Epéchiucü̃ãꞌ 2:1-22
2 Rü ü̃pa ga pema rü perü pecadugagu rü perü chixexü̃gagu nhama pejuexü̃rüü̃ peixĩgü.
2 Jerü ga pema rü nagu pexĩ ga jema chixexü̃ i nhama i naãnecü̱̃ã̱x i duü̃xü̃gü nagu ĩxü̃. Rü pema rü naga pexĩnüẽ ga Chataná i ṉg̱oxogüarü ãẽ̱xgacü ixĩxü̃. Rü nüma nixĩ i nüxü̃́ nangúchaü̃xẽẽãxü̃ na chixexü̃ naxügüxü̃ca̱x i guxü̃ma i ngẽma duü̃xü̃gü i tama Tupanaga ĩnüẽxü̃.
3 Rü guxãma ga jixema rü jemaãcü chixri tamaxẽ ga ü̃pa. Rü tanaxü ga tóxrütama ngúchaü̃, rü nagu taxĩ ga jema taxüne naxwa̱xexü̃ rü jema taãẽ naxwa̱xexü̃. Rü jemagagu jema togü ga duü̃xü̃gü ga chixexü̃ ügüxü̃rüü̃ nawa taxügü i ngẽma pocu i ãũcümaxü̃chixü̃ i Tupana mexẽẽxü̃.
4 Notürü ga Tupana rü poraãcü nüxü̃́ tangechaü̃tümüü̃gü rü poraãcü tüxü̃ nangechaü̃.
5 Rü jemaca̱x, woo tórü pecadugagu nhama ijuexü̃rüü̃ tixĩgü, notürü ga Tupana rü Cristuxü̃ ínadaxẽẽxü̃gagu tüxü̃ namaxẽxẽẽ. Rü nhu̱xma rü pexü̃́ nangẽxma i maxü̃ i taguma gúxü̃, erü Tupana pemaã namecüma.
6 Rü jema na Ngechuchu ja Cristuxü̃ wena namaxẽẽxü̃rüü̃ rü tüxü̃ rü ta namaxẽxẽẽ ga Tupana. Rü jemaãcü nanaxü na jixema rü ta Cristumücügü ixĩgüxü̃ca̱x, rü namaã ãẽ̱xgacügü ixĩgüxü̃ca̱x i dauxü̃guxü̃ i naãnewa.
7 Rü jemaãcü nanaxü ga Tupana na guxü̃gutáma duü̃xü̃güxü̃ nawéaxü̃ca̱x na nhuxãcü Cristugagu poraãcü tüxü̃ nangechaü̃xü̃ rü tamaã namecümaxü̃.
8 Rü jemaãcü pemaã namecüma ga Tupana. Rü jemaca̱x penajaxu ga maxü̃ i taguma gúxü̃ jerü pejaxõgü. Rü ngẽma maxü̃ rü taxucürüwama pegünatama penaxã, notürü Tupana nixĩ ga pexna naxãmarecü ga jema.
9 Rü tama ṯacü i mexü̃ i pexüxü̃ca̱x nixĩ i pexü̃́ nangẽxmaxü̃ i ngẽma maxü̃, notürü Tupana nixĩ ja pexna naxãmarecü na ngẽmaãcü taxúema tügü icua̱xüüxü̃ca̱x.
10 Rü Tupana nixĩ ga tüxü̃ maxẽxẽẽcü. Rü nhu̱xma rü tüxü̃́ nangẽxma i ngẽma maxü̃ jerü Ngechuchu ja Cristu tórü pecaduca̱x naju. Rü Tupana tüxna nanaxã i ngẽma maxü̃ na meã imaxẽxü̃ca̱x rü mexü̃ ixügüxü̃ca̱x. Rü jemaãcü tüxü̃ narüngü̃xẽẽ ga Tupana jerü woetama nuxcümaxü̃chima marü jemagu narüxĩnü.
Cristu nixĩ ja tüxü̃ rüngüxmüẽxẽẽcü
11 2:11-12 Rü ngẽmaca̱x i pema na tama Judéugü peixĩgüxü̃, rü name nixĩ i nüxna pecua̱xãchie na tama toxrüü̃ na peixĩgüxü̃ ga noxri rü tama Tupanaxü̃ na pecua̱xgüxü̃. Rü jema na tama toxrüü̃ peixĩgüxü̃ rü jemaca̱x ga toma ga Judéugü i togü na ítawiecha̱xmüpe̱xechiraü̃güxü̃, rü nüxü̃ tixugüe na pema rü tama Tupanape̱xewa na pemexü̃ jerü tama toxrüü̃ pegü ípewiecha̱xmüpe̱xechiraü̃gü. Rü jexguma ga pema rü tama Cristuxü̃ pecua̱xgü, jerü tama Tupanaãrü duü̃xü̃gü i Judéugütanüxü̃ peixĩgü. Rü tama nüxü̃ pecua̱xgü ga Tupana núma na namuxü̃ ga Nane na duü̃xü̃güarü pecaduca̱x najuxü̃ca̱x na nüxna naxããxü̃ca̱x i maxü̃ i taguma gúxü̃. Rü woo ga jema mexü̃gü ga Judéugümaã inaxunetaxü̃ ga Tupana, rü taxucürüwa penajaxu. Jerü nhama ga naãnewa rü pemaxẽmare, rü tama nüxü̃ pecua̱x ga ṯacü chi pexü̃ na üpetüxü̃ ga jexguma chi pejuegu jerü tama Tupanaxü̃ pecua̱x.
12 Nüü̃ nadau 2:11
13 Notürü woo ga noxri rü tama Tupanaxü̃ na pecuáxü̃, notürü i nhu̱xma rü nügüxü̃tawa pexü̃ nagagü. Rü Ngechuchu ja Cristuarü duü̃xü̃gü peixĩgü jerü pexca̱x naju rü nagü inanaba.
14 2:14-15 Rü nhu̱xma rü Cristu nixĩ ja tüxü̃ rüngüxmüẽxẽẽcü. Rü noxri ga toma ga Judéugü rü pechi taxaie jerü tama toxrüü̃ Judéugü peixĩgü. Notürü i nhu̱xma rü Cristu marü jigümaã tüxü̃ narüngüxmüẽxẽẽ. Rü jemaãcü wüxitama i duü̃xü̃güxü̃ tüxü̃ nixĩgüxẽẽ rü inajanaxoxẽẽ na jigüarü uwanü ixĩgüxü̃. Rü jexguma naju̱xgu ga Cristu rü tüxü̃ ínanguxü̃xẽẽ na tama natüü̃wa ijexmagüxü̃ca̱x ga jema nuxcümaxü̃güxü̃ ga mugü ga toma ga Judéugü nagu taxĩxü̃. Rü wüxitama i duü̃xü̃gü i ngexwacaxü̃xü̃ tüxü̃ nixĩgüxẽẽ i toma i Judéugü na tixĩgüxü̃ rü pema i tama Judéugü na peixĩgüxü̃. Rü jemaãcü nanaxü na guxãma i jixema rü norü duü̃xü̃gü na ixĩgüxü̃ca̱x. Rü jemaãcü jigümaã tüxü̃ inarüngüxmüẽxẽẽ.
15 Nüü̃ nadau 2:14
16 Rü jexguma curuchagu naju̱xgu ga Cristu, rü inajanaxoxẽẽ ga jigüchi na ixaiexü̃. Rü jemaãcü ga Cristu rü Tupanamaã tüxü̃ inarüngüxmüẽxẽẽ, rü wüxitama i duü̃xü̃güxü̃ tüxü̃ nixĩgüxẽẽ.
17 Rü jexguma Cristu núma ũxgu, rü taxca̱x núma nanange ga ore ga mexü̃ ga marü jigümaã rü Tupanamaã na rüngüxmüẽxü̃. Rü jema ore rü toxca̱x nixĩ i toma i Judéugü ga toxira Tupanaxü̃ na tacuáxü̃. Rü jema ore rü pexca̱x rü ta nixĩ ga woo tama Tupanaxü̃ na pecua̱xgüxü̃ ga noxrix.
18 Rü nhu̱xma rü guxãma i jixema rü Cristugagu tüxü̃́ natauxcha na Tanatü ja Tupanana ingaicamagüxü̃. Rü ngẽmatama Naãẽ i Üünexü̃ nixĩ i tüxü̃ rüngü̃xẽẽxü̃ na nüxna ingaicamagüxü̃ca̱x ja Tanatü ja Tupana.
19 Rü ngẽmaca̱x i pema rü woo tama Tupanaxü̃ pecua̱xgü ga noxrix, rü woo tama norü duü̃xü̃gü peixĩgü ga jexguma, notürü tama ngẽmaãcü peixĩgü i nhu̱xmax. Erü nhu̱xma rü natanüxü̃ peixĩgü i guxü̃ma i ngẽma duü̃xü̃gü i Tupanaãrü ixĩgüxü̃. Rü aixcuma Tupanaxãcügüxü̃chi peixĩgü i nhu̱xmax.
20 2:20-22 Guxãma i pema rü wüxi ja ĩpata ja mexü̃ne ja Tupana nawa maxü̃ne peixĩgü. Rü ngẽma chimentu i tijuru naẽ́tügu nugüxü̃, rü ngẽma rü Tupanaãrü ngúexü̃gü ga imugüxü̃ rü norü orearü uruü̃gü nixĩ. Rü jima tijuru ja nüxĩrama chimentuétüwa ixücuchicü rü Cristu nixĩ. Rü ngẽ́ma inanaxügü na naxüãxü̃ ja guxü̃nema ja jima ĩ. Rü düxwa ningu na wüxi ja tupauca ja taxü̃ne ja Cristugagu üünene na jiĩxü̃. Rü ngẽmaãcü i pema na Cristuarü peixĩgüxü̃ rü wüxigu tomaã pejanguxẽẽ ja wüxi ja tupauca ja taxü̃ne i ngextá Tupanaãẽ i Üünexü̃ ímaxü̃xü̃wa.
21 Nüü̃ nadau 2:20
22 Nüü̃ nadau 2:20
