Gárataanecü̃ãꞌ 2:1-21
2 Rü 14 ga taunecüwena rü wenaxãrü Jerucharéü̃wa chaxũ namaã ga Barnabé. Rü Titu rü ta íchajaga.
2 Rü jéma chaxũ jerü Tupana choxü̃ nüxü̃ nacua̱xẽẽ ga na nanaxwa̱xexü̃ na jéma chaxũxü̃. Rü jéma Jerucharéü̃wa, rü jema jaxõgüxü̃ãrü ãẽ̱xgacügümaãxĩcatama changutaque̱xe. Rü meãma namaã nüxü̃ chixu ga nachiga ga jema Tupanaãrü ore i mexü̃ ga nüxna chaxãxü̃ ga jema duü̃xü̃gü i tama Judéugü ixĩgüxü̃. Rü jemaãcü meãma namaã nüxü̃ chixu na nhuxãcü na jiĩxü̃ ga chorü ngu̱xẽẽtae, jerü tama chanaxwa̱xe na jixcüra rü choxü̃́ nüxü̃ naxoexü̃ rü ngẽmaãcü notüca̱xmamare na jiĩxü̃ i ngẽma puracü i chaxüxü̃.
3 Rü jema jaxõgüxü̃, rü nümagü rü ta norü me nixĩ ga jema chorü ngu̱xẽẽtae. Rü jemaca̱x rü woo tama Judéu na jiĩxü̃ ga Titu rü taguma na ínawiecha̱xmüpe̱xechiraü̃xü̃, notürü jema ãẽ̱xgacügü rü tama nanamu na ínawiecha̱xmüpe̱xechiraü̃xü̃ca̱x.
4 Notürü aixcuma nixĩ ga nhuxre ga taeneẽgüneta ixĩgüxü̃ ga bexmamare tatanügu nachocuxü̃. Rü jemagü nixĩ ga naxwa̱xegüxü̃ na inawiü̃cha̱xmüpe̱xechiraü̃xü̃ i ngẽma jaxõgüxü̃ i tama Judéugü ixĩgüxü̃. Rü nhu̱xma na Ngechuchu ja Cristuarü duü̃xü̃gü ixĩgüxü̃, rü jema taeneẽgüneta rü bexma tatanügu nachocu na tüxü̃ nangugügüxü̃ca̱x na nhuxãcü Cristu nüxna tüxü̃ ínguxü̃xẽẽxü̃ ga jema mugü ga Muĩsé ümatüxü̃. Jerü nümagü nanaxwa̱xegü na wenaxãrü nagu ixĩxü̃ ga jema mugü ga guxchaxü̃gü ga Muĩsé ümatüxü̃.
5 Notürü bai ga íraruwa naga na taxĩnüẽxü̃ ga jema duü̃xü̃gü. Jerü tama tanaxwa̱xegü na texé pexü̃́ naxüchicüüxü̃ i ngẽma ore i mexü̃ i aixcuma ixĩxü̃ i tamaã nüxü̃ ixuxü̃ i nhuxãcü tüxü̃́ na nangẽxmaxü̃ i maxü̃ i taguma gúxü̃ ega Cristuaxü̃́ jaxõgügu.
6 Notürü jexguma jema jaxõgüxü̃ãrü ãẽ̱xgacügü ga Jerucharéü̃wa jexmagüxü̃ nüxü̃ ĩnüẽgu ga nhuxãcü na jiĩxü̃ ga chorü ngu̱xẽẽtae, rü namaã nataãẽgü rü taxuü̃ma ga ṯacü ga togü ga mugü choxna naxãgü na namaã changúexẽẽtaexü̃ca̱x. Notürü tama jema na ãẽ̱xgacügü jixĩgüxü̃gu charüxĩnü, erü nüxü̃ chacua̱x na Tupanape̱xewa rü guxãma na wüxiguxü̃.
7 Notürü nümagü ga jema ãẽ̱xgacügü, rü nüxü̃ nicua̱xãchigü na choxü̃ jiĩxü̃ ga namuxü̃ ga Tupana na jema duü̃xü̃gü ga tama Judéugü ixĩgüxü̃maã nüxü̃ chixuxü̃ca̱x ga norü ore i mexü̃, jexgumarüü̃ ga Pedruxü̃ na namuxü̃rüü̃ ga Tupana na Judéugümaã nüxü̃ jaxuxü̃ca̱x ga jema ore.
8 Rü gumatama Tupana ga Pedruxü̃ mucü na Judéugümaã nüxü̃ na jaxuxü̃ ga ore i mexü̃, rü gumatama Tupana nixĩ ga choxü̃ mucü na jema duü̃xü̃gü ga tama Judéugü ixĩgüxü̃maã nüxü̃ chixuxü̃ca̱x ga jema ore.
9 Rü jemaca̱x ga Tiagu rü Pedru rü Juã́ũ ga jaxõgüxü̃ãrü ãẽ̱xgacügü, rü nüxü̃ nicua̱xãchigü na choxü̃ naxunetaxü̃ ga Tupana na chanaxüxü̃ca̱x i ngẽma puracü. Rü jemaca̱x ga jema ãẽ̱xgacügü, rü tome̱x nijauxãchigü ga chama rü Barnabé na toxü̃ nüxü̃ nadauxẽẽgüxü̃ca̱x na aixcuma namücügü tixĩgüxü̃ i ngẽma puracüwa. Rü nümagü rü ta norü me nixĩ na ngẽma duü̃xü̃gü i tama Judéugü ixĩgüxü̃tanüwa na tanaxüxü̃ i Tupanaãrü puracü rü nümagü i Judéugütanüwa.
10 Rü toxna naxca̱x naca na nüxü̃ tarüngü̃xẽẽgüxü̃ca̱x ga jema jaxõgüxü̃ ga ngearü dĩẽruã̱xgüxü̃. Rü jexicatama nixĩ ga toxna nüxü̃ nacua̱xãchixẽẽxü̃. Rü chama rü ta ngẽmatama nixĩ i guxü̃guma woetama meãma chaxüxü̃.
Pauru rü Ãtioquíawa Pedruxü̃ naxucu̱xẽ
11 Notürü jixcüra ga jexguma Ãtioquíawa naxũxgu ga Pedru, rü noxtacüma nüxü̃ nüxü̃ chaxĩnüxẽẽ, jerü tama aixcuma name ga jema naxüxü̃ namaã ga jema jaxõgüxü̃ ga tama Judéugü ixĩgüxü̃.
12 Jerü noxri rü jema duü̃xü̃gü ga tama Judéugü ixĩgüxü̃maã nachibü ga Pedru. Notürü jexguma jéma nangugügu ga nhuxre ga Judéugü ga jaxõgüxü̃ ga Tiagu jéma mugüxü̃, rü Pedru rü marü tama jema duü̃xü̃gü ga tama Judéugü ixĩgüxü̃maã nachibüchaü̃. Rü Judéugümaãxĩcatama nachibü ga jexguma jerü nüxü̃ namuü̃ ga jema Judéugü ga jéma ngugüxü̃ ga nagu ĩxü̃ ga jema nacüma na Tupanaca̱x ínawiecha̱xmüpe̱xechiraü̃güxü̃.
13 Rü jema togü ga Judéugü ga jaxõgüxü̃, rü jexguma nüxü̃ nadaugügu ga jema Pedru üxü̃, rü nümagü rü ta nanaxügü ga jema chixexü̃ rü naxca̱x nawoeguchaü̃ ga jema nuxcümaü̃güxü̃ ga nacümagü. Rü düxwa ga Barnabé rü ta natanügu naxã ga jema chixexü̃ ügüxü̃.
14 Notürü jexguma nüxü̃ chada̱xgu na tama Tupanaãrü ore i mexü̃ tüxü̃ ngu̱xẽẽxü̃ãcüma na namaxẽxü̃ ga jema jatügü, rü guxü̃ ga jaxõgüxü̃pe̱xewa Pedruxü̃ nüxü̃ chaxĩnüxẽẽ. Rü nhacharügü nüxü̃:
“Rü dücax i cuma na Judéu cuiĩxü̃, cuma rü tama aixcuma Judéurüü̃ nagu cuixũ i ngẽma Judéugücüma, notürü wüxi i duü̃xü̃ i tama Judéu ixĩxü̃rüü̃ cumaxü̃. ¿Rü nhuxãcü i nhu̱xma i cunaxwa̱xexü̃ na Judéugücümagu naxĩxü̃ i ngẽma duü̃xü̃gü i tama Judéugü ixĩgüxü̃?” nhacharügü nüxü̃.
Judéugü rü woo ngẽma duü̃xü̃gü i tama Judéugü ixĩgüxü̃ rü norü õgagu nixĩ i najauxgüãxü̃ i maxü̃ i taguma gúxü̃
15 Rü pemaã nüxü̃ chixu rü toma rü aixcuma torü bucümatama Judéugü tixĩgü rü Tupanaxü̃ tacua̱xgü. Rü ngẽmaãcü tama duü̃xü̃gü i tama Tupanaxü̃ cua̱xgüxü̃ tixĩgü.
16 Rü nüxü̃ tacua̱xgü rü jema nuxcümaxü̃güxü̃ ga mugü ga Muĩsé ümatüxü̃ rü tama tüxü̃ nimexẽẽ i Tupanape̱xewa, erü taxucürüwama texé aixcuma naga taxĩnüẽ i ngẽma mugü. Notürü i nhu̱xma rü Tupana tüxü̃ nadau na imexü̃ ega Ngechuchu ja Cristuaxü̃́ jaxõgügu. Rü jemaca̱x ga toma rü ta Ngechuchu ja Cristuaxü̃́ tajaxõgü na torü õgagu Tupana toxü̃ nadauxü̃ na timexü̃. Erü nüxü̃ tacua̱xgü rü tama ngẽma mugügagu nixĩ na Tupanape̱xewa tamexü̃ ja wüxie, erü taxucürüwama texé aixcuma naga taxĩnü i ngẽma mugü na ngẽmaãcü Tupanape̱xewa tamexü̃ca̱x.
17 Rü nhu̱xma i jixema rü Cristuaxü̃́ tajaxõgü, rü ngẽmaca̱x nixĩ i Tupanape̱xewa imexü̃. Notürü ngẽxguma chi wüxi i ngunexü̃gu rü jixema nagu rüxĩnüẽgu rü mugügu na ixĩxü̃gagu jixĩgu na Tupanape̱xewa imexü̃, rü maneca tá nagu tarüxĩnüẽ na Cristu tüxü̃ pecaduã̱xẽẽxü̃. Notürü dücax, rü tama ngẽmaãcü nixĩ erü Cristu rü tagutáma texéxü̃ napecaduã̱xẽẽ.
18 Chama rü marü nüxü̃ charüxo na nagu charüxĩnüxü̃ na mugügu chixũxü̃gagu Tupanape̱xewa chamexü̃. Notürü ngẽxguma chi wenaxãrü naxca̱x chataegugu i ngẽma nuxcümaxü̃güxü̃ i mugü rü chi nüxü̃ charüxoxgu na Cristuaxü̃́ chajaxõxü̃, rü chi aixcuma wüxi i pecaduã́xü̃ chixĩ.
19 Jerü jexguma jema mugüwa changu̱xgu, rü düxwa nüxü̃ chicua̱xãchi na tama janguxü̃ ga jema mugü na choxü̃ namexẽẽxü̃ Tupanape̱xewa. Jerü taxucürüwama aixcuma naga chaxĩnü ga guxü̃ma ga jema mugü. Rü ngẽmaca̱x i nhu̱xma rü Cristuaxü̃́ chajaxõ na Tupanape̱xewa chamexü̃ca̱x rü naxca̱xicatama chamaxü̃xü̃ca̱x. Rü Cristu rü curuchagu naju na ijanaxoxü̃ca̱x ga nuxcümaxü̃xü̃ ga chorü maxü̃ ga choxü̃́ jexmaxü̃ ga jexguma jema mugügu chixũxgu.
20 Rü nhu̱xma rü tama chamatama nixĩ i chaugümaã ichacuáxü̃, notürü Cristume̱xẽwa nangẽxma i chorü maxü̃, rü nüma nixĩ i chamaã inacuáxü̃. Rü nhu̱xma rü Tupana Nane ja Cristuaxü̃́ chajaxõõcüma nixĩ i chamaxü̃xü̃ i nhama i naãnewa. Rü nüma nixĩ ga choxü̃ nangechaü̃ü̃xü̃, rü nügü inaxãxü̃ na chauxca̱x najuxü̃ca̱x.
21 Rü tama nüxü̃ chaxoxchaü̃ i ngẽma mexü̃ ga Tupana taxca̱x üxü̃ ga jexguma naju̱xgu ga Cristu. Jerü jexguma chi jema mugügu ixĩxü̃gagu Tupanape̱xewa imexgu, rü notüca̱xmamare chi nixĩ ga na najuxü̃ ga Cristu.
