Gárataanecü̃ãꞌ 3:1-29
3 Pa Chaueneẽgü i Gárataanecü̱̃ã̱x, pema rü pengẽãẽgümare. Rü jexguma petanüwa tajexmagügu rü meãma guxãpe̱xewa pemaã nüxü̃ tixu rü pexca̱x tanango̱xẽẽ na nhuxãcü curuchagu taxca̱x najuxü̃ ga Ngechuchu ja Cristu. ¿Rü texé pexü̃ tawomüxẽẽ i nhu̱xma na tama naga pexĩnüẽxü̃ca̱x i ngẽma ore i aixcuma ixĩxü̃ ga pemaã nüxü̃ tixuxü̃?
2 Rü wüxi i oreca̱x pexna chaca, rü ¿nhuxãcü jiĩxü̃ ga penajaxuxü̃ ga Tupanaãẽ i Üünexü̃? ¿E̱xna pexca̱x rü jema mugü na peinguxẽẽgüxü̃gagu jiĩxü̃ ga penajaxuxü̃, rü e̱xna ngẽma ore i mexü̃ ga nüxü̃ pexĩnüẽxü̃ rü peixõgüxü̃gagu jiĩxü̃?
3 Pema rü pengẽãẽgümare rü poraãcü ípetüe. Noxri rü Cristuaxü̃́ pejaxõgü jerü Tupanaãẽ i Üünexü̃ pewa napuracü. ¿Rü nhu̱xma rü nhuxãcü i nagu perüxĩnüẽxü̃ na pexrütama poramaã pejanguxẽẽxü̃ i ngẽma puracü i Tupanaãẽ i Üünexü̃ pewa ixügüxü̃?
4 Pema rü poraãcü Tupana pexü̃ narüngü̃xẽẽ. Rü chierü tama notüca̱xmamare jixĩgu ga jema, erü taxucürüwa notüca̱xmamare nixĩ.
5 Rü jexguma Tupana pexna namuxgu ga Naãẽ i Üünexü̃ rü petanüwa naxüãgu ga taxü̃ ga mexü̃gü ga norü poramaã naxüxü̃, rü ¿tü̱xcüü̃ jiĩxü̃ ga naxüãxü̃ ga jema? ¿Pexca̱x rü mugü na peinguxẽẽxü̃gagu jiĩxü̃ ga Tupana naxüxü̃ ga jema? Tama jemaca̱x nixĩ. Tupana rü petanüwa nanaxü ga jema taxü̃ ga mexü̃gü ga norü poramaã naxüxü̃, rü pexna nanamu ga Naãẽ i Üünexü̃, jerü nüxü̃ pexĩnüẽ ga ore i mexü̃, rü Cristuaxü̃́ pejaxõgü.
6 Rü dücax, pemaã nüxü̃ chixu rü name nixĩ i nuxcümaxü̃cü ga torü o̱xi ga Abrã́ũrüü̃ peixĩgü. Jerü Abrã́ũ rü Tupanaãxü̃́ najaxõ, rü jemaca̱x Tupana nüxü̃ nadau ga na namexü̃.
7 Rü ngẽmawa nüxü̃ pedau rü ngẽma duü̃xü̃gü i Tupanaãxü̃́ jaxõgüxü̃ nixĩ i aixcuma Abrã́ũtanüxü̃ ixĩgüxü̃ i Tupanape̱xewa.
8 Rü Tupanaãrü ore i ümatüxü̃wa rü nüxü̃ nixu na nhuxãcü Tupanape̱xewa tá na jamexü̃ i ngẽma duü̃xü̃gü i jaxõgüxü̃ i woo tama Judéugü ixĩgüxü̃. Rü jemaãcü nüxü̃ nixu naxü̃pa ga na nangupetüxü̃. Jerü Tupana rü nuxcümamatama Abrã́ũmaã nüxü̃ nixu ga nhaã ore i mexü̃ i nhaxü̃:“Rü cugagu tá nüxü̃ charüngü̃xẽẽ i guxü̃ma i nachiü̃ãnecü̱̃ã̱x i duü̃xü̃gü”,
nhaxü̃. Rü nüxü̃ tacua̱x rü Cristu rü Abrã́ũtaa na jiĩxü̃.
9 Rü ngẽmaca̱x i nhu̱xma rü Tupana nanajaxu i guxü̃ma i duü̃xü̃gü i jaxõgüxü̃, jexgumarüü̃ ga Abrã́ũ ga jaxõcüxü̃ na najaxuxü̃rüü̃.
10 Notürü chixexü̃wa nangẽxmagü i guxü̃ma i ngẽma duü̃xü̃gü i nagu rüxĩnüẽxü̃ na mugü janguxẽẽgüxü̃gagu Tupanape̱xewa jamexü̃. Erü Tupanaãrü ore i ümatüxü̃wa rü nhanagürü:“Rü guxü̃ma i duü̃xü̃gü i tama aixcuma janguxẽẽgüxü̃ i guxü̃ma i ngẽma mugü i ümatüxü̃, rü chixexü̃wa nangẽxmagü”,
nhanagürü. Erü nüxü̃ tacua̱xgü na taxucürüwama aixcuma texé janguxẽẽxü̃ i guxü̃ma i ngẽma mugü.
11 Rü ngẽmaãcü meãma nango̱x na tama ngẽma mugü tinguxẽẽxü̃ca̱x jiĩxü̃ na texé Tupanape̱xewa mexü̃. Erü Tupanaãrü ore i ümatüxü̃wa rü nhanagürü:“Rü jíxema tümaãrü õgagu Tupanape̱xewa mexẽ, rü jíxema tá tixĩ ja aixcuma tüxü̃́ nangẽxmaxẽ i maxü̃ i taguma gúxü̃”,
nhanagürü.
12 Notürü ngẽxguma nagu rüxĩnüẽgu na mugü inguxẽẽxü̃ca̱x jiĩxü̃ na Tupanape̱xewa imexü̃, rü taxuü̃ca̱x chima tü̱xcüü̃ tajaxõgü. Erü Tupanaãrü orewa rü ngẽmachiga naxümatü, rü nhanagürü:“Rü jíxema aixcuma meãma janguxẽẽ́xẽ i guxü̃ma i mugü, rü ngẽmagagu tá tüxü̃́ nangẽxma i tümaãrü maxü̃”,
nhanagürü. Notürü ngẽma mugü rü düxwa chixexü̃wa tüxü̃ naga erü taxucürüwama texé aixcuma meã tajanguxẽẽ.
13 Notürü ga Cristu rü nawa tüxü̃ ínanguxü̃xẽẽ ga jema mugü ga chixexü̃wa tüxü̃ jexmagüxẽẽxü̃. Rü taxca̱x nixĩ ga chixexü̃wa najexmaxü̃ ga jexguma curuchagu naju̱xgu. Erü Tupanaãrü ore i ümatüxü̃wa, rü nhanagürü:“Rü guxãma ja jíxema wüxi i naĩwa tüxü̃ natuxẽẽgüãcüma júxe, rü chixexü̃wa tangẽxma”,
nhanagürü.
14 Rü jemaãcü curuchagu naju ga Ngechuchu ja Cristu na nüxü̃ nangü̃xẽẽxü̃ca̱x i guxü̃ma i ngẽma duü̃xü̃gü i tama Judéugü ixĩgüxü̃, jema Tupana Abrã́ũmaã ixunetaxü̃rüü̃. Rü taxca̱x rü ta naju ga Cristu na jíxema rü ta nüxü̃́ jaxõgüxü̃ca̱x rü najauxgüxü̃ca̱x i Tupanaãẽ i Üünexü̃ i tamaã inaxunetaxü̃.
Tupanaãrü uneta rü ngẽma mugüarü jexera name
15 Pa Chaueneẽgüx, nhu̱xma rü tá pemaã nüxü̃ chixu i wüxi i cua̱xruü̃ na nhuxãcü duü̃xü̃gü ṯacü nügümaã mexẽẽxü̃. Rü dücax, ngẽxguma chi wüxi ja jatü rü texémaã ṯacü namexẽẽgu rü wüxi i poperagu meã naxümatüãgu i ngẽma, rü taxucürüwa texé itajanaxoxẽẽ rü e̱xna tanaxüchicüü i ngẽma namexẽẽxü̃.
16 Rü dücax, rü jexgumarüü̃tama nixĩ ga nangupetüxü̃ ga jexguma Tupana rü Abrã́ũmaã rü Abrã́ũtaamaã inaxunetagu. Rü Tupanaãrü ore i ümatüxü̃wa rü tama “Abrã́ũtaagü” nhanagürü, jerü tama muxü̃ma ga duü̃xü̃güchiga nidexa. Notürü jema ore rü “Abrã́ũtaa” nhanagürümare, jerü wüxitama ga duü̃xü̃chiga nixĩ ga jadexaxü̃. Rü jema rü Cristuchiga nixĩ.
17 Rü ngẽmaãcü pemaã chanango̱xẽẽ na Tupana rü Abrã́ũmaã namexẽẽãxü̃ rü namaã inaxunetaxü̃ na Cristugagu tá jiĩxü̃ i duü̃xü̃güxü̃ nangü̃xẽẽxü̃. Rü ngẽmaca̱x i nhu̱xma rü jema Muĩsé ümatüxü̃ ga mugü ga 430 ga taunecü jema unetawena ínguxü̃, rü taxucürüwama inajanaxoxẽẽ ga jema Tupanaãrü uneta ga nüxĩra Abrã́ũmaã nüxü̃ jaxuxü̃. Rü ngẽmaca̱x i nhu̱xma rü ta napora i ngẽma uneta.
18 Rü ngẽxguma chi mugü inguxẽẽgüxü̃gagu jixĩgu na Tupana tüxü̃ rüngü̃xẽẽxü̃, rü notüca̱xmamare chi nixĩ ga jema Tupanaãrü uneta ga nüxĩra Abrã́ũmaã nüxü̃ jaxuxü̃. Notürü aixcuma nixĩ na ngetanüãcüma Abrã́ũxü̃ nangü̃xẽẽxü̃ ga Tupana, jerü jemaãcü marü namaã inaxuneta.
19 Rü nhu̱xma rü ¿ṯacüwa namexü̃ ga jema mugü ga Muĩsé ümatüxü̃? Rü dücax, Tupana rü marü Abrã́ũmaã inaxunetaguwena nixĩ ga duü̃xü̃güna naxããxü̃ ga jema mugü, na jemaãcü duü̃xü̃güxü̃ nüxü̃ nadauxẽẽxü̃ca̱x na nhuxãcü poraãcü pecadu naxüexü̃. Rü jemaãcü nixĩ nhu̱xmata ínangu ga guma Abrã́ũtaa ja Cristu. Rü gumachiga nixĩ ga Abrã́ũmaã inaxunetaxü̃ ga Tupana ga noxrix. Rü jexguma ínanguxgu ga jema mugü, rü Tupana rü dauxü̃cü̱̃ã̱x ga norü orearü ngeruü̃gümaãxĩra nüxü̃ nixu. Rü jemagü nixĩ ga nüxĩ Muĩsémaã nüxü̃ ixugüxü̃, rü nüma ga Muĩsé rü duü̃xü̃gümaã nüxü̃ nixu.
20 Notürü jexguma Tupana Abrã́ũmaã ixunetagu, rü nümaxü̃chima ga Tupana nixĩ ga Abrã́ũmaã nüxü̃ jaxuxü̃ ga jema norü uneta. Rü tama togümaãxĩra nüxü̃ nixu na jemagü nüxĩ Abrã́ũmaã nüxü̃ ixugüexü̃ca̱x.
Ṯacüca̱x duü̃xü̃güna nanaxã ga Tupana ga jema mugü
21 ¿Rü nhuxũ nhapegüxü̃ i nhu̱xmax? ¿Pexca̱x e̱xna rü jema Muĩsé ümatüxü̃ ga mugü rü inajanaxoxẽẽ i Tupanaãrü unetagü? Rü dücax, tama ngẽmaãcü nixĩ. Jerü jexguma chi naporagu ga jema mugü na tüxna naxããxü̃ i maxü̃ i taguma gúxü̃, rü chi Tupanape̱xewa time i ngẽxguma meãma janguxẽẽgu.
22 Notürü tama ngẽmaãcü nixĩ. Erü Tupanaãrü ore i ümatüxü̃wa nüxü̃ tadau na guxü̃ma i duü̃xü̃gü rü pecadutüü̃wa nangẽxmagüxü̃. Rü ngẽmaca̱x i nhu̱xma rü jíxema Ngechuchu ja Cristuaxü̃́ jaxõgüxexicatama tixĩ ja najauxgüxe i ngẽma maxü̃ i aixcuma mexü̃ i Tupana tamaã ixunetaxü̃.
23 Rü jexguma taũta ínanguxgu ga Cristu na nüxü̃́ jaxõgüxü̃ca̱x, rü mugütüü̃wa tajexmagü rü tamaã inacua̱x. Rü jemaãcü tixĩgü rü nhu̱xmata Tupana taxca̱x nango̱xẽẽ ga Ngechuchu ja Cristu na nüxü̃́ jaxõgüxü̃ca̱x.
24 Rü jemaãcü ga jema mugü rü tamaã inacua̱x nhu̱xmata Cristuxü̃tawa tüxü̃ nagagü na nüxü̃́ jaxõgüxü̃ca̱x rü ngẽmaãcü Tupanape̱xewa imexü̃ca̱x.
25 Notürü i nhu̱xma na marü núma nanguxü̃ ja Cristu na nüxü̃́ jaxõgüxü̃ca̱x, rü marü tama ngẽma mugütüü̃wa tangẽxmagü. Rü nhu̱xma rü marü taxuü̃ca̱xma tü̱xcüü̃ tamaã inacua̱x i ngẽma mugü.
26 Rü nhu̱xma na Ngechuchu ja Cristuaxü̃́ pejaxõgüxü̃, rü Tupanaxãcügü peixĩgü i guxãma i pemax.
27 Rü nhu̱xma na Cristuégagu ípebaiü̃xü̃, rü Cristuarü peixĩgü rü nüma rü pemaã inacua̱x na naxrüü̃ peixĩgüxü̃ca̱x.
28 Rü nhu̱xma rü Tupanape̱xewa rü nüẽ́tama nixĩ ega woo Judéugü peixĩgügu rü e̱xna tama. Rü nüẽ́tama ega woo wüxi i coriarü duü̃xü̃gü peixĩgügu rü e̱xna taxúxearü duü̃xü̃gü peixĩgügu. Rü nüẽ́tama ega woo peijatügu rü e̱xna peingexgu. Erü nhu̱xma na Ngechuchu ja Cristuarü duü̃xü̃gü na peixĩgüxü̃, rü wüxitama i duü̃xü̃ peixĩgü i guxãma i pemax.
29 Rü nhu̱xma na Cristuarü peixĩgüxü̃, rü ngẽmaca̱x waxi nixĩ na aixcuma Abrã́ũtaagü peixĩgüxü̃. Rü ngẽmaca̱x i pema rü tá ta penajaxu i guxü̃ma ga jema Abrã́ũmaã inaxunetaxü̃ ga Tupana.
