Gárataanecü̃ãꞌ 4:1-31
4 Rü nhu̱xma rü tá pemaã chanango̱xẽẽ i ngẽma marü pemaã nüxü̃ chixuxü̃. Rü dücax, ngẽxguma wüxi i buxü̃ junatügu, rü ngẽma buxü̃ rü tama ngẽxgumatama nanajaxu i nanatüarü ngẽmaxü̃gü. Rü woo guxü̃ma i nanatüarü ngẽmaxü̃ãrü jora jixĩgu, notürü ngẽxü̃rüüxü̃ i nanatüarü puracütanüxü̃rüü̃mare nixĩ nhu̱xmata naja̱x.
2 Rü ngẽmaca̱x nangẽxma i ngẽma buxü̃ãrü daruü̃ i namaã icuáxü̃ rü nüxü̃́ nüxna dauxü̃ i ngẽma nanatüarü ngẽmaxü̃gü nhu̱xmata nawa nangu ja jima taunecü ja noxri nanatü nagu unetacü na ngẽma buxü̃ rü nügümaã inacuáxü̃ca̱x.
3 Rü jexgumarüü̃ nixĩ ga tamaã nangupetüxü̃ ga noxrix. Jerü jexguma taũta Cristuxü̃ icua̱xgu, rü natüü̃wa tajexmagü ga jema naãẽgü i chixexü̃gü i nhama i naãnemaã icua̱xgüxü̃.
4 Notürü jexguma nawa nanguxgu ga jema ngunexü̃ ga inaxunetaxü̃ ga Tupana, rü núma nanamu ga Nane. Rü duü̃xü̃gürüü̃ wüxi ga ngewa nabu ga guma Nane. Rü jema Muĩsé ümatüxü̃ ga mugütüü̃wa najexma ga jexguma nabuxgu.
5 Rü jemaãcü núma nangu ga Tupana Nane na tüxü̃ ínanguxü̃xẽẽxü̃ca̱x i guxãma i jixema ga noxri mugütüü̃wa na ijexmagüxü̃. Rü jemaãcü tüxü̃ narüngü̃xẽẽ ga Tupana Nane na Tupana tüxü̃ jaxuxü̃ca̱x na aixcuma naxãcügüxü̃chi ixĩgüxü̃.
6 Rü Tupana pexna nanamu ga Naãẽ i Üünexü̃ na pexü̃ nüxü̃ nadauxẽẽxü̃ca̱x na aixcuma naxãcügüxü̃chi peixĩgüxü̃. Rü ngẽmaca̱x i nhu̱xma rü marü name i “Pa Chaunatüx”, nhaperügü nüxü̃ ja Tupana.
7 Rü ngẽmaca̱x i nhu̱xma rü Tupanaxãcüxü̃chi cuixĩ, rü tama wüxi i norü duü̃xü̃mare cuixĩ. Rü nhu̱xma na naxãcüxü̃chi cuiĩxü̃, rü norü ngúchaü̃ nixĩ na cuxna naxããxü̃ i guxü̃ma i ṯacü i noxrü ixĩxü̃.
Pauru rü jema jaxõgüxü̃ca̱x naxoegaãẽ
8 Rü ü̃pa ga jexguma taũta Tupanaxü̃ pecua̱xgu, rü perü tupananetagütüü̃wa pejexmagü rü nüxü̃ peicua̱xüü̃gü ga jema tama aixcuma Tupana ixĩgüxü̃.
9 Notürü i nhu̱xma na Tupanaxü̃ pecuáxü̃ rü nüma rü na pexü̃ nacuáxü̃, rü ¿tü̱xcüü̃ wena naxca̱x pewoeguchaü̃ i ngẽma naãẽgü i chixexü̃gü i nhama i naãnemaã icua̱xgüxü̃? ¿Rü tü̱xcüü̃ penaxwa̱xe na wena natüü̃wa pegü pengẽxmagüxẽẽxü̃ i ngẽma naãẽgü i tama aixcuma poraexü̃ i notüca̱xmamare ixĩgüxü̃?
10 Rü dücax i pemax, rü nhu̱xma rü ta ngẽma nuxcümaxü̃güxü̃ i Judéugücümagu pexĩãma woo Cristuaxü̃́ na pejaxõgüxü̃. Erü penaxaure i nhuxre i ngunexü̃gü rü nhuxre ja tawemacügü rü nhuxre ja taunecügü rü nhuxre i petagü, erü nagu perüxĩnüẽ na ngẽmaãcü Tupanape̱xewa tá peimexü̃.
11 Rü ngẽmaca̱x poraãcü chaxoegaãẽ, erü ngürüãchi notüca̱xmamare tá nixĩ ga jema puracü ga petanüwa chaxüxü̃.
12 Pa Chaueneẽgüx, pexü̃ chaca̱a̱xü̃ na chauxrüü̃ nüxü̃ perüxoexü̃ na nagu pexĩxü̃ i ngẽma Judéugüarü mugü. Erü nhu̱xma na Cristuwe charüxũxü̃ rü marü nüxü̃ charüxo na nagu chixũxü̃ ga jema mugü ga ü̃pa tama nagu pexĩxü̃. Rü dücax, jexguma noxri petanüwa chajexmagu rü tama choxü̃ pexo, rü ngẽmaca̱x chanaxwa̱xe i nhu̱xma rü ta chauga pexĩnüẽ.
13 Rü pema rü marü nüxü̃ pecua̱x rü jexguma noxri pemaã nüxü̃ chixuxgu ga Tupanaãrü ore i mexü̃, rü jema na chiḏaawexü̃gagu nixĩ ga petanügu charüxã́ũxü̃ rü pemaã nüxü̃ chixuxü̃ ga Tupanaãrü ore.
14 Rü jema ḏaawe ga choxü̃́ jexmaxü̃, rü woo pexca̱x rü wüxi ga wa̱xtümüü̃ nixĩ, notürü tama choxü̃ pexo rü tama choxü̃ ípeta̱xüchi. Notürü meãma choxü̃ pejauxgü nhama wüxi ga Tupanaãrü orearü ngeruü̃ i dauxü̃cü̱̃ã̱x chiĩxü̃rüü̃. Rü nhama Ngechuchu ja Cristu chiĩxü̃rüü̃, meãma choxü̃ pejauxgü.
15 ¿Notürü ṯacü e̱xna nangupetü namaã ga jema perü taãẽ ga noxri pexü̃́ jexmaxü̃? Erü pemaã nüxü̃ chixu rü noxri petanüwa chajexmagu rü poraãcü chamaã petaãẽgü. Rü jexguma chi pexü̃́ natauxchagu, rü pemaã nanguxü̃gu, rü chi pexetü pejaxu na choxna penaxãxü̃ca̱x, jerü jemaãcü poraãcü chamaã petaãẽgü ga jexguma.
16 ¿Notürü ṯacü pexü̃ naxüpetü i nhu̱xmax? ¿Pexca̱x rü e̱xna perü uwanü chixĩ jerü pemaã nüxü̃ chixu ga Tupanaãrü ore i aixcuma ixĩxü̃?
17 Rü ngẽma duü̃xü̃gü i pexü̃ ngúexẽẽxü̃ na Judéugücümagu na pexĩxü̃ca̱x, rü pegu narüxĩnüẽneta, tama aixcuma ṯacü rü mexü̃ca̱x nadaugü. Erü nümagü rü toxna pexü̃ nixĩgachixẽẽchaü̃ na ngẽmaãcü naga pexĩnüẽxü̃ca̱x.
18 Rü ngẽma togü rü marü name na pegu naxĩnüẽxü̃, notürü nanaxwa̱xe na perü mexü̃ca̱x nadaugüxü̃ i guxü̃guma. Rü tama name na petanüwa changẽxmaguxicatama perü mexü̃ca̱x na nadaugüxü̃ i ngẽma togü.
19 Pa Chauxacügüx, wenaxãrü nhama wüxi i mama ngĩxãcümaã ngu̱xnecacürüü̃ poraãcü pexca̱x ngúxü̃ chinge na aixcuma meã Cristuaxü̃́ pejaxõgüxü̃ca̱x rü aixcuma naxca̱x na pemaxẽxü̃ca̱x. Rü ngẽmaãcü tá chixĩ nhu̱xmatáta Cristu naxwa̱xexü̃rüü̃ peixĩgü i perü maxü̃wa.
20 Rü chierü nhu̱xmatama pexü̃tawa changẽxmagu na pemaã chidexaxü̃chixü̃ca̱x, rü tama nhu̱xmarüü̃ pexca̱x chanaxümatümarexü̃ca̱x. Erü nhu̱xma rü tama nüxü̃ chacua̱x na ṯacügu pemaã charüxĩnüxü̃.
Ore i cua̱xruü̃ i Abrã́ũxü̃taxü̃ ga Agáchiga rü nama̱xü̃chi ga Charachiga
21 Rü pema na ngẽma Muĩsé ümatüxü̃ i mugütüü̃wa pegü pengẽxmagüxẽẽchaü̃xü̃, rü chanaxwa̱xe i chamaã nüxü̃ peixu ngoxi aixcuma nüxü̃ pecuá na nhuxũ nhaxü̃ i ngẽma mugü.
22 Erü ngẽma mugüwa nüxü̃ tadau rü Abrã́ũ rü nüxü̃́ najexma ga taxre ga nane. Rü wüxi ga nane rü naxü̃taxü̃ ga Agáwa nüxü̃́ najexma, rü naĩ ga nane rü nama̱xü̃chi ga Charawa nüxü̃́ najexma.
23 Rü guma nane ga naxü̃taxü̃wa nüxü̃́ jexmacü, rü nabu jerü jema nixĩ ga norü ngúchaü̃ ga Abrã́ũ. Notürü guma nane ga nama̱xü̃chiwa nüxü̃́ jexmacü, rü nabu jerü jemaãcü inaxuneta ga Tupana.
24 4:24-25 Rü pemaã nüxü̃ chixu i ngẽma ore erü ngẽmawa nangẽxma i ṯacü i aixcuma ixĩxü̃ i pexca̱x chango̱xẽẽchaü̃xü̃. Rü jema taxre ga ngexü̃gü rü taxre i cua̱xruü̃gü nixĩgü na ngẽmawa nüxü̃ icuáxü̃ca̱x na nhuxãcü Tupana duü̃xü̃güxü̃ rüngü̃xẽẽxü̃ na naxü̃tawa nangugüxü̃ca̱x. Rü jema nüxĩraü̃xü̃ ga norü ngü̃xẽẽ nixĩ ga jexguma Chinaĩãrü ma̱xpǘnewa Muĩséna naxããgu ga norü mugü na naga naxĩnüẽxü̃ca̱x ga duü̃xü̃gü. Rü jema mugü ga Muĩséna naxãxü̃ ga Chinaĩwa rü Agá ijixĩ ga norü cua̱xruü̃. Rü jema nge ga Agá rü naxü̃taxü̃ ijixĩ ga Abrã́ũ rü jemaca̱x ga ngĩxãcügü rü ngĩxrüü̃tama togütüü̃wa najexmagü rü tama ínanguxü̃. Rü jemaãcü ga jema nge rü wüxi i cua̱xruü̃ ijixĩ nachiga i ngẽma Judéugü i nhu̱xma maxẽxü̃ rü ngẽma mugüwe rüxĩxü̃. Erü nümagü rü nhu̱xma rü ta natüü̃wa nangẽxmagü i ngẽma mugü ga Muĩsé jaxuxü̃ ga ma̱xpǘne ga Chinaĩ ja Arábiaanewa ngẽxmanewa. Rü nhu̱xma rü ta ngẽma mugügu naxĩ rü tama nüxü̃ narüxoe.
25 Nüü̃ nadau 4:24
26 4:26-28 Notürü jema nge ga Abrã́ũ nama̱xü̃chi rü tama Agárüü̃ ijixĩ. Rü ngĩne ga Isaqui rü nabu jerü Tupanaãxü̃́ najaxõ ga Abrã́ũ ga jexguma Tupana namaã nüxü̃ ixuxgu rü tá na nüxü̃́ najexmaxü̃ ga wüxi ga nane. Rü nhu̱xma Pa Chaueneẽgüx, jixema rü ta tajaxõ i ngẽma Tupana tamaã ixunetaxü̃. Rü ngẽmaca̱x i nhu̱xma rü tama ngẽma nuxcümaxü̃güxü̃ i mugütüü̃wa tangẽxmagü. Rü ngẽmaãcü Abrã́ũ nama̱xü̃chixacügürüü̃ tixĩgü. Rü ngẽmaãcü nüxü̃ tadau na aixcuma Tupana janguxẽẽxü̃ i norü ore ga Abrã́ũ nama̱xü̃chichiga ümatüxü̃ i nhaxü̃:“¡Nataãẽ, Pa Ngecü i Ngexacücü! ¡Rü curü taãẽmaã rüxáixnaxü̃ woo tagumachire̱x na cuxãxãcüxü̃! Erü tá cuxãxãcü, rü ngẽma ngexü̃ i cuxü̃taxü̃ i cuteaxü̃́ ãxãcüxü̃ãrü jexera tá cuxü̃́ nangẽxma i cuxacügü”,nhaxü̃.
27 Nüü̃ nadau 4:26
28 Nüü̃ nadau 4:26
29 Notürü guma Abrã́ũ nane ga naxü̃taxü̃wa nüxü̃́ jexmacü, rü chixri namaxü̃ namaã ga guma Abrã́ũ nane ga Tupanaãrü unetagagu bucü. Rü ngẽxgumarüü̃ ta i nhu̱xma rü jixema i Tupanaãẽ i Üünexü̃gagu tüxü̃́ na nangẽxmaxü̃ i maxü̃, rü chixri tamaã nachopetü i ngẽma Judéugü i naxwa̱xegüxü̃ na nagu ixĩxü̃ i ngẽma mugü ga Muĩsé ümatüxü̃.
30 ¿Notürü nhuxũ nhaxü̃ i Tupanaãrü ore i ümatüxü̃wa? Rü dücax, ngẽmawa Abrã́ũmaã nüxü̃ nixu ga na ngĩxü̃ ínatáxü̃ca̱x ga naxü̃taxü̃ ngĩnemaã, jerü taxucürüwama jema ngĩnemaã najajauxje ga norü jemaxü̃ ga nama̱xwaxü̃chixü̃cü ga naneãrü tá ixĩxü̃.
31 Rü ngẽmaãcü, Pa Chaueneẽgüx, rü nüxü̃ tadau rü tama Abrã́ũ naxü̃taxü̃xãcügürüü̃ tixĩgü, erü tama ngẽma mugütüü̃wa tangẽxmagü. Notürü Abrã́ũ nama̱xü̃chixacügürüü̃ tixĩgü, erü Tupanaãrü unetagagu tüxü̃́ nangẽxma i tórü maxü̃.
