Gênesis 39:1-23
39 Rü yexguma Yúchexü̃ Eyítuanewa nagagügu ga yema Ismaéutanüxü̃gü, rü wüxi ga Eyítuanecüã̱x ga Putifágu ãégacü naxca̱x nataxe. Rü nüma ga Putifá rü Eyítuanecüã̱xarü ãẽ̱xgacü ga Faraóũarü daruü̃güeru nixĩ.
2 Notürü ga Cori ya Tupana rü Yúchemaxã nayexma. Rü yemaca̱x meama nüxü̃ nangupetü ga norü cori ga Putifáchiü̃wa.
3 Rü yema norü cori rü nüxü̃ nicua̱xãchi nax Yúchexü̃tawa nayexmaxü̃ ga Tupana, yerü guxü̃ma ga yema naxüxü̃, rü meama inixũ.
4 Rü yemaca̱x ga norü cori rü poraãcü namaxã nataãxẽ. Rü düxwa norü ngü̃xẽẽruü̃xü̃ nayaxĩxẽxẽ, rü naxme̱xgu nanaxǘ ga guxü̃ma ga napatawa yexmaxü̃ nax namaxã inacuáxü̃ca̱x.
5 Rü yexguma Yúcheme̱xẽgu naxǘã̱xgu ga napata rü norü yemaxü̃gü, rü Cori ya Tupana rü poraãcü Putifáxü̃ narüngü̃xẽẽ ga napatawa rü naanewa rü naxü̃nagüwa.
6 Rü yexguma Yúche marü nüxna da̱xgu ga norü yemaxü̃gü, rü nüma ga Putifá rü marü taxuca̱x naxoegaãxẽ, rü chibüguxicatama narüxĩnü. Rü Yúche rü wüxi ga ngextü̱xücü ga mechametücü nixĩ rü yemaca̱x nangúchaü̃.
7 Rü yemaca̱x ga naxma̱x ga Putifá rü düxwa ngĩxü̃́ nangúchaü̃. Rü wüxi ga ngunexü̃gu rü ngĩgürügü nüxü̃: —¡Chamaxã namaxü̃! —ngĩgürügü.
8 Notürü nüma ga Yúche rü ngĩxü̃ naxo. Rü ngĩxü̃ nangãxü̃ rü nhanagürü: —Dücax, chorü cori marü cha̱xme̱xwa nanangexmaxẽxẽ i guxü̃ma i norü ngẽmaxü̃gü nax namaxã ichacuáxü̃ca̱x. Rü nhu̱xmax chama nax chanuxmaxü̃, rü taxuca̱xma naxoegaãxẽ i nümax.
9 Rü daa napatawa rü taxúema ya toguxe rü chorü yexera tixĩ. Rü nüma ya chorü cori rü taxuxü̃ma i ta̱xacü choxna nachu̱xu. Rü cuxicatama nixĩ i tama nanaxwa̱xexü̃ nax cuxü̃ chadáuxü̃ erü naxma̱x quixĩ i cumax. ¿Rü ngẽmaca̱x nhuxũcürüwa i ta̱xacürü chixexü̃ chaxüxü̃ i nua napatawa ya chorü cori rü Tupanape̱xewa? —nhanagürü.
10 Notürü ga ngĩma rü guxü̃ ga ngunexü̃gu rü Yúchexü̃ ichixeweecha nax ngĩxü̃tagu naxã́ũxü̃ca̱x rü ngĩmaxã namaxü̱̃xü̃ca̱x, notürü ga nüma rü tama nanangĩãxẽraxü̃.
11 39:11-12 Notürü wüxi ga ngunexü̃ ga Yúche rü ĩpatagu naxücu nax yéma puracü naxüxü̃ca̱x. Rü yéma aixepewa rü nataxuma ga to ga duü̃xü̃. Rü ngĩma rü naxchiruwa iyachü̱xü, rü ngĩgürügü nüxü̃: —¡Chamaxã namaxü̃! —ngĩgürügü. Notürü ga nüma ga Yúche rü inayago, rü ngĩxme̱xwa nayaxüãchi ga naxchiru ga nüxna yapuxü̃.
12 Nüü̃ nadau 39:11
13 39:13-14 Rü yexguma nüxü̃ nada̱xgux ga naxchiru ga ngĩxme̱xwa nax yaxüãchixü̃, rü ngĩrü duü̃xü̃güca̱x ica. Rü ngĩgürügü nüxü̃: —¡Dücax! Chaute nua nanaga i wüxi i duü̃xü̃ i Ebréutanüxü̃, rü nhu̱xmax rü tagu nua nidauxcüraxü̃. Rü nüma rü nuxã ĩxgu cha̱u̱xca̱x naxücu rü chamaxã taa̱x namaxü̃, notürü i chama rü poraãcü aita chaxüama.
14 Nüü̃ nadau 39:13
15 Rü ngẽxguma poraãcü aita chaxü̱xgu, rü inayago. Rü ngẽmaca̱x nua nanata̱x i nhaa naxchiru —ngĩgürügü.
16 Rü nhu̱xũchi ga ngĩma rü namaxã inguxü̃ ga Yúchechiru nhu̱xmata yéma ĩxwa nangu ga ngĩte.
17 Rü yexguma yéma nanguxgu ga ngĩte, rü namaxã nüxü̃ iyaxu rü ngĩgürügü: —Rü ngẽma duü̃xü̃ i Ebréutanüxü̃ i nua cungexmaxẽẽxü̃, rü chorü ucapugu naxücu rü chamaxã taa̱x namaxü̃.
18 Notürü ngẽxguma poraãcü aita chaxü̱xgu rü inayago, rü nua nanata̱x i nhaa naxchiru.
19 Rü ngẽmaãcü chamaxã nixĩ i ngẽma curü duü̃xü̃ i Ebréutanüxü̃ —ngĩgürügü. Rü yemaxü̃ naxĩnügu ga nüma ga Putifá rü poraãcü nanu.
20 39:20-21 Rü norü duü̃xü̃güxü̃ namu nax Yúchexü̃ yayauxgüxü̃ca̱x. Rü nhu̱xũchi ãẽ̱xgacü poxcuexe ga duü̃xü̃gütanügu nayata̱xcuchigü. Notürü woo ga poxcupataü̃wa nax nayexmaxü̃ ga Yúche rü Cori ya Tupana rü naxü̃tawa nayexma, rü nüxü̃ narüngü̃xẽẽ. Rü nüxü̃́ nanatauxchaxẽxẽ nax yema poxcupataü̃arü ãẽ̱xgacü namaxã taãxẽxü̃ca̱x.
21 Nüü̃ nadau 39:20
22 Rü yemaca̱x ga nüma ga poxcupataü̃arü ãẽ̱xgacü rü Yúcheme̱xẽwa nanange̱x ga guxü̃ma ga yema poxcuexe nax namaxã inacuáxü̃ca̱x. Rü Yúche nixĩ ga namaxã icuáxü̃ ga guxü̃ma ga puracü ga yéma.
23 Rü nüma ga yema poxcupataü̃arü ãẽ̱xgacü rü taxuca̱xma tü̱xcüü̃ ínayadauuxü̃ ga yema Yúcheme̱xẽwa yexmaxü̃, yerü ga Cori ya Tupana rü Yúchexü̃ narüngü̃xẽẽ nax guxü̃ma mea iyaxũxü̃ca̱x ga yema poxcupataü̃wa.
