Gárataanecü̃ãꞌ 5:1-26
5 Rü nhu̱xma ja Cristu rü marü tüxü̃ ínanguxü̃xẽẽ na tama ngẽma mugütüü̃wa ingẽxmagüxü̃ca̱x. Rü ngẽmaca̱x name nixĩ i pegüna pedaugü na tama wena natüü̃wa pegü pengẽxmagüxẽẽxü̃ca̱x i ngẽma mugü.
2 ¡Rü choxü̃́ iperüxĩnüẽ! Rü chama i Pauru rü pemaã nüxü̃ chixu, rü ngẽxguma chi nagu pexĩxgu na pegü ípewiecha̱xmüpe̱xechiraü̃xü̃ na ngẽmaãcü penajaxuxü̃ca̱x i perü maxü̃, rü ngẽxguma ja Cristu rü chi taxuwama pexü̃́ name.
3 Rü wena pemaã nüxü̃ chixu rü ngẽxü̃rüü̃ i jatü i nügü íwiecha̱xmüpe̱xechiraü̃chaü̃xü̃ na ngẽmaãcü Tupanape̱xewa namexü̃ca̱x, rü name nixĩ i nüxna nacua̱xãchi na taxucürüwa ngẽmaãcü na najauxãxü̃ i norü maxü̃ ega tama aixcuma naga naxĩnügu i guxü̃ma i togü i mugü.
4 Rü guxãma i pema i nagu rüxĩnüẽxẽ na Tupanape̱xewa peimexü̃ ega nagu pexĩxgu i ngẽma mugü, rü pemaã nüxü̃ chixu rü marü Cristuna peixĩgachi i ngẽxgumax. Rü ngẽxgumarüü̃ ta pegü nüxna pejaxü̃xẽẽ i ngẽma ngechaü̃ ga noxri Tupana namaã pexü̃ ngechaü̃xü̃.
5 Notürü Tupanaãẽ i Üünexü̃ nixĩ i tüxü̃ rüngü̃xẽẽxü̃ na jaxõgüxü̃ca̱x. Rü ngẽmaca̱x nixĩ i ínaṉg̱uxẽẽxü̃ na Cristugagu Tupanape̱xewa imexü̃.
6 Rü ngẽmaca̱x i nhu̱xma na Ngechuchu ja Cristuarü duü̃xü̃gü ixĩgüxü̃, rü nüẽ́tama nixĩ ega woo íiwiecha̱xmüpe̱xechiraü̃gu rü e̱xna tama, erü tama ngẽma nixĩ i Tupanape̱xewa tüxü̃ mexẽẽxü̃. Rü ngẽma Tupana naxwa̱xexü̃ i nhu̱xma nixĩ na aixcuma jaxõgüxü̃ rü ngẽmaãcü jigü na ingechaü̃güxü̃.
7 Pema rü meãma ipenaxügü na Cristuwe perüxĩxü̃. ¿Rü texé e̱xna pexü̃́ nüxü̃ taxoo̱x na tama naga pexĩnüẽãmaxü̃ca̱x i norü ore i aixcuma ixĩxü̃?
8 Rü pemaã nüxü̃ chixu, rü tama Tupana ga noxri pexca̱x c̱acü nixĩ ja jima pexü̃́ nüxü̃ oócü.
9 Rü name nixĩ i nüxna pecua̱xãchie rü wüxitama i duü̃xü̃ i chixexü̃ üxü̃, rü nanachixexẽẽ i guxü̃ma i togü i natanüxü̃gü, nhama wüxi i íraxü̃ i põũãrü puxẽẽruü̃ rü wüxi i taxü̃ i põũchara ipuxẽẽxü̃rüü̃.
10 Chama rü chajaxõ na tórü Cori tá pexü̃ rüngü̃xẽẽxü̃ na chama nagu charüxĩnüxü̃rüü̃ nagu perüxĩnüẽxü̃ca̱x. Notürü Tupana tá nanapocu i ngẽma duü̃xü̃ i pexü̃ chixeãẽxẽẽxü̃, rü nüẽ́tama nixĩ ega woo texé tixĩgu.
11 Rü nümaxü̃ i duü̃xü̃gü rü chauchiga nidexagü, rü nüxü̃ nixugüe na chama rü duü̃xü̃güxü̃ changúexẽẽxü̃ na nügü ínawiü̃cha̱xmüpe̱xechiraü̃xü̃ca̱x rü mugü na janguxẽẽgüxü̃ca̱x na ngẽmaãcü nüxü̃́ nangẽxmaxü̃ca̱x i maxü̃ i taguma gúxü̃. Notürü, Pa Chaueneẽgüx, rü ngẽxguma chi ngẽmaãcü duü̃xü̃güxü̃ changúexẽẽgu, rü tau chima chawe ningẽxü̃tanü i Judéugü, erü tau chima naãẽwa nangu̱x i ngẽma ore i nüxü̃ chixuxü̃ nachiga ja Cristu ga curuchagu taxca̱x jucü.
12 Notürü ngẽma duü̃xü̃gü i pexü̃ chixeãẽgüxü̃ rü pexü̃ ucu̱xẽgüxü̃ na pegü ípewiü̃cha̱xmüpe̱xechiraü̃xü̃ca̱x, rü ¿tü̱xcüü̃ e̱xna i nümagü i tau noxtacüma nügü jacaugüpüxücharexegüxü̃ ta?
13 Notürü pemax, Pa Chaueneẽgüx, rü Tupana pexca̱x naca na ngẽma mugüna ípenguxü̃xü̃ca̱x. Notürü nhu̱xma na nüxna ípenguxü̃xü̃, rü tama name i ngẽmaca̱x pexeneãrü ngúchaü̃ pexügü. Notürü name nixĩ na pegü pengechaü̃güxü̃ rü ngẽmaãcü pegü perüngü̃xẽẽgüxü̃ i wüxichigü.
14 Erü guxü̃ma i Tupanaãrü mugü rü wüxi i muwatama nango̱x rü nhanagürü:“¡Rü nüxü̃ nangechaü̃ i cumücü na cugütama cungechaü̃xü̃rüü̃!”
nhanagürü.
15 Notürü name nixĩ i pexuãẽgü erü ngẽxguma chi pegümaã penuẽgu rü pegüchi pexaiegu, rü ngürüãchi tá pegü pewoone rü tá ipejanaxoxẽẽ i Tupanaãrü ore i pewa ngẽxmaxü̃.
Ngẽma taxüneãrü ngúchaü̃ rü tama Tupanaãẽ i Üünexü̃ãrü ngúchaü̃maã nawüxigu
16 Pemaã nüxü̃ chixu, rü name nixĩ i Tupanaãẽ i Üünexü̃ naxwa̱xexü̃ãcüma pemaxẽ. Rü ngẽxguma ngẽmaãcü pemaxẽgu, rü tãũxü̃táma pexeneãrü ngúchaü̃ pexügü.
17 Erü ngẽma taxüneãrü ngúchaü̃ rü tama Tupanaãẽ i Üünexü̃ãrü ngúchaü̃maã nawüxigu. Rü ngẽma Tupanaãxẽ i Üünexü̃ãrü ngúchaü̃ rü tama taxüneãrü ngúchaü̃maã nawüxigu. Erü ngẽma taxre i ngúchaü̃gü, rü nügüchi naxaie erü wüxichigü i ngẽma rü tamaã inacuáxchaü̃. Rü ngẽmaca̱x i pema rü taxucürüwa penaxü i ngẽma pematama penaxwa̱xexü̃.
18 Notürü ngẽxguma Tupanaãẽ i Üünexü̃ pemaã icua̱xgux, rü marü tama ngẽma nuxcümaxü̃güxü̃ i mugütüü̃wa pengẽxmagü.
19 Rü meãma nango̱x na nhuxãcü namaxẽxü̃ i ngẽma duü̃xü̃gü i naxü̃neãrü ngúchaü̃ ügüxü̃, rü naĩ i ngemaã maxẽxü̃, rü airugürüü̃mare ixĩgüxü̃. Rü tama naxãneẽ na ṯacü rü chixexü̃ naxügüxü̃.
20 Rü tupananetachicüna̱xãgüxü̃ nicua̱xüü̃gü, rü najuüe rü nangṍxwa̱xegü, rü aigu narüxĩnüẽ, rü nachoxü̃gawa̱xegü, rü togüchi naxaie norü ngẽmaxü̃güca̱x, rü nanuxwa̱xegü, rü duü̃xü̃güxü̃ naxucu̱xẽgü na to i ngu̱xẽẽtaegu naxĩxü̃ca̱x, rü ngẽmaãcü najatoje i duü̃xü̃gü na tama wüxigu naxĩnüẽxü̃ca̱x.
21 Rü togüarü ngẽmaxü̃güca̱x nixãũxãchigü, rü nangãxẽwa̱xegü, rü peta naxügüecha, rü nanaxügü i muxü̃ma i togü i chixexü̃gü i ngẽxgumarüü̃ ixĩxü̃. Rü ngẽmaca̱x, wena pemaã nüxü̃ chixu rü guxü̃ma i ngẽma duü̃xü̃gü i ngẽmaãcü maxẽxü̃, rü nataxutáma i nachica i ngextá Tupana ãẽ̱xgacü íjiĩxü̃wa.
22 Notürü ngẽxguma Tupanaãẽ i Üünexü̃ tamaã icua̱xgu, rü nüma nixĩ i tüxü̃ nangü̃xẽẽxü̃ na jigü ingechaü̃güxü̃ca̱x, rü itaãẽgüxü̃ca̱x, rü meã jigümaã imaxẽxü̃ca̱x, rü jaxna namaã ixĩnüẽxü̃ca̱x i togü, rü togümaã imecümagüxü̃ca̱x, rü togüxü̃ rüngü̃xẽẽgüxü̃ca̱x, rü aixcuma janguxẽẽxü̃ca̱x i ngẽma nüxü̃ ixuxü̃.
23 Rü ngẽxgumarüü̃ ta Naãẽ i Üünexü̃ tüxü̃ narüngü̃xẽẽ na tama chixexü̃maã nataeguxẽẽxü̃ca̱x ega togü chixexü̃ tamaã ü̱xgux. Rü tüxü̃ narüngü̃xẽẽ na meãma jigünatama idauxü̃ca̱x na tama chixexü̃gu ij̱ixü̃ca̱x. Rü nataxuma i mugü i nachu̱xuxü̃ na naxüxü̃ i ngẽma mexü̃gü.
24 Rü ngẽma duü̃xü̃gü i aixcuma Ngechuchu ja Cristuarü duü̃xü̃gü ixĩgüxü̃, rü marü nüxü̃ narüxoe ga jema nuxcümaxü̃xü̃ ga norü maxü̃ ga chixexü̃, rü jema naxü̃neãrü ngúchaü̃gü ga chixexü̃, rü guxü̃ma ga ṯacü ga to ga ngúchaü̃ ga tama mexü̃.
25 Rü nhu̱xma na Tupanaãẽ i Üünexü̃ tüxna naxãxü̃ i tórü maxü̃, rü name nixĩ i nüma tórü maxü̃maã na inacuáxü̃.
26 Rü tama name i jigü ítarüta rü togümaã tanuãẽ, rü bai na ṯacüca̱x ixãũxãchixü̃.
