Gênesis 40:1-23
40 Rü yexguma Yúche poxcupataü̃wa yexmayane rü wüxi ga ngunexü̃gu rü Eyítuanearü ãẽ̱xgacüxü̃ nanuxẽẽgü ga yema norü wíũarü baeruxü̃ rü norü poũarü üruxü̃.
2 Rü yemaca̱x nüma ga ãẽ̱xgacü rü poraãcü namaxã nanu ga yema taxre ga norü ngü̃xẽẽruü̃gü ga yema wíũmaxã baegüxü̃arü ãẽ̱xgacü rü yema poũarü üruü̃güarü ãẽ̱xgacü.
3 Rü yemaca̱x yema poxcupataxü̃ ga Putifápatawa yexmaxü̃wa nanamugü. Rü yematama nixĩ ga Yúche nagu poxcuxü̃.
4 Rü nüma ga poxcupataü̃arü ãẽ̱xgacü rü Yúchexü̃ namu nax namaxã inacuáxü̃ca̱x ga yema taxre ga ãẽ̱xgacüarü ngü̃xẽẽruü̃gü. Rü nümagü rü marü muxü̃ma ga ngunexü̃gu yexma napoxcue.
5 Rü wüxi ga chütaxü̃gu rü yema taxre ga poxcuexe rü wüxichigü rü naxãnegügü. Rü wüxichigü ga yema nanegü rü nüxü̃́ nayexma ga ta̱xacüchiga nax yixĩxü̃.
6 Rü moxü̃ãcü pa̱xmama ga yexguma Yúche natanüwa íyada̱xgu, rü nüxü̃ nadau ga nax poraãcü naxoegaãẽgüxü̃ ga yema taxre.
7 Rü yemaca̱x nüxna naca, rü nhanagürü: —¿Ta̱xacüca̱x pemaechiwe? —nhanagürü.
8 Rü nümagü rü nanangãxü̃gagü, rü nhanagürügü: —Ngewa̱x chütacü rü taxãnegüe. Rü tataxuma ya texé ya tomaxã nüxü̃ ixuxe nax ta̱xacüchiga yixĩxü̃ i ngẽma nagu taxãnegügüxü̃ —nhanagürügü. Rü yexguma ga Yúche rü nhanagürü: —¿Taux ẽ̱xna i Tupana yixĩxü̃ ya yimá nango̱xẽẽcü nax ta̱xacüchiga yixĩxü̃? ¡Rü chamaxã nüxü̃ pexu i ngẽma penegü! —nhanagürü.
9 Rü yexguma ga yema wíũmaxã baegüxü̃arü ãẽ̱xgacü rü nüxíra Yúchemaxã nüxü̃ nixu ga nanegü, rü nhanagürü: —Chaunegüwa rü nüxü̃ chadau ga wüxi ga úwamaxü̃.
10 Rü yema úwamaxü̃ rü narüxü rü niyachigü rü tamaepü̱x nixĩ ga nachacüxü. Rü naxãchacu rü yema nachacuwa rü naxo rü nixãarexe rü nidau.
11 Rü chama rü chanange ga naxpáxü̃ ga Faraóũ. Rü úwata chicawe, rü yema naxpáü̃gu chanama̱i̱xgütüxü̃. Rü nhu̱xũchi chamatama nüxna chayaxãweü̃ ga Faraóũ —nhanagürü.
12 Rü yexguma ga Yúche rü nhanagürü nüxü̃: —Ngẽma cunegü rü nhaxü̃chiga nixĩ: “Rü ngẽma tamaepü̱x i nachacüxü rü tamaepü̱x i ngunexü̃chiga nixĩ.
13 Rü tamaepü̱x i ngunexü̃wa nanguxgu rü nüma ya Faraóũ tá cuxca̱x nangema rü tá cuxna naca nachiga i curü poxcu. Rü ngẽmawena rü wena ngẽma puracüwatátama cuxü̃ napuracüxẽxẽ. Rü cuma rü tá wena cunaxaxẽxẽ ya Faraóũ ngẽma noxri cunaxüxü̃rüü̃tama”, nhaxü̃chiga nixĩ.
14 Rü ngẽxguma ngẽmaãcü tá yanguxgu rü chanaxwa̱xe i cuxü̃́ changechaü̃tümüxü̃. ¡Rü choxna nacua̱xãchi, rü Faraóũmaxã choxü̃ ixu nax choxü̃ ínamuxũchixü̃ca̱x i nua!
15 Rü chama i Ebréutanüxü̃ rü chauchixü̃anewa nixĩ ga choxü̃ yagagüxü̃ rü nuxã chamaxã yataxegüxü̃. Rü taxuca̱xma tü̱xcüü̃ nua poxcupataü̃wa changexma, yerü taxuxü̃ma ga chixexü̃ chaxü —nhanagürü.
16 Rü yexguma yema poũarü üruü̃güarü ãẽ̱xgacü nüxü̃ ĩnügu ga mexü̃chiga nax yixĩxü̃ ga yema Yúche ngo̱xẽẽxü̃ ga nanegüchiga rü nhanagürü: —Chama rü nagu chaxãnegü nax chauerugu chayangexü̃ ga tamaepü̱x ga pexchiãcu ga poũ ga maixcuraxü̃.
17 Rü guma pexchi ga düxétüwaama ücüwa rü nayexma ga naguxü̃raü̃xü̃ ga poũ ga maixcuraxü̃ ga Faraóũca̱x ixĩxü̃. Notürü ínangugü ga werigü, rü guma pexchi ga chauerugu chingecüwa tanaca̱u̱xgü ga poũ —nhanagürü ga yema poũarü üruü̃güarü ãẽ̱xgacü.
18 Rü yexguma ga Yúche rü nanangãxü̃ rü nhanagürü: —Rü ngẽma cunegü rü nhaxü̃chiga nixĩ: “Rü yima tamaepü̱x ya pexchi rü tamaepü̱x i ngunexü̃chiga nixĩ.
19 Rü tamaepü̱x i ngunexü̃wa nanguxgu, rü Faraóũ tá nanangugü nax ta̱xacüca̱x cupoxcuxü̃. Rü tá nanamu i norü purichíagü nax cuxü̃ nawẽxnaxãgüxü̃ca̱x. Rü naixtanüwa tá cuxü̃ narütuxẽẽgü. Rü ngurucugü tá nanangõ̱xgü i cuxune”, nhaxü̃chiga nixĩ —nhanagürü ga Yúche.
20 Rü tamaepü̱x ga ngunexü̃guwena rü ninguarü taunecüã̱x ga Faraóũ. Rü nanaxü ga wüxi ga peta naxca̱x ga guxü̃ma ga norü ngü̃xẽẽruü̃gü. Rü yema duü̃xü̃gü ga nüxna naxugüxü̃pe̱xewa, rü Faraóũ nanamu nax nape̱xewa nagagüaxü̃ca̱x ga yema wíũarü baeruü̃güarü ãẽ̱xgacü rü yema poũarü üruü̃güarü ãẽ̱xgacü.
21 Rü yema baeruü̃güarü ãẽ̱xgacü, rü wenaxarü yematama puracüwa nanamu. Rü wenaxarü noxrirüü̃tama Faraóũxü̃ nayaxaxexẽẽxü̃.
22 Notürü ga yema poũarü üruü̃güarü ãẽ̱xgacü, rü nüma ga Faraóũ rü norü purichíagüxü̃ namu nax nawẽxnaxãgüãxü̃ca̱x yema Yúche nüxü̃ ixuxü̃rüxü̃.
23 Notürü ga yema wíũarü baeruü̃güarü ãẽ̱xgacü rü tama Yúchena nacua̱xãchi.
