jema paigüchiga jadexagu rü taxuü̃ma ga Judátaaxü̃ naxuneta na pai jiĩxü̃ca̱x.
14 Nüü̃ nadau 7:13
15 Rü ngẽmaãcü meã nango̱x na Tupana ijanaxoxẽẽxü̃ ga guxü̃ma ga jema mugü ga Muĩsé ümatüxü̃ ga paigüchiga. Jerü nüma ga Tupana rü tüxna nanamu ga wüxi ga naĩ ga pai ga jexwacaxü̃cü ga tama Lewítaa ixĩcü. Rü nüma nixĩ i tórü Cori jiĩxü̃ ja Meuquichedérüü̃ ixĩcü, erü guxü̃ma i ngẽma togü i paigüarü jexera nixĩ.
16 Rü guxü̃ma ga jema togü ga paigü rü nangucu jerü Lewítaa nixĩgü. Notürü nüma ga Cristu rü paixü̃ ningucuchi jerü poramaã juwa ínarüda rü guxü̃guma namaxẽcha na tüxü̃ nangü̃xẽẽxü̃ca̱x.
17 Rü ngẽmaca̱x i Tupanaãrü ore i ümatüxü̃wa rü tórü Corichiga nhanagürü:“Cuma rü guxü̃gutáma duü̃xü̃güarü ngü̃xẽẽruü̃ ja pai cuixĩ Meuquichedérüü̃”,
nhanagürü.
18 7:18-19 Rü jemaca̱x ga Tupana rü nhama ga naãnewa nanamu ga Nane, jerü jema mugü ga paigüchiga naxümatüxü̃ ga Muĩsé rü tama poraãcü tüxü̃ narüngü̃xẽẽ jerü tama aixcuma tüxü̃ nimexẽẽgü ga Tupanape̱xewa. Rü jemaca̱x Nanexü̃ namu ga Tupana na tórü pecaduca̱x najuxü̃ca̱x na ngẽmaãcü tüxü̃́ nangẽxmaxü̃ca̱x i maxü̃ i taguma gúxü̃ rü aixcuma Tupanamücügü ixĩgüxü̃ca̱x.
19 Nüü̃ nadau 7:18
20 7:20-21 Rü jexguma Tupana jema togü ga paigüxü̃ ngucuxẽẽgu, rü nanangucuxẽẽmare. Notürü jexguma Cristuxü̃ jangucuchixẽẽgu na tórü ngü̃xẽẽruü̃ ja pai jiĩxü̃ca̱x, rü nügüégagutama inaxuneta. Rü jemaca̱x ga jexguma Cristuxü̃ jangucuchixẽẽgu rü nhanagürü:“Chama i Cori ja Tupana rü marü cuxü̃ chaxuneta na guxü̃gutáma duü̃xü̃güarü ngü̃xẽẽruü̃ ja pai cuiĩxü̃ca̱x. Rü ngẽma rü tagutáma chanaxüchicüü erü chaugüégagu ichaxuneta”,nhanagürü.
21 Nüü̃ nadau 7:20
22 Rü nhu̱xma na jemaãcü nügüégagutama inaxunetaxü̃ ga Tupana, rü nüxü̃ tacua̱x na aixcumaxü̃chima jema paigüarü jexera na jiĩxü̃ ja Cristu erü guxü̃gutáma Tupanape̱xewa tüxü̃ narüngü̃xẽẽ.
23 Rü jema togü ga paigü rü namuxũchi, jerü nijuetanü. Rü jemaca̱x taxucürüwama guxü̃guma paigü nixĩgü.
24 Notürü nhu̱xma na tórü ngü̃xẽẽruü̃ ja paixü̃ jangucuchixü̃ ja Ngechuchu, rü ngẽmaca̱x marü taxuü̃ca̱xma texé ja togue tingucuchi, erü nüma ja Ngechuchu rü tagutáma naju.
25 Rü ngẽmaca̱x nixĩ i nhu̱xma i nüxü̃́ natauxchaxü̃ na aixcuma tüxü̃ namaxẽxẽẽxü̃ ja guxãma ja jíxema norü ngü̃xẽẽmaã Tupanaxü̃tawa ngugüxe. Erü nüma ja Ngechuchu rü guxü̃guma namaxẽcha na tümaẽ́tüwa nachogüxü̃ca̱x.
26 Rü ngẽmaãcü ja Ngechuchu, rü nüxĩcatama nixĩ i pai ja tórü ngü̃xẽẽruü̃ jiĩxü̃ i Tupanape̱xewa. Erü nüma rü aixcuma naxüüne, rü nataxuma i chixexü̃ i nawa, rü nangearü pecaduã̱x jerü taguma taxrüü̃ pecadu naxü. Rü nhu̱xma rü guxü̃ẽ́tüwa nangẽxma i dauxü̃guxü̃ i naãnewa i Tupana íngẽxmaxü̃wa.
27 Rü Ngechuchu rü tama ngẽma togü i paigüerurüü̃ nixĩ. Erü nümagü rü nanaxwa̱xe na guxü̃ i ngunexü̃gu Tupanaca̱x naxü̃nagü naḏaixü̃ na ngẽmaãcü Tupana nüxü̃́ nüxü̃ ngechaü̃xü̃ca̱x i noxrütama pecadugü rü guxü̃ i duü̃xü̃güarü pecadugü ta. Notürü nüma ga Ngechuchu rü jexguma nügü inaxãxgu, rü wüxicanatama pecaduca̱x naju. Rü ngẽma rü guxü̃guma name i Tupanape̱xewa.
28 Rü jema mugü ga Muĩsé ümatüxü̃, rü duü̃xü̃gümarexü̃ naxuneta na paigüerugü jixĩgüxü̃ca̱x. Notürü nümagü rü ta nipecaduã̱xgü. Notürü jemawena ga Tupana rü nügüégagu Nanexü̃ naxuneta na tórü ngü̃xẽẽruü̃ jiĩxü̃ca̱x. Rü jima Nane rü guxü̃guma mecüxü̃chi ja tórü Maxẽxẽẽruü̃ nixĩ. Rü nüma rü guxü̃guma tüxü̃ narüngü̃xẽẽ i Tupanape̱xewa.
