Gênesis 41:1-57
41 Rü yemawena rü taxre ga taunecü nangupetü. Rü wüxi ga chütaxü̃gu rü naxãnegü ga Faraóũ. Rü nanegüwa rü taxtü ga Nírucutügu nachi.
2 --
3 --
4 --
5 --
6 --
7 --
8 Rü moxü̃ãcü ga pa̱xmama rü poraãcü naxoegaãxẽ naxca̱x ga yema nanegü. Rü naxca̱x nangema ga guxü̃ma ga yema iyuüxü̃ rü duü̃xü̃gü ga nüxü̃ cua̱xüchigüxü̃ ga Eyítuanecüã̱x. Rü nüma ga Faraóũ rü namaxã nüxü̃ nixu ga nanegü, notürü taxuxü̃ma ga yema yuüexü̃ nüxü̃ nacua̱x nax ta̱xacüchiga yixĩxü̃ ga yema nanegü.
9 41:9-10 Rü yexguma ga guma baeruü̃güarü ãẽ̱xgacü rü Faraóũmaxã nüxü̃ nixu rü nhanagürü: —Pa Chorü Ãẽ̱xgacüx, rü nhu̱xchaama nüxna chacua̱xãchi nax nhuxãcü chixexü̃ chaxüxü̃ yerü taguma cumaxã nüxü̃ chixuchiga ga wüxi ga ngextü̱xücü ga poraãcü choxü̃ rüngü̃xẽẽcü. Rü yexguma namaxã cunuxgu ga yema poũarü üruü̃güarü ãẽ̱xgacü rü chamaxã rü ta cunu, rü yema curü purichíaarü capitáü̃patawa yexmaxü̃ ga poxcuchicaxü̃gu toxü̃ cumugü.
10 Nüü̃ nadau 41:9
11 Rü wüxi ga chütaxü̃gu ga poũarü üruü̃güarü ãẽ̱xgacü rü naxãnegü, rü chama rü ta chaxãnegü. Rü wüxichigü ga yema nagu taxãnegüxü̃ rü tama nüxü̃ tacua̱x nax ta̱xacüchiga yixĩxü̃.
12 Rü yéma poxcupataü̃wa tomaxã nayexma ga wüxi ga ngextü̱xücü ga Ebréutanüxü̃ ixĩcü. Rü nüma rü poxcupataü̃arü ãẽ̱xgacüarü puracütanüxü̃ nixĩ. Rü namaxã nüxü̃ tixu ga tonegü. Rü nüma rü nüxü̃ nacua̱x ga ta̱xacüchiga nax yixĩxü̃ ga wüxichigü ga yema nagu taxãnegüexü̃.
13 Rü guxü̃ma ga yema tomaxã nüxü̃ yaxuxü̃rüü̃ãcütama ningu. Rü chama rü wenaxarü chorü puracüca̱x chatáegu, notürü ga yema chamücü rü purichíagü nanawẽxnaxãgü —nhanagürü.
14 Rü yexguma ga nüma ga Faraóũ rü Yúcheca̱x nangema. Rü yexgumatama Yúchexü̃ poxcupataü̃wa ínamuxũchigü. Rü mea niyoeru rü mexü̃ ga naxchirugu ínacuxuchi. Rü yemaacü Faraóũpe̱xewa naxũ.
15 Rü nüma ga Faraóũ rü nhanagürü nüxü̃: —Ngewa̱xarü chütaxü̃gu rü choxü̃́ nangexma i wüxi i chaunegü. Notürü tataxuma ya texé yango̱xexẽ́xẽ nax ta̱xacüchiga yixĩxü̃. Rü nüxü̃ chaxĩnüchigagu rü cuma rü nüxü̃ cucua̱x nax cunango̱xẽẽxü̃ i nanegü nax ta̱xacüchiga yixĩxü̃ —nhanagürü ga Faraóũ.
16 Rü yexguma ga Yúche rü nanangãxü̃ rü nhanagürü: —Pa Chorü Ãẽ̱xgacüx, ngẽma rü tama chawa nangexma, notürü Tupana tá nixĩ ya cuxca̱x nango̱xẽẽcü —nhanagürü.
17 Rü yexguma ga Faraóũ rü Yúchexü̃ nhanagürü: —Chaunegüwa rü taxtü ga Nírucutügu chachi.
18 Rü yéma taxtüwa ínachõõchi ga 7 ga woca ga ingüexüchixü̃ rü imexechixü̃. Rü taxtüanacüwa maxẽne nanangõ̱xgü.
19 Rü yemawena ínachõõchi ga to ga 7 ga woca i chixemarexü̃ rü ixaexüchixü̃. Rü taguma nhuxgu nüxü̃ chadau i woca i nangexgumaraxü̃xü̃ i chixexü̃ i guxü̃ma i nua Eyítuanewa.
20 Rü yema wocagü ga ixaexüchixü̃ rü ichixemarexü̃, rü yema 7 ga woca ga ingüexü̃xü̃ ínagagü.
21 Notürü ga woo yema woca ga ingüexü̃xü̃ nax ínagagüxü̃, rü aixrügumarüü̃tama nixaexüchi. Rü yexguma rü chaba̱i̱xãchi.
22 Rü yemawena rü wena chaxãnegü. Rü yema chaunegüwa rü nüxü̃ chadau ga 7 rexe ga trígu ga ixããcuxü̃ rü imerexü̃ ga wüxinewatama nguxü̃xü̃.
23 Rü yemawena yemanewatama nanguxü̃ ga to ga 7 rexe ga trígu ga ingeãcuxü̃ rü buanecümaxã ipagüxü̃.
24 Rü yema 7 rexe ga ipagüxü̃, rü yema imerexexü̃ ínagagü. Rü nhaa taxre i chaunegü, rü ngẽma chorü duü̃xü̃gü i iyuǘexü̃maxã nüxü̃ chixu, notürü taxuxü̃ma i ngẽma yuǘexü̃ rü nüxü̃ nacua̱x nax nango̱xẽẽãxü̃ nax ta̱xacüchiga yixĩxü̃ i ngẽma taxre i chaunegü —nhanagürü.
25 Rü yexguma ga Yúche rü Faraóũxü̃ nangãxü̃, rü nhanagürü: —Pa Chorü Ãẽ̱xgacüx, ngẽma taxre i cunegügü rü wüxitama i ĩnüchiga nixĩ. Rü Tupana rü cumaxã nüxü̃ nixu i ngẽma tá naxüxü̃ rü tá ínguxü̃ i yixcüamaxü̃ra.
26 Rü ngẽma 7 i wocagü i imexechixü̃, rü 7 ya taunecüchiga nixĩ. Rü ngẽmachigatama nixĩ i ngẽma 7 rexe i trígu i mexechixü̃. Rü ngẽma taxre i cunegü rü ngẽmachigatama nixĩ.
27 Rü ngẽma 7 i woca i ixaexüchixü̃ rü ichixemarexü̃ ga yema togüarü wixweama íchõõchixü̃, rü 7 ya taunecüchiga nixĩ. Rü ngẽmachigatama nixĩ i ngẽma 7 rexe i trígu i buanecümaxã ipagüxü̃. Rü ngẽma rü nüxü̃ nixu nax 7 ya taunecü tá nangebüanexü̃, rü tá taiya ngúxü̃.
28 Rü ngẽmachiga nixĩ i Tupana cumaxã nüxü̃ ixuxü̃, Pa Chorü Ãẽ̱xgacüx. Rü ngẽmaãcü tá nanaxü ya Tupana.
29 Rü 7 ya taunecü tá naxãbüane i guxü̃ma i Eyítuanewa.
30 Rü ngẽmawena rü 7 ya taunecü tá nangebüane. Rü ngẽma nax nhuxre ya taunecü tá poraãcü taiya ngúxü̃gagu, rü duü̃xü̃gü rü tá düxwa nüxü̃ narüngümae ga guma taunecügü ga nagu naxãbüanecü ga Eyítuanewa. Rü ngẽma taiyagagu rü guxü̃watáma guxchaxü̃ ínangu ya nhaa nachixü̃anewa.
31 --
32 --
33 Rü ngẽmaca̱x Pa Chorü Ãẽ̱xgacüx, rü name nixĩ nax naxca̱x cudauxü̃ ya wüxi ya yatü ya nüxü̃ cua̱xüchicü nax naxme̱xgu cunaxǘxü̃ca̱x i nhaa nachixü̃ane.
34 Rü name nixĩ nax nüxü̃ cuxunetaxü̃ i togü i ãẽ̱xgacügü nax guxü̃ i nhaa nachixü̃anegu yaxĩãgütanüxü̃ca̱x, rü ngẽmaãcü guxü̃ i duü̃xü̃gütanüwa yadeetanüãxü̃ca̱x i trígu. Rü ngẽxguma texé 5 wetaxü̃ i trígu tüxü̃́ ngẽxmagux, rü wüxi tá nixĩ i cuxca̱x nayauxgüxü̃ rü namaxã nanguxü̃güxü̃. Rü ngẽxguma yexera nüxü̃́ ngẽxmagu i duü̃xü̃gü rü yexera tá cuxca̱x nayauxgü.
35 Rü ngẽmaãcü tá nixĩ i nanutaque̱xeãxü̃ i tríguwetaxü̃ i nagu ya yima 7 ya taunecü ya nagu namucü i trígu. Rü nhu̱xũchi name i wüxichigü ya ĩanewa ngẽxmaxü̃ i trígupataü̃gu namaxã nanguxü̃gü nax ngẽ́ma cuma namaxã icucuáxü̃ca̱x nax duü̃xü̃gü tayauxgüxü̃ca̱x i ngẽxguma taiya ínguxgu.
36 Rü ngẽmaãcü i ngẽma trígu rü tá mea namaxã nanguxü̃gü naxca̱x i cuchixü̃ane nax tama taiyamaxã nayuexü̃ca̱x i duü̃xü̃gü i ngẽxguma ínanguxgu ya yima 7 ya taunecü ya nagu tá nangebüanecü i nua Eyítuanewa —nhanagürü ga Yúche.
Yúche rü ãẽ̱xgacüxü̃ ningucuchi ga Eyítuanewa
37 Rü yema Yúchearü ucu̱xẽ rü Faraóũca̱x name, rü norü ngü̃xẽẽruü̃gü rü ta norü me nixĩ.
38 Rü yemaca̱x ga Faraóũ rü nhanagürü norü duü̃xü̃güxü̃: —¿Ngextá chi nüxü̃ iyarüngauxü̃ i to i yatü i nhaa Yúcherüxü̃ Tupanaãxẽ nawa ngẽxmaxü̃? —nhanagürü.
39 Rü yexguma ga Faraóũ rü Yúchexü̃ nhanagürü: —Dücax, rü nataxuma i cuxü̃ rüyexeraxü̃ nax nüxü̃ nacuáxü̃, erü cuma nixĩ i Tupana cuxü̃ nüxü̃ cua̱xẽẽxü̃ i guxü̃ma i ngẽma nagu chaxãnegüxü̃.
40 Rü cuma tá nixĩ i chapatamaxã icucuáxü̃. Rü guxü̃táma i chorü duü̃xü̃gü rü tá cuga naxĩnüe. Rü chaxica tátama nixĩ i cuxü̃ charüyexeraxü̃ erü chama rü nhaa nachixü̃anearü ãẽ̱xgacü chixĩ.
41 Dücax, nhu̱xmax rü chama rü cuxü̃ chaxuneta nax cuma tá ãẽ̱xgacü quixĩxü̃ i guxü̃ma i nhaa Eyítuanewa —nhanagürü.
42 Rü yexguma yema nhaxgu ga Faraóũ rü nügüme̱xẽwa ngĩxü̃ nanangoxochi ga norü ãnera ga cua̱xruxü̃ ngĩwa yexmacü, rü Yúcheme̱xẽwa ngĩxü̃ ningucuchi. Rü nhu̱xũchi norü duü̃xü̃güxü̃ namu nax mexechixü̃ ga naxchirugu yacu̱xẽẽgüaxü̃ca̱x, rü úirumaxã naxüchagügüaxü̃ca̱x.
43 Rü yemawena rü nhu̱xũchi nayamue nagu ga guma cáru ga Faraóũarü cáruweama üxü̃ne ga cowaru itúchigüne. Rü duü̃xü̃güxü̃ namu nax nape̱xewa nhaxü̃maxã aita naxüexü̃: “¡Penaxüchica!” nhaxü̃maxã. Rü yemaacü nixĩ ga Yúche ga guxü̃ma ga Eyítuanemaxã inacuáxü̃.
44 Rü nhu̱xũchi ga Faraóũ rü nhanagürü Yúchexü̃: —Chama nax Eyítuanearü ãẽ̱xgacü chixĩxü̃, rü cuxna chaxãga nax cuxme̱xwa nangexmaxü̃ i guxü̃ma i Eyítuane —nhanagürü.
45 Rü yexguma ga Faraóũ rü Eyítuanecüã̱xégamaxã Yúchexü̃ naxüéga. Rü Cháfachi-Panéagu nanaxüéga. Rü nhu̱xũchi nanaxüxma̱x ngĩmaxã ga Achená ga chacherdóte ga Putiféraxacü. Rü nüma ga ngĩnatü rü ĩane ga Óü̃arü chacherdóte nixĩ. Rü yemaacü nixĩ ga Yúche ga Eyítuanearü ãẽ̱xgacü yixĩxü̃.
46 Rü nüma ga Yúche rü 30 ga taunecü nüxü̃́ nayexma ga yexguma Faraóũ ga Eyítuanearü ãẽ̱xgacüpe̱xewa nagagüãgu rü nüma ga Faraóũ namücüxü̃ yangucuchixẽẽgu. Rü nüma ga Yúche rü Faraóũxü̃ narümoxẽ rü inaxũãchi. Rü guxü̃ma ga Eyítuanegu nixũãgüchigü.
47 Rü 7 ga taunecügu rü meama nayae ga trígu rü poraãcü naxãbüane ga guxü̃wama ga Eyítuanewa.
48 Rü nüma ga Yúche rü 7 ga taunecügu nananutaque̱xe ga guxü̃ma ga yema tríguwetaxü̃ ga ãẽ̱xgacüna üxü̃ ga Eyítuanewa. Rü wüxichigü ga ĩanewa yexmane ga ãẽ̱xgacüarü trígupataü̃gu namaxã ninguxü̃chigü ga yema trígu ga guma ĩanena ngaicamaxü̃ ga naanewa nabuxgüxü̃.
49 Rü Yúche rü nananutaque̱xe ga trígu, rü nhama taxtüpechinüwa ngẽxmacü ya naxnechicüte̱xewarüxü̃ ixĩxü̃ ga nax namuxũchixü̃. Rü yema nax namuxũchixü̃gagu rü düxwa tama nixugü.
50 Rü naxü̃pa ga nax inaxügüxü̃ ga nax nangebüanexü̃, rü marü Yúcheaxü̃́ itaxrexacü ga naxma̱x ga Achená.
51 Rü guma yacü ga nane rü Manachégu nanaxüéga yerü nhanagürü: “Tupana rü choxü̃ nüxü̃ inayarüngümaxẽxẽ i guxü̃ma ga yema guxchaxü̃gü ga choxü̃ ngupetüxü̃ rü nhu̱xmax rü marü tama chautanüxü̃güca̱x changechaü̃”, nhanagürü.
52 Rü guma rübumaecü ga nane rü Efraĩ́gu nanaxüéga, yerü nhanagürü: “Tupana rü nhaa nachixü̃ane i nawa ngúxü̃ chingexü̃wa choxna nanamu ya chaune”, nhanagürü.
53 Rü nangupetü ga guma 7 ga taunecü ga nagu trígu muxũchicü ga Eyítuanewa.
54 Rü inaxügü ga guma 7 ga taunecü ga nagu ngebüane íngucü, yematama Yúche nüxü̃ ixuxü̃rüxü̃. Rü guxü̃ma ga togü ga nachixü̃anewa rü poraãcü taiya nangu̱x. Notürü ga Eyítuanewa rü tama taiya nangu̱x, yerü nayexma ga nabü ga namaxã nanguxü̃güxü̃.
55 Rü yexguma yema Eyítuanecüã̱x marü igu̱xbügügu, rü Faraóũxü̃tawa naxĩ nax trígu nüxna tayacagüxü̃ca̱x. Rü yexguma ga nüma ga Faraóũ rü guxü̃ma ga Eyítuanecüã̱xmaxã nüxü̃ nixu rü nhanagürü: —¡Yéa Yúchexü̃tawa pexĩ, rü penaxü̱x i ngẽma nüma pemaxã nüxü̃ yaxuxü̃! —nhanagürü.
56 Rü yexguma marü guxü̃ma ga Eyítuanewa nangebüanegu, rü nüma ga Yúche rü nayawãxnagü ga guma trígupataü̃gü nax yema Eyítuanecüã̱xgüxü̃ namaxã nataxexü̃ca̱x, yerü niyexeraguchigü ga nax nataiyaexü̃ ga duü̃xü̃gü.
57 Rü guxü̃ma ga nachixü̃anegüwa ne naxĩ ga duü̃xü̃gü nax Eyítuanewa naxca̱x nataxegüxü̃ca̱x ga norü trígu ga Yúchexü̃tawa. Yerü taxuxü̃ma ga to ga nachixü̃anewa nayexma ga nabü.
