Gênesis 37:1-36
37 Rü nüma ga Yacú rü Canaã́anegu naxãchiü̃ ga ngextá nanatü ga Isáqui ü̃paacü ítaxãchiü̃xü̃gu.
Yúche rü naeneegü
2 Rü nhaa nixĩ i nachiga i Yacútanüxü̃. Rü yexguma nane ga Yúche 17 ga taunecü nüxü̃́ yexmagu, rü nüma rü carnérugüarü daruxü̃ nixĩ wüxigu namaxã ga naeneegü ga nanatüxü̃taxü̃gü ga Bíra rü Chípawaü̃güxü̃. Rü nüma ga Yúche rü nanatümaxã nüxü̃ nayarüxugüxü̃ ga naeneegüchiga nax chixexü̃ naxügüxü̃.
3 Rü nüma ga Yacú ga Iraéugu ãégacü, rü poraãcü Yúchexü̃ nangechaü̃ guxü̃ma ga togü ga nanegüarü yexera yerü yexguma marü naya̱xgu ga Yacú nixĩ ga nabuxü̃ ga Yúche. Rü yemaca̱x ga nanatü rü nüxü̃́ tanaxü ga wüxi ga naxchiru ga mápaxü̃ ga mexechixü̃.
4 Notürü yexguma naeneegü nüxü̃ icua̱xãchitanügu nax norü yexera Yúchexü̃ tangechaü̃xü̃ ga nanatü, rü yemaca̱x Yúchechi naxaie, rü tama nüxü̃ narümoxẽgüchaü̃.
5 37:5-6 Rü wüxi ga chütaxü̃ ga Yúche, rü naxãnegü, rü naeneegümaxã nüxü̃ nixu ga yema nanegü. Notürü ga naeneegü rü yexeraãcü naxchi naxaie, yerü ga Yúche rü nhanagürü nüxü̃: —¡Iperüxĩnüe rü tá pemaxã nüxü̃ chixu i ngẽma chaunegü!
6 Nüü̃ nadau 37:5
7 Rü nagu chaxãnegü nax guxãma i yixema rü wüxi i trígunecüwa ingexmagüxü̃ rü ínagoxü̃cütaxü̃. Notürü i ngẽma choxrü cüta rü ngürü nüechama inachicüta rü meama ínarüto. Notürü i ngẽma pexrü cütagü rü ngẽma choxrüxü̃ ínachomaeguãchi, rü ngẽma choxrü cütape̱xegu nayarümaxgütanüãchi rü choxrüxü̃ nicua̱xüxü̃gü —nhanagürü.
8 Rü yexguma ga naeneegü rü nanangãxü̃gagü rü nhanagürügü: —¿Ẽ̱xna cuma nagu curüxĩnügu rü cuma tá nixĩ i torü ãẽ̱xgacü quixĩxü̃ rü tomaxã tá icucuáxü̃? —nhanagürügü. Rü yemaacü yexeraãcü naxchi naxaie naxca̱x ga yema nanegü ga nüxü̃ yaxuxü̃.
9 Rü yemawena ga Yúche rü wenaxarü naxãnegü. Rü yema rü ta naeneegümaxã nüxü̃ nixu, rü nhanagürü: —Pemaxã tá nüxü̃ chixu rü wena chaxãnegü. Rü ngẽma chaunegüwa nüxü̃ chadau ya üa̱xcü rü tauemacü rü 11 ga ẽxtagü rü chape̱xegu nanangücuchitanü rü choxü̃ nicua̱xüxü̃gü —nhanagürü.
10 Rü yexguma Yúche nanatümaxã rü naeneegümaxã nüxü̃ ixuxgu ga yema nanegü, rü nanatü rü ítanangaxüchi. Rü nhatagürü nüxü̃: —¿Ta̱xacüchiga nixĩ i ngẽma cunegü i tomaxã nüxü̃ quixuxü̃? ¿Ẽ̱xna cuma rü nagu curüxĩnügu rü cué rü cueneegü rü chama rü tá cupe̱xegu tanangücuchitanü nax cuxü̃ ticua̱xüü̃güxü̃ca̱x? —nhanagürü.
11 Rü yemaca̱x ga naeneegü rü yexeraãcü nixãũxãchie. Notürü ga nanatü rü bexma tüxica nagu tarüxĩnü ga yema nanegüchiga.
Yúchemaxã nataxegü ga naeneegü
12 Rü wüxi ga ngunexü̃gu rü ĩane ga Chiquéü̃arü ngaicamána naxĩ ga Yúcheeneegü nax yexma maxẽ ne yadaugüxü̃ca̱x naxca̱x ga nanatüarü carnérugü.
13 Rü yemaca̱x ga nanatü ga Iraéu, rü Yúchexü̃ nhatarügü: —¡Paxa cueneegüwe rüxũ rü íyadau i yéa Chiquéü̃wa i carnérugüna ínadaugüxü̃wa! —nhatagürü. Rü nüma ga Yúche rü tüxü̃ nangãxü̃ rü nhanagürü: —Marü name, Pa Papáx, rü taãxẽãcüma tá ngẽ́ma chaxũ —nhanagürü.
14 Rü tüma ga Iraéu rü tanangãxü̃, rü nhatagürü: —¡Ẽcü íyadau ya cueneegü rü ngẽma carnérugü! ¡Rü nhu̱xũchi natáegu nax chamaxã nüxü̃ quixuxü̃ca̱x nax nhuxãcü ínangupetüxü̃! —nhatagürü. Rü yemaacü Ebróü̃wa inaxũãchi ga Yúche ga Chiquéü̃wa nax naxũxü̃.
15 Notürü yexguma Chiquéü̃wa nanguxgu, rü tama nüxü̃ nacua̱x ga ngextá nax nayexmagüxü̃ ga yema naeneegü. Rü wüxi ga yémacüã̱x yexma nüxü̃ nangau, rü nüxna naca rü nhanagürü: —¿Ta̱xacüca̱x cudau? —nhanagürü.
16 Rü yexguma ga Yúche rü nanangãxü̃, rü nhanagürü: —Chaueneegüca̱x chadau. ¿Tama nüxü̃ cucuáxü̃ nax ngextá yixĩxü̃ i carnérugüna nadaugüxü̃? —nhanagürü.
17 Rü nüma ga yema duü̃xü̃ rü nanangãxü̃ rü nhanagürü nüxü̃: —Marü nixĩgachi i nua. Rü nüxü̃ chaxĩnügu rü Dotáü̃wa nixĩ nax naxĩxü̃ —nhanagürü. Rü yexguma ga Yúche rü naeneegüwe narüxũ nax naxca̱x yadauxü̃ca̱x. Rü Dotáü̃gu nüxü̃ inayangau.
18 Rü nüma ga naeneegü rü yáxü̃gu nüxü̃ nadaugü, rü naxü̃pa ga natanüwa nax nanguxü̃ rü nügü nixugücu̱xẽ ga nax yama̱xgüãxü̃ca̱x.
19 Rü nügümaxã nhanagürügü: —¡Dücax! Yéa nixĩ rü ngẽ́ma ne naxũ i ngẽma ãnegüechaxü̃.
20 ¡Rü ngĩxã tayama̱xgü, rü nhu̱xũchi wüxi ya puchugu tayata̱xcuchigü! Rü ngẽxguma Papá tüxna ca̱xgu, rü nhatagürügü tá: “Rü wüxi ya ai nanangõ̱x”, nhatagürügü tá. Rü ngẽmaãcü tá nüxü̃ tacua̱x rü ngoxi aixcuma tá yangugü i ngẽma nanegügü —nhanagürügü.
21 37:21-22 Rü yexguma yemaxü̃ naxĩnügu ga Rubéü̃, rü Yúchexü̃ ínapoxü̃ nüxna ga naeneegü. Rü nhanagürü nüxü̃: —Tama name nax yamáxü̃ rü nagü ipenabaxẽẽxü̃. ¡Rü nhaa ãxmaxü̃gu peyata̱xcuchimare, rü tauxü̃́ i peyamáxü̃! —nhanagürü. Rü yema nhanagürü ga Rubéü̃, yerü Yúcheétüwa nachogü nax tama yama̱xgüaxü̃ca̱x rü nanatüca̱x nax natáeguxẽẽãxü̃ca̱x.
22 Nüü̃ nadau 37:21
23 Notürü yexguma naeneegütanüwa nanguxgu ga Yúche, rü nüxna nanapugü ga yema naxchiru ga mexechixü̃ ga nagu yacúxü̃.
24 Rü nayayauxgü, rü yema ãxmaxü̃gu nayata̱xcuchigü.
25 Rü yemawena rü ínarütogü rü nachibüe. Rü yexguma nachibüeyane rü yáxü̃gu nüxü̃ nadaugü ga Ismaéutanüxü̃gü ga Yiriáyianewa ne ĩxü̃. Rü norü camérutagu nayana ga pumáragü rü tuxuneruü̃gü rü pumára ga míra ga Eyítuanewa nanaxü̃.
26 Rü yexguma ga Yudá rü naeneegüxü̃ nhanagürü: —¿Ta̱xacüwa tüxü̃́ namexü̃ nax yamáxü̃ ya taenexẽ rü nax yacúxü̃ i norü yu?
27 Rü narümemae nixĩ nax Ismaéutanüxü̃güxü̃ namaxã itaxegüxü̃ rü tama nax yamáxü̃, erü taeneexü̃chi nixĩ —nhanagürü. Rü guxü̃ma ga yema togü ga naeneegü rü marü norü me nixĩ ga yema.
28 Rü yexguma yema taxetanüxü̃ yéma chopetüxgu, rü Yúchexü̃ ínatúxuchigü ga ãxmaxü̃wa. Rü yema Ismaéutanüxü̃güxü̃ namaxã nataxegü ga 20 tachinü ga diẽruca̱x. Rü yemaacü Yúchexü̃ Eyítuanewa nagagü.
29 Rü yexguma ínanguxgu ga Rubéü̃ rü íyada̱xgu ga yema ãxmaxü̃wa, rü marü nataxuma ga Yúche ga yéma aixepewa. Rü nüma ga Rubéü̃ rü norü ngechaü̃maxã nügüchirugu nagáugü.
30 Rü naeneegütanüwa naxũ, rü nhanagürü nüxü̃: —Ngẽma buxü̃ rü marü nataxuma i ngẽma ãxmaxü̃wa. ¿Rü ta̱xacü tá chaxüxü̃ i nhu̱xmax? —nhanagürü.
31 Rü yexguma ga yema naeneegü rü nanayauxgü ga Yúchechiru. Rü wüxi ga carnéru tüxü̃ nima̱xgü rü guxemagümaxã nanaduchara ga Yúchechiru.
32 Rü nanatüxü̃tawa nanamugü nhaxü̃ ga dexamaxã: “Nüxü̃ itayangau i nhaa naxchiru. ¡Rü mea nüxü̃ nadau rü bexmana ngẽma yixĩ i cunechiru!” nhanagürügü.
33 Rü yexguma Yacú nüxü̃ da̱xgu ga nanechiru nax yixĩxü̃, rü nhanagürü: —Ngemáacü chaunechiru nixĩ. Rü wüxi i ai i düraxü̃ nagu nawagü rü nanangõ̱x —nhanagürü.
34 Rü yexguma ga Yacú rü nügü narügáutechiru, rü norü ngechaü̃maxã naneca̱x naxaure. Rü nhuxre ga yüxü naxauxecha.
35 Rü guxü̃ma ga nanegü rü naxacügü rü nanataãxẽxẽẽgütaa̱x. Notürü ga nüma rü tama nüxü̃́ nanayaxu. Rü naneca̱x naxauxama, rü nhanagürü: —Chauneca̱x tá chaxaure nhu̱xmatáta chayu̱x rü naxü̃tawa changu —nhanagürü.
36 --
