Ebréugü 8:1-13
8 Rü ngẽma pemaã nüxü̃ tixuxchaü̃xü̃ i nhu̱xma nixĩ na tüxü̃́ nangẽxmaxü̃ ja tórü ngü̃xẽẽruü̃ ja mexẽchicü i Tupanaxü̃tawa. Rü nüma rü Tupana Nane ja Cristu nixĩ. Rü dauxü̃guxü̃ i naãnewa i Tupanaãrü tügünecüwawa narüto erü guxü̃ãrü ãẽ̱xgacü nixĩ.
2 Rü ngẽ́ma dauxü̃guxü̃ i naãnewa i ngẽma nachica i üünexü̃ ga Tupana üxü̃wa nixĩ i taxca̱x ínac̱axü̃. Rü tama ngẽma Judéugüarü paigürüü̃ wüxi ja ĩpata ja duü̃xü̃gü üxü̃newa Tupanana taxca̱x ínaca.
3 Rü guxü̃ma i ngẽma Judéugüarü paigüeru rü nangucu na Tupanana naxãgüãxü̃ca̱x i ãmaregü rü naxca̱x nadaiãxü̃ca̱x i naxü̃nagü na Tupana nüxü̃́ nüxü̃ ngechaü̃xü̃ca̱x i duü̃xü̃güarü pecadugü. Rü jemaca̱x ga Ngechuchu rü Tupanana nügü naxãmare rü duü̃xü̃güarü pecaduca̱x naju.
4 Rü nhu̱xma i nüma ja Ngechuchu rü dauxü̃guxü̃ i naãnewa nangẽxma na ngẽ́ma tórü ngü̃xẽẽruü̃ ja pai jiĩxü̃ca̱x i Tupanape̱xewa. Rü ngẽmaca̱x tama nhama i naãnewa nixĩ i pai jiĩxü̃. Notürü ngẽxguma chi nhama i naãnewa nangẽxmagu rü tau chima pai nixĩ erü nhama i naãnewa nangẽxmagü i ngẽma Judéugüarü paigü i Tupanana ãmare ãgüxü̃ jema Muĩséarü mugü nüxü̃ ixuxü̃rüü̃. Notürü nüma ja Ngechuchu rü tama ngẽmarüü̃ nixĩ erü dauxü̃guxü̃ i naãnewa nixĩ i nangẽxmaxü̃ na ngẽ́ma tüxü̃ nangü̃xẽẽxü̃ca̱x.
5 Notürü ngẽma puracü i nhama i naãnewa naxügüxü̃ i ngẽma Judéugüarü paigü, rü naxca̱x nadauxü̃taegümare i ngẽma Ngechuchu dauxü̃guxü̃ i naãnewa üxü̃. Rü ngẽma nachica i nawa Tupanaca̱x napuracüexü̃ i ngẽma paigü, rü nanaxüchicüna̱xãgümare i ngẽma nachica i Ngechuchu nawa ngẽxmaxü̃. Rü meãma nüxü̃ tacua̱x i ngẽma, jerü jexguma Muĩsé naxüxchaü̃gu ga Tupanapata, rü Tupana rü nhanagürü nüxü̃:“¡Dücax, meã nangugü i ngẽma cua̱xruü̃ ga cuxü̃ chawéxü̃ ga ma̱xpǘne ga Chinaĩwa! Rü chanaxwa̱xe i ngẽmaãcü na cunaxüxü”,
nhanagürü.
6 Notürü nüma ja tórü ngü̃xẽẽruü̃ ja Cristu rü dauxü̃guxü̃ i naãnewa nangẽxma, rü ngẽ́ma aixcumaxü̃chi Tupanape̱xewa taétüwa nachogü. Rü ngẽma Judéugüarü paigü rü nagu naxĩãma ga jema nuxcümaxü̃xü̃ ga uneta ga Muĩsé ümatüxü̃. Notürü nüma ja Tupana rü marü tüxna nanaxã i wüxi i ngexwacaxü̃xü̃ i uneta erü tamaã nüxü̃ nixu na Cristu jiĩxü̃ ja aixcuma tórü ngü̃xẽẽruü̃ ixĩcü. Rü nüma rü naju na Tupanape̱xewa tüxü̃ jamexẽẽxü̃ca̱x, rü ngẽ́ma Tupanaxü̃tawa nangẽxma i nhu̱xma na taétüwa nachogüxü̃ca̱x. Rü ngẽmaãcü nüxü̃ tadau na Tupanaãrü uneta i ngexwacaxü̃xü̃ rü jema nuxcümaxü̃xü̃ ga unetaarü jexera jiĩxü̃ na namexü̃.
7 Jerü jexguma chi jema nüxĩraü̃xü̃ ga uneta ga Muĩsé ümatüxü̃ rü aixcuma namexgu na duü̃xü̃güxü̃ jamaxẽxẽẽxü̃ca̱x, rü marü taxuü̃ca̱x chima tanaxwa̱xe i to i ngexwacaxü̃xü̃ i Tupanaãrü uneta.
8 Notürü nüma ga Tupana rü nüxü̃ nadau na tama aixcuma nape̱xewa duü̃xü̃güxü̃ jamexẽẽxü̃ ga jema nüxĩraü̃xü̃ ga uneta ga Muĩséna naxãxü̃. Rü jemaca̱x ga Tupana rü nhanagürü:“Wüxi i ngunexü̃ rü wena táxarü guxü̃ma i chorü duü̃xü̃gümaã ichaxuneta.
9 Notürü ngẽma chorü uneta i ngexwacaxü̃xü̃, rü tãũxü̃táma namaã nawüxigu ga jema nüxĩraü̃xü̃ ga chorü uneta ga nuxcümaxü̃güxü̃ ga perü o̱xigümaã nüxü̃ chixuxü̃ ga jexguma nüxü̃ charüngü̃xẽẽgu na ínachoxü̃xü̃ca̱x ga Ejituarü naãnewa. Jerü nümagü ga jema duü̃xü̃gü rü tama chauga naxĩnüẽ rü tama najanguxẽẽ ga jema nüxĩraü̃xü̃ ga chorü uneta, rü jemaca̱x íchanawogü.
10 Notürü ngẽxguma nawa nanguxgu na wena namaã ichaxunetaxü̃, rü nhaãcü tá nixĩ i guxü̃ma i Judéugümaã ichaxunetaxü̃: ‘Rü tá meãma ngẽma duü̃xü̃güxü̃ nüxü̃ chacua̱xẽẽ i chorü mugü na aixcuma naãẽwa nangẽxmagüxü̃ca̱x. Rü chama rü tá norü Tupana chixĩ, rü nümagü rü tá chorü duü̃xü̃gü nixĩgü’.
11 Rü guxü̃ma i ngẽma duü̃xü̃gü i choxü̃́ jaxõgüxü̃, rü aixcuma tá choxü̃ nacua̱xgü. Rü ngẽmaca̱x taxuü̃ca̱xtáma tü̱xcüü̃ nügümaã nüxü̃ nixugügü i chauchiga na ngẽmaãcü choxü̃ nacua̱xgüxü̃ca̱x. Erü guxü̃ma i chorü duü̃xü̃gü rü aixcuma tá meã choxü̃ nacua̱xgü woo buxü̃ rü e̱xna jaxü̃.
12 Rü tá nüxü̃́ nüxü̃ changechaü̃ i norü chixexü̃gü, rü tá nüxü̃ ichajarüngümaxü̃chi i norü pecadugü”,
nhanagürü ga Tupana.
13 Rü dücax, nhu̱xma na Tupana ngexwacaxü̃xü̃ i unetachiga idexaxü̃, rü ngẽmawa nüxü̃ tacua̱x na jema nüxĩraü̃xü̃ ga uneta rü marü nangupetüchaü̃xü̃. Rü nüxü̃ tacua̱x rü guxü̃ma i ngẽma marü ngupetüchaü̃xü̃, rü paxa tá inajarüxo. Rü ngẽmaãcü i ngẽma Judéugüarü paigü, rü marü inajarüxoxchaü̃ na Tupanape̱xewa duü̃xü̃güxü̃ nangü̃xẽẽxü̃. Erü nüma ja Tupana rü marü Cristuxü̃ ningucuchixẽẽ na tórü ngü̃xẽẽruü̃ jiĩxü̃ca̱x i nape̱xewa.
