Ebréugü 9:1-28
9 Rü jexguma nuxcüma Muĩsémaã jadexagu rü nüxna naxããgu ga jema nüxĩraü̃xü̃ ga uneta, rü Tupana namaã nüxü̃ nixu na nhuxãcü nanaxwa̱xexü̃ na nüxü̃ jacua̱xüü̃güxü̃. Rü jexgumarüü̃ ta namaã nüxü̃ nixu na nhuxãcü nanaxwa̱xexü̃ na naxca̱x naxüãxü̃ ga wüxi ga ĩpata ga naxchirunaxca̱x na jéma nüxü̃ jacua̱xüü̃güxü̃ca̱x ga paigü.
2 Rü guma ĩpata ga naxchirunaxca̱x rü nitüjemachĩã. Rü jema naxmachĩã ga nüxĩra nawa ixücuxü̃, rü “Nachica i Üünexü̃” nixĩ ga naẽ́ga. Rü jéma najexma ga werachica rü mecha ga põũ ga üünexü̃ nagu nuxü̃.
3 Rü jema to ga naxmachĩã ga jema tüjemachĩãxü̃ca̱xwena üxü̃ rü “Nachica i Üünexü̃chixü̃” nixĩ ga naẽ́ga.
4 Rü jéma najexma ga jema mecha ga uirunaxca̱x ga ngextá nawa jagugüãxü̃ ga pumara ga paacaxü̃ ga jexguma jaguxgu. Rü jéma najexma ta ga jema baú ga Tupanaãrü mugü nagu namaã nanguxü̃güxü̃. Rü jema baú rü guxü̃wama uirumaã natüxüne. Rü jematama baúarü aixepewa najexma ga wüxi ga tü̃xü̃xãcü ga uirunaxca̱x ga jema põũ ga dauxü̃wa rüj̱ixü̃maã ããcuxü̃. Rü jexgumarüü̃ ta jema baúarü aixepewa najexma ga Arã́ũãrü caxü̃ruü̃ ga rüxüxü̃ne, rü guma nutagü ga Tupanaãrü mugü nagu ümatügücü.
5 Rü jema baúétüwa najexmagü ga jema taxre ga dauxü̃cü̱̃ã̱xchicüna̱xãgü ga ixãxpe̱xatüxü̃. Rü naxpe̱xatügümaã najadüxétügü ga jema baúã́taü̃. Rü jema dauxü̃cü̱̃ã̱xchicüna̱xãgüarü ngãxü̃wa nixĩ ga nügü nango̱xẽẽxü̃xü̃ ga Tupana. Notürü taxuü̃ca̱xma tü̱xcüü̃ jexeraãcü nüxü̃ tixu i ngẽmachiga.
6 Rü wüxicana jemaãcü na namexẽẽgüãxü̃ ga guxü̃ma ga jema, rü nhu̱xmachi ga paigü rü guxü̃guma jema nüxĩraü̃xü̃ ga naxmachĩãgu nachocuxü̃ na jéma Tupana namaã nüxü̃ ixuxü̃ãcüma nüxü̃ jacua̱xüü̃güxü̃ca̱x.
7 Notürü jema to ga naxmachĩãwa rü jema paigüarü ãẽ̱xgacüxicatama nixĩ ga jexma ücuxü̃. Rü tama guxü̃guma jexma naxücu, notürü wüxicanatama jexma naxücu ga wüxichigü ga taunecügu. Rü jexguma jexma naxücuxgu rü jéma nanange ga naxü̃nagü rü guma nagümaã jema baúxü̃ namaxcuétü. Rü jemaãcü ga jema paigüarü ãẽ̱xgacü rü inanaxã ga guma nagü na noxrütama pecadu rü guxü̃ma ga duü̃xü̃güarü pecaduxü̃ ijanangümaxü̃ca̱x ga Tupana.
8 Notürü jema paigüarü ãẽ̱xgacüxicatama nixĩ ga jema Nachica ga Üünexü̃chixü̃gu ücuxü̃ ga Tupana íjexmaxü̃wa. Rü ngẽmaãcü Tupanaãẽ i Üünexü̃ tüxü̃ nüxü̃ nacua̱xẽẽ na taxucürüwama jexma Tupana íjexmaxü̃gu nachocuxü̃ ga guxü̃ma ga duü̃xü̃gü jerü jexguma nagu naxĩxgu ga jema mugü ga Muĩsé ümatüxü̃ rü nachu̱xu ga jema.
9 Rü guxü̃ma i ngẽma pemaã nüxü̃ chixuchigaxü̃, rü wüxi i cua̱xruü̃ nixĩ i taxca̱x i jixema na nhu̱xma imaxẽxü̃. Rü ngẽmawa nüxü̃ tadau rü jema ãmaregü ga Tupanana naxãgüxü̃ rü jema naxü̃nagü ga Tupanaca̱x naḏaixü̃ rü taxucürüwama jema duü̃xü̃güxü̃ nimexẽẽ na aixcuma Tupanape̱xewa jamexü̃ca̱x.
10 Rü jema nuxcümaxü̃güxü̃ ga mugü ga õnagüchiga rü axeü̃güchiga rü nacümagüchiga ixĩxü̃, rü jema duü̃xü̃güarü düxétüxü̃neca̱xicatama nixĩgü. Rü jemaca̱x tama jema duü̃xü̃güxü̃ nimexẽẽ na aixcuma Tupanape̱xewa jamexü̃ca̱x. Rü woo napora ga jema mugü ga noxrix, notürü jexguma ínanguxgu ga Cristu rü marü jexma najacua̱x na duü̃xü̃gümaã naporaxü̃.
11 Notürü i nhu̱xma rü marü ínangu ja Cristu. Rü nüma nixĩ i aixcuma tórü ngü̃xẽẽruü̃ jiĩxü̃ i Tupanape̱xewa, rü nagagu nixĩ i nangẽxmaxü̃ i maxü̃ i taguma gúxü̃. Rü ngẽma nachica i ngextá taétüwa ínachogüxü̃wa rü aixcuma naxüüne erü tama guma ĩpata ga naxchirunaxca̱x ga duü̃xü̃gümare üxü̃nerüü̃ nixĩ erü dauxü̃guxü̃ i naãnewa nangẽxma.
12 Rü Cristu rü marü dauxü̃guxü̃ i naãnegu naxücu i ngextá Tupana íngẽxmaxü̃wa. Rü taxuü̃ca̱xma tü̱xcüü̃ wüxichigü ja taunecügu ngẽxma naxücu, erü marü guxü̃guma ngẽ́ma nangẽxmaẽcha. Rü jexguma jexma naxücuxgu, rü tama jéma nanange ga bodegügü rü wocaxacügügü na Tupanana naxããxü̃ca̱x. Notürü nüma ga Cristu rü nagütama inaxã na jemaãcü naxütanüãxü̃ca̱x ga tórü pecadugü rü tüxü̃́ nangẽxmaxü̃ca̱x i maxü̃ i taguma gúxü̃.
13 Rü jema mugü ga Muĩsé ümatüxü̃ rü nhanagürü:“Ngẽxguma texé juetaxü̃ ingõgügu, rü taxucürüwama Tupanapata ja naxchirunaxca̱xgu taxücu”,
nhanagürü. Rü jemaca̱x ga jema Judéugü, rü jexguma wüxi ga juetaxü̃ jangõgügügu rü nanaxwa̱xegü ga na norü paixü̃tawa nagaãxü̃ ga wüxi ga woca na jema pai Tupanaca̱x jamáxü̃ca̱x rü na jaguãxü̃ca̱x na jemaãcü ga guma tanimaca rü dexágu nagüãxü̃ca̱x na jema duü̃xü̃güxü̃ namaã namaxcuxü̃ca̱x na jemaãcü nüxna ínaj̱ixü̃ca̱x ga norü chixexü̃. Notürü jema rü duü̃xü̃güarü düxétüxü̃newaxicatama nanamexẽẽ rü tama norü maxü̃xü̃ namexẽẽ.
14 Notürü nagü ja Cristu rü jema naxü̃nagügüarü jexera name erü tórü maxü̃ namexẽẽ na aixcuma Tupanape̱xewa imexü̃ca̱x. Rü Cristu rü woo Tupana Nane na jiĩxü̃ rü na nataxuxü̃ ga norü chixexü̃, notürü Tupanana nügü naxã rü tórü pecaduca̱x naju jerü Naãẽ i Üünexü̃ nanaporaxẽẽ. Rü jemaãcü curuchagu nanabaxẽẽ ga nagü. Rü nhu̱xma ja jima nagü rü ningu na tüxü̃ namexẽẽxü̃ca̱x i Tupanape̱xewa. Rü ngẽmaca̱x taxuü̃ca̱xma tanaxwa̱xe na nagu ixĩxü̃ ga jema mugü ga Muĩsé ümatüxü̃ ga tama tüxna naxãxü̃ i maxü̃ i taguma gúxü̃. Rü nhu̱xma na Cristugagu Tupanape̱xewa imexü̃, rü nüma ja Cristu rü tüxü̃ narüngü̃xẽẽ na naxüxü̃ca̱x i ngẽma Tupana ja maxü̃cü tüxü̃́ naxwa̱xexü̃.
15 Rü nhu̱xma na tórü pecaduca̱x najuxü̃ ga Ngechuchu ja Cristu, rü nüma nixĩ i tórü ngü̃xẽẽruü̃ i Tupanape̱xewa, ngẽma Tupanaãrü uneta i ngexwacaxü̃xü̃ nüxü̃ ixuxü̃rüü̃. Rü nhu̱xma i jixema i Tupana tüxü̃ idexechixe, rü tüxü̃́ nangẽxma i maxü̃ i taguma gúxü̃ ega jima Naneãxü̃́ jaxõgügu. Rü ngẽxgumarüü̃ ta i guxü̃ma i Tupanaãrü duü̃xü̃gü ga nuxcüma jaxõgüxü̃, rü nüxü̃́ nangẽxma i maxü̃ i taguma gúxü̃ jerü Cristu naju na norü pecaduna ínanguxü̃xẽẽãxü̃ca̱x.
16 Rü ngẽxguma najuxchaü̃gu i wüxi i duü̃xü̃, rü wüxi i poperagu nanaxümatü na texé tá najaxuxü̃ i norü ngẽmaxü̃gü. Notürü ngẽxguma namaxü̃gu i ngẽma duü̃xü̃, rü taxucürüwama texé tanajaxu i norü ngẽmaxü̃gü.
17 Rü ngẽmaca̱x i ngẽma popera rü tama napora i ngẽxguma namaxü̃gu i ngẽma duü̃xü̃. Rü ngẽxguma naju̱xguxicatama nixĩ i naporaxü̃.
18 Rü nüma ga Cristu rü norü jumaã nixĩ ga Tupanape̱xewa tüxü̃ jamexẽẽgüxü̃. Jerü ga Muĩsé rü nüxü̃ nixu rü jexguma texé pecaduã̱xgu rü tanaxwa̱xe na tümaãrü paixü̃tawa tanagaxü̃ ga wüxi ga naxü̃na na tümaẽ́gagu najuxẽẽãxü̃ca̱x rü inabaãxü̃ca̱x ga nagü na Tupana tüxü̃́ nüxü̃ ngechaü̃xü̃ca̱x ga tümaãrü pecadu.
19 Rü Muĩsé rü guxü̃ma ga duü̃xü̃güpe̱xewa nüxü̃ nixu ga guxü̃ma ga Tupanaãrü mugü. Rü jemawena nanajaxu ga wocaxacügügü rü bodexacügügü, rü dexámaã nanaxüéü̃. Rü nhu̱xmachi nanajaxu ga wüxi ga naĩxchacüüxacü rü nhuxre ga tüa̱xmü ga dauxü̃ne, rü jema naĩxchacüügu nanabagümü. Rü jemamaã guma nagüwa nanacúe rü nhu̱xmachi nanamaxcuétü ga jema popera ga Tupanaãrü mugü nawa jexmaxü̃. Rü jexgumarüü̃ ta najamaxcutanü ga guxü̃ma ga duü̃xü̃gü.
20 Rü nhu̱xmachi ga Muĩsé rü nhanagürü nüxü̃ ga duü̃xü̃gü:“Tupana rü marü inaxuneta na pexü̃ tá nangü̃xẽẽxü̃. Rü daa nagümaã pexü̃ chimaxcutanü i nhu̱xma erü ngẽmaãcü nixĩ i choxü̃ namuxü̃ na ngẽmawa nüxü̃ pecuáxü̃ca̱x na aixcuma tá pexü̃ nangü̃xẽẽxü̃”,
nhanagürü.
21 Rü nhu̱xmachi ga Muĩsé rü guma nagümaã nanamaxcuétü ga guma ĩpata ga naxchirunaxca̱x ga nawa Tupanaxü̃ jacua̱xüü̃güne. Rü jexgumarüü̃ ta nanamaxcutanü ga guxü̃ma ga jemaxü̃gü ga namaã Tupanaxü̃ jacua̱xüü̃güxü̃ ga guma ĩpataarü aixepewa jexmagüxü̃.
22 Rü nüxü̃ tacua̱x rü jema duü̃xü̃gü ga jexguma pecadu naxügügu rü Tupanape̱xewa nügü jamexẽẽgüchaü̃gu, rü norü paigüxü̃tawa nanaga ga wüxi ga naxü̃na na nüxü̃́ jamáãxü̃ca̱x rü inabagüxẽẽãxü̃ca̱x na Tupana tama napocuexü̃ca̱x. Notürü nhu̱xma ja Tupana rü tüxü̃́ nüxü̃ nangechaü̃ i tórü chixexü̃ jerü tórü pecaduca̱x naju ga Ngechuchu rü nagü inanaba. Rü jexguma chi tau chima naju̱xgu rü nagü inabaãgu, rü taxucürüwa chima Tupana tüxü̃́ nüxü̃ nangechaü̃ i tórü pecadugü.
Cristu rü naju na ijanaxoxẽẽãxü̃ca̱x i pecadu
23 Rü jemaca̱x ga Tupana rü nuxcümaxü̃chima Muĩsémaã nüxü̃ nixu na paigü duü̃xü̃güarü pecaduca̱x naḏaixü̃ ga naxü̃nagü rü inabaãxü̃ ga nagü na jemaãcü Tupana tama napocuexü̃ca̱x ga duü̃xü̃gü. Notürü i nhu̱xma i jixema na Tupana tüxü̃ idexechixü̃, rü tüxü̃́ nangẽxma i tachica i dauxü̃guxü̃ i naãnewa jerü Nane ja Cristutama tórü pecaduca̱x naju rü inanaba ga nagü. Rü jima nagü rü Tupanape̱xewa rü poraãcü ngẽma naxü̃nagügüarü jexera narüporamaẽ.
24 Rü ngẽmaca̱x i nhu̱xma rü taxuü̃ca̱xma tü̱xcüü̃ guma ĩpata ga naxchirunaxca̱x ga duü̃xü̃gü üxü̃negu naxücu ja Cristu na ngẽ́ma taétüwa nachogüxü̃ca̱x. Erü nüma ja Cristu rü marü Tupanaxü̃tawaxü̃chi nangu i dauxü̃guxü̃ i naãnewa. Rü ngẽ́ma Nanatüpe̱xewa nangẽxma i nhu̱xma na ngẽ́ma taétüwa nachogüxü̃ca̱x.
25 Rü ngẽmaca̱x i nhu̱xma rü taxuü̃ca̱xma tü̱xcüü̃ guxü̃guma Nanatüna nügü naxãẽcha na ngẽmaãcü taxca̱x najuuuxü̃ca̱x. Rü jema Judéugüarü paigüarü ãẽ̱xgacügü rü gúcü ga taunecügügu guma ĩpata ga üünenegu nachocuxü̃ na jéma Tupanana naxãgüãxü̃ca̱x ga guma naxü̃nagügü.
26 Notürü ja Cristu, rü taxuü̃ca̱xma tü̱xcüü̃ gúcü ja taunecügügu Tupanana nügü naxãẽcha, erü ngẽxguma chi ngẽmaãcü jixĩgu rü chi noxri naãne ixügügumama rü chi marü muẽ̱xpü̱xcüna taxca̱x naju. Notürü nhamaü̃cüü ga Cristu rü marü nhama ga naãnewa nangu na wüxicanatama nügü inaxãxü̃ca̱x rü pecaduca̱x najuxü̃ca̱x.
27 9:27-28 Rü ngẽma na wüxicanatama najuexü̃ i duü̃xü̃gü naxü̃pa na Tupanape̱xewa nangugüxü̃, rü jexgumarüü̃tama ga Cristu rü wüxicanatama nügü inaxã rü naju na ijanaxoxẽẽãxü̃ca̱x i muxü̃ma i duü̃xü̃güarü pecadugü. Notürü wena taxarü núma naxũ. Rü ngẽxguma wena núma naxũxgu rü tama pecaduarü oxẽẽwa tá núma naxũ. Notürü tá núma naxũ na namaxẽxẽẽãxü̃ca̱x i guxü̃ma i ngẽma duü̃xü̃gü i aixcuma ínaṉg̱uxẽẽgüxü̃.
28 Nüü̃ nadau 9:27
