Epéchiucü̃ãꞌ 3:1-21
3 Rü nhu̱xma na jemaãcü Tupana pexü̃ rüngü̃xẽẽxü̃, rü chama i Pauru rü pexca̱x chajumuxẽ. Rü pemaã nüxü̃ chixu rü núma pocupataü̃wa changẽxma erü Ngechuchu ja Cristuarü duü̃xü̃ chixĩ. Rü nuxma chapocu erü guxü̃wama nüxü̃ chixuchiga na pema rü ta pexü̃́ nangẽxmaxü̃ i pechica i Tupanaxü̃tawa woo na tama Judéugü peixĩgüxü̃.
2 Rü maneca marü nüxü̃ pecuáchiga na nhuxãcü Tupana choxü̃ nangechaü̃ãcüma choxü̃ muxü̃ na pexü̃ charüngü̃xẽẽxü̃ca̱x rü pemaã nüxü̃ chixuxü̃ca̱x i norü ore i mexü̃.
3 Rü Tupana chamaã nanango̱xẽẽ rü choxü̃ nüxü̃ nacua̱xẽẽ ga jema ore ga pechiga ga noxri nüxĩcatama nüxü̃ nacuáxü̃. Rü jemachiga nixĩ ga íraruwa marü pexca̱x chaxümatüxü̃ ga noxrix.
4 Rü jexguma pexca̱x chanaxümatügu rü pemaã nüxü̃ chixu ga jema noxri ẽxü̃guxü̃ ga ore i nhuxãcü Tupana rü Cristugagu duü̃xü̃güxü̃ namaxẽxẽẽxü̃. Rü ngẽxguma meã nawa pengúegu i ngẽma popera rü tá nüxü̃ pecua̱x na aixcuma jiĩxü̃ ga jema ore ga noxri ẽxü̃guxü̃ ga nachiga pexca̱x chaxümatüxü̃.
5 Rü jema nixĩ ga ore ga ẽxü̃guxü̃ ga Tupana taxúexü̃ma meã nüxü̃ nacua̱xẽẽxü̃ ga noxrix. Notürü i nhu̱xma rü ngẽma Naãẽ i Üünexü̃ rü marü nanango̱xẽẽ i ngẽma ore naxca̱x i Tupanaãrü duü̃xü̃gü i üünexü̃ i jamugüxü̃ rü norü orearü uruü̃gü.
6 Rü nhu̱xma rü tá pemaã nüxü̃ chixu i nhuxãcü na jiĩxü̃ i ngẽma ore ga noxri ẽxü̃guxü̃. Rü dücax, woo tama Judéugü peixĩgü notürü i nhu̱xma rü pexca̱x rü ta nixĩ i ngẽma maxü̃ i taguma gúxü̃ ga noxri Tupana tomaã ixunetaxü̃. Rü nhu̱xma i pema rü ta norü duü̃xü̃gü peixĩgü. Rü pexca̱x nixĩ i guxü̃ma i ngẽma Tupanaãrü unetagü ga noxri tomaã nüxü̃ jaxuxü̃. Rü ngẽmaãcü i nhu̱xma rü Ngechuchu ja Cristugagu pexü̃́ nangẽxma i guxü̃ma i ngẽma mexü̃gü erü pejaxõgü i norü ore i tüxü̃ maxẽxẽẽxü̃.
7 Rü woo taxuwama chame na chanaxüxü̃ca̱x i norü puracü, notürü ja Tupana rü choxü̃ namuãma rü choxü̃ naporaxẽẽ na nüxü̃ chixuxü̃ca̱x i ngẽma norü ore i mexü̃.
8 Rü chaugüca̱x i Tupanape̱xewa rü chama nixĩ i guxü̃ i norü duü̃xü̃güarü nhaxtüwaama chaxüxü̃. Rü woo ngẽmaãcü chixĩ, notürü Tupana choxü̃ nangechaü̃ rü choxna nanaxã i ngẽma puracü i mexü̃ na ngẽma tama Judéugü ixĩgüxemaã nüxü̃ na chixuxü̃ca̱x i norü ore i mexü̃ na nhuxãcü namexẽchixü̃ rü taguma ijagúxü̃ ga jema taxca̱x naxüxü̃ ga Cristu.
9 Rü nüma ga Tupana ja guxü̃ãrü üruü̃ ixĩcü, rü choxü̃ namu na guxü̃ i duü̃xü̃güxü̃ nüxü̃ chacua̱xẽẽxü̃ca̱x na nhuxãcü jiĩxü̃ i ngẽma norü ngúchaü̃ ga nuxcüma ẽxü̃guxü̃ ga noxri nüxĩcatama nüxü̃ nacuáxü̃. Rü ngẽma norü ngúchaü̃ nixĩ i Cristugagu tüxü̃ na namaxẽxẽẽxü̃.
10 Rü jemaãcü choxü̃ namu ga Tupana na ngẽma duü̃xü̃gü i tama Judéugü ixĩgüxü̃maã nüxü̃ chixuxü̃ca̱x i ore i mexü̃ na jaxõgüãxü̃ca̱x. Rü nüma ja Tupana nanaxwa̱xe na jaxõgüãxü̃ na ngẽmaãcü guxü̃ma i ãẽ̱xgacügü i dauxü̃cü̱̃ã̱x nüxü̃ nadaugüxü̃ca̱x na nhuxãcü nüxü̃ nacua̱xüchixü̃ ga Tupana ga jexguma duü̃xü̃güaxü̃́ natauxchaxẽẽãgu na naxü̃tawa nangugüxü̃ca̱x.
11 Rü jemaãcü nüxü̃́ nanatauxchaxẽẽ ga Tupana jerü woetama nuxcümaxü̃chima guxü̃guma nagu narüxĩnü na tórü Cori ja Ngechuchu ja Cristugagu tá na namaxẽxẽẽãxü̃ i duü̃xü̃gü. Rü jemaãcü najanguxẽẽ.
12 Rü nhu̱xma na Cristuarü duü̃xü̃gü ixĩgüxü̃ rü nüxü̃́ na jaxõgüxü̃, rü tüxü̃́ natauxcha na Tupanana ingaicamagüxü̃ rü taxuü̃ca̱xma nüxü̃ na imuü̃ẽxü̃.
13 Rü ngẽmaca̱x i nhu̱xma na pexca̱x ngúxü̃ chingexü̃ rü pexü̃ chaca̱a̱xü̃ na tama chauxca̱x pexoegaãẽgüxü̃ca̱x. Erü ngẽma ngúxü̃ na chingexü̃ i nhu̱xma rü perü meruü̃ nixĩ i ngẽma.
Cristu rü poraãcü tüxü̃ nangechaü̃
14 Rü ngẽmaca̱x, ngẽxguma nagu charüxĩnügu na nhuxãcü Tanatü ja Tupana taxca̱x namexẽẽxü̃ na naxãcügü ixĩgüxü̃ca̱x, rü nape̱xegu chacaxã́pü̱xü na nüxü̃ chicua̱xüü̃xü̃ca̱x.
15 Rü nüma nixĩ i Nanatü jiĩxü̃ i guxü̃ma i norü duü̃xü̃gü i nhama i naãnewa rü dauxü̃guxü̃ i naãnewa ngẽxmagüxü̃.
16 Rü Tanatü ja guxü̃guma poraãcü tamaã mecümacüna chaca na Naãẽ i Üünexü̃ãrü ngü̃xẽẽmaã pexü̃ naporaexẽẽxü̃ca̱x na aixcuma peporaexü̃ca̱x i perü maxü̃wa.
17 3:17-18 Rü ngẽxgumarüü̃ ta nüxna naxca̱x chaca na perü õgagu pewa namaxü̃xü̃ca̱x ja Cristu. Rü ngẽxguma ngẽmaãcü perü maxü̃wa peporaegu rü pexü̃́ nangẽxmagu i ngẽma ngechaü̃ i aixcuma ixĩxü̃, rü tá wüxigu guxü̃ma i jaxõgüxü̃maã nüxü̃ pecua̱x na nhuxãcü nataxüchixü̃ i norü ngechaü̃ i namaã tüxü̃ nangechaü̃xü̃ ja Cristu.
18 Nüü̃ nadau 3:17
19 Rü woo tama janguxgu i tórü cua̱x na nüxü̃ icuáxü̃ca̱x na nanhuxraü̃xü̃ i ngẽma ngechaü̃ i namaã Cristu tüxü̃ ngechaü̃xü̃, notürü Tupanana naxca̱x chaca na pexca̱x nango̱xẽẽãxü̃ca̱x na nhuxãcü na jiĩxü̃ i ngẽma ngechaü̃ na aixcuma pewa nangẽxmaxü̃ i guxü̃ma i Tupanacümagü.
20 Rü nhu̱xma rü name nixĩ i guxãma i jixema rü nüxü̃ ticua̱xüü̃gü ja Tupana. Erü nüma rü nüxü̃́ nangẽxma i pora na naxüãxü̃ i guxü̃ma i ngẽma naxca̱x íic̱axü̃ rü e̱xna nagu rüxĩnüẽxü̃ãrü jexeraxü̃chi. Rü ngẽma norü pora i tawa ngẽxmaxü̃maã nixĩ i naxüãxü̃ i guxü̃ma i ngẽma.
21 Rü nhu̱xma rü name nixĩ i guxü̃ma i norü duü̃xü̃gü i jaxõgüxü̃ rü guxü̃gutáma Tupanaxü̃ nicua̱xüü̃gü naxca̱x i ngẽma Ngechuchu ja Cristu üxü̃. Rü ngẽmaãcü jiĩxü̃.
