Firemú 1:1-25
1 Pa Firemú i Cuxü̃ Tangechaü̃güxe i wüxigu Tomaã Puracüxe, chama i Pauru i Ngechuchu ja Cristuca̱x pocuxe rü taeneẽ i Timúteumaã cuxca̱x tanaxümatü i nhaã popera.
2 Rü nhaã popera rü naxca̱x ta nixĩ i ngẽma taeneẽgü i cupatawa ngutaque̱xegüüxü̃ rü naxca̱x ta nixĩ taeja̱x i Ápia rü taeneẽ i Ariquípu i wüxigu tamaã Tupanaãxü̃́ puracüexü̃.
3 Rü chanaxwa̱xe i Tanatü ja Tupana rü tórü Cori ja Ngechuchu ja Cristu pexü̃ narüngü̃xẽẽ rü pexü̃ nataãẽxẽẽ.
Firemú rü aixcuma Ngechuchuaxü̃́ najaxõ rü jema jaxõgüxü̃xü̃ nangechaü̃
4 Rü guxü̃guma i ngẽxguma cuxna chacua̱xãchigu i chorü jumuxẽwa, rü Tupanana moxẽ chaxã cuxca̱x.
5 Erü nüxü̃ chacuáchiga na nhuxãcü nüxü̃́ cujaxõxü̃ ja tórü Cori ja Ngechuchu rü nhuxãcü nüxü̃ na cungechaü̃xü̃ i guxü̃ma i duü̃xü̃gü i Tupanaãrü ixĩgüxü̃.
6 Rü Tupanana naxca̱x chaca na cuxü̃ nangü̃xẽẽxü̃ca̱x na duü̃xü̃gümaã nüxü̃ cuixuxü̃ca̱x na nhuxãcü Cristuaxü̃́ jaxõgüxü̃ i jixemax, erü chanaxwa̱xe na meã nüxü̃ cucuáxü̃ na nhuxãcü Ngechuchu ja Cristugagu poraãcü tüxü̃ nangü̃xẽẽxü̃ ja Tupana.
7 Rü chama rü poraãcü chataãẽxü̃chi na nhuxãcü nüxü̃ cungechaü̃xü̃ i ngẽma jaxõgüxü̃. Erü cugagu nixĩ, Pa Chaueneẽx, na nataãẽgüxü̃ i ngẽma togü i jaxõgüxü̃.
Firemúxü̃tawa rü Onéchimuca̱x wüxi ga ngü̃xẽẽca̱x ínaca ga Pauru
8 1:8-9 Rü ngẽmaca̱x nangẽxma i wüxi i ngü̃xẽẽ i cuxü̃tawa naxca̱x íchacaxchaü̃xü̃. Rü dücax, Cristu nixĩ ja choxü̃ mucü rü ngẽmaca̱x choxü̃́ nangẽxma i pora na cuxü̃ chamuxü̃ na cunaxüxü̃ca̱x i ngẽma ngü̃xẽẽ i mexü̃ i tá cumaã nüxü̃ chixuxü̃. Notürü tama ngẽmaãcü cuxü̃ chamuxchaü̃ erü cuxü̃ changechaü̃, rü ngẽmaca̱x chauxca̱x narümemaẽ nixĩ na cuxü̃ chaca̱a̱xü̃marexü̃ naxca̱x i ngẽma. Rü chama i Pauru rü marü chaja rü nhu̱xma rü chapocu Ngechuchu ja Cristuca̱x.
9 Nüü̃ nadau 1:8
10 Rü ngẽmaca̱x cuxna naxca̱x chacaxchaü̃ i wüxi i ngü̃xẽẽ naxca̱x i Onéchimu i nuã pocupataü̃wa chauxü̃tawa Cristuxü̃ jaxuxü̃. Rü ngẽmaca̱x i nhu̱xma rü Tupanaãrü orewa rü chaune nixĩ.
11 Rü ü̃pa ga Onéchimu rü wüxi ga curü duü̃xü̃ ga taxuwama cuxü̃́ mexü̃ nixĩ. Notürü i nhu̱xma rü cuxü̃́ rü choxü̃́ rü ta name.
12 Rü nhu̱xma rü cuxca̱x chanataeguxẽẽ i nüma i Onéchimu. Rü chanaxwa̱xe i meã cunajaxu, nhama choxü̃ cujaxuxü̃rüü̃.
13 Chierü chanaxwa̱xe na nuxma chauxü̃tagu naxã́ũxü̃, rü na cuchicüü choxü̃ nangü̃xẽẽxü̃ca̱x i nhu̱xma na chapocuxü̃ naxca̱x i Tupanaãrü ore i mexü̃.
14 Notürü tama chanaxüxchaü̃ i ṯacü i taũta “Ngü̃” nhacuxü̃ choxü̃. Erü ngẽma ngü̃xẽẽ i cuxna naxca̱x chac̱axü̃, rü chanaxwa̱xe na curü ngúchaü̃tama jiĩxü̃ na cunaxüxü̃ i ngẽma rü tama i chorü mugagu na jiĩxü̃.
15 Rü bexmana Tupana nanaxwa̱xe na paxaãchi cuxna jaxũxü̃ ga Onéchimu na jixcama rü wenaxãrü cuxca̱x nataeguxü̃ca̱x rü ngẽmaãcü guxü̃gutáma cuxü̃tawa nangẽxmaxü̃ca̱x.
16 Notürü i nhu̱xma rü tama ngẽxü̃rüüxü̃mare i curü duü̃xü̃rüü̃ nixĩ, erü wüxi i curü düü̃xü̃ãrü jexera nixĩ i nhu̱xmax, erü taeneẽ i nüxü̃ ingechaü̃xü̃ nixĩ. Rü aixcuma poraãcü nüxü̃ changechaü̃ i chamax, notürü maneca i cuma rü jexeraãcü nüxü̃ cungechaü̃. Erü nhu̱xma rü tama wüxi i curü duü̃xü̃mare nixĩ, notürü wüxi i cueneẽ i tórü Coriaxü̃́ jaxõxü̃ nixĩ i nhu̱xmax.
17 Rü ngẽmaca̱x, rü ngẽxguma choxü̃ cuda̱xgu na aixcuma cueneẽ chiĩxü̃, rü chanaxwa̱xe i meã cunajaxu i Onéchimu, nhama choxü̃ cujaxuxü̃rüü̃.
18 Rü ngẽxguma ṯacü rü chixexü̃ cumaã naxü̱xgu rü e̱xna ṯacü cuxü̃́ nangetanügu, rü chanaxwa̱xe i chamaã nüxü̃ cuixu na nhuxre jiĩxü̃, na chamatama cuxü̃́ chanaxütanüxü̃ca̱x.
19 Rü chamatama i Pauru rü cha̱xme̱xmaãxü̃chi chanaxümatü i nhaã popera. Rü aixcuma chamatama tá cuxü̃́ chanaxütanü. Rü tãũxü̃táma cuxna nüxü̃ chacua̱xãchixẽẽ na nhuxãcü choxü̃́ cunangetanüxü̃ i curü maxü̃ i taguma gúxü̃ i chaugagu Tupanaxü̃tawa cujaxuxü̃.
20 Rü ngẽmaãcü, Pa Chaueneẽx, rü chanaxwa̱xe i tórü Corigagu chauxca̱x cunaxü i ngẽma ngü̃xẽẽ. Rü chanaxwa̱xe i choxü̃ cutaãẽxẽẽ, erü chaueneẽ i Cristuaxü̃́ jaxõxü̃ cuixĩ.
21 Rü cuxca̱x chanaxümatü i nhaã popera erü nüxü̃ chacua̱x na aixcuma chauga cuxĩnüxü̃ rü tá cunaxüxü̃ i ngẽma cuxna naxca̱x chac̱axü̃ãrü jexera.
22 Rü ngẽxgumarüü̃ ta chanaxwa̱xe na chauxca̱x cunamexẽẽxü̃ i wüxi i nachica i ngextá tá nawa changuxü̃. Erü íchanaṉg̱uxẽẽ na Tupana tá nangãxü̃xü̃ i perü jumuxẽgü, rü tá choxü̃ nangü̃xẽẽxü̃ na pexü̃ íchajadauxü̃ca̱x.
Pauru rü wenaxãrü Firemúxü̃ narümoxẽ rü naxca̱x ínaca na Cori ja Ngechuchu ja Cristu nüxü̃ rüngü̃xẽẽxü̃
23 Rü moxẽ cuxca̱x ngẽ́ma namu i Epáfra. Rü nüma rü wüxigu chamaã napocu naxca̱x ja Ngechuchu ja Cristu.
24 Rü ngẽxgumarüü̃ ta moxẽ cuxca̱x ngẽ́ma namugü i Marcu, rü Aristácu, rü Dema rü Luca. Rü nümagü rü chamücügü nixĩgü i Tupanaãrü puracüwa.
25 Rü chanaxwa̱xe i tórü Cori ja Ngechuchu ja Cristu pexü̃ narüngü̃xẽẽ i guxãma i pemax.
Rü nuãma cuxna,
Pauru
