Epéchiucü̃ãꞌ 5:1-33
5 Rü nhu̱xma rü Tupanaxãcügü ja pexü̃ nangechaü̃güxe peixĩgü. Rü ngẽmaca̱x name nixĩ i naxca̱x pedau na naxrüü̃ meã pemaxẽxü̃ rü naxrüü̃ peimexü̃.
2 Rü name nixĩ i pegü pengechaü̃gü jema Cristu tüxü̃ na ngechaü̃xü̃rüü̃. Rü nüma rü taxca̱x nügü inaxã rü taxca̱x naju. Rü jemaãcü Tupanaxü̃ nataãẽxẽẽ jerü jemaãcü tüxü̃ namaxẽxẽẽ.
3 Rü nhu̱xma rü Tupanaãrü duü̃xü̃gü peixĩgü. Rü ngẽmaca̱x tama name i naĩ i ngemaã rü e̱xna naĩ ja jatümaã na ipepexü̃. Rü tama name na pexeneãrü ngúchaü̃we perüxĩxü̃ rü e̱xna pegüna penanuãchigüchaü̃xü̃ i ṯacü i ngẽmaxü̃gü. Rü ngẽmaca̱x name nixĩ i nüxü̃ perüxoe i guxü̃ma i ngẽma chixexü̃gü, rü bai i nachiga na peidexagümarexü̃.
4 Rü tama name i ṯacü rü ore i ãũãchixü̃xü̃ peixu, rü bai i ṯacü rü ngeãẽxü̃mare peixu, rü bai i texéxü̃ pecugücüraxü̃. Erü ngẽma ore i chixexü̃gü rü taxuwama name. Rü narümemaẽ nixĩ i Tupanana moxẽ pexãgü.
5 Rü aixcuma pemaã nüxü̃ chixu rü ngẽxguma texé naĩ i ngemaã rü e̱xna naĩ ja jatümaã ipexgu, rü e̱xna tümaxü̃neãrü ngúchaü̃ taxü̱xgu, rü taxucürüwama taxãchica i ngextá tórü Cori ja Cristu rü Tanatü ja Tupana ãẽ̱xgacü íixĩxü̃wa. Rü ngẽxgumarüü̃ ta taxucürüwama texé ngẽ́ma taxãchica ega tügüna tananuãchigüchaü̃xgu i ṯacü rü ngẽmaxü̃gü. Erü jíxema ngẽma nacüma tüxü̃́ ngẽxmaxẽ rü düxwa namaã tatupanaã̱x i ngẽma nacüma i chixexü̃.
6 ¡Rü tama naga pexĩnüẽ ega texé ṯacü rü ore i ngẽãẽmarexü̃maã pexü̃ womüxẽẽchaü̃gu na penaxüxü̃ca̱x i ngẽma chixexü̃gü! Erü ngẽma chixexü̃gügagu nixĩ i Tupana tá poraãcü napocuexü̃ i ngẽma duü̃xü̃gü i tama naga ĩnüẽxü̃.
7 Rü ngẽmaca̱x tama name i ngẽma duü̃xü̃gümaã pexãmücügü na pema rü ta tama penaxüxü̃ca̱x i ngẽma chixexü̃gü.
8 Rü ü̃pa ga pema rü ẽãnexü̃wa pejexmagü, jerü tama Tupanaxü̃ pecua̱x rü chixri pemaxẽ. Notürü i nhu̱xma na Tupanaxü̃ pecuáxü̃ rü tórü Coriarü duü̃xü̃gü na peixĩgüxü̃, rü ngóonexü̃wa pengẽxmagü. Rü ngẽmaca̱x name nixĩ i duü̃xü̃gü i ngóonexü̃wa ngẽxmagüxü̃rüü̃ meã na pemaxẽxü̃.
9 Erü ngẽxguma ngóonexü̃wa ingẽxmagu, rü mexü̃ taxügü, rü nagu taxĩ i ore i aixcuma ixĩxü̃, rü meã tamaxẽ.
10 Rü ngẽmaca̱x name nixĩ i naxca̱x pedau na nagu pexĩxü̃ i ngẽma maxü̃ i tórü Cori namaã taãẽxü̃.
11 Rü tama name i pema rü ta penaxü i ngẽma chixexü̃gü i taxuwama mexü̃ i ngẽma togü i duü̃xü̃gü i ẽãnexü̃wa ngẽxmagüxü̃ ügüxü̃. Notürü narümemaẽ nixĩ i penango̱xẽẽ na nachixexü̃ i ngẽma naxügüxü̃.
12 Erü ngẽma chixexü̃ i cúãcüma naxügüxü̃ i ngẽma jatügü rü ngexü̃gü, rü woo nachiga idexagümaregu rü wüxi i ãnexü̃chi nixĩ.
13 Notürü ngẽxguma ngóonexü̃wa nangẽxmagu i ṯacü rü chixexü̃gü rü meã tá nango̱x na nhuxãcü nachixexü̃.
14 Erü guxü̃ma i ṯacü i ngẽxmaxü̃, rü ngẽxguma ngóonexü̃wa nangẽxmagu, rü meãma nango̱x na nhuxãcü jiĩxü̃. Rü ngẽmaca̱x i Tupanaãrü orewa rü nhanagürü:“¡Naḇaixãchi i cuma na cupexü̃! ¡Rü írüda i cuma na icujarütaxuxü̃! ¡Rü nagu rüxĩnü na nhuxãcü nachixexü̃ i ngẽma curü pecadugü! Rü Cristu tá cuxca̱x nanangóonexẽẽ rü tá cuxü̃ narüngü̃xẽẽ na Tupanaxü̃ cucuáxü̃ca̱x”,
nhanagürü i ngẽma orewa.
15 Rü ngẽmaca̱x name nixĩ i pexuãẽgü rü meã pemaxẽ. Rü tama name i ngẽma duü̃xü̃gü i tama Tupanaãrü orexü̃ cua̱xgüxü̃rüü̃ãcüma na pemaxẽxü̃, notürü penaxwa̱xe na duü̃xü̃gü i meã Tupanaga ĩnüẽxü̃rüü̃ meã na pemaxẽxü̃.
16 Rü nhu̱xma na Tupana pexü̃́ jatauxchaãchixẽẽxü̃ rü ¡pepaxaãẽgü na nüxü̃́ pepuracüexü̃ rü penaxüxü̃ i ngẽma nüma nanaxwa̱xexü̃! Erü nhamaü̃cüü i duü̃xü̃gü rü poraãcü chixexü̃ naxügü.
17 Rü nhu̱xma na ngẽmaãcü namaxẽxü̃ i togü i duü̃xü̃gü, rü tama name na naxrüü̃ peixĩgüxü̃. Rü tama penaxwa̱xe i duü̃xü̃gü i ngẽãẽmarexü̃rüü̃ peixĩgü. Notürü name nixĩ i Tupanaãrü orewa pengúe na nüxü̃ pecuáxü̃ca̱x i ṯacü na jiĩxü̃ i tórü Cori pexü̃́ naxwa̱xexü̃ na penaxüxü̃.
18 Rü tama name i ṯacü rü axchiü i ngúchi̱xáxü̃maã pengãxẽ, erü ngẽma rü chixexü̃ tüxü̃ naxüxẽẽ i ngẽxguma ngẽmaãcü imaxẽgu. Notürü name nixĩ i Tupanaãẽ i Üünexü̃na pegü pexãgü na pewa nangẽxmaxü̃ca̱x rü pemaã inacuáxü̃ca̱x.
19 Rü name nixĩ i Tupanaãrü orechigagu rü norü wijaegügu pegümaã peidexagü rü pegümaã nüxü̃ peixu. Rü name nixĩ i nagúxü̃raü̃xü̃ i norü wijaegügu pewijaegü, na ngẽmaãcü guxü̃ne ja perü maxü̃nemaã tórü Corixü̃ peicua̱xüü̃güxü̃ca̱x.
20 Rü name nixĩ i guxü̃guma tórü Cori ja Ngechuchu ja Cristuégagu moxẽ nüxna pexãgü ja Tanatü ja Tupana naxca̱x i guxü̃ma.
Nhuxãcü meã nügümaã namaxẽ i wüxi ja ĩpatacü̱̃ã̱x i Cristuaxü̃́ jaxõgüxü̃
21 Rü nhu̱xma na Cristume̱xẽwa pengẽxmagüxü̃, rü name nixĩ i pegüga pexĩnüẽ i wüxichigü, erü Cristuxü̃ pengechaü̃gü rü naga pexĩnüẽ.
22 Rü pemax, Pa Ngexü̃güx, rü ngẽma tórü Cori naxwa̱xexü̃rüü̃ rü name nixĩ na petega pexĩnüẽxü̃.
23 Erü nüma ja jatü rü nama̱xẽru nixĩ, ngẽxgumarüü̃ ja Cristu na guxü̃ma i jaxõgüxü̃ẽru na jiĩxü̃. Rü nümagü i jaxõgüxü̃ rü Cristuxü̃ne nixĩgü rü nüma ja Cristu nixĩ i norü maxẽxẽẽruü̃ jiĩxü̃.
24 Rü ngẽxgumarüü̃ na Cristuga naxĩnüẽxü̃ i ngẽma jaxõgüxü̃, rü ngẽxgumarüü̃ ta i ngexü̃gü rü name nixĩ na guxü̃guma natega naxĩnüẽxü̃.
25 Rü name nixĩ i nama̱xü̃ nangechaü̃ ja jatü, jema Cristu guxãma ga jaxõgüxexü̃ na nangechaü̃xü̃rüü̃. Rü jema na tüxü̃ nangechaü̃xü̃ca̱x nixĩ ga najuxü̃ ga Cristu.
26 Rü jemaãcü nanaxü ga Cristu na nügüxü̃́ tüxü̃ jadexechixü̃ca̱x rü tüxü̃ jaxüünexẽẽxü̃ca̱x i guxãma i jixema na jaxõgüxü̃. Rü norü oremaã rü ngẽma dexá i nawa íibaiü̃xü̃maã tüxü̃ nimexẽẽ na aixcuma nape̱xewa imexü̃ca̱x.
27 Rü jemaãcü tüxü̃ nimexẽẽ na nügütama tüxü̃ nawéxü̃ca̱x na aixcuma guxü̃wama imexü̃ rü na nataxuxü̃ma i ṯacü i tórü chixexü̃ rü bai i íraruwa i ngẽxguma nape̱xewa ingugügu. Erü tüxü̃ nidexechi na ixüünegüxü̃ca̱x rü guxü̃wama imexü̃ca̱x i nape̱xewa.
28 Rü jema Cristu tüxü̃ na ngechaü̃xü̃rüü̃, rü wüxichigü ja jatü rü nanaxwa̱xe na nama̱xü̃ nangechaü̃xü̃ nhama nügüxü̃nexü̃ na nangechaü̃xü̃rüü̃tama. Rü jíxema tümama̱xü̃ ngechaü̃xẽ rü tügütama nixĩ i tangechaü̃xü̃.
29 Erü tataxuma ja texé ja tümaxü̃nechitama aixe, notürü tanaxüwemü rü meãma nüxna tadau ngẽma Cristu guxü̃ma i jaxõgüxü̃na dauxü̃rüü̃.
30 Rü guxãma i jixema na jaxõgüxü̃ rü Cristuna taxügü rü ngẽmaãcü naxü̃ne tixĩgü. Rü nüma tüxna nadau.
31 Rü ngẽmaca̱x i Tupanaãrü ore i ümatüxü̃wa rü nhanagürü:“Rü wüxichigü ja jatü rü nanatüna rü naẽna tá nixũgachi na nama̱xmaã inaxã́ũxü̃ca̱x. Rü ngẽma taxre rü wüxi tátama nixĩgü”,
nhanagürü i ngẽma ore.
32 Rü ngẽma ore i jatüchiga rü nama̱xchiga rü wüxi i ore i aixcuma mexü̃ nixĩ. Notürü nhu̱xma na pemaã nüxü̃ chixuxü̃ i ngẽma rü Cristuchiga rü jaxõgüxü̃chiga nixĩ i chidexaxü̃.
33 Notürü ngẽma ore rü pechiga ta nixĩ. Rü ngẽmaca̱x i wüxichigü i pema i jatügü rü name nixĩ i pema̱xü̃ na pengechaü̃xü̃ ngẽma pegütama na pengechaü̃xü̃rüü̃. Rü ngẽxgumarüü̃ ta i pema i ngexü̃gü rü penaxwa̱xe i petega pexĩnüẽ.
