Gárataanecü̃ãꞌ 1:1-24
1 1:1-2 Pa Toeneẽgü i Jaxõgüxü̃ i Gárataaneãrü Ĩãnegüwa Ngẽxmagüxü̃x, chama i Pauru rü namaã i guxü̃ma i taeneẽgü i nuã chauxü̃tawa ngẽxmagüxü̃ nixĩ i pexca̱x tanaxümatüxü̃ i nhaã popera. Rü choxü̃ nixĩ ga namugüxü̃ ga Ngechuchu ja Cristu rü Tanatü ja Tupana. Rü aixcuma tama duü̃xü̃gü nixĩ ga choxü̃ mugüxü̃ rü e̱xna choxü̃ unetagüxü̃ na chanaxüxü̃ca̱x i nhaã Tupanaãrü puracü. Notürü nümatama ga Ngechuchu ja Cristu rü Tanatü ja Tupana ga Ngechuchuxü̃ írüdaxẽẽcü nixĩ ga choxü̃ namugüxü̃.
2 Nüü̃ nadau 1:1
3 Rü chanaxwa̱xe i Tanatü ja Tupana rü tórü Cori ja Ngechuchu ja Cristu poraãcü pexü̃ narüngü̃xẽẽ rü pexü̃ nataãẽxẽẽ.
4 Rü nüma ga tórü Cori ja Ngechuchu rü nügü inaxã na tórü pecaduca̱x najuxü̃ca̱x na nüxna tüxü̃ ínanguxü̃xẽẽxü̃ca̱x i guxü̃ma i nhama i naãneãrü chixexü̃. Rü jemaãcü nanaxü, jerü jema nixĩ ga Tanatü ja Tupanaãrü ngúchaü̃.
5 ¡Namexẽchi ja Tupana i guxü̃guma! Rü ngẽmaãcü jiĩxü̃.
Nataxuma i to i ore i tüxü̃ maxẽxẽẽxü̃
6 Rü jema na Cristuaxü̃́ pengechaü̃tümüü̃güxü̃ca̱x nixĩ ga pexna naxuxü̃ ja Tupana na penajaxuxü̃ca̱x i maxü̃ i taguma gúxü̃. Rü nhu̱xma rü poraãcü chaḇaixãchiãẽ, erü paxaxüchi ipenaxügü na Tupanana peixĩgachixü̃, na nawe perüxĩxü̃ca̱x i to i ngu̱xẽẽtae i nagu perüxĩnüẽgu rü pexü̃ maxẽxẽẽxü̃.
7 Notürü tama aixcuma nangẽxma i to i ngu̱xẽẽtae i nawa najaxuxü̃ i maxü̃ i taguma gúxü̃. Notürü nangẽxma i nhuxre i duü̃xü̃gü i pexü̃́ naguxchaxẽẽchaü̃xü̃, rü nanaxüchicüügüchaü̃ i ngẽma ngu̱xẽẽtae i mexü̃ ga pemaã nüxü̃ chixuxü̃ ga Cristuchiga.
8 Rü toma rü marü pexna tanaxã ga jema ngu̱xẽẽtae i aixcuma ixĩxü̃ i Ngechuchuchiga. Rü ngẽxguma chi texé pexü̃ ngúexẽẽgu i to i ngu̱xẽẽtae, rü name nixĩ i noxtacüma Tupana tüxü̃ napocu. Rü woo chama chixĩgu, rü e̱xna ṯacü rü Tupanaãrü orearü ngeruü̃ i dauxü̃cü̱̃ã̱x jixĩgu i pexü̃ ngu̱xẽẽxü̃ i to i ngu̱xẽẽtae, rü name nixĩ i noxtacüma Tupana tüxü̃ napocu.
9 Rü nhu̱xma rü wena pemaã nüxü̃ chixu ga jema noxri pemaã nüxü̃ chixuxü̃. Rü ngẽxguma chi texé pexü̃ ngúexẽẽgu i wüxi i to i ngu̱xẽẽtae i tama jema noxri pejaxuxü̃rüü̃ ixĩxü̃, rü name nixĩ i noxtacüma Tupana tüxü̃ napocu.
10 Rü tama chamaã na petaãẽgüxü̃ca̱x nixĩ i ngẽma nhachaxü̃. Erü tama naxca̱x chadau na duü̃xü̃gü chamaã taãẽgüxü̃, notürü Tupana chamaã taãẽxü̃ca̱x nixĩ i chadauxü̃. Erü ngẽxguma chi duü̃xü̃güxü̃xicatama chataãẽxẽẽchaü̃gu, rü tau chima Cristuarü puracütanüxü̃ chixĩ.
Nhuxãcü Pauruxü̃ najaxu ga Tupana na norü puracüwa namuãxü̃ca̱x
11 Notürü, Pa Chaueneẽgüx, chanaxwa̱xe i nüxü̃ pecua̱x na nhaã ore i mexü̃ i nüxü̃ chixuxü̃, rü tama duü̃xü̃güãẽwa jiĩxü̃ na ne naxũxü̃.
12 Jerü tama wüxi ga duü̃xü̃xü̃tawa naxca̱x changu̱x. Notürü Ngechuchu ja Cristutama nixĩ ga choxü̃ nüxü̃ cua̱xẽẽcü.
13 Pema rü marü nüxü̃ pexĩnüẽchiga na nhuxãcü chamaxü̃xü̃ ga ü̃pa ga jexguma Judéugücümagu chixũxgu. Rü nüxü̃ pexĩnüẽchiga na nhuxãcü poraãcü nawe chingẽchigüxü̃ ga guxü̃ma ga Tupanaãrü duü̃xü̃gü ga jaxõgüxü̃ rü nhuxãcü chixri namaã na chaxüpetüxü̃ na jemaãcü nüxü̃ nüxü̃ charüxoxẽẽxü̃ca̱x ga jema na Ngechuchuaxü̃́ jaxõgüãxü̃.
14 Rü muxü̃ma ga chautanüxü̃gü ga Judéugü ga chorü jaã̱xraü̃rügüxü̃ãrü jexera nagu chixũ ga jema Judéugücüma. Jerü norü jexera meãma chajanguxẽẽ ga nacümagü ga nuxcümaxü̃güxü̃ ga chorü o̱xigü nagu ĩxü̃.
15 1:15-16 Notürü jexguma tautama chabuxgu, rü woetama Tupana choxü̃ naxuneta na choxü̃ namuxü̃ca̱x na chanaxüxü̃ca̱x i norü puracü. Rü nüma rü chauxca̱x naca na noxrü chixĩxü̃ca̱x jerü poraãcü choxü̃ nangechaü̃. Rü jexguma Tupana naxwa̱xegu, rü choxü̃ nüxü̃ nacua̱xẽẽ ga Nane ja Cristu. Rü jemaãcü nanaxü na ngẽma duü̃xü̃gü i tama Judéugü ixĩgüxü̃maã nüxü̃ chixuxü̃ca̱x na nhuxãcü Ngechuchugagu tüxü̃́ nangẽxmaxü̃ i maxü̃ i taguma gúxü̃. Rü jexguma jemaãcü Tupana choxü̃ nüxü̃ cua̱xẽẽgu ga Nane, rü taxúenama chajaca.
16 Nüü̃ nadau 1:15
17 Rü bai ga Jerucharéü̃wa na chaxũxü̃ na nüxna chajac̱axü̃ca̱x ga jema togü ga ngúexü̃gü ga nüxĩra Tupana imugüxü̃. Notürü ga chama rü jexgumatama Arábiaanewa chaxũ. Rü jemawena, rü Damacuarü ĩãneca̱x chataegu.
18 Rü tamaẽ̱xpü̱x ga taunecü nawena ga Cristuaxü̃́ na chajaxõxü̃, rü jexguma nixĩ ga düxwa Jerucharéü̃wa chaxũxü̃ na Pedruxü̃ chacuáxü̃ca̱x. Rü 15 ga ngunexü̃tama naxü̃tawa chajexma.
19 Rü jéma nüxü̃ chadau ta ga Tiagu ga tórü Cori naẽneẽ. Notürü taxuü̃ma ga togü ga ngúexü̃gü ga tórü Cori imugüxü̃xü̃ chadau.
20 Rü Tupana choxü̃ nadau na aixcuma jiĩxü̃ i ngẽma ore i nhu̱xma pexca̱x chaxümatüxü̃.
21 Rü jemawena, rü Síriaanewa rü Chiríchiaanewa chaxũ.
22 Notürü jema taeneẽgü ga Cristuaxü̃́ jaxõgüxü̃ ga Judéaanewa jexmagüxü̃, rü taguma choxü̃xü̃chi nadaugü.
23 Rü jema nüxü̃ naxĩnüẽxü̃ ga chauchiga rü nhaãxĩcatama nixĩ:
“Rü ngẽma Pauru ga ü̃pa tawe ingẽchigüxü̃, rü nhu̱xma rü duü̃xü̃gümaã nüxü̃ nixu i Tupanaãrü ore i mexü̃, rü namaã najaxucu̱xẽ na Cristuaxü̃́ jaxõgüãxü̃ca̱x. Rü ngẽmaãcü nanaxü i nhu̱xma rü woo ga noxri rü inajanaxoxẽẽchaü̃ ga jema ore”, nhaxü̃. Rü jexicatama nixĩ ga chauchiga ga nüxü̃ naxĩnüẽxü̃.
24 Rü jexguma ga jema duü̃xü̃gü rü Tupanaxü̃ nicua̱xüü̃gü nagagu ga jema Tupana chamaã üxü̃.
