Gênesis 27:1-46
27 Rü Isáqui rü marü nayaxüchi rü natauxetü. Rü wüxi ga ngunexü̃gu rü nane ga rüyamaecü ga Echaúca̱x naca. Rü nhanagürü nüxü̃: —Pa Chaunex —nhanagürü. Rü Echaú nanangãxü̃ rü: —¿Nhuxũ nhacuxü̃, Pa Papáx? —nhanagürü.
2 Rü yexguma ga Isáqui rü nhanagürü: —Cuma choxü̃ cudau nax marü chayaxüchixü̃ rü ngexü̃rüüxü̃ i nhaa ngunexü̃gügu rü tá chayu.
3 Rü ngẽmaca̱x chanaxwa̱xe i cunayaxu ya curü würa rü naixnecüwa cuxũ rü cuyamaxnee rü naexü̃ta quima̱x.
4 ¡Rü nhu̱xũchi cha̱u̱xca̱x naxü i õna i dextanüxü̃ i chaua̱xwa rüchixmaexü̃! ¡Rü nua nange nax chanangṍxü̃ca̱x! Rü nhu̱xũchi tá Tupanaégagu mexü̃ cumaxã chaxuegu naxü̃pa nax chayuxü̃ —nhanagürü.
5 27:5-6 Notürü yexguma nane ga Echaúmaxã yadexa̱xgu ga Isáqui, rü Rebéca rü bexma yéma irüxĩnü. Rü yemaca̱x, yexguma Echaú nanatüca̱x dauxchitawa maxneewa naxũyane, rü ngĩma ga Rebéca rü naxca̱x ica ga Yacú ga guma ngĩne ga rübumaecü. Rü ngĩgürügü nüxü̃: —Dücax, tüxü̃ chaxĩnü ya cunatü nax cuenexẽ ya Echaúmaxã nax ítidexaxü̃. Rü nhatagürü nüxü̃:
6 Nüü̃ nadau 27:5
7 “¡Maxneewa naxũ rü cha̱u̱xca̱x naexü̃ta ima̱x! ¡Rü naxü i õna i dextanüxü̃ i chaua̱xwa rüchixmaexü̃! ¡Rü nua nange nax chanangṍxü̃ca̱x! Rü nhu̱xũchi tá Tupanaégagu mexü̃ cumaxã chaxuegu naxü̃pa nax chayuxü̃”, nhatagürü nüxü̃.
8 ¡Rü dücax, Pa Chaunex, choxü̃́ irüxĩnü i nhaa cumaxã nüxü̃ chixuxü̃!
9 ¡Rü yéa cábrapǘxü̃wa naxũ rü ngẽma rümemaexü̃tanüwa nayaxu i taxre i cábraxacügü! Rü chama rü ngẽmawa tá tümaca̱x chanamexẽxẽ i õna i dextanüxü̃ i tümaa̱xwa rüchi̱xmaexü̃.
10 Rü cuma tá nixĩ i tümaca̱x ngẽ́ma cungexü̃ nax tachibüxü̃ca̱x, rü ngẽmaãcü tá Tupanaégagu mexü̃ cumaxã taxuegu naxü̃pa nax tayuxü̃ —ngĩgürügü.
11 Notürü nüma ga Yacú rü naéxü̃ nangãxü̃ rü nhanagürü: —Chauenexẽ rü naxãxta̱xaxü̃ne, notürü chama rü tama ngẽxgumarüxü̃ chixĩ.
12 Rü ngẽxguma Papá choxü̃ ingṍgü̱xgu rü choxü̃ tacua̱xgu, rü nagu tá tarüxĩnü nax tümagu chidauxcüraxü̃xü̃. Rü ngẽxguma rü taxũtáma mexü̃ chamaxã taxuegu, rü chixexü̃ tá chamaxã taxuegu —nhanagürü.
13 Notürü ga ngĩma ga naé rü inangãxü̃ rü ngĩgürügü: —Pa Chaunex, rü ngẽxguma chixexü̃ cumaxã taxuegu̱xgu ¡rü chagu nangu! Notürü i cumax, rü chanaxwa̱xe i cunaxü i ngẽma cumaxã nüxü̃ chixuxü̃. ¡Rü paxa nawa naxũ i ngẽma cábraxacügü! —ngĩgürügü.
14 Rü yexguma ga Yacú rü nawa naxũ ga yema cábraxacügü rü naéca̱x yéma nanagagü. Rü ngĩma ga naé rü inamexẽxẽ ga õna ga idextanüxü̃ ga Isáquia̱xwa rüchi̱xmaexü̃.
15 Rü yemawena inayaxu ga rümemaexü̃ ga Echaúchiru ga ĩpatagu namaxã nanguxü̃xü̃. Rü yemagu iyacu̱xẽxẽ ga guma ngĩne ga rübumaecü ga Yacú.
16 Rü nhu̱xũchi yema cábraxacücha̱xmüxü̃maxã inaxüxchiü̃chacüxü ga Yacú. Rü ínangexta̱xaremüxü̃wa rü ta inaxǘ ga yema naxcha̱xmü.
17 Rü nüxna inaxã ga yema idextanüxü̃ ga õna rü poũ ga namexẽẽxü̃.
18 Rü nüma ga Yacú rü tümaxü̃tagu naxücu ga nanatü ga ítayexmaxü̃wa, rü nhanagürü tüxü̃: —Pa Papáx, marü íchangu —nhanagürü. Rü tüma rü ítaca, rü nhatagürü: —¿Ngexcürüücü ya chaune quixĩxü̃? —nhatagürü.
19 Rü yexguma ga Yacú rü: —Chama rü cune ya yacü ya Echaú chixĩ. Rü marü chanaxü i ngẽma chamaxã nüxü̃ quixuxü̃. ¡Rü írüda rü írüto nax cunangṍxü̃ca̱x i nhaa naexü̃machi i cuxca̱x chimáxü̃, rü nhu̱xũchi mexü̃ chamaxã naxuegu! —nhanagürü.
20 Rü yexguma ga Isáqui rü nüxna taca, rü nhatagürü: —¿Nhuxãcü paxa cuxãéxü̃, Pa Chaunex? —nhatagürü. Rü nüma ga Yacú rü tüxü̃ nangãxü̃, rü nhanagürü: —Nüma ya Cori ya curü Tupana choxü̃ narüngü̃xẽẽ rü ngẽmaca̱x paxama nüxü̃ ichayangau —nhanagürü.
21 Notürü ga nüma ga Isáqui rü nhanagürü nüxü̃: —¡Cax nua naxũ! Rü cuxü̃ chingṍgüchaü̃ rü aixcuma chaune ya Echaú quixĩ —nhanagürü.
22 Rü Yacú rü nanatüxü̃tawa naxũ nax nüxü̃ tingṍgüxü̃ca̱x. Rü yexguma ga Isáqui rü nhanagürü: —Cuga rü Yacúga nixĩ notürü cuchacüxü rü Echaúchacüxü nixĩ —nhanagürü.
23 27:23-24 Rü yemaacü tama Yacúxü̃ tacua̱x, yerü poraãcü naxãxta̱xachacüxü naenexẽ ga Echaúrüxü̃. Notürü yexguma marü tá mexü̃ namaxã taxueguchaxü̃gu rü wenaxarü nüxna taca, rü nhatagürü nüxü̃: —¿Aixcuma yixĩxü̃ i chaune ya Echaú quixĩxü̃? —nhatagürü. Rü nüma ga Yacú rü tüxü̃ nangãxü̃, rü: —Ngü̃, Echaú chixĩ —nhanagürü.
24 Nüü̃ nadau 27:23
25 Rü yexguma ga nanatü rü nhatarügü nüxü̃: —¡Cü, choxü̃ nachibüxẽxẽ, Pa Chaunex, nax chanangṍxü̃ca̱x i ngẽma cuexü̃! Rü ngẽmawena tá mexü̃ cumaxã chaxuegu —nhatarügü. Rü nüma ga Yacú tüxü̃ nachibüxẽxẽ ga nanatü rü wíũ rü ta tüxna nanaxã. Rü nüma ga Isáqui rü nachibü rü naxaxe.
26 Rü yexguma ga Isáqui rü nhanagürü nüxü̃: —¡Chorü ngaicamánaxüra naxũ, Pa Chaunex, rü choxü̃ nachúxu! —nhanagürü.
27 Rü yexguma Yacú nanatüna nangaicamagu nax nachúaxü̃ca̱x, rü nüma ga Isáqui rü nanechirugu nawãxĩ. Rü yexguma ga Isáqui rü mexü̃ namaxã naxuegu, rü nhanagürü: —Nhaa nixĩ i naema ya chaune ya Echaú. Rü ngẽma naema rü nhama wüxi i naane i chi̱xemaxü̃ i Tupana mexü̃ namaxã ueguxü̃rüxü̃ nixĩ.
28 ¡Rü Tupana cuxna naxã ya pucü rü mea naxügü i cunetügü nax namuxü̃ca̱x i curü trígu rü curü wíũ! ¡Rü muxũchixü̃ i duü̃xü̃gü cuxü̃́ puracüe!
29 ¡Rü cuxme̱xwa nangexmagü i muxü̃ i nachixü̃anegü! ¡Rü cueneegümaxã inacua̱x rü cupe̱xegu nacaxã́pü̱xügü! Rü yíxema chixexü̃ cumaxã uegugǘxe, rü Tupana rü tá chixexü̃ tümamaxã naxuegu. Rü yíxema mexü̃ cumaxã uegugǘxe rü Tupana rü tá mexü̃ tümamaxã naxuegu —nhanagürü.
30 Rü yexguma Isáqui nüxü̃ rüchaxgu ga Yacúmaxã nax mexü̃ naxueguxü̃, rü ínaxũxũ ga Yacú. Rü nawe ínanguama ga Echaú ga maxneewa ne naxũxü̃.
31 Rü nüma rü ta ga Echaú rü nanatüca̱x nanaxü ga õna ga dextanüxü̃ ga chíanexü̃. Rü nanatüxü̃tawa nanange. Rü nhanagürü tüxü̃: —Pa Papáx ¡írüda rü nangõ̱x i nhaa naexü̃machi i chama cuxca̱x chimáxü̃, rü nhu̱xũchi mexü̃ chamaxã naxuegu! —nhanagürü.
32 Rü nüma ga Isáqui rü nüxna naca rü nhanagürü: —¿Texé quixĩ? —nhanagürü. Rü nüma ga Echaú rü tüxü̃ nangãxü̃ rü nhanagürü: —Chama nixĩ i cune ya yacü ya Echaú chixĩxü̃ —nhanagürü.
33 Rü nüma ga Isáqui rü poraãcü naba̱i̱xãchiãxẽ, rü niduxruga, rü nhanagürü: —¿Ẽ̱xna texé tixĩ ya yíxema maxneewa ũxẽ rü cha̱u̱xca̱x nua nangexe i ngẽma õna i dextanüxü̃? Chama rü marü chanangõ̱x i guxü̃ma i norü õna cuxü̃pa nax ícunguxü̃. Rü marü mexü̃ namaxã chaxuegu, rü nhu̱xmax i nüma rü marü nanayaxu i ngẽma mexü̃ —nhanagürü.
34 Rü yexguma ga Echaú yema nanatü namaxã nüxü̃ ixuxü̃xü̃ naxĩnügu, rü poraãcü naxaxu. Rü aita naxüãcüma nhanagürü: —Pa Papáx ¡chamaxã rü ta mexü̃ naxuegu! —nhanagürü.
35 Notürü nüma ga Isáqui rü nanangãxü̃ rü nhanagürü: —Marü nua naxũ ya cuenexẽ rü choxü̃ nawomüxẽxẽ, rü ngẽmaca̱x mexü̃ namaxã chaxuegu, rü nüma nanayaxu i ngẽma mexü̃ i cuxca̱xchire̱x ixĩxü̃ —nhanagürü.
36 Rü yexguma ga Echaú rü tüxü̃ nangãxü̃, rü nhanagürü: —Yemaca̱x yixĩxü̃ ga Yacúgu naxüégagüãxü̃. Rü marü norü taxre nixĩ nax yadoraxü̃ rü choxü̃ nawomüxẽẽxü̃. Rü noxri rü marü choxna nayapu i ngẽma nax charüyamaexü̃ca̱x choxna üxü̃. Rü nhu̱xmax rü choxna nayapu i ngẽma mexü̃ i chamaxã cuxueguchaü̃chiréxü̃. ¿Rü nataxuxü̃ma i to i mexü̃ i choxü̃́ ícuyaxǘxẽẽxü̃? —nhanagürü.
37 Rü yexguma ga Isáqui rü nanangãxü̃, rü nhanagürü: —Dücax, chama rü marü Yacúmaxã chanaxuegu nax naxme̱xwa cungexmaxü̃ rü namaxã nüxü̃ chixu nax guxü̃ma i natanüxü̃gü rü ta naxme̱xwa nangexmagüxü̃. Rü ngẽxgumarüxü̃ ta namaxã chanaxuegu nax namuxü̃ i norü trígu rü norü wíũchiü. Rü nhu̱xmax Pa Chaunex ¿rü ta̱xacü tá cuxca̱x chaxüxü̃? —nhanagürü.
38 Rü nüma ga Echaú rü nanatüxü̃ naca̱a̱xü̃ama, rü nhanagürü: —¿Ẽ̱xna wüxixicatama i mexü̃ nixĩ i cuxueguxü̃? ¡Rü chamaxã rü ta mexü̃ naxuegu! —nhanagürü. Rü aita naxüãcüma naxaxu.
39 Rü yexguma ga nanatü ya Isáqui, rü nhatagürü nüxü̃: —Cuma rü ngẽma naane i mexü̃arü yáxü̃wa tá cumaxü̃ i ngextá taguma ínapuxü̃wa.
40 Rü curü taramaxã tá cugü ícupoxü̃, rü cuenexẽarü duü̃xü̃ tá quixĩ. Notürü ngẽxguma cumuarü duü̃xü̃ã̱xgu, rü tá cuenexẽna ícunguxuchi —nhatagürü.
Yacú rü Echaúcha̱xwa nixũ
41 Rü yexgumacürüwa ga Echaú rü Yacúchi naxai naxca̱x ga yema mexü̃ ga Yacúmaxã taxueguxü̃ ga nanatü. Rü nüma ga Echaú rü nhaxü̃gu narüxĩnü: “Rü Papá rü paxa tá tayu, rü tümawena rü tá chayama̱x ya chauenexẽ ya Yacú”, nhaxü̃gu narüxĩnü.
42 Rü yexguma yema Echaú nagu rüxĩnüxü̃ nacua̱xgu ga Rebéca, rü Yacúca̱x ingema, rü ngĩgürügü nüxü̃: —Dücax, cuenexẽ ya Echaú rü nanu rü cuxü̃ nimáxchaü̃ naxca̱x i ngẽma mexü̃ i cunatü cumaxã ueguxü̃.
43 Rü ngẽmaca̱x, Pa Chaunex ¡rü choxü̃́ irüxĩnü, rü nhu̱xmatama Aráũanewa naxũ i chauenexẽ ya Labáũchiü̃wa!
44 27:44-45 ¡Rü ngẽ́ma nangexma i nhuxre ya taunecü nhu̱xmatáta nangüxmü ya cuenexẽ rü nüxü̃ iyanangüma ga yema namaxã cuxüxü̃! Rü ngẽxguma marü nüxü̃ iyanangümagu, rü cuxca̱x tá ngẽ́ma chamuga nax cutáeguxü̃ca̱x. Erü tama chanaxwa̱xe i wüxitama i ngunexü̃gu nax choxü̃́ peyuexü̃ i pema i taxre i chaunegü —ngĩgürügü.
45 Nüü̃ nadau 27:44
46 Rü yemawena ga Rebéca rü Isáquimaxã iyadexa, rü ngĩgürügü: —Düxwa nüxü̃ charüchau i nacüma i ngẽma taxre i Etéutanüxü̃ i Echaú namaxã ãmaxü̃. Rü ngẽxguma chi Yacú rü wüxi i ngẽma númacüã̱x i Etéutanüxü̃maxã naxãxma̱xgu, rü narümemae nixĩ i noxtacüma chayuxü̃ —ngĩgürügü.
