Gênesis 32:1-32
32 Rü nüma ga Yacú rü inixũchigüama. Rü namagu nüxü̃ nangau ga nhuxre ga dauxü̃cüã̱x ga Tupanaarü orearü ngeruü̃gü.
2 Rü yexguma Yacú nüxü̃ da̱xgu rü nhanagürü: —Nhaagü rü Tupanaarü churaragü nixĩ —nhanagürü. Rü yemaca̱x Maanaĩ́gu nanaxüéga ga yema nachica.
3 Rü Yacú rü inanamuãchitanü ga nhuxre ga norü duü̃xü̃gü nax Cheíarü naanewa ga Edóü̃wa naxĩxü̃ca̱x nax naenexẽ ga Echaúmaxã nüxü̃ yanaxugüxü̃ca̱x ga yéma tá nax nanguxü̃.
4 Rü nhaa dexamaxã yéma nanamugü: “Nhapegürü tá nüxü̃ ya chauenexẽ ya Echaú: ‘Cuenexẽ ya Yacú ya curü duü̃xü̃ ixĩcü rü cuxü̃ narümoxẽ. Rü marü nhuxre ya taunecü rü tórü tutü ya Labáũxü̃tawa chayexma. Rü nhu̱xmax rü marü nüxna íchaxũxũ.
5 Rü choxü̃́ nangexma i chauxü̃nagü i wocagü rü búrugü rü carnérugü rü chorü duü̃xü̃gü iyatüxü̃gü rü ingexü̃gü. Rü ngẽmaca̱x chaugüpe̱xegu cuxca̱x ngẽ́ma chanamugü i chorü duü̃xü̃gü nax cumaxã nüxü̃ yanaxugüxü̃ca̱x i nhaa chorü ore nax marü chatáeguxü̃. Rü chierüna mea choxü̃ cuyauxgu i ngẽxguma cuxü̃tawa changuxgu’, nhapegürü tá”, nhanagürü ga Yacú.
6 Rü yexguma marü Yacúca̱x nawoegu̱xgu ga norü duü̃xü̃gü, rü nhanagürügü: —Marü naxü̃tawa tangugü ya cuenexẽ ya Echaú. Rü nüma rü tá nua naxũ nax nümatama cuxü̃ íyadauxü̃ca̱x namaxã i 400 i norü duü̃xü̃gü —nhanagürügü.
7 Rü yexguma yemaxü̃ naxĩnügu ga Yacú, rü poraãcü namuü̃ rü naxoegaãxẽ. Rü yemaca̱x taxregu nayatoye ga norü duü̃xü̃gü rü norü carnérugü rü wocagü rü camérugü.
8 Yerü nhaxü̃gu narüxĩnü: “Ngẽxguma Echaú nua nguxgu rü ngürüãchi nadaia̱xgu i ngẽma wüxitücumü i duü̃xü̃gü, rü ngẽma totücumü rü yoxni nibuxmü”, nhaxü̃gu narüxĩnü.
9 Rü nhu̱xũchi inanaxügü ga nax nayumüxẽ́xü̃, rü nhanagürü: “Pa Cori Pa Tupana ya Chorü O̱xi ya Abraáũarü Tupana rü Chaunatü ya Isáquiarü Tupanax, cuma rü marü chamaxã nüxü̃ quixu nax chorü naaneca̱x rü chautanüxü̃güca̱x chatáeguxü̃ rü cuma rü tá mea choxna cudauxü̃.
10 Chama rü taxuwama chame nax ngẽmaãcü chamaxã cumecümaxü̃ rü aixcuma mea choxü̃ curüngü̃xẽẽxü̃. Rü yexguma noxri chaunatüna íchaxũxũ̱xgux rü nhaatama Yurdáũ i natüwa chixüegu rü taxuxü̃ma choxü̃́ nayexma rü chorü naixmena̱xãxicatama. Notürü i nhu̱xmax nax chatáeguxü̃ rü choxü̃́ nangexma i taxretücumü i muxü̃ i duü̃xü̃gü.
11 Rü nhu̱xmax rü cuxna chaca rü chanaxwa̱xe i choxü̃ ícupoxü̃ nüxna ya chauenexẽ ya Echaú. Rü nüxü̃ chamuü̃ erü ngürüãchi nuxã toxü̃ nayadai rü ngẽmaãcü tüxü̃ nadai ya cha̱xma̱xgü rü chauxacügü.
12 Cuma rü marü meama chamaxã nüxü̃ quixu rü tá choxna nax cudauxü̃ nax ngẽmaãcü taxuxü̃ma choxü̃ üpetüxü̃ rü ngẽmaãcü i chautaagü rü nhama taxtüpechinüwa ngẽxmacü ya naxnücüte̱xerüxü̃ namuxũchixü̃ca̱x, rü ngẽmaãcü düxwa taxucürüwa texé yaxugüxü̃ca̱x”, yemaacü nayumüxẽ.
13 Rü yema chütaxü̃gu rü Yacú rü yexmatama nape. Rü nüxü̃ nidaugü ga naxü̃nagü rü yematanüwa nayadexechi ga naenexẽ ga Echaúarü ãmareruxü̃.
14 32:14-15 Rü nayamugü ga 200 ga bóyigü ga ingexü̃, rü 20 ga bóyigü ga iyatüxü̃, rü 200 ga carnérugü ga ingexü̃, rü 20 ga carnérugü ga iyatüxü̃, rü 30 ga camérugü ga yexwaca̱x buexacüxü̃, rü 40 ga wocagü, rü 10 ga wocaxacügü ga yexwaca̱x yaexü̃, rü 20 ga búrugü ga ingexü̃ rü 10 ga búrugü ga iyatüxü̃.
15 Nüü̃ nadau 32:14
16 Rü nhu̱xũchi norü duü̃xü̃güna nanamugü ga wüxitücumüchigü, rü nhanagürü nüxü̃: —¡Cü, chape̱xegu namaxã pexĩ, rü pegüna tá piyáxü̃guetanüxü̃ namaxã i wüxitücumüchigü! —nhanagürü.
17 32:17-18 Rü yema nüxíra inamuãchixü̃ ga norü duü̃xü̃, rü nanaxucu̱xẽ, rü nhanagürü nüxü̃: —Ngẽxguma tá cuxü̃ iyangauxgu ya chauenexẽ ya Echaú, rü cuxna naca̱xgu: “Rü texe nixĩ ya curü cori, rü ngextá cuxũ, rü texéarügü nixĩ i nhaa naxü̃nagü i quigagüxü̃”, rü cuma rü tá nhaãcü cunangãxü̃: “Pa Chorü Cori ya Echaúx, rü nhaa rü wüxi i curü ãmare nixĩ i cuxca̱x nua namuxü̃ ya curü duü̃ ya Yacú. Rü nüma rü toweama ne naxũ” nhacurügü tá —nhanagürü ga Yacú.
18 Nüü̃ nadau 32:17
19 Rü yexgumarüxü̃ ta ga yema togü ga duü̃xü̃gü ga inamuãchigüxü̃ rü nhanagürü nüxü̃: —¡Ngẽxguma tá pexü̃ inangauxgu ya Echaú, rü ngẽmatama orexü̃ namaxã pexu!
20 Rü nhapegü nüxü̃: “Yacú ya cuenexẽ ya cuxü̃ ngechaü̃cü rü toweama ne naxũ”, nhapegü nüxü̃! —nhanagürü ga Yacú. Rü yemaacü nayaxucu̱xẽ ga yema duü̃xü̃gü, yerü nhaxü̃gu narüxĩnü: “Nhaa ãmaregü i chape̱xegu chimugüxü̃maxã tá chanangüxmüxẽxẽ ya chauenexẽ. Rü ngẽmawena rü chamaxü̃chi tá nüxü̃ chadau. Rü bexmana ngẽmaãcü tá mea choxü̃ nayaxu”, nhaxü̃gu narüxĩnü.
21 Rü yemaacü ga yema ãmaregü rü nüxíra nügüpe̱xegu nayamugü. Rü nüma ga Yacú rü yexmatama nape ga yema chütaxü̃gu.
Yacú rü wüxi ga Tupanaarü orearü ngeruxü̃ i dauxü̃cüã̱xmaxã nügü nawogü
22 32:22-23 Rü yematama ga chütaxü̃gu rü ínarüda ga Yacú, rü tüxü̃ namuãchitanü ga guxema taxre ga naxma̱x rü yema taxre ga naxü̃taxü̃, rü gumá 11 ga nanegü. Rü wüxigu, namaxã ga guxü̃ma ga norü yemaxü̃gü, tüxü̃ nimuü̃ nawa ga yema natü ga Yurdáũarü nuxtamaxü̃ ga Yabógu ãégaxü̃.
23 Nüü̃ nadau 32:22
24 Rü yexguma Yacú nüxicatama yéma yaxüãchigu, rü wüxi ga duü̃xü̃ namaxã nügü nawogü rü nhu̱xmata yangunemare.
25 Notürü yema duü̃xü̃ rü nüxü̃ nacua̱x ga tama Yacúxü̃ nax naporamaexü̃. Rü yemaca̱x düxwa Yacútachinügu nidagü, rü nanatüxüchitachinü ga yexguma nügü inawogügu.
26 Rü yexguma ga yema duü̃xü̃ rü nhanagürü Yacúxü̃: —¡Choxü̃ inge̱x erü marü ningóonechaü̃! —nhanagürü. Rü yexguma ga Yacú rü nanangãxü̃ rü nhanagürü: —Ngẽxguma taxũtáma mexü̃ chamaxã cuxuegu̱xgu, rü taxũtáma cuxü̃ chinge̱x —nhanagürü.
27 Rü Yacúna naca ga yema duü̃xü̃ rü nhanagürü: —¿Ta̱xacü nixĩ i cuéga? —nhanagürü. Rü Yacú nanangãxü̃, rü nhanagürü: —Yacú nixĩ i chauéga —nhanagürü.
28 Rü yexguma ga yema duü̃xü̃ ga nügü namaxã inawogüxü̃, rü nhanagürü nüxü̃: —Nhu̱xma rü marü taxũtáma Yacú nixĩ i cuéga. Rü Iraéu tá nixĩ i cuéga i nhu̱xmax, erü Tupanamaxã rü duü̃xü̃gümaxã cugü icuwogü rü tama choxü̃ quinge̱x nhu̱xmata mexü̃ cumaxã chaxuegu —nhanagürü.
29 Rü yexguma ga Yacú rü nüxí nüxna naca rü nhanagürü: —Nhu̱xma chanaxwa̱xe i chamaxã nüxü̃ quixu ¿rü ta̱xacü nixĩ i cuéga? —nhanagürü. Notürü ga yema duü̃xü̃ rü nanangãxü̃ rü nhanagürü: —¿Tü̱xcüü̃ nüxü̃ cucuáxchaxü̃ i chauéga? —nhanagürü. Rü nhu̱xũchi ga yema duü̃xü̃ rü yexgumatama Yacúmaxã mexü̃ naxuegu.
30 Rü yexguma ga Yacú rü Penuégu nanaxüéga ga yema nachica. Rü ngẽma naéga rü “Tupanachiwexü̃ chadau”, nhaxü̃chiga nixĩ. Rü yemagu nanaxüéga yerü nhanagürü: —Rü woo Tupanachiwexü̃ chadau, notürü chamaxãma —nhanagürü.
31 --
32 --
