Epéchiucü̃ãꞌ 6:1-24
6 Pa Buxü̃güx, nhu̱xma na Cristuarü peixĩgüxü̃, rü name nixĩ i penatüga rü peega pexĩnüẽ, erü ngẽma nixĩ i aixcuma mexü̃.
2 6:2-3 Jerü jema mugü ga Tupana Muĩséna ãxü̃tanüwa rü jema mu ga nüxĩra wüxi ga unetamaã Tupana nüxü̃ ixuxü̃, rü nhanagürü:“¡Rü tüxü̃ nangechaü̃ rü tüxü̃ rüngü̃xẽẽ ja cunatü rü cue na aixcuma cutaãẽxü̃ca̱x rü namáxü̃ca̱x i curü maxü̃ i nhama i naãnewa!”nhanagürü.
3 Nüü̃ nadau 6:2
4 Rü pemax, Pa Papagü rü Pa Mamagüx, rü tama name i penangamare rü penanuẽxẽẽ i pexacügü. Rü name nixĩ i meã penajaexẽẽ, rü pejaxucu̱xẽgü rü penangúexẽẽ na meã tórü Coriaxü̃́ jaxõgüãxü̃ca̱x.
5 Rü pemagü, Pa Duü̃xü̃gü ja Ixããrü Coriã̱xgüe, rü name nixĩ i meã naga pexĩnüẽ i perü corigü i nhama i naãnewa. Rü penaxwa̱xe i nüxü̃ pengechaü̃güãcüma rü nüxü̃ pemuü̃ẽãcüma meã naga pexĩnüẽ nhama Cristuaxü̃́ pepuracüexü̃rüü̃.
6 Rü tama name ega perü corigü pexü̃ dawenüguxicatama meã nüxü̃́ pepuracüe na ngẽmaãcü pemaã nataãẽxü̃ca̱x. Notürü nhu̱xma na Cristuarü duü̃xü̃gü peixĩgüxü̃, rü name nixĩ i guxü̃ma i perü ngúchaü̃maã penaxü i ngẽma Tupana pexü̃́ naxwa̱xexü̃.
7 Rü ngẽma puracü i perü cori pexna ãxü̃, rü name nixĩ i petaãẽãcüma penaxü, nhama tórü Cori ja Ngechuchuaxü̃́ pepuracüexü̃rüü̃. Erü aixcuma nüxü̃́ nixĩ i pepuracüexü̃ rü tama i duü̃xü̃güaxü̃́.
8 Rü name nixĩ i ngẽmaãcü meã pepuracüe, erü nüxü̃ pecua̱x rü wüxichigü i duü̃xü̃ rü woo wüxi i coriarü duü̃xü̃ jixĩgu rü e̱xna taxúxearü jixĩgu, notürü tórü Cori ja Ngechuchu tá nüxü̃́ nanaxütanü naxca̱x i ngẽma mexü̃ i naxüxü̃.
9 Rü pemax, Pa Corigüx, rü name nixĩ i ngẽxgumarüü̃ ta meã namaã pemaxẽ i perü duü̃xü̃gü. Rü tama name i ṯacü rü chixexü̃maã penaxãxũne. Rü nüxna pecua̱xãchie na pema rü ta perü duü̃xü̃gürüü̃ tórü Cori ja dauxü̃gucüme̱xẽwa na pengẽxmagüxü̃. Rü aixcuma guxãma i jixema rü tawüxigu i nape̱xewa ja tórü Cori ja Cristu.
Cristuarü duü̃xü̃güarü poxü̃ruü̃ i Tupana nüxna ãxü̃ na nügü namaã ínapoxü̃güxü̃ca̱x naxchaxwa i Chataná
10 Rü nhu̱xma Pa Chaueneẽgüx, rü name nixĩ i penajaxu i tórü Coriarü pora na namaã peporaexü̃ca̱x. Erü nüma rü naporaxü̃chima rü ngẽmaca̱x nüxü̃́ natauxcha na pexü̃ naporaexẽẽxü̃ca̱x.
11 Rü name nixĩ i penajaxu i guxü̃ma i perü poxü̃ruü̃ i Tupana pexna ãxü̃ na ngẽmaãcü pegü ípepoxü̃xü̃ca̱x rü aixcuma peporaexü̃ca̱x i ngẽxguma Chataná pexü̃ womüxẽẽchaü̃gu.
12 Erü tama duü̃xü̃gü i taxrüü̃ ãmachixü̃ rü ãxchinaxãxü̃maã nixĩ i jigü idaixü̃. Notürü ngẽma namaã jigü idaixü̃ nixĩ i Chatanáãrü duü̃xü̃gü i ṉg̱oxogü i chixexü̃gü i poraexü̃. Rü nümagü rü namuxũchi rü tüxü̃ narüporamaẽgüchaü̃. Rü tama nüxü̃ tadaugü erü naãẽgü nixĩ, notürü guxü̃wama nangẽxmagü i nhama i naãnewa. Rü namaã inacua̱x i nhama i naãne i chixexü̃.
13 Rü ngẽmaca̱x name nixĩ i penajauxgü i guxü̃ma i ngẽma perü poxü̃ruü̃ i Tupana pexna ãxü̃, na ngẽmaãcü pegü ípepoxü̃xü̃ca̱x rü nüxü̃ perüjexeraxü̃ca̱x i ngẽxguma ngẽma naãẽgü i chixexü̃ pexü̃ rüporamaẽchaü̃gu. Rü ngẽmaãcü tãũxü̃táma nüxü̃ penguxü̃ i ngẽxguma ngẽma naãẽgü i chixexü̃ pexü̃ rüjexerachaü̃gu.
14 Pema nüxü̃ pecua̱x rü ngẽxguma nügü nadaixchaü̃gu i churaragü rü nagúxü̃raü̃xü̃ i norü poxü̃ruü̃ nügü naxügü na tama norü uwanügü nüxü̃ rüporamaẽgüxü̃ca̱x. Rü pema penaxwa̱xe na Tupanaãrü churaragü i mexü̃ na peixĩgüxü̃. Rü ngẽmaca̱x name nixĩ i penajauxgü i guxü̃ma i ngẽma poxü̃ruü̃ i Tupana pexna ãxü̃. Rü wüxi i churara rü nügü nigoje namaã i norü gojexü̃ i tachipanüxü̃ na ngẽmamaã nügü ínapoxü̃xü̃ca̱x i napütüwewa. Rü ngẽxgumarüü̃ ta i pema rü penaxwa̱xe na ngẽma ore i aixcuma ixĩxü̃gu pexĩxü̃ na ngẽmaãcü pegü ípepoxü̃xü̃ca̱x nawa i chixexü̃gü. Rü wüxi i churara rü najanga̱xcuchi i naremüãrü poxü̃ruü̃ na ngẽmaãcü nügü ínapoxü̃xü̃ca̱x. Rü ngẽxgumarüü̃ ta i pema rü penaxwa̱xe na pexü̃́ nangẽxmaxü̃ i perü maxü̃ i aixcuma Tupanape̱xewa mexü̃ na ngẽmaãcü pegü ípepoxü̃xü̃ca̱x nawa i chixexü̃gü.
15 Rü wüxi i churara rü nicuaixcuchi i norü chapatu na nüxü̃́ natauxchaxü̃ca̱x na ijaxũxü̃. Rü ngẽxgumarüü̃ ta i pema rü penaxwa̱xe na meã ípememarexü̃ na ipexĩãchixü̃ na nüxü̃ peixuxü̃ i ngẽma ore i mexü̃ i Tupanamaã tüxü̃ rüngüxmüẽxẽẽxü̃ rü tüxü̃ taãẽxẽẽxü̃.
16 Rü wüxi i churara rü nügüchacüüwa najanga̱xcuchi i norü poxü̃ruü̃ i ãtachinüxü̃ i namaã nügü ínapoxü̃xü̃. Rü ngẽxgumarüü̃ ta i pema rü penaxwa̱xe na aixcuma Cristuaxü̃́ pejaxõgüxü̃ na ngẽmaãcü pegü ípepoxü̃xü̃ca̱x nüxna i Chatanáne i ãũcümaxü̃ i namaã tüxü̃ nachixexẽẽchaü̃xü̃.
17 Rü wüxi i churara rü nüxü̃́ nangẽxma i napate̱xe i norü poxü̃ruü̃ i naẽruwa. Rü ngẽxgumarüü̃ ta i pema rü penaxwa̱xe na pexü̃́ nangẽxmaxü̃ca̱x i perü maxü̃ i taguma gúxü̃ na ngẽmamaã pegü ípepoxü̃xü̃ca̱x. Rü penaxwa̱xe i pexü̃́ nangẽxma i ngẽma pexne i wüxi i tararüü̃ ixĩxü̃. Rü ngẽma pexne nixĩ i Tupanaãrü ore i mexü̃ i Naãẽ i Üünexü̃ pexna ãxü̃.
18 Rü tama name i nüxü̃ perüchaue na pejumuxẽgüxü̃. Notürü name nixĩ i guxü̃guma Tupanaãẽ i Üünexü̃ãrü ngü̃xẽẽmaã Tupanaxü̃ peca̱a̱xü̃ rü guxü̃raü̃ãcü pejumuxẽgü. Rü name nixĩ i pexuãẽgü na guxü̃guma ngẽmaãcü pejumuxẽgüxü̃ rü taguma nüxü̃ perüxoexü̃. Rü penaxwa̱xe i tümaca̱x pejumuxẽgü ja guxãma ja texé ja Tupanaãrü duü̃xü̃gü ixĩgüxe.
19 Rü ngẽxgumarüü̃ ta chanaxwa̱xe na chauxca̱x pejumuxẽgüxü̃ na Tupana choxü̃ rüngü̃xẽẽxü̃ca̱x rü choxna naxããxü̃ca̱x i ngẽma ore i nüma nanaxwa̱xexü̃ na nüxü̃ chixuxü̃. Rü chanaxwa̱xe i Tupanana naxca̱x peca na choxü̃ naporaxẽẽxü̃ca̱x na tama chamuü̃ãcüma meãma nüxü̃ chixuxü̃ca̱x i norü ore i mexü̃ ga noxri duü̃xü̃gü tama nüxü̃ cuáxü̃ i Cristuchiga.
20 Rü ngẽma orexü̃ na chixuxü̃ca̱x nixĩ ga Tupana nügüchicüü choxü̃ namuxü̃, rü ngẽmaca̱x nixĩ i chapocuxü̃ i nhu̱xmax. Rü chanaxwa̱xe i chauxca̱x pejumuxẽgü na tama chamuü̃ãcüma meãma nüma nanaxwa̱xexü̃ãcüma nüxü̃ chixuxü̃ca̱x i ngẽma norü ore.
Pauru nanagu̱xẽẽ ga norü popera rü wenaxãrü jema duü̃xü̃güxü̃ narümoxẽ
21 Rü taeneẽ ja nüxü̃ ingechaü̃cü ja Tíquicu, rü chauxrüü̃ aixcuma meãma napuracü i tórü Coriarü puracüwa. Rü nüma tá pemaã nüxü̃ nixu i chauchiga rü guxü̃ma i nhuxãcü choxü̃ na naxüpetüxü̃ i nuã.
22 Rü ngẽmaca̱x nixĩ i pexü̃tawa chanamuxü̃, na pemaã nüxü̃ jaxuxü̃ca̱x na nhuxãcü toxü̃ naxüpetüxü̃, na ngẽmaãcü pexü̃ nataãẽxẽẽxü̃ca̱x.
23 Pa Toeneẽgü i Jaxõgüxü̃x, chanaxwa̱xe i Tanatü ja Tupana rü tórü Cori ja Ngechuchu ja Cristu pexü̃ narüngü̃xẽẽgü i guxãma i pema na meã pegümaã pemaxẽxü̃ca̱x, rü aixcuma petaãẽgüxü̃ca̱x, rü pegü pengechaü̃güxü̃ca̱x rü meã pejaxõgüxü̃ca̱x.
24 Rü chanaxwa̱xe i Tanatü ja Tupana nüxü̃ narüngü̃xẽẽ i guxü̃ma i ngẽma duü̃xü̃gü i aixcumaxü̃chi tórü Cori ja Ngechuchu ja Cristuxü̃ ngechaü̃güxü̃. Rü ngẽmaãcü jiĩxü̃.
Rü nuãma pexna,
Pauru