Epéchiucü̃ãꞌ 1:1-23
1 Pa Chaueneẽgü ja Epéchiuwa Ngẽxmagüxe, chama i Pauru nixĩ i pexca̱x chanaxümatüxü̃ i nhaã popera. Rü chama i Pauru chixĩ i Tupana choxü̃ jaxuxü̃ na Ngechuchu ja Cristu choxü̃ muxü̃ca̱x na duü̃xü̃gümaã nüxü̃ chixuxü̃ca̱x i norü ore. Rü pexca̱x chanaxümatü i guxãma i pema ja Epéchiuarü ĩãnewa ngẽxmagüxe rü Tupanaãrü duü̃xü̃gü ixĩgüxe rü Ngechuchu ja Cristuaxü̃́ jaxõgüxe.
2 Rü chanaxwa̱xe i pexü̃ narüngü̃xẽẽ rü pexü̃ nataãẽxẽẽ ja Tanatü ja Tupana rü tórü Cori ja Ngechuchu ja Cristu.
Tupana rü poraãcü tüxü̃ narüngü̃xẽẽ erü Cristuarü duü̃xü̃gü tixĩgü
3 Rü name nixĩ i nüxü̃ ticua̱xüü̃gü ja Tanatü ja Tupana ja tórü Cori ja Ngechuchu ja Cristunatü. Rü name nixĩ i ngẽmaãcü tanaxü erü nhu̱xma na Cristuarü duü̃xü̃gü ixĩgüxü̃, rü nüma ja Tupana rü dauxü̃wa taxca̱x ne nanamu i nagúxü̃raü̃xü̃ i ngü̃xẽẽ i Naãẽ i Üünexü̃wa ne ĩxü̃ i tórü maxü̃ca̱x ixĩxü̃.
4 1:4-5 Rü tautama naãne ü̱xgu, rü Cristugagu Tupana tüxü̃ nidexechi na nape̱xewa ixüünegüxü̃ca̱x rü na nataxuxü̃ca̱x i tórü chixexü̃ i nape̱xewa. Rü Tupana rü poraãcü tüxü̃ nangechaü̃. Rü jemaca̱x nuxcümamatama tüxü̃ naxuneta na naxãcügüxü̃ tüxü̃ nadexü̃ca̱x Ngechuchugagu. Rü jemaãcü nanaxü jerü jema nixĩ ga norü ngúchaü̃.
5 Nüü̃ nadau 1:4
6 Rü ngẽmaca̱x name nixĩ i guxü̃guma nüxü̃ ticua̱xüü̃gü ja Tupana. Erü nüma rü poraãcüxü̃chima tamaã namecüma rü poraãcü tüxü̃ narüngü̃xẽẽ ga jexguma taxca̱x núma namuãxgu ga Nane ja nüxü̃ nangechaü̃xü̃chicü.
7 Rü Tupana rü poraãcü tüxü̃ nangechaü̃, rü jemaca̱x nanamu ga Nane na taxca̱x najuxü̃ rü nagü inabaxü̃ na jemaãcü tüxü̃ ínanguxü̃xẽẽü̃ca̱x rü tüxü̃́ nüxü̃ nangechaü̃xü̃ca̱x ga tórü pecadugü.
8 Rü Tupana tüxü̃ nüxü̃ nadauxẽẽ na nhuxãcü poraãcü tüxü̃ nangechaü̃xü̃ ga jexguma tüxna naxããxgu ga guxü̃ma ga tórü cua̱x na taãẽxü̃ icuáxü̃ca̱x rü tüxü̃́ natauxchaxü̃ca̱x i norü ore.
9 Rü tüxü̃ nüxü̃ nacua̱xẽẽ ga norü ngúchaü̃ ga noxri nüxĩcatama nüxü̃ nacuáxü̃. Rü jema norü ngúchaü̃ ga nuxcümaxü̃chima Cristumaã nagu naxĩnüxü̃ ga Tupana, rü jema nixĩ ga nhama ga naãnewa na namuãxü̃ na tüxü̃ jamaxẽxẽẽxü̃ca̱x.
10 Rü jema nagu naxĩnüxü̃ nixĩ na Cristume̱xẽwa nangẽxmaxẽẽãxü̃ i guxü̃ma i dauxü̃guxü̃ i naãnewa ngẽxmaxü̃ rü guxü̃ma i nhama i naãnewa ngẽxmaxü̃. Rü ngẽmaãcü tá nanaxü ja Tupana i ngẽxguma nawa nanguxgu na janguxẽẽãxü̃.
11 Jerü nuxcümamatama Tupana toxü̃ nidexechi na Cristugagu tanajauxgüxü̃ca̱x i ngẽma maxü̃ i taguma gúxü̃ i nüma toxna naxãxchaü̃xü̃. Rü aixcuma jemaãcü toxü̃ narüngü̃xẽẽ jerü jema nixĩ ga norü ngúchaü̃ ga Tupana ja guxü̃ma ücü, ngẽma nüma nagu naxĩnüxü̃ãcüma.
12 Rü jemaãcü Tupana toxü̃ nidexechi na naxca̱x tamaxẽxü̃ca̱x rü nüxü̃ ticua̱xüü̃güxü̃ca̱x naxca̱x na tomaã namecümaxü̃ i toma i toxira Cristuaxü̃́ na tajaxõgüxü̃.
13 Rü jexgumarüü̃ ta ga pema i Epéchiucü̱̃ã̱xgü, rü jexguma nüxü̃ pexĩnüẽgu ga jema ore i aixcuma ixĩxü̃ i tüxü̃ maxẽxẽẽxü̃, rü jexguma Cristuaxü̃́ pejaxõgügu, rü natanüxü̃gü peixĩgü. Rü Tupana ga tamaã ixunetacü na tüxna namuãxü̃ca̱x i Naãẽ i Üünexü̃, rü marü pexna nanamu i ngẽma Naãẽ na nüxü̃ pecuáxü̃ca̱x na aixcuma norü duü̃xü̃gü peixĩgüxü̃.
14 Rü nüma ga Tupana núma nanamu ga Naãẽ i Üünexü̃ na nawa nüxü̃ icuáxü̃ca̱x na aixcuma tá tüxna naxããxü̃ i guxü̃ma ga jema tamaã inaxunetaxü̃. Rü jixema na noxrü ixĩgüxü̃ rü tá aixcuma tanajaxu i guxü̃ma i ngẽma tamaã inaxunetaxü̃ i ngẽxguma wena núma naxũxgu na pecaduwa tüxü̃ íjanguxü̃xẽẽxü̃chixü̃ca̱x. Rü ngẽmaca̱x name nixĩ na nüxü̃ icua̱xüü̃güxü̃ ja Tanatü ja Tupana ja mexẽchicü.
Pauru rü Tupanana naxca̱x naca na jema jaxõgüxü̃na naxããxü̃ca̱x ga cua̱x
15 1:15-16 Rü ngẽmaca̱x, nhu̱xma na nüxü̃ chacuáxü̃ na aixcuma tórü Cori ja Ngechuchuaxü̃́ pejaxõgüxü̃ rü na aixcuma nüxü̃ pengechaü̃güxü̃ i guxü̃ma i ngẽma togü i Tupanaãrü ixĩgüxü̃, rü ngẽmaca̱x taguma nüxü̃ charüchau na pexca̱x moxẽ nüxna chaxãxü̃ rü pexna chacua̱xãchixü̃ i chorü jumuxẽwa.
16 Nüü̃ nadau 1:15
17 Rü ngẽxguma namaã chidexagu ja Tanatü ja Tupana ja mexẽchicü ja Nanatü ja tórü Cori ja Ngechuchu ja Cristu, rü naxca̱x nüxna chaca na pexna naxããxü̃ca̱x i ngẽma cua̱x i Naãẽ i Üünexü̃wa ne ũxü̃. Rü ngẽma Naãẽ i Üünexü̃ tá nixĩ i pexca̱x nango̱xẽẽxü̃ i Tupanaãrü ore i mexü̃ na jexeraãcü nüxü̃ pecuáxü̃ca̱x ja Tupana.
18 Rü Tupanana naxca̱x chaca na nümatama pexü̃ jango̱xnaãẽxẽẽxü̃ca̱x, na nüxü̃ pecuáxü̃ca̱x na ṯacü jiĩxü̃ i ngẽma ípenaṉg̱uxẽẽxü̃ i naxca̱x pexü̃ jadexechixü̃. Rü nüxna naxca̱x chaca na pexü̃ nüxü̃ nacua̱xẽẽxü̃ca̱x na nhuxãcü namexẽchixü̃ i ngẽma maxü̃ i taguma gúxü̃ i nüma norü duü̃xü̃güca̱x namexẽẽxü̃ i dauxü̃guxü̃ i naãnewa.
19 1:19-20 Rü ngẽxgumarüü̃ ta rü nüxna naxca̱x chaca na pexü̃ nüxü̃ nacua̱xẽẽxü̃ca̱x na nhuxãcü nataxüchixü̃ i norü pora i tawa ngẽxmaxü̃ rü namaã tüxü̃ nangü̃xẽẽxü̃ i jixema na jaxõgüxü̃. Rü ngẽmatama pora i taxü̃maã nixĩ ga napuracüxü̃ ga Tupana ga jexguma juwa Cristuxü̃ ínadaxẽẽgu rü dauxü̃guxü̃ ga naãnewa nagaãxgu rü nügüarü tügünecüwawa janatoxẽẽãgu na guxããrü ãẽ̱xgacü jiĩxü̃ca̱x.
20 Nüü̃ nadau 1:19
21 Rü jemaãcü guxü̃ẽ́tüwa nanajexmaxẽẽ. Rü ngẽmaca̱x i nhu̱xma rü Cristume̱xẽwa nangẽxmagü i guxü̃ma i dauxü̃guxü̃ i naãnecü̱̃ã̱x i ãẽ̱xgacügü rü guxü̃ma i nhama i naãnecü̱̃ã̱x i ãẽ̱xgacügü. Rü ngẽmaãcü naxme̱xwa nangẽxmagü i guxü̃ma i pora i nhu̱xma ngẽxmagüxü̃ rü guxü̃ma i pora i tá ngẽxmagüxü̃. Rü ngẽmaãcü i nüma rü guxü̃ i ãẽ̱xgacügüarü ãẽ̱xgacü tá nixĩ i guxü̃guma.
22 Rü jemaãcü ga Tupana rü marü Cristume̱xẽwa nanajexmagüxẽẽ ga guxü̃ma. Rü jexgumarüü̃ ta Cristuxü̃ ningucuchixẽẽ na guxü̃ma i jaxõgüxü̃ẽru na jiĩxü̃ca̱x.
23 Rü nhu̱xma rü guxü̃ma i jaxõgüxü̃ rü wüxigu Cristuarü nixĩgü. Rü nüma nixĩ i tawa nangẽxmaxü̃ i guxãma i jixema i nüxü̃́ na jaxõgüxü̃. Rü ngẽxgumarüü̃ ta nüma nixĩ i nangẽxmaxẽẽãxü̃ i guxü̃ma i ṯacü i ngẽxmaxü̃ i guxü̃wama.
