Epéchiucü̃ãꞌ 4:1-32
4 Rü nhu̱xma na ngẽmaãcü Tupana tüxü̃ rüngü̃xẽẽxü̃, rü chama i Cristugagu na chapocuxü̃, rü pexü̃ chaca̱a̱xü̃ na Tupana naxwa̱xexü̃ãcüma meã pemaxẽxü̃. Rü name nixĩ i ngẽmaãcü pemaxẽ erü pexü̃ nixĩ ga jadexechixü̃ ga Tupana, rü norü duü̃xü̃gü peixĩgü i nhu̱xmax.
2 Rü chanaxwa̱xe i pegü íperüxíragü rü tama pegü peicua̱xüü̃gü. Rü name nixĩ i meã togü i duü̃xü̃güxü̃ pejaxu rü namaã pemecümagü rü jaxna namaã pexĩnüẽ. Rü name nixĩ i pegü pengechaü̃ãcüma pegü perüngü̃xẽẽgü.
3 Rü nhu̱xma rü wüxigu perüxĩnüẽ rü nhama wüxitama i duü̃xü̃rüü̃ peixĩgü erü pewa nangẽxma i Tupanaãẽ i Üünexü̃. Rü name nixĩ i naxca̱x pedau na guxü̃guma ngẽmaãcü meã pegümaã pemaxẽxü̃ rü pegü pengechaü̃güxü̃ na taguma ṯacüca̱x na pegü peitojexü̃.
4 Erü jixema na Cristuarü duü̃xü̃gü ixĩgüxü̃, rü nhama wüxitama i duü̃xü̃rüü̃ tixĩgü. Rü ngẽxgumarüü̃ ta wüxitama nixĩ i Naãẽ i Üünexü̃ i guxãwama maxü̃xü̃. Rü ngẽxgumarüü̃ ta Tupana pexü̃ nidexechi na guxãma ípenaṉg̱uxẽẽgüxü̃ca̱x i wüxitama i maxü̃ i taguma gúxü̃.
5 Rü wüxitama nixĩ ja tórü Cori, rü wüxiaxü̃́tama nixĩ i jaxõgüxü̃ rü wüxica̱xicatama nixĩ ga íibaiü̃xü̃ ga guxãma.
6 Rü wüxitama nixĩ ja Tupana ja guxãnatü ixĩcü. Rü nüma rü guxãẽ́tüwama nangẽxma rü guxãwama namaxü̃. Rü nüma rü guxãxü̃ narüngü̃xẽẽ na tanaxüxü̃ca̱x i norü puracü.
7 Notürü wüxichigü i jixema rü tanajaxu i ngẽma nacüma rü ngẽma cua̱x i Cristu tüxna ãmarechaü̃xü̃ na naxügüxü̃ca̱x i norü puracü.
8 Rü ngẽmaca̱x i Tupanaãrü ore i ümatüxü̃wa rü nhanagürü:“Rü jexguma dauxü̃guxü̃ ga naãnewa naxũxgu, rü jéma tüxü̃ nagagü ga guxema marü nüma tüxü̃ najexeraxe. Rü norü duü̃xü̃güna nanaxã ga nacüma i mexü̃”,
nhanagürü i ngẽma orewa.
9 Rü nhu̱xma Pa Chaueneẽgüx, rü pexna chaca, rü ¿ṯacüchiga nixĩ i ngẽma ore i nhaxü̃, “Dauxü̃wa naxũ”, nhaxü̃? Rü dücax, ngẽmawa nüxü̃ tacua̱x ga noxri rü nhama ga naãnegu na ínaxĩxü̃ ga nümax.
10 Rü gumatama Cristu ga nhama ga naãnegu írüxĩcü, rü gumatama nixĩ ga dauxü̃guxü̃ i naãne i Tupana íngẽxmaxü̃wa ũxcü na guxãẽ́tüwa nangẽxmaxü̃ca̱x rü guxü̃wama nangẽxmaxü̃ca̱x.
11 Rü nümatama nixĩ ga guxema norü duü̃xẽgüna naxããxü̃ ga tümaãrü cua̱x rü tümaãrü puracü. Rü tüxü̃ naxuneta ga nhuxre na toxnamana tüxü̃ namugüxü̃ca̱x na jéma tanaxüxü̃ca̱x ga norü puracü. Rü tüxü̃ naxuneta ga ṯoguã̱x na tanango̱xẽẽxü̃ca̱x ga norü ore. Rü tüxü̃ naxuneta ga ṯoguã̱x na togümaã nüxü̃ tixuxü̃ca̱x ga jema norü ore. Rü tüxü̃ naxuneta ga ṯoguã̱x na jema jaxõgüxü̃ãrü daruü̃ na tixĩgüxü̃ca̱x. Rü tüxü̃ naxuneta ga ṯoguã̱x na duü̃xü̃güxü̃ tangúexẽẽxü̃ca̱x ga norü ore.
12 Rü jemaãcü norü duü̃xẽgüna nanaxã ga tümaãrü puracü rü tümamaã inananguxü̃xẽẽ na ngẽma jaxõgüxü̃xü̃ tarüngü̃xẽẽgüxü̃ca̱x na ngẽmaãcü guxü̃ma i ngẽma jaxõgüxü̃ rü jexeraãcü nüxü̃ jacuáetanüxü̃ca̱x i norü ore.
13 Rü Cristu nanaxwa̱xe na ngẽma norü orewa ijaetanüxü̃ i guxãma i jixema nhu̱xmatáta wüxigu aixcuma meã jaxõgü rü meã nüxü̃ icua̱xgü ja Tupana Nane. Rü ngẽmaãcü tá düxwa nawa tangugü na aixcuma Tupana naxwa̱xexü̃ãcüma ixĩgüxü̃, rü tá tijaetanü i norü orewa nhu̱xmatáta nhama Cristu ja aixcuma mexẽchicürüü̃ ixĩgü.
14 Rü tãũxü̃táma nhama buxü̃gürüü̃ tixĩgü i tórü maxü̃wa. Erü ngẽma buxü̃gü rü tauxchaãcü toguama narüxĩnüẽ. Rü ngẽxguma ṯacü rü to i ngu̱xẽẽtaexü̃ naxĩnüẽgu rü ngẽmawe narüxĩ nhu̱xmata naga naxĩnüẽ i ngẽma duü̃xü̃gü i chixexü̃ i norü doramaã nawomüxẽẽgüxü̃ rü nachixexẽẽgüchaü̃xü̃. Notürü i jixema rü tama name na ngẽxgumarüü̃ ixĩgüxü̃.
15 Rü name nixĩ i jigü ingechaü̃güãcüma nagu taxĩ i ngẽma ore i aixcuma ixĩxü̃, na ngẽmaãcü jexeraãcü naxrüü̃ ixĩgüxü̃ca̱x ja Cristu ja guxü̃ma i jaxõgüxü̃ãrü ãẽ̱xgacü ixĩcü.
16 Rü taeru ja Cristuwa nixĩ i ne naxũxü̃ i tórü pora na naxca̱x imaxẽxü̃ca̱x. Rü guxãma i jixema rü wüxigu naxme̱xwa tangẽxmagü. Rü ngẽxguma Cristugagu meã wüxigu ipuracüegu rü jigü rüngü̃xẽẽgu rü guxü̃ma meãma inixũ. Rü ngẽmaãcü jigü ingechaü̃güãcüma norü orewa tijaetanü na düxwa nüma nanaxwa̱xexü̃ãcüma ixĩgüxü̃ca̱x.
Maxü̃ i ngexwacaxü̃xü̃ i Cristugagu tüxü̃́ ngẽxmaxü̃
17 Rü nhu̱xma rü Cristuégagu pexü̃ chaxucu̱xẽ na tama nagu pexĩxü̃ i ngẽma chixexü̃ ga noxri nagu pexĩxü̃cãx ga jexguma taũta Cristuaxü̃́ pejaxõgügu. Rü tama name i nagu pexĩ i nacümagü i ngẽma duü̃xü̃gü i tama Tupanaxü̃ cua̱xgüxü̃ i naẽchitamare maxẽxü̃.
18 Erü Chataná rü nanatoõẽgü i ngẽma duü̃xü̃gü, rü ngẽmaca̱x chixexü̃guxicatama narüxĩnüẽ. Rü nagagugütama nüxü̃́ nataxuma i maxü̃ i taguma gúxü̃ i Tupanawa ne ũxü̃, erü tama nüxü̃ nacua̱xgüchaü̃.
19 Rü tama naxãneẽ na ṯacü rü chixexü̃ na naxügüxü̃, rü ngẽmaca̱x nagu naxĩ rü nüxü̃́ namepua i guxü̃raü̃xü̃ i chixexü̃gü na naxügüxü̃.
20 Notürü i pema rü tama ngẽmaãcü na pemaxẽxü̃ca̱x nixĩ i Cristuaxü̃́ pejaxõgüxü̃.
21 Jerü pema rü marü meã nüxü̃ pexĩnüẽ ga Cristuchiga. Rü toxü̃tawa naxca̱x pengúe, rü nüxü̃ pecua̱x i norü ore i aixcuma ixĩxü̃ na nhuxãcü Ngechuchu naxwa̱xexü̃ãcüma na pemaxẽxü̃.
22 Rü ngẽmaca̱x name nixĩ i nüxü̃ perüxoe i ngẽma nuxcümaxü̃xü̃ i pecümagü ga ü̃pa nagu pexĩxü̃. Jerü jema nuxcümaxü̃xü̃ ga perü maxü̃ rü nachixexü̃chi. Rü pexü̃́ napora rü pexü̃ nawomüxẽẽgü na nagu pexĩxü̃ca̱x ga jema pexeneãrü ngúchaü̃gü i tama mexü̃. Notürü i nhu̱xma rü name nixĩ i nüxü̃ perüxoe i guxü̃ma i ngẽma.
23 Rü ngẽmaca̱x i nhu̱xma na Cristuarü duü̃xü̃gü peixĩgüxü̃ rü name nixĩ na Tupanaguxicatama perüxĩnüẽxü̃. Rü name nixĩ i Tupanana pegü pexãgü na Naãẽ i Üünexü̃ pewa puracüxü̃ca̱x rü na nangexwacaxü̃xẽẽãxü̃ca̱x i peãẽ.
24 Rü name nixĩ i penajaxu i ngexwacaxü̃xü̃ i pecüma i Tupana norü ngúchaü̃maã pexca̱x mexẽẽxü̃. Rü ngẽma nacüma i ngexwacaxü̃xü̃ rü perü maxü̃ i mexü̃wa tá nango̱x i ngẽxguma nagu pexĩxgu i ngẽma ore i aixcuma ixĩxü̃ rü tama nawe perüxĩxgu i pexeneãrü ngúchaü̃.
25 Rü ngẽmaca̱x i nhu̱xma na Cristuarü peixĩgüxü̃ rü tama name na peidorata̱a̱xgüxü̃. Notürü name nixĩ i wüxichigü rü tümamücümaã aixcumaxü̃ tixu. Erü guxãma i jixema rü jigütanüxü̃ i jaxõgüxü̃ tixĩgü.
26 Rü ngẽxguma texé ṯacü peãẽwa ngu̱xẽẽgu rü ¡pegüna pedaugü na tama pecadu pexüxü̃ca̱x! Rü tama name i nagu perüxĩnüẽẽcha notürü name nixĩ i paxa ngẽmatama i ngunexü̃gu nüxü̃ ipejarüngüma i ngẽma naxü̃pa na janaxücuxü̃ ja üa̱xcü.
27 Rü pegüna pedaugü na tama penaxüchicaxü̃ca̱x i Chataná na ngẽmaãcü najoxniẽxü̃ca̱x rü pemaã inacuáxü̃ca̱x.
28 Rü ngẽxguma texé petanüwa ngĩ́ta̱a̱xgu ga ü̃pa, rü name nixĩ i nüxü̃ tarüxo i ngẽma. Rü name nixĩ i tümame̱xẽmaã meã tapuracü na ngẽmaãcü tüxü̃́ nangẽxmaxü̃ca̱x i tümaãrü ngẽmaxü̃ na ṯoguã̱x ja tüxü̃́ nataxúemaã taṉg̱auxü̃ca̱x.
29 Rü tama name i chixexü̃ i oremaã peidexagü. Notürü name nixĩ i ore i mexü̃maã peidexagü na ngẽmaãcü ngẽma duü̃xü̃gü i pexü̃ ĩnüẽxü̃xü̃ perüngü̃xẽẽgüxü̃ca̱x na jexeraãcü Tupanaga naxĩnüẽxü̃ca̱x rü nataãẽgüxü̃ca̱x.
30 ¡Rü pexuãẽgü na tama penangechaü̃xẽẽxü̃ca̱x i Tupanaãẽ i Üünexü̃! Erü ngẽma Naãẽ i Üünexü̃ nixĩ i Tupana pexna muxü̃ na nüxü̃ pecuáxü̃ca̱x na aixcuma norü duü̃xü̃gü peixĩgüxü̃ nhu̱xmatáta ngẽma ngunexü̃ i nagu pexca̱x núma naxũxü̃ ja Cristu.
31 ¡Rü nüxü̃ perüxoe na nagu perüxĩnüẽẽchaxü̃ ega texé ṯacü rü chixexü̃ pemaã ü̱xgux! Rü ngẽxgumarüü̃ ta name nixĩ na nüxü̃ perüxoexü̃ na aigu perüxĩnüẽxü̃, rü e̱xna penuẽxü̃, rü e̱xna pegü na pengaexü̃, rü e̱xna peguxchigawa̱xegüxü̃. Rü ngẽmaãcü name nixĩ na nüxü̃ perüxoexü̃ i guxü̃ma i ngẽma chixexü̃ i dexagü.
32 Rü name nixĩ i pegü perüngü̃xẽẽgü rü pegümaã pemecümagü, rü pegüxü̃́ pengechaü̃tümüü̃gü i wüxichigü. Rü ngẽxguma petanüwa texé ṯacü rü chixexü̃ pemaã ü̱xgux, rü name nixĩ i pegüxü̃́ nüxü̃ pengechaü̃gü i wüxichigü jema na Cristugagu Tupana pexü̃́ nüxü̃ nangechaü̃xü̃rüü̃.
