Gárataanecü̃ãꞌ 6:1-18
6 Pa Chaueneẽgüx, ngẽxguma chi texéxü̃ peda̱xgu na ṯacü rü chixexü̃gu tanguxü̃, rü pema na Tupanaãẽ i Üünexü̃ naxwa̱xexü̃ãcüma na pemaxẽxü̃, rü name nixĩ i tüxü̃ pengechaü̃ãcüma tüxü̃ perüngü̃xẽẽ na itajarüwe̱xãchiãẽxü̃ca̱x. ¡Notürü pexuãẽgü i wüxichigü, na tama pema rü ta nagu pej̱ixü̃ca̱x i ngẽma chixexü̃!
2 ¡Rü pegü perüngü̃xẽẽgü i ngẽxguma texé petanüwa guxchaxü̃gü tüxü̃́ ngẽxmagu! Erü ngẽxguma ngẽmaãcü pegü perüngü̃xẽẽgu, rü ngẽmaãcü tá pejanguxẽẽ i ngẽma Cristu pexü̃ muxü̃.
3 Rü ngẽxguma texé nagu rüxĩnügu na wüxi i ṯacü tixĩxü̃, rü tügütama tawomüxẽẽ, erü Tupanape̱xewa rü taxuü̃machire̱x tixĩ.
4 Rü ngẽmaca̱x i wüxichigü, rü name nixĩ i tügüarü maxü̃tama tangugü. Rü ngẽxguma namexgu i tümaãrü maxü̃, rü tügümaã tátama tataãẽ, rü nataxuma i tü̱xcüü̃ togüarü maxü̃wa tügü tangugüarü maxü̃ã̱x.
5 Erü tanaxwa̱xe i wüxichigü na tümaãrü maxü̃natama tadauxü̃ i Tupanape̱xewa.
6 Rü jíxema najaxuxe i ngu̱xẽẽtae i Tupanaãrü orewa rü tanaxwa̱xe na tümaãrü ngu̱xẽẽruü̃maã taṉg̱auxü̃ i nagúxü̃raü̃xü̃ i tümaãrü ngẽmaxü̃gü.
7 ¡Rü pexuãẽgü na tama ípetüexü̃ca̱x i perü maxü̃wa! Erü taxucürüwa texé Tupanaxü̃ tawomüxẽẽ. Rü jíxema chixexü̃ ǘxe, rü chixexü̃ tá tajaxu. Rü jíxema mexü̃ ǘxe, rü mexü̃ tá nixĩ i tajaxuxü̃.
8 Rü jíxema tümaxüneãrü ngúchaü̃ üxe, rü ngẽma tümaxü̃neãrü ngúchaü̃ rü tá juwa tüxü̃ naga. Notürü jíxema Tupanaãẽ i Üünexü̃ãrü ngúchaü̃ üxe, rü ngẽma Tupanaãẽ i Üünexü̃wa tá tanajaxu i maxü̃ i taguma gúxü̃.
9 Rü ngẽmaca̱x tama name na nüxü̃ rüchauexü̃ na mexü̃ ixüexü̃. Erü ngẽxguma chi tama nüxü̃ rüchauegu, rü düxwa mexü̃ tá tajaxu i Tupanaxü̃tawa.
10 Rü ngẽmaca̱x ngẽxguma tüxü̃́ nangẽxmagu na ṯacümaã togüxü̃ rüngü̃xẽẽxü̃, rü name nixĩ i guxãxü̃ma tarüngü̃xẽẽ. Notürü jexera tanaxwa̱xegü na nüxü̃ rüngü̃xẽẽgüxü̃ i ngẽma taeneẽgü rü taeja̱xgü i jaxõgüxü̃.
Pauru najaxucu̱xẽgü ga jema jaxõgüxü̃ rü nüxü̃ narümoxẽ
11 Rü nuã tá ichanaxügü na chamaxü̃chima cha̱xme̱xmaã pexca̱x chanaxümatüxü̃ i nhaã popera. ¡Rü dücax, nüxü̃ peda̱x i ngẽma chama chaxümatüxü̃ na nhuxãcü natamatüxü̃!
12 Rü ngẽma Judéugü i pexü̃ ngúexẽẽxü̃ na pegü ípewiecha̱xmüpe̱xechiraü̃güxü̃ca̱x, rü ngẽmaãcü pexü̃ namu erü nanataãẽxẽẽgüchaü̃ i ngẽma togü i Judéugü na tama nachi naxaiexü̃ca̱x nagagu na Ngechuchu ja Cristu ga curuchagu jucüaxü̃́ na jaxõgüãxü̃.
13 Erü woo i nümagü na ínawiü̃cha̱xmüpe̱xechiraü̃xü̃, rü tama najanguxẽẽ i guxü̃ma i mugü. Notürü nümagü rü nanaxwa̱xegü na pegü ípewiü̃cha̱xmüpe̱xechiraü̃xü̃, na jixcama nügü jacua̱xüü̃güxü̃ca̱x rü togü i Judéugümaã nüxü̃ na jaxuxü̃ca̱x na pema rü ta naxrüü̃ nagu pexĩxü̃ i ngẽma nuxcümaxü̃güxü̃ i mugü.
14 Notürü i chama rü chaugü chicua̱xüü̃ erü nüxü̃́ chajaxõ ja tórü Cori ja Ngechuchu ja Cristu ga curuchagu jucü. Rü ngẽmaca̱xicatama nixĩ i chaugü chicua̱xüü̃xü̃. Rü nhu̱xma na Cristu ga curuchagu jucüaxü̃́ chajaxõxü̃, rü marü tama nagu charüxĩnü i nhama i naãne rü norü ngẽmaxü̃gü. Rü ngẽxgumarüü̃ ta i nhama i naãne rü marü tama choxü̃ nacuáxchaü̃.
15 Erü ngẽxguma Ngechuchu ja Cristuarü duü̃xü̃gü ixĩgügu, rü Tupanape̱xewa rü taxuü̃ma nixĩ i ngẽma na íiwiecha̱xmüpe̱xechiraü̃xü̃ rü e̱xna tama. Notürü ngẽma aixcuma nape̱xewa mexü̃ nixĩ na naxüchicüüxü̃ i tórü maxü̃ na ngexwacaxü̃xü̃ i duü̃xü̃gü ixĩgüxü̃ca̱x.
16 Rü Tupanana naxca̱x chaca na pexü̃ nataãẽxẽẽgüxü̃ca̱x rü nüxü̃́ pengechaü̃tümüü̃güxü̃ca̱x i guxãma i pema i aixcuma janguxẽẽgüxe i ngẽma pemaã nüxü̃ chixuxü̃, rü guxãma ja jíxema aixcuma Tupanaãrü duü̃xü̃gü ixĩgüxe.
17 Rü nhu̱xmawena rü tama chanaxwa̱xe na texé ṯacü rü guxchaxü̃gü choxna ãxü̃. Erü chama rü aixcuma tórü Cori ja Ngechuchuarü duü̃xü̃ chixĩ. Rü ngẽma chorü o̱xrigüchica i chawa ngẽxmagüxü̃wa nüxü̃ pecua̱x na aixcuma jiĩxü̃ i ngẽma.
18 Pa Chaueneẽgüx, chanaxwa̱xe i tórü Cori ja Ngechuchu ja Cristu pexü̃ narüngü̃xẽẽ i guxãma i pemax. Rü ngẽmaãcü jiĩxü̃.
Rü nuãma pexna,
Pauru
